Markos 4 - Northern Tepehuan Bible

Go maaxidaragai ñoki aagaitai ïmo ïsadami tïrhigi

¹ Ïpï ïmo imidagai gamamaatïturhi go Suxi go gïï sudagi ugidana, tai arhiï kïï mui gïn ïmpagi odami ami xako daja ïgai. Sïïrhikïdï muidu ïgai tai go Suxi ïmo barko ïrana daiba sudagi daama. Tai go odami sudagi ugidïrï bii.

² Taidi Suxi aagidi mui naana maaxi maaxidaragai ñokikïdï dai adukai maatïturhimi ïgai,

³ —Kaïkabïrai aapimï— ikaiti. —Ïmo imidagai ïmo odami gaïi,

⁴ tai chïki ïxtokai boiyïrï surhi tai dada ujurugi dai kuku.

⁵ Dai jaa ïxtokai ojodai saagida surhi, xako mai xii tipu dïbïrai, dai otoma bubuaja mai xii tukabi surhigïkai.

⁶ Mai xii tataaka ïgai xi kaxkïdï mos busai tasai tai otoma tobhipa gobai dai mos gakixa.

⁷ Dai jaa ïxtokai uparai saagida surhi, taidi go uparai gïï dai buamatu go ïxikami, tai podukai go tïrhigi mai ibhaji.

⁸ Dai jaa ïxtokai kïïgadukami dïbïriïrï surhi dai bubuaja dai kïïga gïï, dai kïïga ibhaji. Ïgai gia ïïmo kaidïañdïrï ïïmo kobhai dan bhaibuxtama bubuaja, dai jaa babaikobhai, dai jaa ïïmo ciento.

⁹ Kïïga abïr gïn tïgito kaïka gobai gin aatagi— itïtïdai Suxi.

Suxi aagai ix tïiya ïrhidi ïgai go maaxidaragai aatagikïdï

¹⁰ Amaxi ka iimïkai go bamioma muidukïdï odami tai ïïgi bii Suxi ïmadï go bhaibuxtama dan goka mamaatïrdami ix makïdï ïko bubaitu ïgai. Dai ami bii jaa oijadami chïki ïpï. Dai tïkakai ïgai go Suxi ix tïiya ïrhidi go maaxidaragai ñoki.

¹¹ Taidi go Suxi potïtïdai, —Daiñi, Diuxi gïn maakai oigaragai xi maatïkagi aapimï ïmo xijaigakami aatagi. Ïgai gïn maakai oigaragai xi maatïkagi ix maaxi xudu tïanïi ïgai. Dïï go gaa gia cho. Ïgai mosïkaxi maaxidaragai aatagikïdï aatagai aanï

¹² bai podukai tomaxi nïidi ïgai ixtuma buadana aanï dai kaï gin aatagi modukai mai maatï kaïkamu ïgai. Xi maatï kaïkamudai ïgai aidï gia ïma dukai gïn tïtïgitomudai ïgai dai ka oigïrhixikami bimudai gïn soimaaxkamigakïdï— itïtïdai Suxi.

¹³ Daidi potïtïdai ïgai ïpï, —¿Maiti mïx maatï kaï idi maaxidaragai ñoki? ¿Aidï dukatai maatï kaïkamu aapimï go gaa maaxidaragai ñoki ix makïdï aagamu aanï kia?

¹⁴ Daiñi, go kïïrhi ïsadami ïr ïpïan dukami ïmoko ix makïdï aagidiña odami Diuxi ñokidï.

¹⁵ Ïïmo odami iibhïadï ïpïan kapaka boi xako surhi ïxtokai. Ïgai kaïkana Diuxi ñokidï bai otoma didibai go Diabora dai maigobai dadasai go ñoki tïgibudadïañdïrï xi mai buaboitudana ïgai.

¹⁶ Dai jaa odami iibhïadï ïpïan dukami ojodai dai ami saagida surhi ïxtokai. Bhai ïrhiarakïdï kaïkana ïgai Diuxi ñokidï

¹⁷ dïï mos mai kia xii gupurtudan buadana ïgai buaboidaradï. Dai mos parunadan kaitidana jaa ïgai bui xiïpï soi gïn buididana ïgai go ñokikïdï ix makïdï buaboitudai ïgai baidi ïgai ka ugiatïi buaboituldaradï.

¹⁸ Dai jaa odami iibhïadï ïpïan dukami uparai xako ami saagida surhi ïxtokai. Kaïkana ïgai Diuxi ñokidï

¹⁹ dïï mos arhiï tïtïitoi ïgai ixdukatai oidaka agai tami oidigi daama. Ïgai gïn bupuirutudai adaimïitai go tuminxi. Naana maaxi biaka ïrhidi ïgai dai go ñoki ix makïdï kaï ïgai ka mai soikïi.

²⁰ Daidi go ïxtokai ix makïdï kïïgadukami dïbïriïrï surhi ïpïan dukami odami ix makïdï buaboida kaïkana Diuxi ñokidï dai gïïpi ibuayi soiñi. Ïïmoko ïgai ix makïdï buaboida kaï ïpïan dukami ïxtokai ix makïdï ïmo kobhai dan bhaibuxtama bubuaja ïmo kaidïañdïrï, dai jaa babaikobhai bubuaja, dai jaa ïïmo ciento— itïtïdai Suxi.

²¹ Dai apia gamamaakai ñoki Suxi go odami daidi potïtïdai ïgai, —Xadïrï asaraikïdï iñapaiña odami ïmo kudakarui kudaidakai gobai. Tomarhi ïmo boikarui uta mai dadasai gobai ïpï. Bhaiyoma tïka dadasai ïgai bai kïïga maaxkagi.

²² Podukai ïpï bïïxi gin aatagi gï maaxiturhi. Xibi ïxto aagai aanï gin aatagi dïï mos gokiïrioma gia bïïxi aipako gï maaxi aagada agai gobai.

²³ Kïïga abïr tïgito kaï gin aatagi aidï— itïtïdai Suxi.

Suxi ñokidï ïmadï go kudagi bïï goka maitï agai ïxtoagi

²⁴ Daidi potïtïdai ïgai ïpï, —Kïïga abïr tïgito kaï idi aatagi. Daiñi, ix xïidurokagi gïn ïpïabidakarui ixtukïdï ïpïabidagi aapimï pokaxikïdï gïn aa noraidamu aanï bhai ïrhiaragai dai asta bamioma ïpï.

²⁵ Ix makïdï bhïjïi gin ñoki dai gin ïïgidi ïgai bamioma tïïgidamu aanï tïgibudagai. Dai ix makïdï mai bhïjïi gin ñoki dai maiti gin ïïgidi, ïgai mai abhana bimu go tïgibudagai— itïtïdai Suxi.

²⁶ Daidi Suxi potïtïdai ïpï, —Gïn aagidamu aanï ix maaxi xudu tïanïi Diuxi odami. Ïpïan dukami gobai ïmo ïxikami tïrhigi. Daiñi, xudu ïmo odami ïsïi tïrhigi, ïpïgioma yaasai ïgai ïxtokai.

²⁷ Dai bhodïrï nonoragïi dai kokosïi dai chïki tasaikïdï ka bubuakïi go tïrhigi dai gïrai, baidi go kïïrhi mai maatïkana ixdukatai.

²⁸ Go dïbïrai ïïgi bhai buayi kuadagai, ïpïga bubuakïi aagadï dai gokiïrï muradadï dai gokiïrï ibhiadï.

²⁹ Dai xïïxkadï ka kaibhia ïgai dai ka aiyagi yoobaragai, otoma gï yoobai gobai— itïtïdai Suxi. Podukai gamaa Suxi aatagi dai aagidi odami ix maaxi xudu gatïanïi Diuxi.

Suxi aagai aatagi aagaitai korabi kaidï

³⁰ Dai apia aatagaimi Suxi dai itïtïdai ïgai odami, —¿Tukïdï gïn tïïgidana aanï ix dukatai tïanïi Diuxi? ¿Ix tuma aatagi gïn aagidana aanï dai gïn maatïtuldagi?— itïtïdai.

³¹ —Gïn aagidamu aanï ix maaxi gobai. Oidaga ïmo ïxikami kaidï ix makïdï ïpïamaaxi go korabi kaidï dïï mos arhidioma ïgai xi tomax tuma kaidï.

³² Dai ix maaxi gï ïsïi gobai dai gïrai dai gïgïrï maamartïrïi baidi maamaradï saagida kosatai ujurugi ami ïïkapi. Pomaaxi imïi aaduindadï Diuxi ïpï xako gatïanïi ïgai. Arhidukana go aaduindadï tukamïrï dïï gokiïrï gia gïdukana— itïtïdai Suxi go odami.

³³ Mos podukai Suxi naana maaxi maaxidaragai aatagikïdï aagaiña Diuxi ñokidï. Bïïxi maatïturhi ïgai odami asta xako ukami ayi odami tïgibudadï ix maatï kajiagi.

³⁴ Mosïkaxi maaxidaragai aatagikïdï gaatagaiña Suxi. Dai gokiïrï bïïxi aagidiña ïgai gï mamaatïrdamiga ix tïiya ïrhidi go maaxidaragai ñoki ïïgi darajatai bai maatïkagi ïgai.

Suxi ïïpiturhi ïbïrhi ïmadï sudagi

³⁵ Daidi mos naato aagakai Suxi go maaxidaragai ñoki bai go baa tasïrï ka didiaymitadai oidigi tai potïtïdai ïgai go mamaatïrdami, —Timïda mïï basadïrï go gïï sudagi— itïtïdai.

³⁶ Taidi go mamaatïrdami iji go baaxi barkoïrï xako dajatadai Suxi dai gamamaatïturhi go gaa. Baidaja ïgai go Suxi dai go odami no baaxi bia ïgai. Dai ïïmo odami apia oidi jaa barkoïrï.

³⁷ Tai kabami ïbï daidi go ïbïrhi gïï nïituskïi sudagi bai barko ïrana aaxtai, karhioga suda go barko sudagikïdï.

³⁸ Baidi go Suxi go barko gokiamadïrï kostugai. Taidi go mamaatïrdami nïñitu dai itïtïdai, —Maatïtuldiadami, ¿Maiti pïx buamï ïrhidi tïx bhaikoagi?— itïtïdai.

³⁹ Tai bañi go Suxi dai bhagaidi go ïbïrhi ïmadï sudagi dai itïtïdai, —Gï ïïpidañi— itïtïdai. Taidi go ïbïrhi gï ïïpitu dai bïïxi dodorhi bii.

⁴⁰ Dai amaxi go Suxi potïtïdai mamaatïrdamigadï, —¿Tuimïxi duduadimuka dai mai buaboitudai in xi aanï ixtutuidi ix gïn nukadakagi?— itïtïdai.

⁴¹ Baidi ïgai arhiï duduadimuka daidi ikaitimi, —¿Xorai idi dai asta go ïbïrhi ïmadï go gïï sudagi bïïxi ïïgiturhi?— ikaitimi.