Markos 15 - Northern Tepehuan Bible

Go kaigi buidïrï baan gï kïïsatu go Suxi

¹ Bhodïrï mos maaxikai gïn ïmpagi go bhaitï gukakami daxdadami ïmadï judidiu tïtïanïdamigadï dai maatïtuldiadami sïïrhikami. Bïïxkatai go ix makïdï ïr komite supremo judidiu gïn ïmpagi tudu dai ami bhai dui aatagi ixdukatai duñagi go Suxi. Dai ka aatagakai burhikami bhïkai ïgai go Suxi dai mïï tïïgi go kaigi. Pilato tïgidu go kaigi.

² Dai Pilato potïtïdai aidï go Suxi, —¿Aapi pïxi tudu ïr reygadï go judidiu?— itïtïdai. —Ïjï, podukai aba ix duu aagai aapi— ikaiti go Suxi.

³ Daidi go bhaitï gukakami daxdadami naana dukai gïpiïrï bupaimi.

⁴ Baidi go Pilato ïpamu potïtïdai go Suxi, —¿Maiti pïx aa noraida agai tomarhi ïmo ñoki? Daiñi bïï naana dukai gïpiïrï gï bupai gobai— itïtïdai.

⁵ Dïï mos go Suxi mai aa noraidi tomarhi ïmo ñoki xi go Pilato mai tïtïgaitadai ixtumaxi gï tïgitoagi.

Odami gatïjai muaragai go Suxi

⁶ Dai go Pilato mos umiïrï daadagitoiña ïmo maixapikami aidï daibuñigïrï, ïïgi ix makïdï tañiagi odami.

⁷ Dai no maixakaruana dajatadai ïmo omarhigami Barabás tïgidukami. Ïgai ïmadï jaa maamaixapikïdï bui susurhigïitadai go gobierno dai kodai odami. Kaxkïdï maixa ïgai.

⁸ Tai mïï dada go odami muidutai xako daja go Pilato dai aagidimi sai dagitona ïmo maixapikami ix dukai ibuadana ïgai mos umiïrï bagimiïrï.

⁹ Daidi go Pilato potïtïdai aidï, —¿Aagai mïxi ix dagito aanï go ix makïdï gïn Rey aagai aapimï, go Suxi tudu?— itïtïdai.

¹⁰ Kïï maatïkatadai ïgai xi mos ïgamu go bhaitï gukakami daxdadami dai gï buitapi baan kïïsatu go Suxi, kaxkïdï aagidi ïgai sa bhai ipïrhidi ix dagitoagi ïgai.

¹¹ Dïï go bhaitï gukakami daxdadami bhaiyoma mos abïnakidimi go odami xi tanïna dagito ïgai go Barabás.

¹² Daidi go Pilato potïtïdai go odami judidiu aidï, —¿Dukatai duna aidï aanï go ix makïdï gïn Rey aagai aapimï?— itïtïdai.

¹³ Daidi go odami mos ijiñakimi daidi ikaitimi, —Kuruxiana abïr xixa— ikaitimi.

¹⁴ Dai go Pilato potïtïdai, —¿Tumaxi soimaaxi idukami gobai?— itïtïdai. Dïï mos go odami apia bamioma ijiñakimi daidi ikaitimi, —Kuruxiana abïr xixa— ikaitimi.

¹⁵ Bai go Pilato ïïgi go odami dai dagito go Barabás. Maiti ipïrhidi ïgai ix bamioma bhaakoika ïgai kaxkïdï. Bhodïrï gatïjai ïgai sandadaru mïsai gïikarsana go Suxi dai bhodïrï sai bhïkana dai kuruxiana xixana.

Go sandadaru parunai go Suxi

¹⁶ Taidi go sandadaru baidaja go Suxi Pilato kiidamu ïpamu dai ami tuixikana kïi dai ami mui gïn ïmpagi sandadaru.

¹⁷ Dai aadi yukuxi moraduakami daidi iduñi ïmo korona uparai dai kïïxi xi ïpïamaaxkana ïgai ïmo Rey dai podukai parunai ïgai.

¹⁸ Bïïxkatai iiñakai daidi ikaitiña, —Xïïxi ïr gïdukami reygadï go judidiu— ikaitiña. Xadutuadan duu kaitiña ïgai dïï mos parunaiña ïgai bhaiyoma.

¹⁹ Dai ïmo uxikïdï modïrï gïbai. Dai xixibidi dai gïn totonakïdï gukiba buitapi. Xadutuadan buayi mos parunaitai.

²⁰ Naana dukai parunadan buayi ïgai dai bhodïrï upasai yukuxidï moraduakami dai ïïgi yukuxidï aadi. Dai bhodïrï busaitu ïgai abhiadïrï dai kuruxiana xixa agai.

Kuruxiana xixa ïgai go Suxi

²¹ Kaiyañdïrï iimïi ïgai tai ayi ïmo kïïrhi Sireniañdïrï oidakami, Ximuñi tïgidukami. Alejandro ïmadï Rufo ogadï ïgai. Oidigañdïrï imïi ïgai tai go sandadaru gubukadakïdï gatïjai sai kusubaka ïgai go kuruxi.

²² Mïtai bhïkai go Suxi ïmapïkïrï xakopïrï Golgota tïgidu (odami modï tïiya ïrhidi gobai).

²³ Ami oida agaitadai ïgai uba baragadï ïkokami bïnakami usabhai. Mira tïgidu go usabhai gobai. Oida agaitadai gobai xi mai kabami kokokagi Suxi dïï maiti ipïrhi ïgai xi iiyagi.

²⁴ Daidi go sandadaru upai yukuxidï go Suxi dai bhïiyi go Suxi dai kuruxiana xixa. Bhodïrï gïn totoidi ïgai yukuxidï ïmo tïtïïbiïrï nïidana as tuma aïna ïïmadutai.

²⁵ Parï tuxtamïrï kiamoko taidi ka kuruxiana xixatadai go Suxi.

²⁶ Mïtai kuruxiana xixa ïmo ojixikami ïpï xi ïgaikïdï gï maatïkana mïx tuixidï xixa go Suxi kuruxiana, daidi ikaiti go ojai, IDI ÏR REYGADÏ GO JUDIDIU, ikaititadai go ojai.

²⁷ Dai bïï gokapadïrï go Suxi mïtai abhai xixa goka ïïxibogami jaa kukuruxiana.

²⁸ Podukai ka buaboi busai ixdukatai ka ojixikatadai ïïki xako go ojai ikaiti, Odami soimaaxi ibuadami dukai nïidi Diuxi otosadï, ikaiti go ojai.

²⁹ Dai ix makïdï ami dïgabuskïi mos parunadan kaitidiña dai giidai momodï daidi ikaitiña, —Aapi pïx ix makïdï pokaititadai pïsaidi ixtutuidi xi daitudagi go gïï kiupaigadï judidiu dai baika tasaikïdï kïïsa agai ïpamu,

³⁰ kïïgakïrï gï busaidi ïïgi dai tïbañi kuruxiañdïrï— ikaitiña.

³¹ Daidi go bhaitï gukakami daxdadami ïmadï go maatïtuldiadami sïïrhikami parunadan kaiti ïpï dai ïïgi gïn tïtïdai ïgai aipako sai, —Kïïgakïrï bubaitu ïgai mui odami dïï gia ïïgi maiti ixtutuidikïi ix kïïgakïrï gï busaidagi ïgai— ikaiti ïgai.

³² —Diuxi otosadï gï agaiña ïïgi go Suxi dai reygadï go judidiu. Tï nïida xibi ix bhai tïbanïna kuruxiañdïrï. Aidï gia buaboituda antaada aatïmï— ikaitiña ïgai. Dai ï goka kïkïïrhi ix makïdï kukuruxiana nagiïjï galnaaxi ñoki surhigidi ïpï.

Suxi muu kuruxiana

³³ Daidi daan duku abhiadïrï asta koi gïsïko ukami mos tukapi bii oidigi.

³⁴ Dai aidï uruno taadako gïgïrï iiña go Suxi daidi ikaiti, Eloi, Eloi, ¿Lama sabhaktani? ikaiti. Gobai itïiya ïrhidi, —Gin Oga, Gin Oga, ¿Tui pïxi gin dagito?— itïiya ïrhidi gobai.

³⁵ Dai ïïmoko ix makïdï ami daraja kaï ix potïi ïgai daidi ïgai ikaiti, —Daiñi, gabapaidi gobai go Elias— ikaiti go odami kaïkatai ix tïi go Suxi.

³⁶ Tai ïmadutai mïï dai bhïiyi ïmo bixokorhi dai badaitu uba baragadï ïkokami. Bhodïrï ïmo uxi kugïrï tïbïdukami buu ïgai dai miadïrï daxi go Suxi sai bixusuna. Daidi ikaiti go ix makïdï dagïi go uxi, —Tïnïida sa bhai dibiana go Elias dai tïbandana— ikaiti.

³⁷ Daidi go Suxi gïïgïrï iiña dai muu.

³⁸ Baidi ïrana ïxi sarai go gïï ikuxi tïkabidïrï abhiadïrï asta mïï taana ukami ix makïdï go gïï kiupaigadïrï judidiu sagiïkatadai.

³⁹ Daidi go kapitañi go sandadarugadï romanos buidïrï kïakatadai xako muu go Suxi dai tïgito nïidi ixdukatai iiña ïgai dai ixdukatai muu. Daidi ikaiti ïgai, —Idi gia ïr buaboi xi ïr Diuxi maradï— ikaiti ïgai.

⁴⁰ Dai mïkaxdïrï gukatadai oki ïpï dai nïnïidi ix dukatai ïpïbuimi. Dajatadai Maria Magdalena, dai go gïmai Maria ix makïdï ïr dïïdï Jakobo ïmadï Jose dai Salomé. Jakobo arhidukïdï aagaiña odami go Jakobo.

⁴¹ Go oki ïgai oidatukïiña go Suxi dai soikïiña xudu Galileïrï aimïraiña ïgai. Dai jaa mui oki darakatadai ïpï ix makïdï xibhïadïrï oi go Suxi Jerusalenamu ïpï.

Gï yaasatu go Suxi

^42-43 Ïmo bianaxiko muu go Suxi. Dai dajatadai ïmo kïïrhi Arimateañdïrï oidakami Jose tïgidu. Ïgai ïr ïmo dunukami dai odami kïï oigïdaitadai. Tïgito ajiopaiña ïgai sai dibiagai Diuxi otosadï dai sai ïgai ïmo gïï tïanïdami dukai kïkiba aagai dibiakai. Go Jose yaasa ïrhiditadai tukugadï Suxi dïï ka uruitadai oidigi dai xadiko ka maitï aatabuayi. Kaxkïdï maigobai dáí ïgai duadimudagai dai jii dai mïï baa buidïrï go Pilato dai gatai go Suxi tukugadï.

⁴⁴ Dai go Pilato mai maatïkatadai kia ix ka mutadai go Suxi dai gatïkakai go kapitañi ix bhai ka muu dai ïgai potïtïdai, —Kaxi ti muu— itïtïdai.

⁴⁵ Aidï gia go Pilato maa oigaragai go Jose xi bhïkiagi tukugadï.

⁴⁶ Taidi Jose sabïrhi ïmo ikuxi namïakami dai tïbañi go mukiadï dai go ikuxiïrï bhixa. Dai ïmo aitiana xako ka dïgarxikatadai ami tïï. Dai bhodïrï taagiña dáí ïmo gïï odai.

⁴⁷ Baidi Maria Magdalena ïmadï Maria Jose dïïdï nïidi mïx xako tïï go Suxi.