Markos 11 - Northern Tepehuan Bible

Suxi ayi Jerusalenïrï

¹ Go Suxi ïmadï go gaa mos apia boiyamu imïi. Ugidïrï dïgabusai ïgai xako Betpage dai Betania tïtïgidu oidigi dai ayi xako ukami Olibos tïgidu ïmo gidi. Taidi abhiadïrï go Suxi otoi goka gï mamaatïrdamiga.

² Daidi potïtïdai ïgai mai kia otosakai, —Iimibïrai momokoro arhi kiikiïrï dai mos aïkai tïïgimu aapimï ïmo axñitu maradï dai ami burhikami kïïka. Ïgai tomarhi ïmo imidagai mai kia dadaïjïi odami. Upanabïrai tudu dai bhaigobai buapa— itïtïdai.

³ —Dai xi ïmadutai gïn tïkakagi mïx tuixidï upanai go axñitu, bïrai aagida ansai aanï ïr Tïanïdami bïïxi aïkatai dai tïgito aanï go axñitu. Dai aagidabïrai ïpï ansai otoma ïpamu otosda iñagai— itïtïdai Suxi go ojotosadï.

⁴ Taidi iji ïgai dai tïï go axñitu. Ïmo kitaagiñana burhikatadai ïgai no kaiyana, mïtai upai.

⁵ Dai ïïmadutai ix makïdï ami daraja potïtïdai, —¿Ix tuma bïïtarï upasai aapimï go axñitu?— itïtïdai.

⁶ Dai go ojotosadï Suxi aagidi ix tïtïdai Suxi bai go odami dagito mïx bhïkiagi go axñitu.

⁷ Mïï buapi ïgai xako daja Suxi dai daama darai gïn susua taidi go Suxi daamioma daiba. Podukai Suxi daitugai ïmo axñitu dai ïpamu bhïiyi boi Jerusalenamu.

⁸ Tai aa mui odami boiyïrï ïrhigimi susuadï bhai ïldakai dai aa guikutai uxi maamara dai boiyïrï tuajaimi ïpï.

⁹ Sïïrhikïdï muidu iimïdami ix makïdï oi go Suxi ïïmoko bhaitï gukigi dai jaa gokiañdïrï gukigi. Dai bïï aipako mos iñakimi ïgai bhai gïn ïldakai. —Agia ïr gïdukami Diuxi— ikaitiña. —Gia kïï gï ïldamu aapi. Gïr Nukadakami otosadï aapi tudu— ikaitiña go odami aagaitai Suxi.

¹⁰ —Xïï kïïga tïanïdamu idi kïïrhi. Go baaxi sïïrhikami bia gobai ix makïdï biakana gïr pipiixaraga Dabidkaru ïïki. Xibi kaxi miadaimi ix tuigako gïr tïanïda agai ïmoko ix makïdï bia go baaxi Dabidkaru sïïrhikamigadï. Agia ïr gïdukami Diuxi go tïbagiana oidakami— ikaitiña odami.

¹¹ Bhodïrï Jerusalenana baa go Suxi dai baa go gïï Jerusalenïrï kïakïdï kiupiïrï. Mos aipako nïnïaba ïgai dai nïidi ix tuma oidaga ami dai bhodïrï ka urui oidigi xi ka Betaniamu jii ïmadï go bhaibuxtama dan goka mamaatïrdami.

Ïmo igoxi dïïdï mai iibhaidakami

¹² Xadiko Betaniañdïrï iji ïgai ïpamu dai bhiugimutugai go Suxi.

¹³ Mïkaxdïrï tïï ïgai ïmo igoxi dïïdï dai kïï tïdogi aagadï. Dai jii ïgai dai nïnïida agai sa bhai ibhaidaga, dïï mos mai tïï tomarhi ïmo ibhiadï. Mai kia ayi ixtuigako ibhiatai ïgai kaxkïdï.

¹⁴ Dai Suxi potïtïdai aidï go igoxi dïïdï, —Tomarhi ïmo imidagai ka mai ugimu odami gï ibhaidaga— itïtïdai. Baidi go mamaatïrdami kaï.

Suxi aadaji go gaagaradami go gïï kiupiañdïrï Jerusalenïrï kïakïdï

¹⁵ Bhodïrï ka ayi ïgai Jerusalenïrï ïpamu. Dai Suxi baa go gïï Jerusalenïrï kïakïdï kiupiïrï dai adaimu agai go ix makïdï gaagarai dai gasapïdai naana maaxi ami kiupiïrï. Mos daitu ïgai memesagadï go ix makïdï kambhiandoi tuminxi dai daraikarudï ix makïdï gaagarai tutugu ïpï.

¹⁶ Daidi ïgai odami ix makïdï kukuspui dïgabuskïi kiupai ïrana.

¹⁷ Bhodïrï gï aagakai maa ñoki go odami daidi potïtïdai, —Diuxi ñokidïrï adukai ojixi— itïtïdai. —Diuxi kiidï ïr Diuxi daanïdaragai Diuxi bïïtarï. Bïïxi oidigi daama óídakami bïïtarï gobai tudu. Dïï ïïxibogami kiidï dukai bia aapimï Diuxi kiidï— itïtïdai.

¹⁸ Daidi go bhaitï gukakami daxdadami ïmadï go maatïtuldiadami sïïrhikami kaï ix kaiti go Suxi dai tïï ïgai xi go odami arhiï tïïtïitoi Suxi aatagidï dai ka duduadimu ïgai. Ïbhïidi ïgai xi go odami ka maiti gïn ïïgiada agai buaboitudaitai go Suxi dai gïn aaga gaagaimi ïgai ixdukatai muagi go Suxi.

¹⁹ Dai mos tuka oidigi tai jii go Suxi abhiadïrï ïmadï mamaatïrdami.

Suxi ïpamu aagai go igoxi dïïdï mai ibhaidakami

²⁰ Dai xadiko kiamoko dïgabusai ïgai ïpamu xako kïïka go igoxi dïïdï dai xibi ka gakixapi ïgai takadïañdïrï abhiadïrï asta kugïrï ukami.

²¹ Dai go Piduru tïgito tïï xi idi ïr ïgai baa uxi ix makïdï tïï ïgai takabo daidi potïtïdai ïgai Suxi, —Daiñi aapi maatïtuldiadami— itïtïdai. —Go igoxi dïïdï ix makïdï ñokidi aapi takabo ti ka gakixa— itïtïdai.

²² Dai Suxi potïtïdai, —Gï agai mïx buaboitudadagi Diuxi— itïtïdai.

²³ Daiñi, xi ïmadutai kïï buaboitudadagi dai tïdagi ïmo gidi, —Imïdañi marïrï dai mïï gïxi, mos pobï duñimu gobai, ix ïmadutai kïïgakïrï buaboitudada tudu.

²⁴ Aanï aagai sai tomax tuma tanïdagi aapimï Diuxi ïgai gïn maakimu. Mos gï agai mïx kïï buaboitudadagi xi ka bia aapimï mïx tuma tanïi xi ïgai gïn urhiñdamu gobai.

²⁵ Xudu aataga agadagi aapimï ïmadï Diuxi dai gïn tïgitoagi xi ïmadutai soi gïn buididi abïr oigïlda tomax tuma soi gïn buididi ïgai. Aidï gia kïïgadu ix aatagada aapimï ïmadï Diuxi.

²⁶ Ïma dukai gïn oga tïbagiïrï oidakïdï maitï gïn oigïldamu aapimï ïpï— itïtïdai.

Gupudagai bipiakami gatïkakai go Suxi sa xajadïrï bhïiyi ïgai sïïrhikami

²⁷ Bhodïrï Suxi ïmadï mamaatïrdami oi gïn imidaga dai ayi Jerusalenïrï ïpamu dai ïpamu baapa go gïï kiupaigadïrï judidiu. Dai miadïrï gukiba chïki dudunukami, dukami go bhaitï gukakami daxdadami ïmadï maatïtuldiadami sïïrhikami dai gïn sonoïrï gukakami,

²⁸ dai potïtïdai ïgai go Suxi aidï, —¿Padïrï bhïiyi aapi sïïrhikami xi kiupiañdïrï aadaji aapi go gaagaradami takabo? ¿Borai gï aagidi pïx pomaaxi ibuada aapi?— itïtïdai.

^29-30 Daidi go Suxi aadïrï gatïkakai, —¿Borai otoi go Juan sai bapakonana odami? ¿Diuxi otosadï xi ïgai, ïmo odami otosadï xio?— itïtïdai. —Gin aagidabïrai nai aanï gïn aagidana ïpï xorai otosadï aanï— itïtïdai Suxi go dudunukami.

³¹ Baidi go dudunukami mos aipako gïn aagidimi daidi ikaitimi, —¿Dukatai duna aidï aatïmï? Ix potïdagi aatïmï sai Diuxi otoi go Juan, go Suxi pobïr tïda antaada ïpï tïx tuixi aidï mai buaboitu.

³² Dai ix potïdagi aatïmï sai ïmo odami otoi go Juan dai mai xu Diuxi otosadï ïgai, aidï gia bhaakoika antaada odami. Go odami kïï buaboitudai saidi go Juan ïr Diuxi otosadï di— ikaitimi ïgai duduadimukai.

³³ Dai bhodïrï potïtïdai ïgai go Suxi, —Bïï mai maatï aatïmï xorai otosadï go Juan— itïtïdai. Dai Suxi potïtïdai aidï go dudunukami, —Aidï gia tomarhi aanï maiti gïn aagidamu xajadïrï bhïiyi aanï gin sïïrhikamiga ïpï ixtukïdï aatabuayi aanï— itïtïdai.