Lukas 2 - Northern Tepehuan Bible

Go Lukas aagai ixdukatai dibia Suxi tami oidigi daama

¹ Dai aidïpïrï go Augusto ïr go gïï dunukamikatadai Romïrï. Dai ïgai tïjai go sonoïrï gukakamigadï sai ïkaldana bïïxi go óídakami xako ukami gatïanïitadai ïgai oidigi dai sai ojana tïtiaradï bïïxkatai ïgai.

² Aidï ïr tukamïrï xi ïkarhi ïgai bïïxi go óídakami dai aidï Sireno ïr kaigikatadai amïka xako Siria tïgidu oidigi.

³ Mïtai tïjai go odami saidi iimïna xako ïr bubuakïkami ïgai saidi ami ïkaldana go dudunukami.

⁴ Daidi Nasaretana oidakatadai ïmo oidakami Jose tïgidukami. Dai jii ïgai Nasaretañdïrï ix makïdï Galileïrï bipiïyi dai ayi Belenïrï ix makïdï Judeïrï bipiïyi. Go Dabidkaru ïr Belenïrï busaikamikatadai dai go Jose ïr pipiixaradï kaxkïdï biakatadai ïgai xi gamo imiagi dai ami gï ojagi.

⁵ Dai baidakai ïgai go Maria gamo Belenamu ïpï. Kaxi bhai duitadai ïgai ñoki sai ïmadï bii agaitadai dïï mos mai kia ïmadï bii ïgai. Dïï ka nonoakatadai go Maria aidï dai karhioga ayitadai ixtuigako duadiagi.

^6-7 Dai aidïxi ayi ïgai Belenïrï ka mai tipukatadai xako gïn urhiñagi kaxkïdï kapayo kiidïrï gïn urhi ïgai. Ami darakatadai ïgai kia xi duayi go Maria dai bua ïmo arhi gïrhi. Ïgai ïr tukamïrï maradïkatadai tudu dai bhixa ïgai dai ami boda xako gakuadana kapayo.

Ïmo tïañikarudï Diuxi aagidi chïki paxtuturu sai ka dibiatadai Suxi

⁸ Dai Belenïrï no maigobai oidigana ajiopaitadai paxtuturu dai nukadatadai kañiñiru aidï tukarï.

⁹ Dai todian dukai gï maaxitu ïmo tïañikarudï Diuxi ami go paxtuturu buidïrï. Dai Diuxi gubukarhigadïkïdï kudikami bii oidigi ami xako darakatadai go paxtuturu dai duduadimu ïgai.

¹⁰ Dai go tïañikarudï Diuxi potïtïdai ïgai, —Maiti duduadikuda aapimï. Gïn bhïidati aanï ïmo bhai ïrhiaragai ñoki. Idi ñokikïdï kïïga bhai gïn ïjïldamu aapimï ïmadï bïïxi oidigi daama óídakami ïpï— itïtïdai.

¹¹ —Ïkiapo mo busai gïn Kïïgakïrï Bubiadamiga ami go arhi kiikiïrï xakoga oidatu go Dabidkaru ïïki. Ïgai ïr Gabhaitïkïakami dai ïr go Kristo.

¹² Mobai xako gakuadana go kapayo ami bhixapikatai kaatï ïgai. Ami tïïgimu aapimï dai maatïkamu saidi ïr buaboi ixtumaxi gïn aagidi aanï— itïtïdai.

¹³ Mos sai naato ñokakai ïgai tai bhodïrï mui bamioma gïn maaxitu Diuxi tïtïañikarudï daidi itïtïdai ïgai go paxtuturu,

¹⁴ —Gï agai xi bïïxi Diuxi tïtïañikarudï mïï tïbagiïrï aagana xïïxi ïr gïdukami Diuxi. Dai gï agai xi kïïga ibhïxtakan taadakagi óídakami tami oidigi daama ïpï. Diuxi ka kïïga buididi ïgai xibi kaxkïdï— ikaiti Diuxi tïtïañikarudï.

¹⁵ Daidi bhodïrï nonora ïgai tïbagiamu baidi go paxtuturu ikaitimi, —Timïda mïï Belenamu dai nïida ix dukatai daibusai ix makïdï gïr aagidi Diuxi— ikaitimi.

¹⁶ Baidi otoma iji ïgai amïka dai tïï ïgai go Maria ïmadï Jose dai go arhi xïïñi ami kaatïkatadai xako gakuadana go kapayo.

¹⁷ Dai tïïgakai ïgai go arhi xïïñi otoma aagidi ïgai go odami aipakoga ix tïtïdaitadai Diuxi tïtïañikarudï aagaitai go xïïñi.

¹⁸ Dai bïïxkatai ix makïdï kaï aatagidï mai tïtïgaiña ix dukatai gïn tïtïgitoagi.

¹⁹ Dai go Maria mai ugutai gï tïgitokana bïïxi ixtumaxi pogïduitadai.

²⁰ Daidi aa surhi go paxtuturu dai boiyïrï ganïïjimi ïgai aagaitai xïïxi ïr gïdukami Diuxi. Gïn tïgitotadai ïgai bïïxi ixtumaxi nïidi ïgai dai ixtumaxi kaï. Kaxkïdï tudu bïïxi pobï gï duitadai ix dukatai aagiditadai go tïtïañikarudï Diuxi.

Go Jose ïmadï go Maria gatïïgi Suxi Diuxi ami gïï kiupiana Jerusalenïrï

²¹ Dai bhodïrï abhiadïrï mamaako tasaikïdï gï circuncido go arhi xïïñi. Daidi Suxi tïïtï ïgai ix dukai aagiditadai go tïañikarudï Diuxi go Maria. Ka ïkiaxdïrï aagiditadai ïgai tudu mai kia nonoakatai ïgai.

²² Daidi gokiïrï biakatadai go Maria ix gï buanadagi ïïgi tukugadï chïki tasai ix dukai ojixi go Moises ojadïrï. Dai ka daibunukai gobai sai bhodïrï go Maria ïmadï Jose bhïkai go arhi xïïñi Jerusalenamu dai mïï tïïgida agai Diuxi.

²³ Ka podukai ojixi Diuxi ojadïrï tudu. Ami ikaiti sai, Bïïxkïrï xïïxkadï maamarakagi aapimï gïn tukamïrï maara kïïrhi gï agai ix tïïgidagi aapimï Diuxi sai ïkobai dakana ïgai Diuxi bïïtarï, ikaiti go ojai.

²⁴ Gobai bïïtarï iji go Maria ïmadï Jose gamo Jerusalenamu tudu gatïïgida agaitai go Suxi Diuxi dai gadarasda agaitai goka bautu xiïpï goka tutuguïpï ixdukai ojixi Diuxi ojadïrï.

Go Ximuñi aagai ïmo ñoki Diuxiañdïrï aagaitai go Suxi

²⁵ Dai ami Jerusalenïrï oidakatadai ïmo kïrhiodami Ximuñi tïgidukami. Kïï tuiga ïgai dai kïïga ïïgidiña ïgai Diuxi. Dai nïnïrakatadai ïgai sai dibiana Diuxi Otosadï dai sai kïïgakïrï bubaidana ïgai go Israelitas. Dai Diuxi Ibhïadï ïmadï dakatadai go Ximuñi

²⁶ dai Diuxi Ibhïadï ka aagiditadai ïgai sai mai muki agai asta xïxkadï tïï ïgai go Diuxi Otosadï.

²⁷ Dai aidï tasïrï Diuxi Ibhïadï maa tïgibudagai go Ximuñi sai imïna ïgai go gïï kiupiamu Jerusalenïrï. Dai aidïxi ami ayi go Maria ïmadï Jose gatïïgida agaitai ïgai go Suxi ïïgiditai ïgai go Moises ojadï sai go Ximuñi tïï.

²⁸ Dai bhïiyi ïgai go xïïñi dai komitu dai aagai xïï kïï tuiga Diuxi daidi potïtïdai,

²⁹ —Aapi Diuxi gin Tïanïdamiga, ka bïïxi idui aapi ixtumaxi gin aagidi aapi. Xibi ka tïï aanï idi arhi xïïñi dai ka ibhïxtakan taadaga aanï. Xibi ka bhai gin duu ix imiagi idi oidigiañdïrï. Kaxi gin tïïgi aapi ix makïdï gin aagidi aapi kaxkïdï.

³⁰ Xibi ka tïï aanï idi ix makïdï otoi aapi sai kïïgakïrï gïr bubaidana.

³¹ Dai idi xïïñi ïr kïïgakïrï bubiadami bïïxi go gaa oidigi daama oidakami ïpï.

³² Idi maatïtuldamu ixtumaxi ïr buaboi go odami ix makïdï maiti ïr judidiu. Dai idikïdï gïr ayimu ïmo gïdukami xadutudaragai aatïmï Israelitas. Aatïmï gïr bïïtarï ix makïdï ïr gï aaduñi aapi Diuxi— itïtïdai go Ximuñi Diuxi.

³³ Dai dïïdïdï go Suxi mai tïtïgaitadai ixtumaxi gïn tïgitoagi kaïkatai ix kaiti go Ximuñi aagaitai maradï.

³⁴ Daidi Ximuñi aagai ïmo bhai ïrhiaragai ïgai bïïtarï daidi potïtïdai ïgai go Maria, —Diuxi ka ïkobai busaitu idi xïïñi sai kïïgakïrï bubaidana gobai mui Israelitas. Mui kïïgakïrï bubuakimu idikïdï tudu dïï gia mui gïpiïrï surhigimu idikïdï ïpï— itïtïdai. —Kaxkïdï tudu mui odami bui surhigimu idi.

³⁵ Podukai gï maaxitudamu ix dukatai gïn tïtïitoi odami. Dai aapi Maria sïïrhikïdï gï ayimu soi ïrhiaragai— itïtïdai Ximuñi.

Ïmo oki Ana tïgidukami aagai ïmo ñoki Diuxiañdïrï aagaitai go Suxi

³⁶ Dai ami go gïï kiupiïrï dakatadai ïmo rhiokodami Ana tïgidukami ïpï. Ïmo ñokituldiadamikatadai ïgai Diuxi dai ïr maradïkatadai go Penuelikaru daidi ïr pipiixaradïkatadai go Asielikaru. Ïmadï bitadai ïgai ïmo kïïrhi ïkioma dïï kubarakami umigikïdï mutadai go kïïrhi.

³⁷ Podukai ïïgi bii ïgai dai ka maita gaïmadï bii ïpamu. Xibi ka biakatadai ïgai maakokobhai dan maakoba umigi dai ami go gïï kiupiïrï dakana ïgai bïïx tasai modukai tasïrï dai tukarï. Dai dudatai mai dïdïïkaiña ïgai kuadagai xadutudaitai Diuxi dai daanïitai.

³⁸ Dai kia ñokaitadai go Ximuñi xi ami miadïrï kïkiba go Ana dai aagai xïï bhai gï ïrhidi ïgai Diuxi bïïtarï nïiditai go arhi xïïñi. Dai aidï abhiadïrï aatagidiña ïgai mui odami aagaitai go arhi xïïñi. Aatagidiña ïgai go odami ix makïdï nïnïrakatadai xi dibiagi go kïïgakïrï bubiadami go judidiu bïïtarï tudu.

³⁹ Dai bhodïrï kaxi idunakai go Maria ïmadï Jose bïïxi ixtumaxi aagai Diuxi ojadïrï sai baidakai ïgai go arhi gïrhi Galileamu ïpamu. Dai ami ayi ïgai Nasaretïrï.

⁴⁰ Daidi go arhi gïrhi kïï gubuakami gïïrhimi ami dai bhïjimi tïgibudagai dai Diuxi kïïgakïrï nïidiña.

Go Suxi aataga ïmadï tïtïgiadami Diuxi ojadï go gïï kiupiïrï Jerusalenïrï

^41-42 Dai ïmo imidagai aidïxi ka biakatadai go Suxi bhaibuxtama dan goka umigi sai jii ïgai Jerusalenamu dïïdïdï ïmadï. Mos umiïrï po buadana ïgai tudu go Kïïgakïrï Bubaidaragai bagimiïrï.

⁴³ Dai ugidakai go bagimi sai Suxi dïïdïdï bhïiyi boi ka aa surhigi agaitai kiidïrï amakoga. Dïï go Suxi amaxi bii Jerusalenïrï dai go dïïdïdï mai maatïkatadai.

⁴⁴ Po ïrhiditadai ïgai sai go Suxi saagida imïitadai aaduñdï ix makïdï nonoigimi kiikiamakoga ïpï. Ïmo tasai iji ïgai dai bhodïrï gaagamu ïgai go Suxi aaduñdï saagida

⁴⁵ dai mai tïï xi kaxkïdï aa surhi ïgai ïpamu Jerusalenamu gaagaitai.

⁴⁶ Baika tasai gaa ïgai dai tïï kiupiana dakatai ïgai. Ami saagida dakatadai ïgai tïtïgiadami ñoki kiupiana. Dai kaïkatadai ïgai aatagidï go tïtïgiadami ñoki dai gatïkakatadai naana maaxi ixtumaxi.

⁴⁷ Dai go tïtïgiadami ñoki tïkakatadai go Suxi naana maaxi ixtumaxi ïpï. Dai ix makïdï kaïkana aatagidï mai tïtïgaiña ixtumaxi gïn tïtïgitoagi kaïkatai xïï kïïga aa noraidiña Suxi go tïkakaragai mos ïï kïïgadukatai ïgai tïgibudadï.

⁴⁸ Dai dïïdïdï mai tïtïgaitadai ixtumaxi gïn tïtïgitoagi ïpï tïïgakai. Dai go Maria potïtïdai, —¿Gin maara, tuipïxi po gïr duñi aapi maiti gïr aagidakai dai tami bii?— itïtïdai. —Duduadimukatai gï gaagai aanï ïmadï gï oga aipakoga di— itïtïdai.

⁴⁹ Dai Suxi potïtïdai, —¿Ix tuixi mai maatïkatadai aapimï xako gin gaagagi? ¿Maiti mïx maatï sai gï agai xi gin oga kiidïrï dakagi aanï?— itïtïdai aagaitai sai Diuxi ïr ogadï dai go gïï kiupai ïr kiidï.

⁵⁰ Dïï gia dïïdïdï mai maatï kaï ixtumaxi aagida ïrhiditadai Suxi.

⁵¹ Pobï gï dui Jerusalenïrï tudu. Dai bhodïrï go Suxi oi dïïdïdï gamo Nasaretamu dai apia mo ïxi kïïga ïïgidi. Dai dïïdï bïïx tasai tïtïitoiña ixtumaxi pogïduitadai ïgaikïdï.

⁵² Daidi go Suxi kïïga gïï dai bhïjimi kïïga tïgibudagai. Dai Diuxi kïïgakïrï nïidiña dai go óídakami kïïgakïrï nïidiña ïpï.