Kolosenses 3 - Northern Tepehuan Bible

¹ Gin aaduñi, bïïna daraka aapimï Suxi Kristo dai kaxkïdï kaxi gïn duakaturhi Diuxi ïmo utudui oidaragai bïïtarï. Dai kaxkïdï bïïna dakatai aapimï ïgai abïr biaka ïrhiada ixtumaxi oidaga amïka xako daja ïgai. Tïbagiana daja Suxi Kristo tudu sïïrhixapadïrï Diuxi xakoga kabami bia ïgai xadutudaragai.

² Gïn tïgito abïr ajiopada ixtumaxi oidaga tïbagiana tudu dai mai xu ixtumaxi oidaga tami oidigi daama.

³ Kaxkïdï tudu ka koidadï duu bii aatïmï gïr ïïkidadï oidakaragai bïïtarï dai xibi bia aatïmï ïmo utudui oidakaragai bïïnaka darakatai aatïmï Suxi Kristo. Aatïmï bïïnaka daraka Suxi Kristo tudu dai Suxi Kristo bïïnaka daja Diuxi dai bia gïr utudui oidakaragai. Suxi gia kïïga maatï ix maaxika agai gïr utudui oidakaragai dïï aatïmï gïr bïïtarï mai maaxi kia.

⁴ Dïï gia kïïga maatï aatïmï sai mosïkaxi bïïnakatai aatïmï Suxi Kristo bhaiga aatïmï xi kïïgakïrï óídakagi. Mai tipu ïma dukai. Kïïga maatï aatïmï gobai tomaxi mai maatï aatïmï kia ix maaxika agai gïr utudui oidakaraga. Dïï gia xïïxkadï ka kïïga gï maaxitudagi Suxi Kristo xïïxi ïr gïdukami ïgai dai ka biakagi gïdukami xadutudaragai amaxi biakamu aatïmï xadutudaragai ïgai ïmadï ïpï.

⁵ Kaxkïdï abïr dagitoda ixtumaxi ibuadana aapimï aidïxi oidiña aapimï gïn ïkidadï oidakaraga. Maiti abïr ïmadï bopoda tudu ix makïdï maiti ïr gïn aduñi dai maiti abïr tïtïgito ajiopada podukai ïpï. Maiti abïr ibuada ïrhiada buirudagai tudu. Dai maiti abïr koimudadï tutiaka. Tomaxorai ix makïdï koimudadï tutiakagi ïpïan dukamikana ix makïdï Diuxi dukai nïidi ixtumaxi ix makïdï maiti ïr Diuxi. Ïgai bamioma namïakami dukai nïidi ixtumaxi oidaga tami oidigi daama dai mai pokaxi namïakami dukai nïidi ïgai Diuxi.

⁶ Ix makïdï soimaaxi ibuadagi podukai, dukami ix ïmadï bopodagi jaa dai koimudadï tutiakagi ïgai ka mai ïïgidi Diuxi dai Diuxi maakimu gïgïbidaragai.

⁷ Ïkioma aapimï ïpï ibuadana naana maaxi soimaaxi podukai ïpï mai kia dagitokai aapimï gobai.

⁸ Dïï gia xibi ka ayi xi dagitoagi aapimï bïïxi gobai. Xibi ka maiti abïr bhakokïrïda tudu. Maiti abïr gïn dagitoagi xi gïn maitana go bhamudagai tudu. Dai maiti abïr soi buidada ïrhiada jaa. Dai maiti abïr galnaxi ñokada buidïrï. Maiti abïr galnaaxi ñoki aagada toma lïïchi tudu.

⁹ Kaxi maiti abïr yaatagïda jaa ïpï. Kaxkïdï tudu ïkioma galtutuigatakana aapimï oiditai gïn ïkidadï oidakaraga dïï gia xibi ka maigobai dáí aapimï go ïïkidadï oidakaragai ïmadï go soimaaxi ix makïdï ibuadana aapimï oiditai gobai tudu.

¹⁰ Xibi ka bhïiyi aapimï go utudui oidakaragai dai ka utudutudaimi aapimï. Xibi Diuxi ix makïdï gïn idui aatabuayi aapimïrï dai ka ïpïan tuigakami bijimi aapimï Diuxi. Gïn utudutuldaimi Diuxi sai podukai kïïga maatïkana aapimï ïgai dai kïïga ïmadaiña aapimï ïpï.

¹¹ Dai xibi ka utudukatai aatïmï buaboitudadami ka mai xudu xi ïr judidiu aapimï xi ïpï ix maiti ïr judidiu. Xiïpï xi circuncidaduga aatïmï ix mai circuncidaduga ïpï. Mai xudu ix ïr mïkaxdïrï oidakamikagi ïmoko xiïpï asta xi ïr oidigana oidakamikagi ïpï. Xibi bïïxi gobai ka maiti ïr ixtumaxi gïr bïïtarï ix makïdï ïr buaboitudadami. Ka utudui bubuaka aatïmï dai ka mai buamï rïrhidi aatïmï xoraitadai aatïmï. Xibi Suxi Kristo gïr ïmadï daja bïïxkatai aatïmï buaboitudadami kaxkïdï. Dai mosïkaxi Suxi Kristo ïgai dai namïga gïr bïïtarï xibi.

¹² Daiñi, xibi aapimï buaboitudadami kaxi ïr ïko bubaidadï Diuxi. Ïkobai darasaka aapimï Diuxi bïïtarï tudu dai gïn oigïdai ïgai. Kaxkïdï abïr soi gïn ïrhiada nïiditai jaa ix makïdï soimaaxi taatamadagi daidi abïr kïï tutiaka buidïrï jaa odami ïpï. Maiti abïr gïgïrdukïdï gïn ïrhiada daidi abïr kïï bhai maaxkami buidadagi jaa mai omarhigakatai buidïrï. Maiti abïr otoma ojodada go jaa xïïxkadï mai kïï ibuadagi ïgai.

¹³ Dai kïïga abïr gïn kabakada xïïxkadï soi gïn buidadagi ïgai daidi abïr oigïldada. Gï agai xi oigïldagi aapimï ix makïdï soi gïn buidadagi ïpïan dukai ix dui Suxi Kristo aidïxi gïn oigïrhi gïn soimaaxkamiga tudu.

¹⁴ Bïïxi ixtumaxi ibuadagi aapimï abïr ibuada kïïga oigïdaitai jaa tudu. Gobai ïgai dai bïïxi adaama gï agai xi ibuadagi aapimï. Ix gïn oigïdada aapimï aidï gia kïïga gïn uraba óídakamu aapimï tudu.

¹⁵ Gin aaduñi, Diuxi gïr báí tïsaidi ïmo tukugai dukamikagi aatïmï ïmo aadunumïkatai aatïmï. Kaxkïdï kïïga abïr gïn tïgito nïijada ixtumaxi ibuadagi aapimï. Oijadabïrai tudu go ibhïxtaragai dai urabaragai ix makïdï gïr maa Suxi Kristo. Sai gobai ïgai dai gïr tïanïna tudu. Dai dudatai abïr aagiada Diuxi sai bhai gïn ïrhidi aapimï ïgaikïdï ïpï.

¹⁶ Gïn tïgito abïr ajiopada aatagidï Suxi Kristo dai abïr dagito sai ïgai ñokidï gïn tïanïdagi gïn tïgibudagïrï dai saidi gïn tïanïdagi gobai bïïxi ix tumaxiïrï ibuadagi aapimï ïpï. Podukai abïr bhïiyi kïïgadukami tïgibudagai daidi aipako abïr gïn mamaatïturhiada aapimï dai aipakoga abïr gïn mamaakada ñoki. Dai bïïxi gïn ibhïdakïdï abïr ganïyi go naana maaxi nïidadï Diuxi ix makïdï aagai xïïxi ïr gïdukami Diuxi. Daidi abïr gamamaakada ïmo Diuxiatanamїidaragai Diuxi bïïxi gïn ibhïdagakïdï.

¹⁷ Dai bïïxkïrï xïxkadï ñokadagi aapimï xiïpï xïxkadï ibuadagi aapimï ixtumaxi abïr Suxi Kristo bïïtarï ibuada ka urabakatai aapimï ïgai. Dai gïn tïgitobïrai ïpï sai Suxi Kristo ka bhai dui gïn bïïtarï sai biakana aapimï oigaragai xi Diuxiatanamïidana tïdagi Diuxi gïr Oga kaxkïdï dudatai abïr potïda ïgai.

Go Pabora aagai ixdukatai gï agai xi ibuadagi go aaduñdï go buaboitudadami bïïtarï

¹⁸ Aapimï oki, abïr kïïga ïïgiada gïn kukuna. Kaxkïdï tudu gï agai xi pobuadagi aapimï oki urabakatai aapimï Suxi Kristo.

¹⁹ Dai aapimï kïkïïrhi, abïr kïïga oigïdada gïn oñiga dai maiti abïr bhakokoda ïgai bui dai bhaiyoma abïr kïïga bhai maaxi buidada.

²⁰ Dai aapimï arhi kïïga abïr ïïgiada gïn dïïdï bïïxi ixtumaxiïrï gïn tïanïdagi ïgai. Kaxkïdï tudu xïïxkadï ïïgiadagi aapimï gobai ïr ïmo bhai ïrhiaragai Gïr Nukadakami bïïtarï.

²¹ Dai aapimï ix makïdï ïr gaoga, maiti abïr bhakoitudada gïn maamara. Tadu dagito ïgai buaboidaradï.

²² Dai aapimï ix makïdï ïr pipioñi, kïïga abïr ïïgiada gïn amu ix makïdï bia aapimï tami oidigi daama. Dai mai xu xi mosïkaxi ïïgiada aapimï xïïxkadï gïn nïijadagi ïgai buamï gïn ïrhiditai ix tïiyagi ïgai. Bïïxi gïn ibhïdagakïdï abïr ïïgiada bhaiyoma ïmo xadutudaragai dukai Gïr Nukadakami bïïtarï.

²³ Bïïxi gïn bhai ïrhiarakïdï abïr ibuada bïïxi ixtumaxi ibuadagi aapimï tudu. Dai xïxkadï ibuadagi aapimï ïmo aaduindagai gïn amu bïïtarï abïr kïïga ibuada xadutudaitai Diuxi. Saidi ïr Diuxi bïïtarïkagi gïn aaduindaga tudu dai mai xu xi mosïkaxi gïn amu bïïtarï.

²⁴ Kïï maatï aapimï tudu sai Gïr Nukadakami ïgai dai gïn maaki agai go maitïki ix makïdï ka aagai ïgai sai gïr maaki agai. Suxi Kristo Gïr Nukadakami tudu ïgai daidi kïïgakïrï ïr gïn amu.

²⁵ Dai xorai mai kïïga ibuadagi bhïimu ixtumaxi ajïakagi ïpï mai kïïga ibuadatai ïgai. Diuxi maakimu bïïxi odami ixtumaxi ajïakagi tudu. Mai xudu xoraikagi ïgai.