Kolosenses 2 - Northern Tepehuan Bible

¹ Gin aaduñi, ipïrhidi aanï ix maatïkagi aapimï xïï kabami buamï in ïrhidiña aanï gïn bïïtarï. Kabami buamï in ïrhidiña aanï go Laodisiïrï óídakami bïïtarï ïpï dai bïïtarï bïïxi go buaboitudadami aipako óídakami ix makïdï mai kia gin maatï.

² Kabami ipïrhidi aanï tudu sai aapimï ïmadï bïïxkatai ïgai kïïga abïnakian taadakagi dai sai kïïga gïn urabakagi gïn oigïdaitai aipakoga. Kabami ipïrhidi aanï sai biakana aapimï ïmo ixtumaxi kïïga namïakami. Ipïrhidi aanï sai gïn ibhïxtakan taadakagi aapimï kïïga maatïkatai aapimï Suxi Kristo tudu. Daiñi, go óídakami ïïki mai maatïkatadai sai oidaka agai ïmo kïïgakïrï bubiadami ix makïdï odami ïrana oidaka agai. Diuxi mai maaxiturhi ïgai kaxkïdï. Dïï gia ipïrhidi aanï sai aapimï gia kïïga maatïkana.

³ Suxi Kristo tudu ïgai dai gïr tïtïgidi Diuxi tïgibudadï. Daiñi, Diuxi bïïxi maatï dai tïgibudadï kïï saitudaga. Dai ïxtokikana Diuxi tïgibudadï gïr bïïtarï ïpïan dukai mui tuminxi yaasapikami. Dïï gia Suxi Kristo ïgai dai gïr tïtïgidi gobai.

⁴ Dïï gia gïn tïgitobïrai sai oidaga jaa ix makïdï sastudaga aatagidï dai ipïrhiadamu ix gïn bupuirumadagi. Kaxkïdï gïn ojidi aanï podukai aagaitai Suxi Kristo.

⁵ Daiñi, tomaxi maiti gïn ïmadï daja aanï bïïxkïrï gïn tïtïitoi aanï. Dai bhai gin ïrhidi maatïkatai sai kïï buañixikami dukai óídaga aapimï dai sai kïï gubuakami kïïka gïn buaboidaraga buaboitudaitai aapimï Suxi Kristo.

⁶ Gin aaduñi, aidï abhiadïrï xi buaboitu aapimï Suxi Kristo Gïr Nukadakami ka uraba bii aapimï ïgai. Kaxkïdï xibi abïr óídaka ixdukatai gï aagai sai kïïga maaxitudana aapimï saidi ïr buaboi sai uraba daraka aapimï ïgai.

⁷ Daiñi, ïpïan dukami ïmo uxi ix makïdï kïïga kabakami kïïka kïï tukabi ukami bia tatakadï podukai abïr gubukan gukada aapimï ïpï kïïga gïn daagïkan dukai aapimï Suxi Kristo ïmadï. Gï agai xi ïmo simiento gï dukamikagi Suxi Kristo gïn bïïtarï tudu sai aapimï daama kaban gukakagi ïgai gïn buaboidaragakïdï. Aidï gia kïïga gïïrhimu dai gubukan kïakamu gïn buaboidaraga ix makïdï gïn tïtïgidi aatïmï. Dai aidï ïpï kïïga maaxkamu jaa bïïtarï xïï kabami bhai gïn ïrhidi aapimï Diuxikïdï.

^8-10 Daiñi, Suxi Kristo kïïgakïrï ïr Diuxi ïpïan ïxi Ogadï. Mai bii toma lïïchi xi kïïgakïrï ïr Diuxika ïgai ïpïan ïxi Ogadï tudu. Tomaxi gïr ïpïamaaxi biatu ïgai tukugadï bïïxkïrï kïïgakïrï ïr Diuxi ïgai. Dai kaxkïdï buaboitudakai aapimï ka bïïna bii aapimï Suxi Kristo dai ka maiti gïn biïga ixtumaxi gïn ibhïdagïrï. Ïgai tudu bïïxi adaama ïr Tïanïdami. Ïgai bamioma ïr gatïanïdami xi bhai tomax makïdï gubukadagai bipiakami tudu. Kaxkïdï maiti abïr gïn dagito xi gïn bupuirumadagi odami ix makïdï tïtïïgidi mosïkaxi óídakami tïgibudadï ix makïdï maiti ïr buaboi. Gobai maiti ïr soiñi. Aagaiña ïgai bituldaradï óídakami mosïkaxi dai mai aagai ïgai Suxi Kristo. Maiti abïr ïïgiada aatagidï ïgai. Tadu maamaixapikan dukai bii aapimï ïïgiditai aatagidï.

¹¹ Daiñi, aidïxi bïïnakami bii aapimï Suxi Kristo ka circuncidadugami duu bii aapimï. Dïï gia mai xu xi ïmo odami gïn ikitï dai maigobai dáí lïïchi gïn tukuga ogidï aidï dai bhaiyoma Suxi Kristo ïgai dai maigobai dáí gïn tïgibudaga ïkidadï dai soimaaxkïdï. Podukai gïn circuncido ïgai gïn ibhïdagïrï.

¹² Daiñi, kïïga buaboitudai aapimï Diuxi gubukarhigadï ixtukïdï duakaturhi ïgai Suxi Kristo. Kaxkïdï aidïxi gïn bapakoi aapimï gïn yaasatudan duu aapimï Suxi Kristo ïmadï dai gïn duduakaturhi aapimï ïgai ïmadï ïpï.

¹³ Gin aaduñi, ïkioma ïko darakatadai aapimï Diuxiañdïrï. Koidadï dukaikana aapimï Diuxi bïïtarï tudu soimaaxi ibuadamikatai aapimï. Aidï kia biakatadai gïn ïïkidadï tïgibudagai soimaaxkïdï. Mai kia maigobai dasakatadai gobai gïn ibhïdagaiñdïrï aidï. Dïï gia tomaxi pomaaxkatadai aapimï bïïxkïrï Diuxi gïn oigïrhi bïïxi gïn soimaaxkamiga dai gïn duakaturhi bïïnakai aapimï Suxi Kristo.

¹⁴ Ïkioma gïpiïrï bïïtïkamikatadai aatïmï. Dai go sïïrhikami gobai dai gïpiïrï gïr bupaiña. Maiti ixtutuidikïi aatïmï ix bïï sudakami ïïgiadagi go sïïrhikami tudu dai podukai gïr mamaaxidi gobai saidi ïr soimaaxi ibuadami aatïmï. Dïï gia Diuxi bhai dui gïr bïïtarï aidïxi kuruxiana gï xixatu Suxi Kristo. Aidï maigobai daitu ïgai go ojai xako pokaiti sai buaturhi aatïmï gïr soimaaxkamiga bïïtarï dai podukai ka kïïgakïrï bubuaka aatïmï.

¹⁵ Ami kuruxiana maitï ïgai go diabora tudu ïmadï go tïtïañikarudï ix makïdï gatïanïiña tami oidigi daama. Maitï ïgai dai kïïga mamaaxidi ïgai bïïxi go óídakami buitapi sai maiti ixtutuidikïi go diabora ïgai bui.

¹⁶ Dai xibi ka kïïgakïrï gïn bubaitu Suxi Kristo mukukai ïgai kuruxiana. Dai kaxkïdï ka maiti gï agai xi gïn dagitoagi aapimï xi gïpiïrï gïn bupadagi jaa pokaititai ïgai sai mai kïïga ibuayi aapimï mai ïïgiditai aapimï go Judidiu bituldaradï. Pokaitada antaada ïgai tudu sai mai kïïga buayi aapimï gakuadatai ïïmo kuadagai xiïpï gayïdatai ïïmo idagai. Pokaitada antaada ïgai ïpï sai gï agai xi xadutuada aapimï go gïgïr tasai ïmadï go ibhïxtaragai tasai. Maiti abïr ïïgiada tudu ix makïdï podukai ñokai.

¹⁷ Daiñi, ïkioma nïnïrakatadai aatïmï Diuxi otosadï ix dibiagi. Dai bïïxi go bituldaragai ix makïdï ibuadana aatïmï mos ïr maaxidaragai dukai bïïtarï go otosadï Diuxi. Dïï gia xibi ka dibia Diuxi otosadï dai ïgai ïr Suxi Kristo. Ka dibia ïgai dai kaxkïdï ka maiti gï agai go maaxidaragai. Ka maiti gï agai go ïïkidadï bituldaragai tudu.

¹⁸ Gin aaduñi oidaga tïtïgiadami ñoki ix makïdï gïgïrdukami gïn ïrhidi aagaitai ixtumaxi tïïtïkiïrï dukai tïï ïgai dai adaimïitai ïïgi tïgibudadï. Gïgïrdukïdï gïn ïrhidi ïgai dai maiti ïr gïgïrdukïdï. Dai pokaitiña ïgai sai gï agai odami xi Diuxi dukai xadutuadagi Diuxi tïtïañikarudï dai sai gï agai xi ïïgi soimaaxi gï taatamituldagi ïmoko tukugadï sai Diuxi kïïgakïrï nïidiña. Maiti abïr ïïgiada ïgai tadu gïn popoki ïgai gïn bhai ïrhiaraga.

¹⁹ Ix makïdï podukai gatïtïïgiadagi ñoki mai urabaka Suxi Kristo. Dai Suxi Kristo ïgai daidi ïr gïr moo gï dukami gïr bïïtarï. Ïgai tudu gïr tïanïi dai gïr mamaakai ixtumaxi gï agadagi sai kïïga gïr urabana aatïmï aipakoga dai kïïga arasakami dukana aatïmï ïpïandukai ïmo odami tukugadï ix makïdï bïïxi arasaka taatadï dai xixixodï. Podukai gïr gïrhidi Diuxi tudu kïïga gïr arasakan dukai óídakatai aatïmï aipakoga dai arasakami darakatai aatïmï Suxi Kristo ïpï ix makïdï ïr gïr moo dukai.

²⁰ Ïgai ix makïdï gatïtïïgidi ñoki gïn aagidiña tudu sai ïïgiada aapimï naana maaxi bituldaragai ix makïdï ïr ïïgi odami tïgibudadï. Dïï aapimï ka bïïnaka daraka Suxi Kristo dai ka ïmadï koi aapimï aidïxi ïgai muu gïn bïïtarï. Kaxkïdï ka mai bia aapimï xi ïïgiadagi pomaaxi bituldaragai. Koidadï dukai bii aapimï gobai bïïtarï di. Dai ïmo mukiadï mai bia xi ïïgiadagi tomarhi ïmo ixtumaxi. Kaxkïdï ka mai bia aapimï xi ïïgiada go bituldaradï óídakami tudu ix makïdï ikaitiña

²¹ sai mui ixtumaxi ïr daidarxi ix bhïiyagi ïmoko dai sai jaa ixtumaxi maiti gï agai ix kuadagi ïmoko dai jaa maiti gï agai ix taatamadagi ïpï.

^22-23 Daiñi bïïxi gobai ix makïdï gïn daidi ïgai mos ugiatïi kaxkïdï maiti gï agai xi buamï gïn ïrhiada ïgaikïdï. Dïï gia go tïtïgiadami ñoki aatagidï kïïga xigian kaiti. Aatagidï ïgai po ïrhiadan kaiti sai kïïgioma xadutuadamu ïmoko Diuxi ïïgiditai bituldaradï dïï maiti ïr buaboi. Ix makïdï gatïtïïgidi ïgai mos ïr ïïgi ïgai tïgibudadï tudu dai maiti ïr Diuxi tïgibudadï. Pokaiti ïgai sai gï agai ïmoko xi ïïgi gï dumaltudagi dai soimaaxi gï taatamiturhiadagi. Dïï gobai mai soikïi toma lïïchi sai ka mai ïïgiada ïmoko go soimaaxi tïgibudagai ix makïdï ïrañdïrï ibhïadïrï imïi odami. Kaxkïdï tudu pomaaxi bituldaragai maiti ïr Diuxi tïgibudadï. Go ïï odami tïgibudadï gobai.