Kolosenses 1 - Northern Tepehuan Bible

Go Pabora biaturhi go buaboitudadami

^1-2 Aapimï gin aaduñi Diuxi amadïrï Kolosiïrï óídakami, aanï ïr Pabora dai gïn ojidi idi ojai. Gïn ojidi aanï aapimï tudu ix makïdï bïïnaka daraka Suxi Kristo dai ix makïdï mai dagitokatai buaboitudai Diuxi. Dai tami gin ïmadï daja gïr aduñi Timoteo ïpï ibuadatai aanï idi ojai. Gï agai sai maatïkagi aapimï sai bia aanï ïmo sïïrhikami otosadïkatai aanï Suxi Kristo Gïr Nukadakami. Diuxi ïgai dai ipïrhi sai biakana aanï gin sïïrhikamiga tudu. Dai aanï ïmadï Timoteo ipïrhidi sai maatï taatana aapimï xïï kïï tuiga Diuxi gïr Oga gïn bïïtarï. Dai ipïrhidi aatïmï sai gïn maakana ïgai ibhïxtaragai gïn ibhïdagïrï.

Go Pabora daanïiña Diuxi go buaboitudadami bïïtarï

³ Gïr aaduñi, mai dagitokai gïn daanturhiña aatïmï dai aagidiña aatïmï Diuxi xïï bhai gïr ïrhidi ïgaikïdï gïn tïgitokatai. Aagidiña aatïmï Ogadï Suxi Kristo Gïr Nukadakami sai bhai gïr ïrhidi ïgaikïdï tudu.

⁴ Kaxkïdï tudu kajioma aatïmï sai kïïga buaboitudai aapimï Suxi Kristo dai sai oigïdai aapimï bïïxi go gaa buaboitudadami. Kaxkïdï bhai gïr ïrhidi Diuxikïdï.

⁵ Kïïga maatï aapimï tudu sai bia aapimï ïmo kïïgadukami nïnïraragai mïï tïbagiana. Dai gobai ix makïdï bia aapimï tïbagiana gïn abïnakiadan buayi sai apia kïïga buaboitudada aapimï dai sai kïïga oigïdada aapimï bïïxi go gaa buaboitudadami. Máí aapimï sai bia aapimï ïmo kïïgadukami nïnïraragai aidïxi kaï aapimï go buaboikïdï aatagi. Aidïxi kaï aapimï go bhai ïrhiaragai aatagi tudu.

⁶ Dai go bhai ïrhiaragai aatagi ix makïdï kaï aapimï ka bïïxi aipakoga oidigi daama aijimi. Dai bïïxi aipakoga xako ajïi go bhai ïrhiaragai aatagi ïpï jaa óídakami buaboitudaiña ïpïan dukai aapimï. Dai go aatagi soikïi óídakami aipakoga sai ïma dukai óídakana ixdukai bhai ïrhidi Diuxi ïpï. Ïpïan dukai gïn soi aapimï ïpï aidïxi kaï aapimï dai buaboitu. Aidï tudu máí aapimï xïï kïï tuiga Diuxi gïn bïïtarï.

⁷ Aapimï kaï go bhai ïrhiaragai aatagi gïn aagidakai go Epafro baasïkioma tudu. Go Epafro ïr ïmo pioñigadï Diuxi ïpïan dukai aatïmï dai kïïga oigïdai aatïmï. Kïï sïïrhi ibuayi ïgai Suxi aaduindadï ami gïn saagida gïr soikïitai ïgai.

⁸ Go Epafro ïgai tudu dai gïr aagidi xïï kïïga oigïdai aapimï jaa gïn soikïitai Diuxi Ibhïadï.

⁹ Dai aidï abhiadïrï xi kaï aatïmï ix makïdï gïr aagidi Epafro gïn aagaitai aapimï, aidï abhiadïrï gïn daanturhiña aatïmï. Mai dagitokai gïn daanturhiña aatïmï tudu. Daanïiña aatïmï Diuxi sai gïn soikïiña sai kïïga biakana aapimï bïïxi go tïgibudagai ix makïdï ïr soiñi. Dai daanïiña aatïmï sai kïïga maatï nïijadana aapimï ix dukatai ibuadagi tomax tuma daibuñagi. Podukai gïn daanturhiña aatïmï sai bïïxi aïkatïrï ixtumaxiïrï kïïga maatïkana aapimï ix dukatai ipïrhidi Diuxi sai ibuada aapimï tudu.

¹⁰ Gïr aaduñi, gï agai xi óídakagi aapimï Diuxi bïïtarï ixdukatai gï agai. Ix dukatai bhai ïrhidi ïgai tudu. Kaxkïdï gïn daanturhiña aatïmï sai kïï bhai dukai óídakana aapimï kïïga xadutudaitai Diuxi. Sai podukai kïïga bhai ïrhiatudana aapimï Gïr Nukadakami bïïxi aïkatïrï. Gïn daanturhiña aatïmï sai apia bamioma kïïga maatïkana aapimï Diuxi. Saidi ibuada aapimï naana maaxi aaduindagai kïkïïgadukami dai sai kïïga bubuakïna naana maaxi kïï bhai maaxkami gïn aaduindagaiñdïrï ïpï.

¹¹ Daanïiña aatïmï Diuxi ix makïdï kabami gubuka kïï gïdukatai ïgai tudu. Daanïi aatïmï Diuxi sai gin maakana gubukarhigadï. Podukai bhaigakamu aapimï xi mai ojodatai buidïrï gukiba go soimaaxi. Ipïrhidi aatïmï sai kïïga bhai ïrhiarakïdï

¹² aagidiña aapimï Diuxi sai kïïga bhai gïn ïrhidi ïgaikïdï. Sai bhai gïn ïrhidiña aapimï tudu Diuxikïdï maatïkatai sai ïgai ka bhai gïr dui sai biakana aatïmï bïïxi ixtumaxi bia Diuxi gïr bïïtarï. Aatïmï gïr bïïtarï tudu ix makïdï kaxi ïr maamaradï. Aatïmï ix makïdï kudagiïrï dukai óídaga ïïgiditai ixtumaxi ïr buaboi tudu.

¹³ Diuxi ïgai dai kïïgakïrï gïr bubaitu abhiadïrï xako tukamugan duu gatïanïitai go diabora ami dai gïr daibuintu ïgai xako gatïanïi Diuxi Maradï ix makïdï Diuxi oigïdai. Xibi ka kudagiïrï dukai óídaga aatïmï tudu gïr tïanïitai ïgai.

¹⁴ Diuxi Maradï tudu ïgai dai daxi namïgadï go kïïgakïrï bubaidaragai gïr bïïtarï dai kaxkïdï gïr oigïrhi Diuxi gïr soimaaxkamiga.

Mai tipu xorai ïpïan dukamikagi Suxi Kristo

¹⁵ Daiñi, tomarhi ïmo odami mai nïidi Diuxi. Dïï gia Suxi Kristo dai Diuxi ïpïan tutuiga dai gïgïrioma ïgai xi bhai xi bïïxi ixtumaxi idui ïgai. Dai Suxi Kristo gïr tïtïgidi ix tuiga Diuxi. Ïgai ïr Diuxi Maradï dai ka ïkioñdïrï oidakatadai mai kia tipukatai ïma maaxi ixtumaxi.

¹⁶ Suxi tudu bïïxi idui ixtúmaxi. Bïïxi idui ïgai ixtumaxi oidaga tïbagiana dai tami oidigi daama ïpï. Idui ïgai ixtúmaxi maaxkana odami bïïtarï dai ïpï ixtumaxi mai maaxi. Idui ïgai asta go tïtïanïdami dai go dudunukami dai go gupudagai bipiakami bïïxi. Suxi Kristokïdï idui Diuxi bïïxi aïkatai tudu dai Suxi Kristo bïïtarï idui gobai.

¹⁷ Suxi Kristo kaxi oidakatadai aidïxi mai kia tipukatadai ïma maaxi ixtumaxi dai ïgai mai daadagitoi xi todian dukai ugitiagi bïïxi ixtumaxi ïpï.

¹⁸ Aatïmï buaboitudadami ïr tukugadï duki Suxi Kristo dai ïgai ïr gïr moo. Ïgaiñdïrï tudu bhïjïi aatïmï gubukarhigai ixtukïdï óídaga aatïmï. Kaxkïdï tudu ïgai ïr Maradï Diuxi dai ïr ïpïgadï ix makïdï gï duakatu gokiïrï xi muu dai ka mai mukia agai ïpamu tomarhi ïmo imidagai. Ïgai tudu bïïxi adaama gatïanïda agai.

¹⁹ Daiñi, Suxi Kristo ïr Diuxi Maradï. Dai Diuxi bhai ïrhi sai Suxi Kristo maaxitudana go óídakami buitapi xorai Diuxi dai kaxkïdï otoi ïgai tami oidigi daama. Suxi Kristo kïïgakïrï ïr Diuxi tudu dai kaxkïdï kïïga maaxiturhi ïgai ix tuiga Diuxi.

²⁰ Daiñi, ïki aidïxi soimaaxi idui go Adán, ïkobai bia ïgai bïïxi ixtumaxi oidaga Diuxiañdïrï. Dïï gia Diuxi bhai ïrhi sai Maradï ïpamu bhai duñagi ixdukatai bïïxi aïkatai dakagi Diuxi ïmadï ïpamu. Dai kaxkïdï Diuxi Maradï muu kuruxiana aaxtakai ïradï ami dai podukai bhai dui bïïtarï bïïxi ixtumaxi oidaga. Mai xudu xi ïr ixtumaxi tïbagiïrï xi ïr ixtumaxi tami oidigi daama ïpï. Bïïxi bïïtarï bhai dui ïgai sai ka mai ïkobai dakana Diuxiañdïrï.

²¹ Aapimï ïpï buidïrï bïïtïkatadai Diuxi soimaaxkatai gïn tïgibudaga dai soimaaxi ibuadatai aapimï.

²² Buidïrï bïïtïkamikatadai aapimï Diuxi tudu. Dïï gia Suxi Kristo bhai dui gïn bïïtarï sai podukai ka mai buidïrï bïïtïkana aapimï. Dibia ïgai tami oidigi daama dai bhïiyi ïmo tukugai ïpïan dukai ix makïdï bia aatïmï dai muu ïgai kuruxiana dai ami bhai dui gïn bïïtarï. Dai xibi ka buitapi gïn tutui ïgai Diuxi. Xibi kaxi ïr ïko bubaidadï aapimï Diuxi tudu dai ami Diuxi buitapi guka aapimï mai biakatai ixtukïdï gïpiïrï gïn bupadagi ixtumaxi.

²³ Dïï gia tomaxi ïr buaboi sai Suxi Kristo ka bhai dui gïn bïïtarï bïïxkïrï gï agai xi apia buaboitudada aapimï ixtumaxi ïr buaboi. Kabami abïr gugukada tudu kïïga buaboidaitai ixtumaxi ïr buaboi. Daiñi, aidï abhiadïrï xi tukamïrï kaï aapimï go bhai ïrhiaragai aatagi kïïga bhai gïn ïrhidiña aapimï. Bhai gïn ïrhidiña nïnïrakatai go naana maaxi kïkïïgadukami ix makïdï bia Diuxi gïn bïïtarï. Apia abïr buaboidaitai nïnïraka gobai tudu. Dai maiti abïr gïn dagito xi gin maitiagi ïma maaxi tïgibudagai. Maiti abïr gïn dagito xi tomarhi ïmo ixtumaxi gïn popoidagi gïn bhai ïrhiaraga tudu ix makïdï bhïiyi aapimï xudu tukamidïrï buaboitu aapimï. Daiñi, ix makïdï buaboitu aapimï ïr go galbaaxi bhai ïrhiaragai aatagi ix makïdï gï aiturhi bïïxi go gaa oidigi daama óídakami. Dai Diuxi gin maa sïïrhikami saidi aipakoga aagaiña aanï go galbaaxi bhai ïrhiaragai aatagi ïpï.

Pokaiti go Pabora sai gaatabuayi ïgai soikïda ïrhiditai go buaboitudadami

²⁴ Gin aaduñi Diuxi amadïrï, aanï soimaaxi taatamai xibi ibuadatai ïmo aaduindagai ix makïdï ïr soiñi gïn bïïtarï. Dïï gia tomaxi soimaaxi taatakagi aanï bïïxkïrï bhai gin ïrhidiña aanï maatïkatai sai aapimï gïn bïïtarï soimaaxi taataimi aanï. Daiñi, Suxi Kristo soimaaxi taata go buaboitudadami bïïtarï baasïkioma dai xibi aanï in ajïga xi soimaaxi taatagi go buaboitudadami bïïtarï ïpï ïpïan dukai ïgai.

²⁵ Diuxi gin maa ïmo sïïrhikami tudu saidi gïn pioñiga dukamikagi aanï aapimï buaboitudadami. Saidi ibuada aanï ixtumaxi ïr soiñi aapimï gïn bïïtarï tudu. Gin maa ïgai go sïïrhikami saidi kïïga gïn aituldana aanï go aatagi ix makïdï bia Diuxi bïïxi óídakami bïïtarï. Dai saidi mai gajiadïrï biagi aanï tomarhi ïmo ñoki gïn tïtïgiditai Diuxi ñokidï.

^26-27 Ïkioma Diuxi mai mamaakaiña oigaragai óídakami sai maatïkana go aatagi ix makïdï aipakoga aiturhiña aanï. Dïï gia xibi Diuxi bhai ïrhi xi tïïgidagi gobai bïïxkatai go óídakami ix makïdï ïr ïkobai bubaidadï ïgai. Dai ami ajïi aapimï buaboitudadami ix makïdï maiti ïr judidiu ïpï. Diuxi ipïrhi xi gïn tïïgidagi tudu sai Suxi Kristo gïn ïrana oidaga. Dai kaxi gïn ïrana oidakatai Suxi Kristo gokïdï kaxi gï maatï sai kïïgakïrï óídakamu aapimï dai sai kabami biakamu aapimï xadutudaragai tïbagiana.

²⁸ Aipakoga aiturhiña aatïmï go aatagi aagaitai Suxi Kristo tudu. Aagdiña aatïmï bïïxi óídakami. Diuxi ïgai dai gïr mamaakai tïgibudagai ix dukatai aagidagi aatïmï odami dai podukai gatïtïïgidiña aatïmï ñoki. Ipïrhidi aatïmï sai bïïna darakagi ïgai Suxi Kristo sai podukai mai biïgakagi ïgai tomarhi ïmo ixtumaxi sai kïïgakïrï nïijada Diuxi xïïxkadï ami buitapi gukakagi ïgai. Kaxkïdï gatïtïïgidiña aatïmï ñoki bïïxi óídakami.

²⁹ Dai kaxkïdï ïpï tomaxi xijiakan taadakagi bïïxkïrï kabami gin aajagïi aanï dai aatabuayi gin maakaitai Suxi Kristo gubukarhigai.