Hechos 5 - Northern Tepehuan Bible

Go Ananias ïmadï Safira yaatagidi Diuxi Ibhïadï

¹ Dai ami dakatadai ïpï ïmai kïïrhi Ananias tïgidukami dai Safira tïgidukatadai oñigadï. Dai biakatadai ïgai ïmo dïbïrai dai gagara.

² Dai go kïïrhi gatïïgi jaa tuminxi go ojotoxikami dai jaa tuminxi ïïgi gï bïïtarï bia. Dai pokaititadai xi bïïxi gatïïgi ïgai namïgadï go dïbïrai. Dai aduñdï pokaititadai ïpï.

³ Daidi go Piduru itïtïdai aidï, —¿Aapi Ananias tuipïxi bhïiyi Diabora tïgibudadï? Kaxi yaatagidi aapi Diuxi Ibhïadï dai ïïgi gï bïïtarï bhïiyi aapi chïki go tuminxi go dïbïrai namïgadï.

⁴ Aapi gï tuidagatadai go dïbïrai ¿aba? Dai aidïxi gagaara aapi go dïbïrai, ¿Mai ix aapi gï tuidagatadai go tuminxi ïpï? Kaxkïdï kïïga biakatadai aapi sïïrhikami ïïgi ix duña ïrhiada aapi bïïxi go tuminxi. ¿Tui pïxi aidï pomaaxi yaatagïi aapi? Yaatagidi aapi Diuxi mai xu aatïmï di— itïtïdai Piduru.

⁵ Dai go Ananias amaxi gïi dai muu mos kaïkai go ñoki. Dai kabami duduadimu go jaa odami kajiomakai ix tumaxi pobïduitadai.

⁶ Dai dada gïgïrhi dai bhïiyi dai kïï bhixa tukugadï go mukiadï dai bhïkai dai yaasa.

⁷ Bhodïrï abhiadïrï parï baika horakïdï ami baa Ananias oñigadï xako dajatadai Piduru. Mai maatïkatadai ïgai ixtumaxi pobï gï duitadai kunadïkïdï.

⁸ Taidi go Piduru itïtïdai, —Gin aagidañi, ¿Go kakikïdï mïx gagara go dïbïrai?— itïtïdai Piduru. —Ïjï, go kakikïdï— itïtïdai go oki.

⁹ Daidi go Piduru itïtïdai aidï, —¿Ix tuixidï pomaaxi gïn tïïtïitoi aapi ïmadï Ananias dai pomaaxi yaatagidi Diuxi Ibhïadï? Kiidañdïrï imïi gïgïrhi ix makïdï bhïkai gï kuna dai yaasa. Dai xibi aapi gï bhïkia agai ïpï— itïtïdai go Piduru.

¹⁰ Daidi mos gïi ïgai dai abhaxi muu abhana go Piduru ïïkasodï . Dai bhodïrï bapai go gïgïrhi dai tïï go oki mukiadï dai busaitu dai mïï yaasa kunadï abhana.

¹¹ Dai sïïrhikïdï duduadimu bïïxkatai go buaboitudadami ïmadï go gaa maigobai kajiomakai ix pomaaxi daibusai.

Go ojotoxikami duduadi mui kokokoñiadï

¹² Dai Diuxi soikïiña go ojotoxikami saidi ïgai ibuadana naana maaxi ixtumaxi odami saagida ix makïdï ïïgi Diuxi ixtutuidikïi xi buadagi. Dai mos ïmo gïn aadunumïkana go buaboitudadami dai gïn ïmpaidiña go gïï kiupiïrï xako Salomón Portarhigadïrï tïgidu.

¹³ Dai go gaa óídakami ami Jerusalenïrï ïbhïiditadai xi gaurabagi ïgai tomaxi gia kïïga ñokaiña ïgai bïïtarï.

¹⁴ Dïï bïïxkïrï kïïga mui kïkïïrhi ïmadï oki buaboitudaimi Gïr Nukadakami dai biïna ïgai go gaa buaboitudadami.

¹⁵ Dai go ojotoxikami mui duduadi kokokoñiadï. Xi kaxkïdï odami kayana bubaidiña kokokoñiadï dai bapakoxiïrï xiïpï sosoayïrï daama dadasaiña sai tomaxi mosïkaxi Piduru ïïkagidï aiyagi miadïrï daibunukai ïgai.

¹⁶ Mui odami daibuiña jaa arhi kiikiañdïrï miadïrï Jerusalen dai baidi ajiopaiña kokokoñiadï ïmadï jaa ïpï ix makïdï biakana Diabora tïtïañikarudï dai bïïxkatai duduadaiña.

Gïn buitu go Juan ïmadï Piduru

¹⁷ Daidi go bhaitï kïakami daxdadami judiu ïgamu go ojotoxikami bui. Dai go saduseos ix makïdï urabakatadai go bhaitï kïakami ïgamu ïpï. Tïï ïgai xi go odami ojoidi kaïkatadai atagidï ojotoxikami dai kaxkïdï kabami ïgamu ïgai.

¹⁸ Dai bui ïgai go ojotoxikami dai maamaixa.

¹⁹ Dïï aidï tukarï dibia ïmo Diuxi tïañikarudï dai kukupioka kuukuparagadï go maixakarui dai bubaitu go ojotoxikami daidi itïtïdai,

²⁰ —Imiburai go gïï kiupiïrï dai aagida odami ix dukatai kaatï idi tïgibudagai utudukïdï ixtukïdï kïïgakïrï óídakagi odami— itïtïdai.

²¹ Daidi go ojotoxikami oton ïïgi dai xadiko ïïki baapa go gïï kiupiana dai ami gaatagiditadai ïgai odami. Baidi go bhaitï kïakami dadaxdadami judidiu ïmadï ix makïdï urabakatadai ïgai pobï gïn ïrhiditadai ix kia maixakaruana darajatadai go ojotoxikami daidi idui ïmpaiñdaragai ïmadï go bhaitï gukakamigadï judidiu. Dai bhodïrï otoi ïgai sandadaru sai buapana go maamaixapikïdï.

²² Daidi go sandadaru mai tïï go ojotoxikami maixakaruana,

²³ dai ïpamu aa surhi dai mïï aagidi go bhaitï gukakami daidi itïtïdai, —Kïïga kuukupiñi kuukuparagadï go maixakarui dai buidïrï guka go sandadaru dai nukada. Dïï mos aidïxi kupioka aatïmï kuuparadï mai tïï aatïmï tomarhi ïmoko go ix makïdï gïr tïjai aapimï buaparagai— itïtïdai go sandadaru.

²⁴ Daidi kapitañigadï go gïï kiupiïrï sandadaru ïmadï go gaa bhaitï gukakamigadï judidiu aipako gïn tïkakai daidi ikaiti, —¿Xi gï duñimu xibi?— ikaiti.

²⁵ Tai amaxi dibia ïmo kïïrhi daidi itïtïdai, —Mïï gïï kiupiïrï guka go kïkïïrhi ix makïdï maamaixa aapimï dai gamamaakai ñoki— ikaiti go kïïrhi.

²⁶ Daidi kapitañigadï go gïï kiupiïrï sandadaru jii ïmadï sandadarugadï dai bua. Dïï go sandadaru arhiï ïbhïiditadai go óídakami xi maikarsagi ïgai xi mos kïï bhaidukai bai ïgai go ojotoxikami dai mai soi buimi.

²⁷ Bua ïgai dai go bhaitï gukakami bui tuutui baidi go bhaitï kïakami daxdadami potïtïdai,

²⁸ —¿Maiti ix gïn dáí aatïmï mïsai ka mai aagaiña Suxi Kristo ñokidï?— itïtïdai. —Dïï mos aapimï bhaiyoma aiturhi gïn aatagi bïïxi aipako Jerusalenïrï óídakami buitapi. Dai gïpiïrï gïr susurhigai aapimï gïn aatagikïdï ïpï. Pokaiti aapimï sai aatïmï ïr gïr duñi ix gï muatu go Suxi agaikïdï di— ikaiti go bhaitï kïakami daxdadami.

²⁹ Daidi go Piduru ïmadï go gaa ojotoxikami aa noragi ñokidï go bhaitï kïakami xadutudikïdï daidi itïtïdai, —Diuxi ñokidï bamioma namïga xi ñokidï odami. Gï agai xi ïgiada aatïmï Diuxi ixtumaxi gïr tïjai dai mai xu xi ïïgiada aatïmï odami ix tumaxi gïr tïanïdagi.

³⁰ Daiñi, aapimï gatïjai kuruxiana xixaragai go Suxi dai podukai mua. Dai gïr Diuxi ix makïdï gïr ïïki aduñi xadutudaiña ïpamu duakaturhi ïgai.

³¹ Dai Diuxi baidi jii go Suxi tïbagiamu dai sïïrhixapadïrï dáí saidi ïgai ïr gatïanïdamikana daidi ïr kïïgakïrï gïr bubiadamikana. Podukai idui Diuxi sai ïma dukai gïn tïtïgitona aapimï judidiu baidi podukai gïn oigïldana Diuxi gïn soimaaxkamiga.

³² Dai aatïmï ïmadï Diuxi Ibhïadï ïr aagadami ixtumaxi dui Diuxi aidï. Dai Diuxi otoi Ibhïadï saidi abhana dakana odami ix makïdï ïïgida kaïkana Diuxi— ikaiti go Piduru.

³³ Daidi go bhaitï gukakami kabami bhakoi kaïkai aatagidï go Piduru dai koda ïrhiditadai ïgai ïmadï bïïxi go gaa ojotoxikami.

³⁴ Dïï ami ïmpaiñdaragïrï dakatadai ïmo kïïrhi Gamaliel tïgidukami. Ïgai ïr ïmo fariseo daidi ïr maatïtuldiadami Diuxi sïïrhikamigadï. Dai odami kïï xadutudaiña ïgai. Daidi kïkiba ïgai mobai ïmpaiñdaragïrï dai gatïjai bubaidaragai lachi go ojotoxikami.

³⁵ Dai bhodïrï potïtïdai ïgai go gaa bhaitï gukakami, —Kaïkabïrai gin aaduñi judidiu, gï agai xi kïïga gïn tïgito nïida mïx duñagi idi kïkïïrhi.

³⁶ Daiñi, kïï maatï aapimï ix baasïkioma oidakatadai ïmo kïïrhi Teudaxi tïgidukami. Dai pokaititadai ïgai saidi ïr ïmo gïïdukami gubukadagai biakami dai maako ciento kïkïïrhi urabatadai ïgai. Dai bhodïrï gï muatu ïgai. Dai ix makïdï oidatukïitadai mos aipako iji dai amaxi ukami ayi aaduindadï go Teudaxi.

³⁷ Dai gokiïrï oidakatadai ïmai kïïrhi pomaaxkami ïpï. Ïgai oidakatadai aidïxi dudunukami ïkalditadai óídakami. Dai ïgai Udaxi tïgidukana. Galileana oidakamikatadai ïgai. Dai abïnaki ïgai mui odami sai bui surhigïna go gobierno. Daidi ïgai gï muatu ïpï bai bïïxkatai ix makïdï oidatukïitadai bïïxi aipakoga iji ïpï.

³⁸ Kaxkïdï aanï aagai xibi mïsai dagitona idi mamaatïrdamigadï Suxi. Maiti abïr oiñada gobai. Xi ïr odami aaduindadï gobai aidï gia ugiti antaada gobai.

³⁹ Dïï ix ïr Diuxi aaduindadïka gobai aidï gia xadïrï ixtutuidïna aapimï xi sobhidagi. Gïn tïgito abïr nïida tudu, tadu bui surhi aapimï Diuxi— itïtïdai go Gamaliel.

⁴⁰ Dai go bhaitï gukakami bhai aa ixdukatai agaitadai go Gamaliel. Dai báí ïgai go ojotoxikami dai gatïjai gïikarsaragai dai daidi ïgai ix ka mai ñokaiña go Suxi bïïtarï. Dai bhodïrï dagito sai iimïna.

⁴¹ Daidi go ojotoxikami bubuaka abhiadïrï xako darajatadai go bhaitï gukakami dai kïï gïn bhai gïn ïrhiatugai ïgai soimaaxi taatakai Suxi bïïtarï.

⁴² Dai bïïx tasai go ojotoxikami aipakoga gamaatïturhiña odami. Maatïtuldiña ïgai go gïï kiupiïrï Jerusalenana dai modukai kiikiïrï. Aagaiña ïgai go bhai ïrhiaragai aatagi. Dai pokaitiña saidi go Suxi ïgai daidi ïr Diuxi Otosadï Gïr Bhaitï kïakamiga.