Hechos 3 - Northern Tepehuan Bible

Piduru duadi ïmo kïïrhi mai aimïrdami

¹ Ïmo imidagai go Piduru ïmadï Juan ka aijimitadai go gïï kiupai Jerusalenïrï. Ka ayitadai kaduku xi gamamaadaitadai go judidiu, koi gïsïkai tasai ïxi.

² Dai bïïx tasai ami dadaïjïiña ïmo kïïrhi ix makïdï arhidukatai abhiadïrï maiti ixtutuidikïiña xi aimïrdagi. Jaa odami ami kiupiïrï buapaiña go kïïrhi dai kuuparana Kïï Tiodikïdï agaikïdï abhai bipiaiña bai tanïna ïgai soiñi odami ix makïdï ami bapakïi.

³ Ka karhioga bapaki agaitadai go Piduru ïmadï Juan bai go kïïrhi mai aimïrakïdï tïï dai gatáí tuminxi.

⁴ Daidi Piduru ïmadï Juan tïgito nïidi go kïïrhi aidï dai Piduru itïtïdai, —Gïr buidïrï inïnïaba— itïtïdai.

⁵ Dai go kïïrhi ïïgidi Piduru ñokidï dai bui nïnïaba poïrhiditai ix oida agai ixtumaxi.

⁶ Dïï go Piduru mos potïtïdai, —Maiti an bia tuminxi dïï gia ïma maaxi gia gï maakimu aanï— itïtïdai. Dai bhodïrï itïtïdai, —Kïkibañi dai aimïrada gubukadadïkïdï Suxi Kristo go Nasaretañdïrï oidakami— itïtïdai Piduru.

⁷ Bhodïrï go Piduru ïkadïañdïrï bhïiyi go kokoadï sïïrhixapadïrï ïkadï dai bañigi. Tai bhobaxdïrï gubukatu ïïkasodï.

⁸ Dai ka mos tuarhi daa ïgai dai kïkiba. Dai kaxi aimïrai ïgai dai baa kiupiïrï ïmadï Piduru dai Juan. Dai ami apia tuarhi dadaimi ïgai aimïraitai. Dai kïïga ñokimi, aagaiña xïï kïï tuiga Diuxi.

⁹ Dai bïïxkatai ix makïdï ami daraka nïidi go kïïrhi xi ka aimïrai dai kaï ix aagaiña xïï kïï tuiga Diuxi.

¹⁰ Dai ka mai tïï odami ix dukatai gïn tïtïïgitoagi tïïgakai ix ka duayi ïgai. Kïïga mai ïgai go kïïrhi xi ïgai baa dai dadaïjïiña dai gataanïiña soiñi ami Kïï Tiodikïdï kuuparadïrï kiupai.

Piduru gamaa ñoki go gïï kiupiana Jerusalenïrï

¹¹ Dai bhodïrï ka kiupiïrï bapakïkai go Piduru ïmadï Juan sai ayi ïgai portarhiïrï xako Solomon portarhigadï tïgidu. Dai go kïïrhi ix makïdï duayi dagï imïi Piduru baasaradïañdïrï. Maiti ipïrhiditadai xi dagitoagi. Dai go odami mos apia kia mai tïtïïgai ix dukatai gïn tïtïïgitoagi dai gamo boopoi dai nïida agai go ix makïdï ka duayi.

¹² Daidi go Piduru tïïgakai ix gïn ïmpagi mui odami daidi tïtïdai, —Gin aaduñi, aapimï Israelïrï óídakami tudu ¿Tuixi mos ïï kabami gïr nïnïidi aapimï? ¿Poïrhidi mïxi xi kaban gupuka aatïmï xi ïpï kïïga tutuiga aatïmï Diuxi bui dai ïïgi gïr gubukadagakïdï duadi aatïmï idi kïïrhi?

¹³ Cho, bhaiyoma Suxi gubukadadïkïdï duayi gobai— ikaiti. —Daiñi, gïr aaduñi ïïki buaboitudaiña Diuxi, go Abraam dai Isaak dai Jakobo tudu. Dai xibi Diuxi gïr tïïgi ix xïïxi ïr gubuakami Suxi gï maara. Dai aapimï tïïgi go Suxi go gïï dunukami Pilato. Dai tomaxi Pilato ka dagito agaitadai go Suxi xi imiagi aapimï mos apia gïpiïrï buapaimitadai.

¹⁴ Mai aagidi aapimï go Pilato ix dagitomudai ïgai go Suxi tomaxi ïgai kïïga ïïgidiña Diuxi dai kïï sïïrhiñikatadai tïgibudadï. Aapimï aagidi go Pilato ix bhaiyoma dagitona ïgai ïmo gamuakami.

¹⁵ Podukai mua aapimï go ix makïdï gïr maakai gïr iibhïdaga. Mua aapimï dïï Diuxi duakaturhi ïgai dai aatïmï ïr nïijadami ix duaka ïgai— ikaiti.

¹⁶ Dai apia gamaakai ñoki go Piduru daidi ikaiti, —Aapimï kïï maatï idi kïïrhi ix makïdï ïr kokoadïkatadai. Daiñi, ïgai baa Suxi gubukadadïkïdï duayi idi kïïrhi. Kïïga buaboitu gobai kaïkai ix aagai aatïmï gubukadadï Suxi dai mos kïï buaboidakai duayi gobai. Dai aapimï ka nïidi ïpï— itïtïdai.

¹⁷ Dai Piduru apia kia oidi gï ñoki daidi ikaiti, —Gin aaduñi kïïga maatï aanï xi tomarhi aapimï tomarhi gïn bhaitï gukakamiga mai kïïga maatïkatadai xorai ïr Suxi kaxkïdï bhïiyi aapimï dai gatïjai muaragai.

¹⁸ Ïïki ka podukai ojixikami bia bïïxkatai go Diuxi ñokituldiadami. Dai xibi ka buaboi busai gobai dai soimaaxi taata Diuxi Otosadï Gïr Bhaitï Kïakamiga.

¹⁹ Kaxkïdï abïr ïma dukai gïn tïtïïgito aapimï dai ïmai boi bhïiyi, Diuxi amajako tudu. Buaboitudabïrai Diuxi bai ïgai buanadagi bïïxi gïn soimaaxkamiga ix makïdï ibuayi aapimï Diuxi bui. Aidï gia Diuxi Gïr Nukadakami gïn bhai gïn ïrhiatudamu.

²⁰ Dai ïpamu bhai gobai gïn otosdamu go Suxi. Ïgai tudu ïr Diuxi otosadï. Dai Diuxi kaxi ïkiaxdïrï dáí ïgai saidi ïr aapimï gïn bhaitï kïakamigakana— itïtïdai.

²¹ —Dïï gï agadamu kia ix tïbagiïrï biyagi go Suxi asta xïïxkadï Diuxi utuduturhi bïïxi aïkatai ixtuma oidaga. Podukai tudu oja go ñokituldiadamigadï Diuxi ïïki. Kïïga ïïgidi ïgai Diuxi dai oja tudu.

²² Dukami go Moiseskaru ïr ñokiturhiña Diuxi ïïki. Dai ïgai adukai oja ïgai, Otosamu Diuxi ïmoko gïn pipiixara xi ïgai ïr ñokituldiadamigadïka agai Diuxi gin ïpïandukami. Kïïga abïr ïïgida kaïka ïgai tudu.Ïgai ïr Diuxi otosadï ka agai gin ïpïandukami. ikaiti go Moises ojadïrï.

²³ Xorai mai ïïgida kaïkagi ñokidï Diuxi Otosadï, ïgai gïn kodituda agai dai maiti ïr aaduñdï ka agai Diuxi, podukai tudu oja go Moises ïïki— ikaiti go Piduru.

²⁴ Dai kia aatagai ïgai daidi kaiti, —Ïïki oidakatadai ïmai ñokituldiadamigadï Diuxi ïpï. Samuel tïgidu ïgai. Ïgai ïkiaxdïrï aagai ixdukatai pogïduña agaitadai xibi ïpï. Dai aidï abhiadïrï xi oidakatadai go Samuel, bïïxkatai go ñiñokituldiadamigadï Diuxi aagaiña idi ïpï ix makïdï ïpïbuimi xibi tuigako.

²⁵ Aapimï judidiu gïn bïïtarï tudu go ñoki ix makïdï Diuxi bïïxi gï ibhïdagakïdï aagidi gïr aaduñi ïïki. Diuxi itïtïdai gïr aaduñi Abraamkaru aidï, Aanï bhai ïrhiatudamu bïïxi odami oidigi daama oidakami aapi Abraam gï piipixarakïdï itïtïdai Diuxi aidï. Aapimï judidiu gïn agaitadai Diuxi gobai ñokikïdï tudu. Aapimï ïr piipixaradï bïïxi go ñiñokituldiadamigadï Diuxi kaxkïdï.

²⁶ Dai kaxkïdï ïpï bhai gobai gïn saagida otoi Diuxi mos duakatuldakai Maaradï bai biakana aapimï ïmo gïdukami bhai ïrhiaragai gïn abhana dagitokai gïn soimaaxkamiga ixtukïdï soi buididi aapimï Diuxi. Mos duakatu go Suxi bai otoma bhai gobai gin otoi Diuxi tudu saidi aapimï ïpïgioma gïn aiyagi go bhai ïrhiaragai— ikaiti Piduru.