Hechos 28 - Northern Tepehuan Bible

Ix tumaxi ïpï dui Maltana

¹ Dai kïïgakïrï bubuakïkai aatïmï, go óídakami gïr aagidi xi Malta tïgidu ami. Xikorhimadikami sudagi ami oidigi.

² Dai kïïga tutuiga ami óídakami. Ïïpidikatadai oidigi aidï dai dukuitadai xi gïïpi ganai ïgai dai gïr miadïgi sai ukadana aatïmï tai.

³ Daidi Pabora bui chïki kuagi dai taiyïrï tuajaimi baidi busai ïmo kooyi kuagiañdïrï toiñdakai gobai dai nobidïrï kïi dai ka mos abhai nobiañdïrï nagiïjï kïïkai.

⁴ Daidi go óídakami ikaiti aidï nïiditai ix kïitadai go kooyi, —Idi kïïrhi gia ïr buaboi xi ïr gamuakami. Daiñi, tomaxi kïïgakïrï busai gobai sudagiañdïrï Diuxi tomax dukai mai dagitomu ix apia oidakagi gobai— ikaiti.

⁵ Dïï Pabora mos gigigi ïkadï dai taiyïrï gïi go kooyi. Dai Pabora mai xïï gï dui.

⁶ Bïïxkatai ami darakïdï mos nïnïrakatadai ix baiguguagi xiïpï mukiagi todian dukai. Bhai lachi nïnïra ïgai dai mai xïï gï dui ïgai bai ïma dukai gïn tïtïgito ïgai dai xibi ka pokaitiña saidi Pabora ïr ïmo diuxi.

⁷ Dai mai xii mïkaxi abhiadïrï oidakatadai go tïanïdami ami Maltaïrï. Ïgai Publio tïgidu. Dai kïï bhai dukai gïr bapaidi ïgai xi gamo iimïna aatïmï dai xioma daraja aatïmï baika tasai ami kiidïrï ïgai.

⁸ Daidi ogadï go Publio kaatïkatadai oiditai toiñdagai ïmadï bhitabigai. Baidi Pabora baa xako kaatïkatadai ïgai dai ami gaataga Diuxi ïmadï dai bhodïrï kokoadï daama darai ïgai gï noonobi dai go kokoadï duayi aidï.

⁹ Daidi go óídakami ami kajioma ix Pabora duaditadai ïgai daidi go gaa kokokoñiadï ami Maltaïrï óídakïdï daibuiña dai bïïxkatai duduayi ïpï.

¹⁰ Kïïgakïrï gïr tïï ami óídakami aidï dai naana maaxi gïr maa oidaragai. Dai gokiïrï aidïxi ka iimi aragaitadai aatïmï gïr maa ïgai kuadagai ixtuma ugia aatïmï ïmai barkoïrï iimïkai ïpamu.

Pabora ayi Romïrï

¹¹ Baika masadai bii aatïmï Maltaïrï dai bhodïrï tïtïsai aatïmï ïmo bakoïrï Alejandreañdïrï imïdami. Ïgai ami Maltaïrï daibuintu toomoko ïpï. Ïgai barko kugïrï gukatadai goka sasanto. Ïmoko Kastor tïgidu dai go gïmai Polus.

¹² Iji aatïmï Maltañdïrï aidï dai ayi Siracusana ukami dai ami gïr urhi baika tasai.

¹³ Bhodïrï abhiadïrï apia iimïi aatïmï kosta sonoana dai ayi Rejiïrï ukami. Dai aidï xadiko gïr ayi ïbïrhi sur amajadïrï dai ïgaikïdï go gïn xadiko ayi aatïmï Poteoliïrï.

¹⁴ Ami tïï aatïmï chïki buaboitudadami dai ïgai gïr báí tïsai ïmadï darakana ïmo ïkaldi. Dai gokiïrï abhiadïrï iji aatïmï Ramamu.

¹⁵ Daidi kajioma go buaboitudadami Romïrï xi ka boiyïrï imïi aatïmï dai ïïmoko ïgai iji dai gïr buidïrï ayi. Jaa gïr ayi ïmo gagarakaroana xako Apio tïgidu dai jaa gïr ayi ïmapïkïrï xako Baika Kokoxikaruana tïgidu. Daidi Pabora mos tïïgakai go buaboitudadami aagidi Diuxi ix kïï bhai gï ïrhidi ïgaikïdï daidi ka gubukan taadatu gï ibhïdaga ïpamu.

¹⁶ Dai bhodïrï ka aïkai aatïmï Romïrï go Pabora ïkobai gï maixatu ïmo kiiyïrï ïkobai dai mai xu go gaa maamaixapikïdï ïmadï. Dai ïmo sandaru nukadakatadai ami.

Pabora gamaa ñoki Romïrï

¹⁷ Dai baika tasaikïdï abhiadïrï xi ayitadai Pabora Romïrï báí ïgai go bhaitï gukakamigadï judidiu sai gïn ïmpaidana. Dai aidïxi kaxi gïn ïmpagi ïgai Pabora itïtïdai aidï, —Gin aaduñi, aanï tomarhi ïmo imidagai soi buididi gïr aaduñi dai bïïxkïrï xadutudaiña aanï gïr bituldaraga ïpï. Dïï tomax dukai gïr aaduñi gin bhïiyi mïï Jerusalenïrï dai gin tïïgi go romanos xi ïgai gin maixa.

¹⁸ Daidi go dudunukami romanos mai tïï tomarhi ïmo soi maaxkami gin abhana. Mai tipukatadai ixtumaxikïdï gin muagi dai kaxi gin dagito ïrhiditadai ïgai.

¹⁹ Dïï go judidiu mai bhai aatadai xi gin dagitoagi go romanos kaxkïdï biakatadai aanï xi gataañiagi oigaragai xi go gïï tïanïdami César ïmadï bhai duñagi go aatagi tami Romïrï. Dïï tomax dukai mai ñokai aanï gin aaduñi bui.

²⁰ Kaxkïdï tudu gïn báí aanï xibi dai gaataga in ïrhidi. Daiñi, aanï buaboitudai ix ka dibia go ix makïdï aatïmï judidiu nïnïrakaiña ïïki abhiadïrï. Xibi burhidi aanï idi kadenakïdï mos buaboitudaitai aanï go ix makïdï ïr Diuxi Otosadï gïr Bhaitï Kïakamiga tudu— itïtïdai.

²¹ Baidi go gaa potïtïdai aidï, —Tami mai taadaga tomarhi ïmo ñoki gï bui. Maiti gïr ayi tomarhi ïmo ojai Judeañdïrï. Tomarhi mai dibia ïmadutai gïr aaduñi mïkadïrï xorai gï bui ñokadagi.

²² Dïï gia kïï maatï aatïmï sai odami toma xakoga bui ñokaiña idi buaboidaragai utudukïdï ix makïdï urabaka aapi. Kaxkïdï ïmo imidagai gï kaïka rïrhidi pïx tumaxi gïr aagidagi— itïtïdai go bhaitï gukakami judidiu.

²³ Dai bhai dui ïgai ixtuigako gïn ïmpaida agai ïpamu. Dai aidï bhai kïïga mui odami gïn ïmpagi ami xako gï urhiñakatadai Pabora. Dai Pabora ïmo tasai gamaakaitadai ñoki kiamoko abhiadïrï tukarï ukami. Aagidimi ïgai ix dukatai tïanïi Diuxi dai aagidimi ïpï ix kaiti Moiseskaru ïki ïmadï go gaa aagadami Diuxi ñokidï. Pabora ipïrhiditadai xi go odami buaboitudagi Suxi Kristo kaxkïdï pomaaxi atagidi.

²⁴ Jaa buaboida kaï aatagidï Pabora dai jaa maiti ipïrhi xi buaboida kaïkagi.

²⁵ Mai ïmo tïgibudagai biakatadai ïgai dai gïn bupui ñokaitadai. Kaxi ïr iimïdamikatadai go odami baidi Pabora itïtïdai aidï, —Gia ïr buaboikatadai ix dukatai Diuxi Ibhïadï aagidi gïn aaduñi ïki. Ïgai aagidi ïmo ñoki go aagadami Diuxi Ñokidï Isaias tïgidukami ïki. Bai go Isaias oja ix kaititadai Diuxi Ibhïadï aidï dai adukai oja,

²⁶ Imïdañi aapi dai potïda go judidiu, Tomaxi mos kaïkatai kaïkana aapimï tomax dukai mai maatï kaï. Dai tomaxi mos nïiditai, nïnïidi aapimï tomax dukai mai maatï nïnïidi.

²⁷ Sïïrhikïdï kapaka momodï idi odami. Kuukupidi gïn naanaka maiti gin kaïka ïrhiditai. Dai iñapidi gïn bupuji ïpï mai nïida ïrhiditai ixtumaxi buayi aanï. Ix mai pomaaxkamudai aapimï aidï gia maatï kaïkamudai aapimï gin ñoki. Dai maatï nïijadamudai ix tuma buayi aanï. Aidï gia gin buaboitudamudai aapimï dai aanï kïïgakïrï gïn bubaidamudai. Potudu kaiti Diuxi Ibhïadï ïïki— ikaiti Pabora.

²⁸ —Kaxkïdï xibi ipïrhidi aanï ix kïïga maatïkagi aapimï judidiu sai xibi bhaitiakoga go ix makïdï maiti ïr judidiu bïïtarï ka agai idi aatagi ix makïdï Diuxiañdïrï imïi. Podukai maatïkamu aapimï sai Diuxi kïïgakïrï bubaidimi odami. Dai ïgai gia buaboida kaïkamu go aatagi— itïtïdai.

²⁹ Mos potïi Pabora baidi go judidiu otoma iji abhiadïrï daidi aipako gïn bupui ñokimi ïgai iimïitai.

³⁰ Daidi Pabora anaaxi bii goka umigi ïmo baaki rentadugamiïrï. Dai ami miadïgidiña ïgai bïïxkatai xorai daibidiña.

³¹ Mai duadimukatai gamaamakaiña aatagi dai aagidiña ix dukatai tïanïi Diuxi dai aatagidiña aatagidï Suxi Gïr Nukadakami ïpï, mai tipukatai xorai daidagi.