Hechos 27 - Northern Tepehuan Bible

Ramamu imi agai Pabora

¹ Daidi go dudunukami bhai dui ñoki xi Italiamu otosa agai Pabora. Ami Italiana tudu bipiïyi Roma. Dai gatïïgi ïgai Pabora ïmo kapitañi sai ïgai nukadakana dai sai baidakana Romïrï ukami. Julio tïgidukatadai go kapitañi ïgai dai baidakatadai jaa mui maamaixapikïdï ïpï dai aatïmï ïpï oi. Go Julio ïr tïanïdamigadï mui sandarugadï go gïï tïanïdami Romïrï oidakïdï.

² Dai tïtïsai aatïmï ïmo barkoïrï Adramitiañdïrï oidakami daidi ïr Asiamako imïdami. Dai ïmo kïïrhi Aristarko tïgidukami gïr oiditadai ïpï. Ïgai ïr Tesalonikïrï oidakami. Go Tesalonika Masedonia oidigïrï bipiïyi.

³ Xadiko Sidonïrï gïr urhi aatïmï. Dai Julio kïïgakïrï nïiditadai Pabora dai dagito sai mïï dibidana ïgai óídakami ix makïdï kïï ïmagi ïgai. Daidi ïgai bhai gïn ïrhiarakïdï miadïgi dai bhibhi.

⁴ Dai bhodïrï barkoïrï iji aatïmï abhiadïrï dai xibi gïr buidïrï imïitadai ïbïrhi xi ïmo padïrï dïgabusai aatïmï go Chipre xako mai xii kabami ajïitadai ïbïrhi. Go Chipre xako dïgabusai aatïmï ïr lachi oidigi xikorhimadikami sudagi.

⁵ Daidi mos sudagi daama sïïrhi iji aatïmï kia dai buidïrï dïgabusai xako Cilicia dai Panfilia tïtïgidu oidigi. Dai bhodïrï ayi aatïmï Lisia oidigïrï ïmo kiikiïrï Mira tïgidukami.

⁶ Ami go kapitañigadï sandaru tïï ïmai barko Alejandreañdïrï imïdami dai Italia amako imïitadai. Italiana tudu bipiïyi go gïï kiiki Roma tïgidukïdï. Dai gïr tïjai ïgai tïtïidaragai ami barkoïrï tïsai Ramamu iimiagi.

⁷ Abhiadïrï xako tïtïsaitadai aatïmï mui tasai mai bhaigakatadai imidagai dai xijaitai ayi aatïmï buidïrï xako Gnido tïgidu. Kabami imïitadai ïbïrhi gïr buidïrï xi ka maiti ixtui aatïmï xi sïïrhi oijadagi imidagai dai ïbhïgidïrï dïgabusai aatïmï xako Kreta tïgidu dai ayi buidïrï xako Salmona tïgidu. Daidi apia kia gïr buidïrï buxtaimi ïbïrhi xi kaxkïdï Salomoñi buidïrï iji aatïmï xako Kreta sobhikïitadai go ïbïrhi. Go Kreta ïr ïmo bïïxi xikorhimadikami sudagi ïpï.

⁸ Kabami xijaimi aatïmï dai oi gïr imidagai barkoïrï dai kosta buidïrï sïïrhi dïgabusai dai ayi xako Buenos Puertos tïgidu. Miadïrï bipiïyi gobai ïmo kiiki Lasea tïgidukami.

⁹ Kaxi arhiï tïbïraimi gïr imidagai dai ka miadaimitadai toomoko. Sïïrhikïdï ïr ïbhïidaraga ami tudu xi imiagi sudagi daama toomoko xi kaxkïdï Pabora maa ñoki go gaa,

¹⁰ daidi potïtïdai, —Gin kaïkabïrai aapimï kïkïïrhi, arhiïxi ïr ïbhïidaragai xi oijada aatïmï gïr imidagai xibi. Tadu soi gï buadagi idi barko modukai ïmadï kusubidï. Dai aatïmï bïïxi bhaiko antaada aidï— ikaiti Pabora.

¹¹ Dïï go kapitañi Julio mai ïïgidi Pabora ñokidï dai bhaiyoma ïïgidi ïgai go barko imibudadami ïmadï soigakami.

¹² Mai xii ïr kïïgaikatadai ix daibundagi go toomoko ami xako burhikatadai go barko xi kaxkïdï bhaitoma bïïxkatai go barkoana iimïdami pobai gïn ïrhiditadai ix xioma ïr kïïgaikatadai ix iimiagi abhiadïrï. Nïida ïrhiditadai ïgai sa bhai ixtutuidikïi ix aiyagi Feniseïrï dai ami daibundagi toomoko. Go Fenise ïr ïmo puerto xako mai xii kabami ajïi ïbïrhi dai ami gïn bupuraiña barkos. Kreta tïgidu ami oidigi xako bipiïyi ïgai.

Xia tui go barko sudagi daama imïitai

¹³ Ka ïbïraitadai ïpamu sur amajadïrï dïï mai xi kabami bai kaxkïdï pobai gïn ïrhiditadai ïgai sai ayimu xako ukami aiya ïrhiditadai. Daidi tïsagi aatïmï go gïï baiñomi ixtukïdï burhikatadai go barko dai bhodïrï iji aatïmï ïpamu dai Kreta kostagadï sonoana sïïrhi dïgabuskimi.

¹⁴ Mos lïïchi iji aatïmï bai gïr ayi ïbïrhi kabami dai Kreta amajadïrï imïi.

¹⁵ Daidi go barko ka maiti ixtui go ïbïrhi bui xi aatïmï mos dagito gobai xi go gïï sudagi ïrana amakoga gïr bhïkana.

¹⁶ Dai ïmo ïmapïkïrï ami xikorhimadikami sudagi Kauda tïgidu tïtai ïbhïgidïrï sïïrhi dïgabusai aatïmï xako mai xii kabami ïbïrai. Go gïï barko tïbaimuka imïi ïmo arhi lancha dai ïbogian dukai tïsagi aatïmï go lancha dai kïï buu xi mai xia gï duñagi ïgai.

¹⁷ Tïsagi aatïmï go arhi lancha aidï dai bhodïrï kïïga buu aatïmï go gïï barko ïpï. Utadïrï daibundi aatïmï tuturopindi dai kabami buu sai soiñana ïgai go barko sai mai xia gï duna. Dai ïbhïimi aatïmï xi gïr bhïkiagi ïbïrhi Sirte amakoga xako komarhi kaatï sudagi laalachi. Ami sudagi uta kaatï orai dai ïbhïimi aatïmï xi ami oratïrï omixagi go barko. Kaxkïdï tïbañi aatïmï go gïï ikuxi ixtukïdï ïbïrhi nïituskïi go barko. Dai mos apia dukai dagito aatïmï xi gïr bhïkiagi ïbïrhi.

¹⁸ Dai xadiko apia ïxi kabami ïbïraitadai xi go odami kaxi gïn aaga sudaïrï surhigai kukuspi xi mai dupiagi go barko.

¹⁹ Dai go gïn xadiko bïïxkatai aatïmï sudaïrï surhigaimi bhaitoma bïïxi go aaduinkarudï go barko.

²⁰ Dai bhodïrï mui tasai mai tïï aatïmï tomarhi tasai tomarhi xixabugai mos ïï kabami imïitai go gïï xiborhiki dukai ïbïrhi. Daidi aatïmï ka mai buaboitudaimi ix kïïgakïrï bubuakiagi.

²¹ Mui tasai maiti gauu aatïmï mosïï xigarhi buadatai go ïbïrhi. Dai bhodïrï go Pabora ñokidi go gaa daidi itïtïdai aidï, —Gin kaïkabïrai aapimï kïkïïrhi, xioma ïr kïïgaikamudai xi gin ïïgiadamudai aapimï baasïki. Aidï gia mai iimimudai aatïmï Kretañdïrï dai mai soi maaxi taatamudai aatïmï podukai xibi. Daidi mai xia gï duñimudai mos ïïki ixtumaxi ïbïrhikïdï ïpï— itïtïdai.

²² —Maiti abïr soi gïn ïrhiada tudu. Daiñi, aanï agai sai mai koi agai aapimï tomarhi ïmadutai. Dïï gia go barko bïïxi naato xia gï duñi agai.

²³ Aanï ïr pioñigadï Diuxi tudu dai tukarï tïï aanï ïmo Diuxi tïañikarudï

²⁴ bai ïgai gin tïtïdai, —Maiti duadikuda aapi Pabora— gin tïtïdai. —Gï agadamu kia xi baan kïkibagi aapi go César, go gïï tïanïdami Romïrï tudu. Diuxi gï oigïdai xi kaxkïdï kïïgakïrï bubuakimu bïïxkatai go ix makïdï gï ïmadï iimïi barkoïrï— gin tïtïdai go Diuxi tïañikarudï.

²⁵ Kaxkïdï abïr bhai gïn ïrhiada aapimï bïïxkatai xibi. Aanï gia buaboitudai Diuxi dai kïïga maatï aanï sai pobai gï duñi agai ix dukatai gin aagidi Diuxi tïañikarudï.

²⁶ Dïï gia go barko gia xia gï duñimu arasakai gobai oidigi no xibhïkai— itïtïdai Pabora.

Bïï naato omi go barko xakoïrï imïitadai Pabora

²⁷ Adriatico tïgidu go gïï sudagi xako iimïitadai aatïmï. Dai aidï tukarï ka aiturhi aatïmï goka ïkaldi xi bïï aipako gïr bhïï aimïrai ïbïrhi. Daidi ïran tukarï go iimibudadami go barko maatï tïï ix ka miadaimitadai sudagi ugidïrï.

²⁸ Daidi ïpïabidi ïgai sudagi xïï tukabaga saidi ïr ïmo kobhai dan bhaibuxtama dan kubarakami metro. Dai bhaitïkioma lïïchi ïpamu ïpïabidi ïgai. Dai xibi mos arhi ïmo kobhai dan kubarakami metro gobai.

²⁹ Daidi gokïdï duduadimu ïgai pobai gïn ïrhidikatai xi xatuidagi go barko arasakai ojodai gïï sudagi ugidana. Daidi go barko gokiamadïrï tïapañi ïgai maakoba bapaiñomi gïgïrdukami dai bïpïtïkami sudaïrï sai kïkibana go barko. Dai bhodïrï mos nïnïraka ïgai ipïrhiditai ix otoma maaxiagi oidigi.

³⁰ Daidi go iimibudadami go barko mos ïïgi kïïgakïrï bubuakia ïrhiditadai dai ka dagito agaitadai go barko. Sudaïrï tïbañi agaitadai ïgai go arhi lancha ïpamu. Ïgaikïdï iimia agaitadai ïgai dai ïxto tïbañimi. Tïapañiadan kaiti ïpï jaa papaiñomi mïï barko kugïrï bhaitïadïrï xi mai kabami mïradagi go barko, dïï maiti ïr buaboikatadai. Tïbañimi ïgai go lancha bhaiyoma.

³¹ Dïï Pabora aagidi go kapitañi Julio ïmadï sandaru daidi itïtïdai aidï, —Ix mai biiyagi idi kïkïïrhi tami barkoïrï aidï mai tipukamu ixdukatai kïïgakïrï bubuakiagi aapimï— itïtïdai Pabora.

³² Daidi go sandaru guikoma tuturopindi ixtukïdï burhidi go lancha dai ka mos sudaïrï gïi gobai.

³³ Dai xarhimodï Pabora daañimi go gaa saidi ugana dai potïtïdai, —Ka ayi goka ïkaldi ix mai dïïka aapimï kuadagai duduadimukatai.

³⁴ Xibi gïn daanïi aanï mïsai ugana lachi dai bhïiyi gubukarhigai xi kïïgakïrï bubuakia aapimï. Daiñi, tomarhi ïmadutai mai xïï gï duñimu xibi— itïtïdai.

³⁵ Mos potïi ïgai dai bhodïrï bhïiyi ïmo tïrhigi pan dai bïïxi go gaa buitapi aagidi ïgai Diuxi ix xïï bhai gï ïrhidi ïgaikïdï daidi bhodïrï saasarai ïgai go pan daidi gauu.

³⁶ Dai bïïxkatai go gaa bhai gïn ïjïrhi daidi gauu ïpï.

³⁷ Goka ciento dan baikobhai dan bhaibuxtama dan naadamikana aatïmï ami barkoana iimïdami.

³⁸ Daidi ka ugakai aatïmï bïïxkatai bai sudaïrï surhi aatïmï go tïrhigi ix makïdï bhaibitukatadai sai xioma mai bïïtïtugaiña go barko.

³⁹ Dai maaxikai oidigi go iimibudadami barko tïï ix ka miadïrï kaatïkatadai oidigi dïï mai máí ïgai ix tïgidu ami. Dïï nïidi ïgai ïmo aki maaxi dai oraga ugidana dai ami imituda agaitadai go barko ix ixtutiadagi.

⁴⁰ Daidi guikoma ïgai go tuturopindi ixtukïdï bupurakatadai go gïgïr bapaiñomi ix makïdï dïbïrapi bïïtï sudagi uta ixtukïdï mai xii kabami mïradana go barko. Mos sudaïrï surhi ïgai tuturopindi guikomakai daidi upai ïgai go tabla ix makïdï ïr bolantegadï dukamikana go barko. Gobai bupurhidikatadai ïpï. Daidi tïka ïrhigi ïgai go gïï ikuxi bhaitïadïrï go bako saidi ïbïrhi imibudana. Daidi podukai ka sudagi ugidï amakoga jii go barko.

⁴¹ Dïï ami sudagi uta kaatïkatadai ïmo arhi gidi orai dai mai xii tukabaga sudagi xi ami oriana ayi kugadï go barko dai kabami saï. Anaaxi bii ïgai dai ka maiti ixtui ix oiñïdagi dai gokiamadïrï mos kabami gïgïbaimi sudagi dai omixaimi.

⁴² Daidi go sandaru karhioga koda agaitadai go maamaixapikïdï aidï. Pobai gïn ïrhiditadai ïgai xi go maamaixapikïdï surhigi agai sudaïrï dai bopi agaitadai aïkai dïbïrapi. Mos kaxkïdï koda agaitadai.

⁴³ Dïï go kapitañi Julio ipïrhiditadai xi kïïgakïrï busiagi go Pabora dai mai dagito mïx kodagi. Dai tïjai ïpï bïïxkatai ix makïdï gïgïxikoi saidi sudaïrï surhigïna ïpïgioma xi go gaa dai aïna dïbïrai.

⁴⁴ Dai go kapitañi tïjai ïpï saidi go gaa bhïiyiña tabla dai go barko omikigadï ïpï xi ami daama iimia ïgai sudaïrï ïpï. Dai podukai bïïxkatai aatïmï kïïgakïrï ayi dïbïrai daama gakikïrï.