Hechos 26 - Northern Tepehuan Bible

Pabora gï kïïsatu Agripa buidïrï

¹ Daidi go Rey Agripa ñokidi go Pabora aidï daidi itïtïdai, —Xibi gï maakai aanï oigaragai xi aa noraidagi aapi ñokidï ix makïdï gïpiïrï gï bupai— itïtïdai. Daidi Pabora tai sïïrhiñtu gï ïka maakakai Agripa oigaragai ix ñokiagi daidi itïtïdai aidï,

² —Aapi Rey Agripa, kïïga ïr ïmo bhai ïrhiaragai gin bïïtarï xi aapi gin kaïkamu xibi aa noraidakai aanï ñokidï go judidiu ix makïdï gïpiïrï gin bupaimi.

³ Aapi tudu kïï maatï bïïxi bituldaragadï judidiu dai bïïxi ixtumaxikïdï gïr bupui ñokaiña aatïmï. Kaxkïdï gï daanïi aanï pïx mai ojodakai gin kaïkagi— itïtïdai.

⁴ —Bïïxkatai go judidiu kïïga maatï ixdukatai oidakatadai aanï arhidukatai abhiadïrï— ikaiti Pabora oiditai aatagidï. —Maatï ïgai ixdukatai oidakatadai mïïka xako busaikami aanï dai ixdukatai oidakana aanï Jerusalenïrï ïpï ka gïrakai aanï.

⁵ Ïïki abhiadïrï gin maatï ïgai tudu. Kïï maatï ïgai xi aanï ïr fariseokana. Dai go fariseos bamioma kïïga ïïgidiña gïr bituldaraga ix makïdï bia aatïmï judidiu dai go gaa mai podukai ïïgidi. Xi ipïlda ïgai kïï gï aagida antaada ïgai xi buaboi aagai aanï xibi.

⁶ Daiñi, Diuxi aagidi gïr aaduñi ïki sai duduakalda agai bïïxi go koidadï. Aanï mos buaboitudaitai nïnïraka xi pobï duñagi gobai ixdukatai Diuxi aagai ïki. Podukai buaboitudai aanï tudu dai mos gokïdï soi gin buididimi gin aaduñi.

⁷ Daiñi aapi Rey, aatïmï judidiu ïr piipixaradï go bhaibuxtama dan goka maamaradï Israelkaru. Dai bïïxkatai aatïmï kïïga xadutudai Diuxi tasïrï dai tukarï ïpï. Mos nïnïraka aatïmï xi ïgai gïr duakatuldagi ïpamu xïxkadï koiyagi aatïmï. Aanï tudu nïnïraka podukai ïpï xi gin duakaldagi Diuxi mukukai aanï dai gokïdï gïpiïrï gin bupai go judidiu— itïtïdai.

⁸ Dai bhodïrï Pabora ñokidi go judidiu daidi itïtïdai, —¿Ix tuixidï aapimï judidiu pokaiti sai mai buaboitudai aapimï ix Diuxi duakaldana koidadï?— ikaiti Pabora.

⁹ Dai bhodïrï Pabora oi aatagidï daidi ikaiti, —Aanï pobai gin ïrhiditadai ïïkioma ix gï agaitadai xi kabami soi buadagi aanï go buaboitudadamigadï go Nasaretañdïrï oidakami, go Suxi Kristo tudu.

¹⁰ Dai podukai idui aanï Jerusalenïrï. Go bhaitï gukakami dadaxdadami judidiu gin maatadai sïïrhikami dai aanï podukai biakatadai oigaragai dai podukai maixatu aanï mui buaboitudadamigadï Suxi Kristo. Dai ïkobïrako xuduku gïn koditudagi ïgai aanï bhai aagaiña xi podukai gïn buadagi ïgai.

¹¹ Dudatai no aïjïiña aanï kikiupaigadïrï dai kabami soi buididiña go buaboitudadami. Gubudakïdï potïtïdaiña aanï sai ïgai itïïna xi ka mai buaboitudai Suxi Kristo. Sïïrhikïdï kïdaiña aanï go buaboitudadamigadï Suxi Kristo tudu dai asta adaimïiña aanï maigobai mïkaxi xako óídaga jaa ïma maaxi ñokadami, dai ami soi buididiña aanï ïpï— ikaiti.

¹² —Ïmo imidagai pomaaxi bïïtarï imïitadai aanï Damasko amakoga. Otosadïkatadai aanï go bhaitï kïakamigadï dadaxdadami. Gin maatadai ïgai sïïrhikami ïmo ojixikamiïrï xi pobuadagi aanï.

¹³ Daiñi aapi rey, boiyana imïitadai aanï parï dan duku ïxi dai tïï aanï ïmo gïï kudagi tïbagiañdïrï kudaidakami. Bamioma kïï kudaka ïgai xi bhai tasai bai ami xikorhi kudaidakatadai ïgai xako imïitadai aanï ïmadï go gaa.

¹⁴ Tïtai bïïxkatai dïbïrapi surhi antai kaï aanï ïmo ñoki Hebreokïdï daidi gin tïtïdai, —Saulo, Saulo, ¿Tui pïxi soi gin buayi? Gï tomituskïi aapi ïïgi pobuadatai. Arhiïxi ïr buirudagai gobai— gin tïtïdai.

¹⁵ Antai aanï potïi aidï, —¿Borï aapi tïanïdami?— antïtïdai aanï. Bai Gïr Nukadakami pobai gin tïtïdai, —Aanï ïr Suxi dai soi gin buayi aapi.

¹⁶ Kïkibañi tudu dai kaïka ixtumaxi gï aagidamu aanï— gin tïtïdai. —Gin maaxitu aanï gï buitapi xibi dai gï dasa in agai xi ïr gin pioñigakagi pai aagada aapi pïx tuma tïï gin nïiditai xibi. Dai ïkobïrakoga gokiïrioma gï tïïgidamu aanï ïpï jaa ixtumaxi ix makïdï aagadamu aapi.

¹⁷ Gï otosamu aanï xako óídaga ix makïdï maiti ïr judidiu. Dai gï nukadakamu aanï xi tomarhi ïgai dai tomarhi go judidiu maiti gï muamu.

¹⁸ Dai tïïgidamu aapi ixtumaxi ïr buaboi bai ïgai dagitona go soimaaxkïdï tïgibudagai tukamukïdï dai oijadana go kïïgadukïdï tïgibudagai ix makïdï ïr kudagi tudu. Sai ka maiti gïn tïanïna go diabora dai Diuxi gïn tïanïna bhaiyoma. Daidi oigïrhixikami bimu soimaaxkamigadï gin buaboitudaitai ïgai dai uraba bimu ïgai Diuxi ïko bubaidadï— gin tïtïdai Suxi— itïtïdai Pabora.

¹⁹ Dai Pabora oi aatagidï daidi ikaiti, —Daiñi aapi Rey Agripa, aanï ïïgidi aidï go ix makïdï tïbagiañdïrï dibia dai gin buitapi gï maaxitu.

²⁰ Daidi aipako aatagidi aanï óídakami. Ïpïgioma jii aanï Damaskamu dai abhiadïrï Jerusalenamu dai bïïxi aipako aatagidi aanï go judidiu xako Judea tïgidu oidigi. Dai podukai ïpï aagidiña aanï go ix makïdï maiti ïr judidiu ïpï sai gï aagai xi ïma dukai gïn tïtïgitoagi dai oijadagi Diuxi. Dai sai kïï bhai maaxkami dukai óídakaiña bai podukai maaxitudaiña ïgai xi gia ïr buaboi xi ka ïma dukai gïn tïtïgito ïgai.

²¹ Mos pomaaxi aatagaiña dai gokïdï kaxi gin bhïiyi go judidiu mïï gïï kiupiana Jerusalenïrï dakatai aanï dai kaxi gin mua agaitadai.

^22-23 Dïï Diuxi kïïga gin soi. Kaxkïdï tami kïïka aanï xibi. Daiñi aanï mos apia ïxi aagidiña bïïxi odami toma xorai ïgai. Gin aatagi mos ïr ïgai baaxi aatagi ix makïdï aagaiña go Moiseskaru ïmadï go gaa aagadami Diuxi ñokidï ïïki. Aagidiña aanï óídakami sai gï agaitadai xi gï muatudagi Kristo ix duu aagai go Moiseskaru. Dai sai Kristo ïr ïpïgadadï ka agai go ix makïdï duaka agai. Dai sai ka duakakai sai bhodïrï aitulda agaitadai go bhai ïrhiaragai ñoki bïïxi óídakami ix makïdï ïr judidiu dai ix makïdï maiti ïr judidiu ïpï. Go bhai ïrhiaragai ñoki ïr ïmo kudaidakaru dukai bïïxi óídakami bïïtarï— itïtïdai Pabora.

²⁴ Mos potïkai Pabora ïïgi gï soiña ïrhiditai baidi go Festo gïgïrï ño daidi ikaiti, —Kaxi pïtiki buirutu aapi Pabora. Ka bhaibitukami nïnïidi aapi ojai dai kaxkïdï gï buirutu ïrhi aanï— ikaiti Festo.

²⁵ Daidi Pabora aa noraidi ñoki aidï daidi itïtïdai, —Maiti an buirutu aanï aapi Rey Festo. Buaboi aagai aanï— itïtïdai.

²⁶ —Tami daja go Rey Agripa tudu, gobai kïïga maatï sai buaboi aagai aanï. Gobai ix makïdï daibusai Suxikïdï maiti pogïdui xako odami mai nïijadagi. Daidi go Agripa kïïga maatï ixdukatai pobï gï dui. Kaxkïdï mai duadimukatai ñokai aanï gobai buitapi— ikaiti.

²⁷ Bhodïrï Pabora aatagidi go Agripa daidi itïtïdai, —Aapi Rey Agripa, ¿Buaboitudai pïxi aapi ojadï go aagadami Diuxi ñokidï? Kïïga maatï aanï xi buaboitudai aapi— itïtïdai Pabora.

²⁸ Daidi Agripa potïtïdai aidï, —¿Mos ïï chïki ñokikïdï ipïrhidi aapi xi bhïiya aanï Suxi Kristo buaboidaradï?— itïtïdai.

²⁹ Daidi Pabora itïtïdai aidï, —Aanï mos ipïrhidi xi buaboitudagi aapi tomaxi gï aagadagi ix gï aagida aanï mui ñoki xi chïki ïpï. Tomax dukai daanïi aanï Diuxi aapi bïïtarï dai go gaa bïïtarï ïpï ix makïdï kaï gin aatagai xibi. Daanïi aanï xi aapimï gin ïpïan dukamikagi buaboitudakai Suxi Kristo. Dïï gia mai daanïi aanï Diuxi xi gïn maixatudagi aapimï ix duu daja aanï— ikaiti Pabora.

³⁰ Daidi bhodïrï kïkiba go Rey ïmadï Festo dai go oki Berenice ïmadï bïïxkatai ix makïdï ami darakatadai.

³¹ Dai ka bubuaka ïgai abhiadïrï dai ïkobai bhai duñagai aatagi daidi ikaiti, —Idi kïïrhi maiti ïr soimaaxi idukami. Mai tipu ixtukïdï tañiagi muaragai dai tomarhi maixatudagi— ikaitimi.

³² Daidi go Agripa itïtïdai go Festo aidï, —Kïïga bhaigakatadai xi dagitoagi idi kïïrhi ix imiagi xi mai potïimudai gobai saidi ipïrhidi mïx baan kïïsagi go gïï tïanïdami Romïrï, go César tudu— itïtïdai.