Hechos 25 - Northern Tepehuan Bible

Pabora aataga ïmadï go dunukami Festo

¹ Aidïpïrï go Festo ayitadai ami Judea oidigïrï. Daidi bhodïrï baika tasaikïdï jii ïgai Cesareañdïrï dai maigo daana ayi Jerusalenïrï.

² Ami go bhaitï gukakamigadï dadaxdadami judidiu ïmadï jaa bhaitï gukakamigadï judidiu aataga ïmadï Festo dai gïpiïrï bupai go Pabora.

³ Dai daañimi ïgai go Festo dai itïtïdai aidï, —Gïr oigïdakai otosda aapi ïmoko sai mïkadïrï Cesareañdïrï buapana go Pabora tanai Jerusalenïrï— itïtïdai. Mua ïrhiditadai ïgai go Pabora boiyañdïrï imïitai tudu dai poduu aagai.

⁴ Daidi go Festo itïtïdai aidï, —Go Pabora maixapi Cesareïrï dai aanï gamo imia in ïrhidi chïki tasaikïdï,

⁵ kaxkïdï aapimï ix makïdï bia sïïrhikami gï aagai xi gin oidagi gamoko. Dai xi Pabora ïr soimaaxi idukami aidï ami gïn kaïkamu aanï baidi aagada aapimï ix tumaxiïrï soimaaxi idui ïgai— itïtïdai go dunukami Festo.

⁶ Bhodïrï amaxi Jerusalenïrï bii go Festo ïpï parï mamaako xi ïpï bhaibuxtama tasai dai bhodïrï ïpamu jii Cesareamu. Dai xadiko baa ïgai xako dudunukami bhai buadana ñoki dai gatïjai mïsai ami buapana go Pabora.

⁷ Daidi mos baa go Pabora baidi go judidiu ix makïdï dadatadai Jerusalenañdïrï bïï xikorhi gukiba. Dai kabami ñokimi ïgai dai gïpiïrï bupaimi tomaxi mai biakatadai ïgai ixdukatai maaxitudagi ix ïr buaboi ix duu aagai ïgai.

⁸ Daidi Pabora ïïgi gï soiña agaitadai dai pokaiti, —Aanï maiti ïr soimaaxi idukami, tomarhi judidiu sïïrhikamigadï bui tomarhi go gïï kiupai Jerusalenïrï kïakïdï bui, dai tomarhi go gïï tïanïdami romano bui ïpï— ikaiti Pabora.

⁹ Daidi Festo itïtïdai aidï, —¿Imia pïx ïrhidi Jerusalenamu xi ami bhai duñagi aanï idi ñoki dai aagadagi ix bhai ïr soimaaxi ibuadami aapi ix cho ïpï?— itïtïdai Festo. Ipïrhiditadai ïgai xi go bhaitï gukakïdï judidiu kïïgakïrï nïijadagi ïgai dai podukai aagidi tudu.

¹⁰ Kaxkïdï Pabora itïtïdai aidï, —Cho daiñi— itïtïdai. —Maiti agai xi imi aanï gamoko. Kaxi gï buitapi kïïka aanï xibi di. Dai aapi ïr dasadï go gïï tïanïdami romano. Tami tudu gï agaitadai xi bhai duñagi idi aatagi. Kïï maatï aapi sai aanï mai soi buididi go judidiu toma lachi— itïtïdai.

¹¹ —Xi ïr buaboikagi xi ïr soimaaxi ibuadami aanï dai ix kaxkïdï gï aagadagi xi gin muatudagi, aanï mai ñokai. Dïï gia xi maiti ïr buaboikagi gobai ixdukatai gïpiïrï gin bupaimi idi judidiu aidï gia tomarhi ïmadutai mai bia sïïrhikami xi gin tïïgidagi ïgai. Kaxkïdï aanï mai imia in ïrhidi Jerusalenamu. Xibi gï tanïi aanï oigaragai bhaiyoma xi go gïï tïanïdami Romïrï daakïdï bhai duñagi idi aatagi— itïtïdai.

¹² Daidi go Festo gaataga jaa ïmadï ix makïdï soikïiña aatagiïrï daidi bhodïrï aa noragi ïgai Pabora daidi itïtïdai, —Kaxi pokaiti aapi pïsaidi ipïrhidi xi go gïï tïanïdami Romïrï bhai duñagi idi aatagi. Kaxkïdï xibi aanï aagai sai go gïï tïanïdami buitapi kïkibamu aapi— itïtïdai.

Go Festo aataga ïmadï go Rey Agripa

¹³ Bhodïrï ka daibunukai chïki tasai ami Cesareïrï dibia go Rey Agripa tïgidukïdï ïmadï gï oñiga Berenice. Ga dibida agai ïgai go Festo dai dada.

¹⁴ Ami bii ïgai chïki tasai Festo kiidïrï baidi Festo aatagidi ixdukatai ïpïbuimitadai go Paborakïdï. Daidi itïtïdai, —Aapi Rey Agripa, ïkioma go dunukami Felix tanai maixapikami bia ïmo kïïrhi Pabora tïgidukami— itïtïdai.

¹⁵ —Dai gokiïrï aidïxi Jerusalenïrï aimïraitadai aanï bai go bhaitï kïakamigadï dadaxdadami judidiu ïmadï jaa bhaitï gukakamigadï judidiu bïïxkatai gïpiïrï bupaitadai go Pabora. Daidi gin aagidi ïgai saidi ïr ïmo soimaaxi ibuadami dai gin tanïi ïgai saidi gïgïbitulda aanï ïgai.

¹⁶ Dïï aanï itïtïdai aidï saidi aatïmï dudunukamigadï romanos mai mos ïgikïdï gatïanïi gïgïbituldagi odami podukai— itïtïdai. —Aagidi aanï sai ïpïgioma gï agaitadai xi gïn bui tutusagi go ix makïdï ïr gïpiïrï bupadami ïmadï ix makïdï gï gïpiïrï bupaitudai bai ïïgi gï soiñagi ïgai— itïtïdai.

¹⁷ —Kaxkïdï mos dadakai go gïpiïrï bupadami ka mai nïnïra aanï bamioma dai mos aidï xadiko baa aanï dudunukami kiidïrï xako gï bhai gï buayi aatagi dai gatïjai aanï mïsai buapana go maixapikïdï.

¹⁸ Aanï pobai gin ïrhiditadai sai go Pabora ïr kabami soimaaxi ibuadamikatadai. Dïï go ix makïdï mïï dada dai gïpiïrï buaja agai mai biakatadai ixdukatai gïpiïrï buajagi ixtumaxikïdï kabami soimaaxkami.

¹⁹ Mos bui ñokaiña ïgai ïïgi gïn buaboidaragaikïdï. Pokaitiña ïgai sai go Pabora mai xadutudaiña gïn buaboidaraga dai aagaiña ïgai ïmo kïïrhi mukiadï Suxi tïgidukami ïpï. Pabora pokaiti sai duaka go Suxi kaxkïdï mai bhai gïn ïrhidi ïgai— itïtïdai Festo.

²⁰ —Kaxkïdï aanï ka mai tïtïïgaitadai ix dukatai iduñagi dai maatiagi ixtumaxi ïr buaboi mos ïï gïn bupui ñokaitai ïgai— itïtïdai. —Dai mos aagidi aanï go Pabora sa bhai mai imia ïrhidi Jerusalenamu xi ami bhai buadagi aatïmï go aatagi.

²¹ Dïï go Pabora ipïrhi xi go gïï tïanïdami Romïrï aagadagi ixdukatai bii agai go aatagi. Kaxkïdï aanï gatïjai sai gï maixatudagi ïgai kia asta xïïxkadï bhaigakagi aanï xi otosagi Ramamu xako daja go gïï tïanïdami— itïtïdai Festo.

²² Daidi go Rey Agripa itïtïdai aidï, —Aanï kaïka in ïrhidi go Pabora aatagidï ïpï— itïtïdai. Daidi Festo itïtïdai aidï, —Xoroko kaïkamu aapi— itïtïdai.

Pabora buitapi gï kïïsatu go Agripa

²³ Xadiko go Rey Agripa ïmadï Berenice baapa ami salonïrï ïmo desfile dukai gïn ïmadï iimïitai mui tïtïanïdami sandadaru ïmadï jaa tïtïanïdami ami kiikiïrï óídakami. Podukai go Rey Agripa ïmadï Berenice gïn maaxitu xïï kïïga ïr gïgïrdukami ïgai. Dai ka bapakïkai ïgai bai go Festo gatïjai mïsai buapana go Pabora.

²⁴ Daidi ka dibiakai Pabora go Festo ñokidi go ix makïdï ami daraja daidi itïtïdai, —Aapi Rey Agripa ïmadï bïïxkatai aapimï tami ïmpaiñdaragïrï darakïdï, tami daja go kïïrhi— itïtïdai. —Idi tudu ïgai dai bïïxi go judidiu Jerusalenïrï óídakami dai Cesareïrï óídakami gïpiïrï bupaimi. Tami dada ïgai dai gïgïr iñakaitai gin tanïi muaragai.

²⁵ Aidïpïrï aanï itïtïdaitadai go judidiu sai mai tipukatadai ixtumaxikïdï gataanïdagi muaragai. Dïï go Pabora ïïgi ipïrhi xi baan gï kïïsagi go gïï tïanïdami Romïrï. Kaxkïdï podukai tïgito aanï ix gamo otosagi.

²⁶ Dai aanï mai maatï ixtumaxi ojidagi go gïï tïanïdami dai aagidagi ixtuma soimaaxkami idukami idi. Kaxkïdï gatïjai aanï mïsai buapana gobai tami dai gïn buitapi kïïsagi. Dai aapi Rey Agripa xioma ipïrhidi aanï xi aapi gatïkakagi ix tumaxi soimaaxi dui gobai nai podukai biakagi aanï ixtumaxi ojidagi go gïï tïanïdami Romïrï.

²⁷ Maiti ïr sïïrhi iñïrhidi aanï ix mos apia dukai otosagi aanï go Pabora mïï go gïï tïanïdamiïrï mai ojidikai ixtumaxi ïr soimaaxi idukami gobai tudu— itïtïdai Festo aatagiditai go gaa ami ïmpaiñdaragïrï.