Hechos 24 - Northern Tepehuan Bible

Go Felix aagada agai sa bhai biakamu gïgïbidaragai go Pabora

¹ Bhodïrï abhiadïrï taama tasaikïdï dibia go Ananias ami Cesareana. Ïgai ïr bhaitï kïakamigadï dadaxdadami judidiu Jerusalenïrï. Dai ïmadï iimïitadai ïpï jaa judidiu bhaitï gukakamigadï ïpï dai ïmadï imïitadai Tertulo tïgidukami ïpï. Go Tertulo ïr ïmo kïï maatï nïijadami go sïïrhikami. Bïïxkatai ïgai mïï buidïrï baapa go gïï dunukami Felix tïgidukami dai gïpiïrï buaja agai go Pabora.

² Mïtai baan kïi go Pabora ami buidïrï go dunukami daidi bhodïrï go Tertulo ñokidi aidï go dunukami gïpiïrï bupaitai ïgai go Pabora daidi ikaiti, —Aapi gïr dunukamiga Felix, kaxi mui umigi xioma óídaga aatïmï gïr tïanïitai aapi. Kïïga bhai gïr ïrhidi aatïmï aapikïdï. Aapi kïïga aatabuayi dai kïïga soikïi gïr aaduñi kaxkïdï gïïpi bamioma kïïga óídaga aatïmï xibi.

³ Bïïxkatai aatïmï maigo óídakïdï bïïx tasai gïr tïgito nïidiña xi kïïga aatabuayi aapi dai bïïx tasai aagaiña aatïmï xïï bhai gïr ïrhidi aapikïdï.

⁴ Sïïrhikïdï kïï tuiga aapi xi kaxkïdï gï daanïi aanï pïsai gïr oigïdakai gïr kaïkagi lachi. Mai xii gïïpi gï bopoida rïrhidi aatïmï tasai tudu.

⁵ Aatïmï ix makïdï tami guka maatï tïï xi idi Pabora mos ïr soi buadami óídakami dai ïr bui kaatïkami ïpï gïr gobiernoga. Mos aipako aimïraiña gobai dai baakoitudaiña go judidiu bïïxi aipako óídakami xi gïn bupui aipako surhigïna muidutai ïgai. Bhaitï kïakamigadï gobai go Nasarenos agaikïdï ix makïdï ïkobai bia gïn buaboidaraga. Buaboitudai ïgai Suxi Kristo go Nasaretañdïrï oidakïdï.

⁶ Dai ïkobïrakoga idi kïïrhi tukurhimada ïrhiditadai go gïï kiupai Jerusalenïrï mai xadutudaitai xi kaxkïdï bhïiyi aatïmï.

⁷ Dïï go komandante Lisias tïgidukami ami dibia dai gubudakïdï gïr popoki.

⁸ Daidi gïr tïtïdai sai xorai gïpiïrï bupadagi idi kïïrhi sai dadana aapi gï ïmadï. Xibi ix tïkakada aapi go kïïrhi kïïga maatïka antaada aapi ix ïr buaboi ix makïdï aagai aatïmï xi idi kïïrhi ïr soimaaxi ibuadami— itïtïdai Tértulo.

⁹ Daidi go gaa judidiu poduu aagai ïpï gïpiïrï bupaitai go Pabora dai aagai sai ïr buaboi ix duu agaitadai go Tértulo.

¹⁰ Dai bhodïrï go gïï dunukami Felix xixigi go Pabora dai maa oigaragai sai ñokada baidi Pabora potïtïdai aidï, —Kïïga maatï aanï ix ïïki abhiadïrï ïr dunukami aapi tanai oidigïrï. Kaxkïdï bhai gin ïrhiarakïdï aapi gï buitapi aa noraidamu aanï idi kïkïïrhi ñokidï ixtukïdï gïpiïrï gin bupaimi ïgai.

¹¹ Xi gatïkakamudai aapi nobai óídakami aidï otoma maatïkamudai aapi sai xibi baasïki ayi aanï amïï Jerusalenïrï dai ami xadutuada gin agaitadai aanï Diuxi. Xibi utudami pogïdui bhaibuxtama dan goka tasai abhiadïrï xi mïï ayitadai aanï.

¹² Dai aanï mai bui ñokaitadai tomarhi ïmadutai ami Jerusalenïrï aidïxi gin tïï idi ix makïdï gin gïpiïrï gin bupai. Tomarhi mai bhakoitu aanï odami go gïï kiupiïrï tomarhi go arhi kikiupiïrï tomarhi ïmapïkïrï ami Jerusalenïrï— itïtïdai.

¹³ Dai Pabora itïtïdai go dunukami ïpï sai, —Idi odami maiti ixtutuidikïi ix busaidagi tomarhi ïmo ixtumaxi ixtukïdï gï tïïgidagi xi ïr buaboi gobai ixtukïdï gïpiïrï gin bupaimi ïgai.

¹⁴ Gia ïr buaboi xi aanï xadutudai Diuxi buaboitudaitai aanï Suxi Kristo buaboidaradï. Go judidiu pokaiti sai maiti ïr buaboi idi buaboidaragai, go buaboidaragai ix makïdï odami Boi aagaiña. Dïï aanï gia buaboitudai dai podukai xadutudai aanï Diuxi ix makïdï gïr aaduñi buaboitudaiña ïïki abhiadïrï. Buaboitudai aanï bïïxi go sïïrhikami makïdï oja Moiseskaru dai ix makïdï oja bïïxi go aagadami Diuxi ñokidï ïïki ïpï.

¹⁵ Idi kïkïïrhi ix makïdï gïpiïrï gin bupaimi buaboidadankaiti sai Diuxi duduakalda agai bïïxi go koidadï tomaxi ïr kïï buañixikami iibhïadï xi ïr soimaaxi buadamikagi ïpï. Aanï podukai buaboitudai ïpï tudu.

¹⁶ Kaxkïdï gaagai aanï ixdukatai oidakagi ixdukai buaboitudai aanï gin ibhïdagïrï xi ïr sïïrhi xi podukai mai xaïradagi aanï Diuxi buitapi dai odami buitapi ïpï.

¹⁷ Chïki umigi mïkaxi aimïraiña aanï xibhïako dai gokiïrï ïpamu ayi aanï Jerusalenana. Buapidi aanï gin aaduñi tuminxi ix makïdï otoxi jaa xibhïadïrï óídakami ïmo soiñi dukai. Ami Jerusalenïrï koda in agaitadai buxtaki ïpï dai daxda in agaitadai ïmo xadutudaragai dukai Diuxi bïïtarï.

¹⁸ Kaxi iduitadai aanï go bituldaragai ix makïdï gïr biturhi Moises dai gokïdï kaxi buañixikami bitadai gin tukuga xadutudaragai bïïtarï Diuxi. Ka daxdimitadai aanï daxdaragai Diuxi baidi gin tïï go ga. Mai kaburhi gukatadai odami ami gin ïmadï dai tomarhi mai bui ñokaitadai aanï ïmadutai.

¹⁹ Asiañdïrï óídakami judidiu ïgai dai gin tïï ami aidï. Ïgai tudu tami dadimudai dai ñokadamudai ix biakagi ixtumaxi gin bui.

²⁰ Dai xibi idi kïkïïrhi ix makïdï tami guka gï aagidamudai ix bhai tïï ïgai ixtumaxi gin bui dudunukamiïrï gukakatai aatïmï Jerusalenïrï baasïki. Mai tïï ïgai ixtumaxi ïr soi maaxi idukami aanï aidï.

²¹ Maatï xi pokaiti ïgai ïpï sai soimaaxi idui aanï aidïxi gïgïrï ño aanï dai potïtïdai aanï go gaa sai, —Aanï buaboitudai sai go koidadï duduakarïi dai mosïï kaxi gobai ñokikïdï gin abhana daituda ïrhidi aapimï gïgïbidaragai tomaxi buaboi aagai aanï— antïtïdai aanï aidï, ikaiti go Pabora ami buitapi go dudunukami.

²² Daidi go gïï dunukami Felix kïïga maatïkana go buaboidaragai ix makïdï Boi agaiña odami, go Suxi Kristo buaboidaradï tudu. Kaxkïdï mos kaïkai ix kaititadai go Pabora ka mai bamioma gatïkakai daidi bhaiyoma potïtïdai aidï, —Nïnïrakamu aanï kia asta dibiakai go komandante Lisias. Aidï gia aagadamu aanï ix dukatai bimu idi aatagi— itïtïdai.

²³ Daidi bhodïrï go dunukami tïjai ïmo kapitañi sai maixakaruana nukadakana go Pabora dïï mai xu ix mos kuupikami dakagi ïgai. Dai aagidi ïpï sai maakana oigaragai xi daibiada aaduñdï xi ïgai soikïda ixtumaxi tïgitokagi ïgai.

²⁴ Dai chïki tasaikïdï ïpamu dibia go Felix dai baidati oñigadï. Oñigadï ïr judiu dai Drusila tïgidu. Dai go Felix otoxi Pabora ñoki saidi dibiana. Daidi Pabora aatagidi ixdukatai gï agai xi buaboitudagi Suxi Kristo.

²⁵ Ga aagiditadai ixdukatai sïïrhi oidakagi dai ix dukatai nukadakagi gï tïgibudaga. Dai aagidi ïpï sai maatigian dukai ayi agai ixtuigako Diuxi aagada agai ix makïdï odami ïgai dai biakamu gïgïbidaragai. Dai duadimu go Felix kaïkatai aatagidï Pabora daidi itïtïdai aidï, —Kïïgadu xibi bïïtarï. Imïdañi. Ïpï daamïrï xudu biakagi aanï tasai gï otosdamu aanï ñoki pïx dibiagi— itïtïdai.

²⁶ Mos ipïrhiditadai go Felix xi Pabora maakiagi tuminxi xi podukai dagitona ïgai xi busiagi maixakaruañdïrï. Dudatai bapaidiña ïgai go Pabora aagaitai tuminxi.

²⁷ Podukai aitu Pabora goka umigi maixakaruïrï. Daidi bhodïrï go Felix gatïïgi gï sïïrhikamiga mïtai dáí ïmai ix makïdï Porcio Festo tïgidu. Dïï mos mai kia gatïïgidakai go Felix ipïrhiditadai ix go judidiu kïïgakïrï gï nïijadagi xi kaxkïdï anaaxi maixakaruana biatadai ïgai go Pabora.