Hechos 23 - Northern Tepehuan Bible

¹ Daidi Pabora bui nïnïaba bïïxi go bhaitï gukakami ix makïdï gïn ïmpagitadai ami daidi itïtïdai, —Gin aaduñi, aanï kïïgakïrï ïïgidiña Diuxi ïïki abhiadïrï. Dai xibi ukami mai buaboitudai aanï gin ibhïdagïrï xi oidakagi ixtukïdï gïpiïrï gin bupadagi jaa Diuxi buitapi— itïtïdai Pabora.

² Daidi go bhaitï kïakami daxdadami judiu mos kaïkai ix kaiti Pabora gatïjai sai ix makïdï miadïrï gukatadai go Pabora gïïgïna tïñidïrï. Ananias tïgidu ïgai ix makïdï gatïjai gïgïdaragai.

³ Baidi Pabora itïtïdai aidï, —Diuxi gï gïgïdamu. Ïma dukai aagai aapi dai ïma dukai ibuayi di. Mobai daiba aapi dai nïida agai ix bhai mai ïïgidi aanï sïïrhikami dai ïïgi mai ïïgidi aapi xibiki. Gatïjai aapi saidi gin gïgïna idi kïkïirhi. ¿Mai ix daidarxi gobai sïïrhikamiïrï?— itïtïdai Pabora.

⁴ Dai go ix makïdï Pabora sonoana guka itïtïdai aidï, —¿Ix tuixidï bui ñokai aapi gobai? Diuxi dasadï gobai daidi ïr bhaitï kïakamigadï go dadaxdadami— itïtïdai.

⁵ Daidi Pabora itïtïdai aidï, —Gin aaduñi, mai maatïkatadai aanï xi gobai ïr bhaitï kïakami dadaxdadami. Diuxi ñokidïrï ikaiti tudu sai, Maiti abïr bui ñokada ïmo bhaitï kïakamigadï gïn aaduñi, ikaiti Diuxi ñokidïrï—.

⁶ Daidi Pabora gï tïgito tïï ix go dudunukami ix makïdï ami daraka ïïmoko ïr saduseo dai jaa ïr fariseo, kaxkïdï gïgïrï ño daidi itïi, —Gin aaduñi, aanï ïr fariseo dai gin oga ïr fariseo ïpï. Dai aanï buaboitudai sai koidadï duduaka agai kaxkïdï gin bua aapimï tanai dai gïn baan kïi— itïtïdai.

⁷ Mos potïi ïgai baidi go fariseos ïmadï saduseos ïïgi gïn bupui ñokimi.

⁸ Go saduseos pokaiti sai mai oidaga duakaragai koidadï bïïtarï. Ïgai mai buaboitudai ix oidaga Diuxi tïtïañikarudï ïpï dai pokaiti ïpï sai mai oidaga óídakami ix makïdï mos ïr ïbïrhi dukai. Dïï go fariseo gia buaboitudai sai oidaga bïïxi gobai. Kaxkïdï gïn bupui ñokimi ïgai.

⁹ Daidi bhodïrï ka mos bamioma gïïgïrï xixorhi ïgai gïn bupui ijiñakaitai daidi ami gasaagida gukiba chïki bhaitï gukakamigadï fariseos ix makïdï ïr maatïtuldiadami go sïïrhikami, daidi ïgai ikaiti, —Aatïmï pokaiti saidi idi kïïrhi maiti ïr soimaaxi idukami. Maatï xi ïmo Diuxi tïañikarudï ñokidi gobai xiïpï ïmadutai ix makïdï mos ïr ïmo ïbïrhi dukai— ikaiti.

¹⁰ Daidi go komandante ka duadimu xi go odami bïïxi naato saasasagi Pabora tukugadï mos ïï bhaakoikatai. Dai gatïjai sandaru sai dadana dai sai gubudakïdï busaidana go Pabora abhai saagidañdïrï dai sai bhïkaiña kuartelamu.

¹¹ Xadiko tukarï Gïr Nukadakami gï maaxitu Pabora buitapi daidi itïtïdai, —Maiti soi gï ïrhiada aapi Pabora. Daiñi, kaxi aatagidi aapi go óídakami Jerusalenïrï gin bïïtarï dai aanï aagai sai aapi podukai aatagadamu Romïrï óídakami ïpï— itïtïdai Diuxi.

Go judidiu gaagai ix dukatai muagi go Pabora

^12-13 Daidi go gïmai xadiko ïïki gïn ïmpagi bhaibitukami gokobhai kïkïïrhi judidiu dai bhai dui ñoki sai mua agai go Pabora. Dai agai ïgai ïmo ñoki Diuxi buitapi daidi ikaiti, —Gia muamu aatïmï go Pabora. Dai xibi agai aatïmï gïr nïiditai Diuxi sai mai dïïka ragai kuadagai tomarhi sudagi mai kia muakai ïgai— ikaiti ïgai bhaidunakai ñoki.

¹⁴ Dai bhodïrï iji ïgai dai mïï nïidi go bhaitï gukakamigadï dadaxdadami judidiu ïmadï jaa bhaitï gukakamigadï judidiu daidi itïtïdai, —Ka bhai dui aatïmï aatagi sai mai dïïka ragai kuadagai asta xïxkadï mua aatïmï Pabora. Sai Diuxi gïr gïïgïna tïxi mai poduñagi ixdukatai aagai aatïmï gïr nïiditai Diuxi— itïtïdai.

¹⁵ —Dai xibi aapimï bhaitï gukakami, ipïrhidi aatïmï xi aapimï ïmadï go gaa tïtïanïdamigadï judidiu aagidana go komandante sai bhaigobai buapana go Pabora. Dai gï agadamu xi tïdagi aapimï go komandante sai maatïka ïrhidi aapimï bamioma ixtuma dui Pabora. Dai aatïmï sobhidamu aidï boiyïrï dai gïbiñamu— itïtïdai go kïkïïrhi.

¹⁶ Dïï mos ïmo gïrhi, akitadï Pabora, máí ix poduña agaitadai go kïkïïrhi dai mïï baa kuartelïrï dai aagidi go Pabora.

¹⁷ Daidi Pabora bai ïmo kapitañigadï sandaru daidi itïtïdai, —Baidakañi idi arhi gïrhi dai mïï tïïgida go komandante. Aagida as agai gobai ïmo ñoki— itïtïdai Pabora.

¹⁸ Daidi go kapitañi baidakai komandanteïrï daidi itïtïdai, —Go maixapikïdï Pabora tïgidukïdï gin aagidi ansai bhaigobai gï buapidana idi arhi gïrhi. Gï aagida asïrhidi gobai ïmo ñoki— itïtïdai.

¹⁹ Daidi go komandante nobidïaiñdïrï bhïiyi go arhi gïrhi dai ïkobai baidakai daidi itïtïdai, —¿Tumaxi gin aagida ïrhidi aapi?— itïtïdai.

²⁰ Daidi go arhi gïrhi itïtïdai aidï, —Kaxi bhai dui ñoki go judidiu saidi gï buirumada agai dai po gï tïda agai pïsaidi xoroko bhïkana go Pabora dai mïï kïïsana judidiu dudunukamigadïrï bui. Daidi tïdamu ïpï saidi mos maatïka ïrhidi kïïgioma ixtuma dui Pabora.

²¹ Dïï mos maiti agai ix buaboituda aapi. Daiñi, bhaibitukami gokobhai kïkïïrhi no gïn ïjïxto daraka xibi dai sobhida agai boiyïrï dai sai mai kia aïkai ïgai ka mua agai. Kaxi as bhai dui ïgai sai mai dïïka agai kuadagai tomarhi sudagi asta xïxkadï mua. Dai agai ïpï sai Diuxi gïïgïbidana ix mai poduña ïgai ixdukatai aagai ïgai gïn nïiditai Diuxi. Dai xibi ka bhai gïn duduna dai mos nïnïraka ix tïiya aapi— itïtïdai go arhi gïrhi.

²² Daidi go komandante potïtïdai go arhi gïrhi sai mai aagada ix tuma aataga ïgai. Dai bhodïrï maigo otoi.

Go gïï dunukami Felix buidïrï gï kïïsatu Pabora

²³ Dai bhodïrï go komandante báí goka kapitañi daidi itïtïdai, —Bhaiga abïr duñi gociento sandaru gïn taatarakïdï iimïdami dai ïpï baikobhai dan bhaibuxtama sandaru kapayoïrï iimïdami, ïmadï gociento sandaru ix makïdï bhïï ajiopai lansa. Gï agai xi bhai gïn dukagi ïgai xi iimïdagi Cesareamu xibi tuxtamïrï tukarï— itïtïdai.

²⁴ Dai gatïjai ïpï sai bhai duna kaapayu ïpï dai saidi Pabora daama daitugaiña ïmoko dai sai go sandadaru kïïga nukatikana ïgai boiyamu dai sai mïï tïïgidana go gïï dunukami Felix tïgidukami.

²⁵ Dai go komandante idui ïmo ojixikami ïpï dai otosda agai go gïï dunukami. Dai go ojixikami ikaiti,

²⁶ —Aanï ïr Klaudio Lisias dai gï otoxdi idi ojai. Kïïga gï xadutudaitai gï biaturhi aanï aapi gïï dunukami.

²⁷ Gï otosdi aanï ïmo kïïrhi Pabora tïgidukami. Go judidiu ka bhïitadai gobai dai soi buadatadai. Karhioga mua agaitadai ïgai antai máí aanï ix gobai ïr ïmo romano, kaxkïdï otoma jii aanï ïmadï gin sandaruga dai mïï soi.

²⁸ Gokiïrï maatïka in ïrhiditadai aanï ix tukïdï gïpiïrï bupaimi ïgai go kïïrhi dai baan kïi aanï judidiu dudunukamiïrï.

²⁹ Ami máí aanï sai ïïgi judidiu sïïrhikamigadïkïdï gïpiïrï bupaimi ïgai. Mai tipu tudu ixtukïdï gataañiagi muaragai tomarhi ixtukïdï maixagi ïpï.

³⁰ Bhodïrï kajioma aanï sai go judidiu bhai duitadai ñoki gobai bui dai gaagaitadai ix dukatai muagi. Kaxkïdï tudu pobï gin ïrhi aanï xi otoma gï otosdagi go kïïrhi. Aagidi aanï go judidiu ïpï sai mïï gï nïidana sai gï aagidana ïgai ixtukïdï gïpiïrï bupaimi ïgai— ikaiti go ojai.

³¹ Daidi go sandadaru baidaja Pabora tukarï ix dukatai aagiditadai go komandante. Baidaja ïgai xako Antipatris tïgidu ïmo kiiki ukami.

³² Xadiko abhiadïrï Antipatriañdïrï aa surhi go sandadaru gïn taatarakïdï iimïdami dai iji ïpamu kuartelamu. Daidi go kaapayu daama iimïikïdï apia baidatikatadai go Pabora.

³³ Mos aïkai Cesareïrï tïïgi ïgai go ojixikami go gïï dunukami Felix tïgidukami. Dai bhobai gatïïgi ïgai Pabora ïpï.

³⁴ Daidi go dunukami ïpïgioma nïnïidi go ojai dai gokiïrï tïkakai ïgai Pabora ix xako busaikami ïgai. —¿Pako busaikami aapi?— itïtïdai. Dai Pabora itïtïdai aidï, —Ciliciana busaikami aanï— itïtïdai.

³⁵ Baidi go dunukami itïtïdai aidï, —Nïnïrakamu aatïmï kia ix dadiagi go ix makïdï gïpiïrï gï bupai, aidï gia kaïkamu aanï ix tumaxi gin aagiadagi aapimï— itïtïdai. Dai bhodïrï gatïjai ïgai mïsai nukadakana go Pabora kiidïrï go gïï Rey Herodes tïgidukami.