Hechos 20 - Northern Tepehuan Bible

Pabora dibiji buaboitudadami Masedoniïrï dai Gresiïrï

¹ Mos ugitïkai go xixorhigai Efesoïrï baidi Pabora otoxi ñoki go buaboitudadami ami óídakïdï sai gïn ïmpaidana. Dai maa ïgai aatagi dai abïnaki daidi itïtïdai sai apia buaboitudana ïgai. Dai gokiïrï diosagi ïgai dai bhïiyi boi Masedoniamu.

² Muiyapïrï gadibiji ïgai buaboitudadami Masedoniïrï óídakami dai gaabïnakidimi gamaamakaitai ñoki. Dai bhai tïbïpikïdï ayi ïgai Gresiïrï ukami.

³ Ami bii ïgai baika masadai. Dai gokiïrï ka tïsaida agaitadai ïmo barkoana dai imia agaitadai Siriamu, dïï máí ïgai xi go judidiu ka bhai duitadai ñoki dai mua agai ïgai kaxkïdï bhaiyoma dïbïrapi sïïrhi aa gïi ïgai ïpamu Masedoniamu sïïrhi.

^4-5 Jaa chïki kïkïïrhi oiditadai go Pabora ïpï dai ïgai gïr bhaitï iji dai ïpïgioma ayi xako Troasïrï tïgidu kiiki. Ami gïr nïnïrakatadai ïgai. Ïmoko ïgai ix makïdï bhaitï jii ïr maradïkatadai Pirhi dai Sopater tïgidu. Bereïrï oidakamikatadai ïgai . Dai iimïitadai go Aristarko ïpï ïmadï Segundo. Ïgai ïr Tesalonikïrï óídakami. Dai Gayo ïpï, Derbiïrï oidakami dai Timoteo. Dai imïitadai Tikiko ïpï ïmadï Trofimo. Ïgai ïr Asiïrï óídakami. Bïïxkatai ïgai gïr nïnïrakatadai Troasïrï.

⁶ Dai aatïmï iji Filipoañdïrï mos kugaidakai go bagimi ixtuigako gï kuayi go pan mai bïnakami kopodakarui. Dai bhodïrï taama tasaikïdï ayi aatïmï go gaa Troasïrï dai ami bii aatïmï ïmo ïkarhi.

Pabora dibiji buaboitudadami Troasïrï

⁷ Dai aidï tumiñoko urunoko gïr ïmpagi aatïmï ïmadï go buaboitudadami dai tïtïitoitadai aatïmï Suxi gakuadatai. Dai Pabora ka imi agaitadai xadiko xi kaxkïdï maa ïgai ñoki go buaboitudadami. Kia aatagaitadai ïgai ïraan tukarï tïbïrakatai aatagidï.

^8-9 Dai ïmo baiko daamarhikamiïrï baaki tïkabiakoga gïr ïmpagitadai aatïmï dai mui kudidikatadai kukudakarui ami. Dai ïmo gïrhi Eutiko tïgidukami ïmo bentanïrï dakatadai dai Pabora arhiï tïbïpi aatagïi baidi go gïrhi kabami oi kooximudagai dai mïï taana gïi. Dai aidïmïxi bañigi ïgai ka mutadai.

¹⁰ Baidi otoma tïbai Pabora dai boiyi ïgai go gïrhi daama dai komitu. Daidi potïtïdai ïgai go odami, —Maiti abïr duduadikuda— itïtïdai. —Duakaba go gïrhi— itïtïdai Pabora.

¹¹ Dai bhodïrï tïkabi tïtïsai ïgai bïïxkatai ïpamu dai saasarai pan dai gauu go gaa ïmadï. Dai bhodïrï oi Pabora gï aatagi asta maaxiko ukami. Daidi ka kugaidakai jii ïgai abhiadïrï.

¹² Mïtai duakakami bhïkai go gïrhi kiiyamu dai kïïga bhai gïn ïldakai bii odami.

Pabora diosagi go kïkïrhiodami ix makïdï ïr bhaitï gukakïdï Efesoïrï óídakami

¹³ Dai bhodïrï aataga aatïmï bïïxkatai iimïdami ixdukatai imi aragai dai Pabora ipïrhi xi imiagi taatarakïdï. Bhodïrï aatïmï bhaitïki iji ïmo barkoïrï asta Asonoïrï ukami. Ami nïnïraka aatïmï go Pabora.

¹⁴ Dai aidïxi ayi ïgai ami gïr ïmadï tïsai barkoïrï dai sudagi daama sïïrhi iji aatïmï dai ayi xako Mitileniïrï tïgidu bhaabhaki.

¹⁵ Bhodïrï abhiadïrï iji aatïmï dai xadiko miadïrï dïgabusai xako Kiyo tïgidu oidigi. Dai go gïn xadiko ayi aatïmï Samosïrï dai abhiadïrï ïpï ïmo tasaikïdï ayi aatïmï go gïï kiiki Mileto tïgidukami.

¹⁶ Go Pabora mai tïbïpi daka ïrhiditadai go Asia oidigïrï. Otoma aiya ïrhiditadai Jerusalenïrï. Daka ïrhiditadai ïgai go tïrhigi bagimigadï tasïrï bïïtarï. Kaxkïdï ijitadai aatïmï Miletamu sïïrhi dai mai dïgabusai Efesoana.

¹⁷ Dai abhiadïrï Miletañdïrï go Pabora otoxi ñoki sai gamo iimïna go kïkïrhiodami ix makïdï ïr buaboitudadami bhaitï gukakïdï Efesoana óídakami.

¹⁸ Daidi ka dadakai ïgai bai Pabora itïtïdai aidï, —Kïïga maatï aapimï ixtumaxi ibuadana aanï aidï abhiadïrï xi tukamïrï ayi aanï Asiïrï— itïtïdai.

¹⁹ —Tomaxi kabami soi gin ïrhidiña dai asta suanïiña aanï soi gin buididitadai go judidiu, bïïxkïrï aanï maiti gin tiodimadai. Mos pioñigadï Diuxi dukai aatabuadana aanï bhaiyoma.

²⁰ Ïmpaiñdaragïrï dai odami kiikidïrï gamaakaiña aanï aatagi. Mai dagito aanï xi go xaïraragai gin sobhidagi. Bïïxi gïn aagidiña aanï aapimï buaboitudadami ixtumaxi ïr soiñi aapimï gïn bïïtarï.

²¹ Kabami ñokidi aanï bïïxi óídakami bïïxi ix makïdï ïr judidiu dai ix makïdï maiti ïr judidiu. Aagidiña aanï sai ïma dukai gïn tïgitokana dai sai ïgiada ïgai Diuxi buaboidaitai Suxi Gïr Nukadakami.

²² Xibi gin tañimi Diuxi Ibhïadï ansai imïdana Jerusalenamu dai aanï ïïgidamu tomaxi mai maatï aanï xi gin duñagi mïïka.

²³ Mos maatï aanï sai bïïxi go gïgïr kiikiïrï xako aimïraiña aanï Diuxi Ibhïadï gin maatïturhimitadai xi maatïkagi aanï sai gin maixatuda iñagai dai soimaaxi taatamu aanï.

²⁴ Dïï aanï mai buamï in ïrhidi gokïdï. Aanï gin bïïtarï maiti ïr ixtumaxi ix gin aiyagi mukigami ix cho ïpï. Dïï gia nato in ïrhidi aanï go aaduindagai ix makïdï gin maa Suxi Gïr Nukadakami. Ïgai gin tïjai ansai aagaiña aanï go Bhai Ïrhiaragai Ñoki ix makïdï aagai xïï kïï tuiga Diuxi gïr bïïtarï.

²⁵ Baasïkioma gïn didibidiña aanï dai gïn aatagidiña ix maaxi tïanïi Diuxi. Dïï aanï aagai sai xibi abhiadïrï bhaitiakoga ka maiti gin nïijadamu aapimï ïpamu.

²⁶ Daiñi, xïduñada ïmadutai mai buaboitudagi dai gï aiyagi gïgïbituldaragai mai buaboidaitai, aanï maiti ïr gin duñi ka agai gobai.

²⁷ Maiti an ïxto aanï Diuxi ñokidï aidï. Kïïga gïn aagidi aanï bïï sudakami.

²⁸ Kaxkïdï gïn nukadakabïrai ïïgi aapimï bhaitï gukakami daidi kïïga abïr nukada go buaboitudadami ïpï ix makïdï gïn nukaturhi Diuxi Ibhïadï. Ïgai tudu gïn darai saidi ïr nukadakamikana aapimï go buaboitudadami ix makïdï Diuxi sabïrhi ïïgi maradï ïradïkïdï. Go buaboitudadami ïpïan dukamikana kañiñiru. Diuxi sosoigadï gïn dukamikana ïgai dai gï aagaiña xorai nukadakagi ïgai.

²⁹ Kïïga maatï aanï sai imïdakai aanï tabhiadïrï sai dadimu jaa ix makïdï ïïxibogan tutuiga ïpïan dukai sïsïïyi ix makïdï mai biayi kañiñiru. Ïgai yaatagidida agai go buaboitudadami dai soi buada agai.

³⁰ Dai asta ïïmoko gïn aaduñi ïpï ipïrhiadamu xi ïr bhaitï gukakamikagi dai naana maaxi yaatagi gïn aagidamu, ipïrhiditai xi mui odami ïïgiadagi ïgai aatagidï.

³¹ Gïn nukadabïrai tudu. Daidi abïr gïn tïgito ajiopada ix dukatai aatadui aanï gïn ïmadï dakatai. Baika umigi aitu aanï gamamaakaitai ñoki modukai tasïrï dai tukarï. Dai tomaxi dudatai dai kabami soimaaxi taata aanï tomax dukai apia dukai gïn mamaakaiña aanï ñoki tomaxi suanïitadai aanï.

³² Xibi daanïi aanï Diuxi sai ïgai gïn nukadakana dai sai kïïga ïïgiada aapimï Diuxi ñokidï ix makïdï aagai xïï kïï tuiga Diuxi. Diuxi ñokidï kïï gupurtudarhiga dai ïgaikïdï biaka antaada aapimï naana maaxi ixtumaxi kïï bhai maaxkami ix makïdï Diuxi bhai dáí maamaradï bïïtarï.

³³ Daiñi, kïï maatï aapimï sai aanï mai ïgamudagaikïdï tïï gïn tuminxiga tomarhi gïn yukuxi.

³⁴ Bhaiyoma kïïga maatï aapimï sai kïïga gaatabuadana aanï dai gamaitïkïiña ixtukïdï oidakagi aanï dai ixtukïdï oidakagi go ix makïdï gin ïmadï ajiopaiña ïpï.

³⁵ Podukai gatïtïïgidi aanï sai gï agai xi kabami gaatabuadagi ïmoko dai podukai biakagi ixtukïdï soikïdagi go ix makïdï tïgitokagi. Gï agai xi gïn tïgito ajiopada aapimï go ñoki ix makïdï gïr aagidi Suxi. Ïgai gïr tïtïdai sai, —Xioma ïr bhai ïrhiaragai ix gamaakiagi ïmoko soiñi xi bhai ix mos buiyagi— gïr tïtïdai Suxi.

³⁶ Dai bhodïrï ka kugaidakai Pabora aatagidï daidi go totonakïdï kïkiba ïmadï go gaa dai gadaanïi Diuxi.

³⁷ Dai go gaa ka mos susuañimi dai kokomitukimi dai usudaimi dai podukai diosaidi.

³⁸ Kabami soi gïn ïjïrhi ïgai potïkai Pabora sai ka mai nïijada agai bamioma. Daidi oi ïgai go Pabora asta xako kïïka go barko ukami.