Hechos 19 - Northern Tepehuan Bible

Pabora maa ñoki go Efesoana óídakami

¹ Daidi bhodïrï ïmo imidagai Apolos biitadai Korintoana dai Pabora oi gï imidaga xibhïakoga. Ukoidigana sïïrhi daibusai ïgai dai ayi xako Efesoana tïgidu bhaabhaki. Ami tïï ïgai chïki buaboitudadami.

² Daidi Pabora itïtïdai go buaboitudadami aidï, —¿Dibia xi Diuxi Ibhïadï gïn abhana buaboidakai aapimï?— itïtïdai. —Cho— ikaiti go buaboitudadami, —Tomarhi mai kajiomakatadai aatïmï ix oidaga ïmoko dai Diuxi Ibhïadï tïgidu— itïtïdai.

³ Daidi Pabora itïtïdai aidï, —¿Ix tuma bïïtarïtadai aidï go bakuanaragai ixtukïdï gïn bapakoi aapimï?— itïtïdai. Dai go gaa itïtïdai, —Buaboida kaï aatïmï Juan ñokidï xi kaxkïdï gïr bapakoi aatïmï— itïtïdai.

⁴ Daidi Pabora itïtïdai aidï, —Go Juan bapakonaiña odami ix makïdï ka dagitotadai soimaaxi tïgibudagai. Daidi potïtïdaiña Juan ïpï sai gï agaitadai xi buaboitudagi Suxi Kristo ïpï, go makïdï gokiïrioma dibiagaitadai tudu— itïtïdai Pabora.

⁵ Dai gïn bapakoi ïgai mos kaïkai aatagidï Pabora dai podukai mamaaxidi ix ka buaboitu ïgai Suxi Kristo.

⁶ Dai go Pabora mos daama darai gï noonobi bai dibia Diuxi Ibhïadï ïgai ïmadï. Daidi ñiño ïgai mui naana maaxi ñokikïdï ix makïdï mai maatïkatadai ïgai dai aagai ñoki ix makïdï gïn maa Diuxi sai aagana.

⁷ Parï bhaibuxtama dan gokadukana ïgai aidï ix makïdï buaboitu.

⁸ Daidi ami Efesoana go Pabora aitu baika masadai aimïraitai judidiu kikiupaigadïamu. Mai xaïraitai aatagidiña ami judidiu ix maaxi tïanïi Diuxi. Ipïrhiditadai ïgai xi go judidiu buaboitudagi.

⁹ Dïï ïïmoko modukai maiti ipïrhi. Bhaiyoma mos galnaaxi ñokaiña ïgai buidïrï go buaboidaragai ix makïdï gïr biturhi Suxi Kristo. Dai bïïxi go gaa odami kaï aidï ix bui ñokaitadai ïgai. Baidi Pabora dagito go judidiu ami kiupiana dai jii dai baidakai go ix makïdï gia ïr buaboitudadami. Gïn ïmpagi ïgai ïmo eskuelïrï bhaiyoma xako gatïtïïgidiña ïmo kïïrhi Tirano tïgidukami. Ami go Pabora gamaa aatagi bïïx tasai.

¹⁰ Goka umigi aiturhi Pabora gamaamakaitai aatagi ami. Dai bïïxi aipako ayi go aatagi bai podukai bïïxi ami oidigïrï óídakami kaï Diuxi ñokidï, ix makïdï ïr judidiu ïmadï ix makïdï maiti ïr judidiu ïpï. Asia tïgidu ami oidigi tudu.

¹¹ Dai Diuxi maa gubukadagai Pabora saidi ibuadana ïgai mui naana maaxi ix makïdï ïïgi Diuxi bhaiga xi buadagi.

¹² Dai go odami buyiña Pabora pañiñitugadï ïmadï taagiana nagiakarui ix makïdï bhïï aimïraiña Pabora aatabuadatai dai bhïkaiña xako darajatadai kokokoñiadï. Podukai maigobai imïiña kokodagai dai asta Diabora tïtïañikarudï daadagitoiña odami.

¹³ Dai nobai ajiopaitadai chïki judidiu dai mos agaitai Suxi tïtiaradï gatïañia ïrhiditadai Diabora tïtïañikarudï sai bubuakiagi odamiañdïrï. Itïtïdaiña ïgai go Diabora tïtïañikaru aidï, —Suxi gubukadadïkïdï, ix makïdï Pabora aagaiña aatagidïrï, ïgai gubukadadïkïdï tudu gïn tïanïi aatïmï mïsai bubuakïna dai sai dagitona idi odami— ikaitiña ïgai.

¹⁴ Pobuadana kubarakami kïkïïrhi tudu, maamaradï ïmo kïïrhi Esceba tïgidukami. Go Esceba ïr ïmo judiu dai ïr bhaitï kïakamigadï daxdadami xadutudaragai. Ïgai maamaradï bubaida ïrhiditadai Diabora tïtïañikarudï odamiañdïrï aidï.

¹⁵ Daidi ïmo imidagai ïmo Diabora tïañikarudï ïrana dajatadai ïmo odami dai aa noraidi ïgai ñokidï go ix makïdï busaidadankaiti daidi itïtïdai, —Kïï maatï aanï Suxi dai Pabora ïpï dïï borï aapimï dai pomaaxi ñokai— itïtïdai.

¹⁶ Dai go kïïrhi biakami Diabora tïañikarudï bui gïi go kubarakami kïkïïrhi dai bïïxi gamaitï. Kabami kapiakarai ïgai taidi go kïkïïrhi mai yuukusu bii dai boopoi ami kiiyañdïrï dai saasakitugai ïgai tukugadï.

¹⁷ Dai bïïxi Efesoïrï óídakami máí ix tumaxi pobï gï duitadai, bïïxi kajioma go ix makïdï ïr judidiu dai ix makïdï maiti ïr judidiu ïpï. Dai kabami duduadimu ïgai dai gïïpi bamioma xadutudai ïgai Suxi Gïr Nukadakami.

¹⁸ Dai muidutai ix makïdï buaboitu daibuiña dai go gaa buitapi maaxiko aagaiña naana maaxi kïkïïdaragai maaxi ix makïdï ibuadana ïgai.

¹⁹ Dai bhai mui ix makïdï ïr kïkïïdarakamikana bua gïn lilibroga ixtukïdï máítadai ïgai ixdukatai ibuadagi kïkïïdaragai. Mïï odami buitapi kaburhi tua ïgai dai bïïxi mïïji. Dai gokiïrï ïkarhi ïgai namïgadï go lilibro dai parï tajukami ciento mirhi plata tuminxi ayi.

²⁰ Dai mui odami buaboitu nïiditai ixdukatai pobï gï duitadai dai podukai gïïpi gubukadagaikïdï mïkaxioma aijimitadai Diuxi ñokidï dai óídakami kaïkatadai.

²¹ Daidi gokiïrï xi kaxi pobï gï duitadai gobai, gï tïgito Pabora xi imiagi Jerusalenamu dai gï tïgito ïpï xi boiyana gadibidagi xako Masedoniana dai Akayana tïtïgidu oidigi. Daidi ikaititadai ïgai aidï, —Mos dibidamu aanï óídakami Jerusalenïrï dai bhodïrï gï agadamu xi imi aanï Ramamu ïpï— ikaiti.

²² Dai bhodïrï Masedoniamu otoi ïgai goka gï aaduñi. Timoteo dai Erasto tïtïgidukana ïgai daidi ïr soikïdakamikana aaduindadïrï. Dai Pabora anaaxi bii bhai tïbïpi xako Asiana tïgidu oidigi.

Bhakoi Efesoana óídakami

²³ Aidïpïrï mui óídakami Efesoana bhakoi Suxi Kristo buaboitudadamigadï bui.

²⁴ Dai oidakatadai ïmo kïïrhi dai ibuadana naana maaxi ixtumaxi platakïdï duñixikami. Ïgai kïïrhi Demetrio tïgidukana daidi ibuadana platakïdï aarhi kikiupai ïpïamaaxi go ix makïdï ami Efesoana kïakatadai, go Diana kiupaigadï tudu. Gaagaraiña ïgai go aarhi kikiupai dai mui gamaitikïiña tuminxi. Dai jaa kïkïïrhi muidu maitïkïiña ïpï soiña ibuadatai gobai.

²⁵ Daidi go Demetrio ïmpagi bïïxi gï pipioñiga ïmadï ïpï jaa kïkïïrhi ix makïdï biakatadai pomaaxi aa duiñdagai ïpï, daidi itïtïdai aidï, —Gin aaduñi, kïïga maatï aapimï xïï kïïga maitïkïi aatïmï tuminxi idi aaduindagaikïdï.

²⁶ Dai maatï aapimï ïpï sai mui odami ka bhïiyi go Pabora buaboidaradï kaïkai aatagidï dai mai xu mosïkaxi tanai Efesoana. Maigobai aipako xako ukami Asia tïgidu oidigi go óídakami ïïgidimi Pabora ñokidï ïpï. Ïgai pokaiti sai go momono ix makïdï ibuayi odami mai namïga didiuxi dukai.

²⁷ Dai xi mos apia imïdagi go aatagi podukai go óídakami ka mai namïakan dukai nïijada antaada gïr aaduindagai. Dai ka maiti ipïlda antaada ïgai ïpï xi xadutuadagi go gïï kiupaigadï Diana. Aidï gia bïïxi go Asiana óídakami dai bïïxi go gaa oidigi daama óídakami ka maiti ipïlda antaada xi xadutuada go Diana. Gï agai xi gïr nukadakagi aatïmï gin aaduñi. Tadu ka mai namïakan dukai bia ïgai gïr diuxiga Diana— itïtïdai Demetrio.

²⁸ Daidi go gaa gïïgïr iiñakimi kaïkai ix kaiti go Demetrio daidi ikaitimi, —Gia ïr gïdukami Diana, diuxigadï Efeso— ikaitimi.

²⁹ Daidi bïïxi Efesoïrï óídakami gin ïmpagi dai naana kaitimi iñakaitai ïpï. Dai muidutai ïgai iji dai mïï bui goka kïkïïrhi Gayo dai Aristarko tïtïgidukami dai gubudakïdï tïbaimuka ïgai salonamu xako ibuadana ïmpaiñdaragai ami óídakami. Go Gayo ïmadï Aristarko xibhïadïrï oitadai go Pabora. Masedoniañdïrï óídakami ïgai.

³⁰ Daidi go Pabora bakia ïrhiditadai dai ñokida agaitadai go odami dïï mos go buaboitudadami ami óídakami mai dagito.

³¹ Dai ïïmoko go dudunukami ami Asiana óídakïdï kïï ïmagitadai go Pabora ïpï dai otoxi ñoki dai daañimi sai mai bakïna ïgai ami.

³² Dai ami xako gïn ïmpagi odami, ïïmoko iiñakai ïmo ixtumaxi bai jaa ïma maaxi dai sïïrhikïdï gïïgïrï xigarhi kaiti ïgai. Bhaitoma bïïxkatai mai maatïkatadai tomarhi ix tuma bïïtarï gïn ïmpagitadai ïgai.

³³ Daidi ami saagida gukatadai judidiu ïpï dai ïgai nïituka ïmo kïïrhi Alejandro tïgidukami dai odami buitapi kïi dai aagidi ix tuma tïdagi ïgai go gaa. Bai ïgai ñokia agaitadai dai bañigi gï nobi saidi dodorhi biïna go odami.

³⁴ Daidi go odami máítadai ix ïgai ïr judiu dai mos gukatai iñakai parï go hora daidi ikaitimi ïgai bïïxkatai, —Gia ïr gïdukïdï Diana, diuxigadï Efeso— ikaitimi.

³⁵ Daidi bhodïrï ïmo dunukami anaaxi Efesoana oidakami dodorhitu go odami daidi itïtïdai, —Gin aaduñi Efesoana óídakami, kïïga maatï bïïxi oidigi daama óídakami ix aatïmï ïr nukadakamigadï go odai mono ix makïdï tïbagiañdïrï gïi, gïr diuxiga Diana tudu. Dai nukadai aatïmï kiupaigadï ïgai ïpï— itïtïdai.

³⁶ —Kïïga maatï aapimï sai tomarhi ïmadutai mai bhaiga ix pokaitadagi sai maiti ïr buaboi gobai, kaxkïdï dodorhigibïrai xibi. Maiti abïr ibuada ixtumaxi mai kïïga gïn tïtïgitokai ïpïgioma.

³⁷ Daiñi, aapimï tami bua go Gayo ïmadï go Aristarko tomaxi gobai maiti gaïïxidi tomarhi ïmo ixtumaxi go kiupiañdïrï dai tomarhi mai galnaaxi ñokai gïr diuxiga bui.

³⁸ Daidi go Demetrio ïmadï go gaa aatabuadami biakagi ïmo ixtumaxi ïmo odami bui, gï agai xi dunukamiïrï aipako gïpiïrï gïn bupadagi ïgai dai ami bhai duñagi. Pomaaxi bïïtarï aatïmï dudunukami tudu dai pomaaxi bïïtarï oidaga ixtuigako gïr ïmpaidagi aatïmï dai bhai buadagi aatagi— itïtïdai.

³⁹ —Dai xi tïgitokagi aapimï ïma maaxi ixtumaxi, gï aagai xi gï bhai duñagi ïmo ïmpaiñdaragïrï ix dukai aagai sïïrhikami.

⁴⁰ Xibi xi gïr tïkakamudai dudunukami bhaitï gukakïdioma xi tuixidï bhakoikan kaiti aatïmï xibi, mai tipu ixtumaxi aagida aatïmï kaxkïdï ïr ïbhïidaragai gobai. Kïïga potïi antaada ïgai sai ïïgi aatïmï xixortu óídakami xibi— itïtïdai go dunukami.

⁴¹ Dai ka potïkai, aagidi ïgai go odami sai nonoigïna ïgai kiikidïrï.