Hechos 18 - Northern Tepehuan Bible

Pabora ayi Korintoana

¹ Dai gokiïrï jii Pabora Atenasañdïrï dai ayi xako Korinto tïgidu ïmo gïï kiiki.

² Ami tïï ïgai ïmo kïïrhi judiu Akila tïgidukami. Ïgai ïr Pontoañdïrï oidakami dai Prisila tïgidukana aduñdï. Ïgai utudama ayitadai Korintoana ïpï. Italiañdïrï dadatadai ïgai. Baasïkioñdïrï go gïï dunukami Klaudio tïgidukami gatïjai sai iimïna bïïxi go judidiu Romañdïrï xi kaxkïdï dadatadai ïgai Korintoïrï. Dai Pabora mïï dibiji ïgai.

³ Ikuxi bhaabhaki somadamikatadai go Akila ïmadï aduñdï dai Pabora biakana go baaxi aaduindagai ïpï xi kaxkïdï ami gï urhi Pabora ïgai ïmadï dai ami gaatabuada agai.

⁴ Dai Pabora mos ïkarhiïrï aimïraiña judidiu kiupaigadïamu ibhïxtaragai tasïrï. Ami gaatagidiña ïgai go judidiu dai go ix makïdï maiti ïr judidiu ïpï dai aagidiña ïgai Diuxi ñokidï. Kïï sïïrhi aagidiña ïgai sa bhai buaboitudana.

⁵ Daidi gokiïrï go Silas ïmadï Timoteo ayi Masedoniañdïrï. Dai Pabora dagito somaragai ikuxi bhaabhaki dai mos aagidiña óídakami ix kaiti Diuxi ñokidï. Sïïrhi aagidiña ïgai go judidiu sai Suxi ïr Diuxi Otosadï Gïr Bhaitï Kïakamiga.

⁶ Daidi go judidiu mos parunai dai xigalnaxi ñoki aagidi. Daidi Pabora upai baasaradï dai gigigi dai podukai maaxitudai sai ïgai maiti ïr duñidï xi go judidiu mai buaboitu ñokidï. —Ïïgi aapimï ïr gïn duñi xi gïn gïïgïdagi Diuxi— itïtïdai. —Aanï gia ka maiti ïr gin duñi ka agai gobai— itïtïdai Pabora. —Xibi abhiadïrï bhaitiakoga aituldamu aanï ñoki go ix makïdï maiti ïr judidiu bhaiyoma— itïtïdai.

⁷ Daidi busai Pabora aidï go judidiu kiupaigadïañdïrï dai jii kiidïrï ïmo kïïrhi Tikio Justo tïgidukami. Ami kiupai abhana oidakami ïgai dai kïïga ïr xadutuadami ïgai Diuxi. Ami kiiyïrï tudu ayi Pabora.

⁸ Dai aidïpïrï ïmo kïïrhi Krispo tïgidukami ïr bhaitï kïakamikatadai ami kiupiïrï dai ïgai ïmadï aaduñdï ix makïdï ami kiiyïrï óídaga bïïxi buaboitu Suxi Kristo. Dai jaa mui Korintoana óídakami kaïkana Pabora aatagidï ïpï dai buaboitu ïpï dai gïn bapakoi.

⁹ Dai ïmo imidagai tukarï Pabora ïmo tïïtïkiïrï dukai tïï Gïr Nukadakami. Dai Gïr Nukadakami itïtïdai aidï, —Aapi Pabora, maiti ïbhiada xi apia aagadagi gin ñoki. Gï agai xi maiti dagitokai gaatagiadagi odami.

¹⁰ Aanï gï ïmadï daja aidï dai tomaxi odami gï bui surhiagi aanï mai dagitomu xi gï galdoadagi dai mui odami tami Korintoana ïr gin oijadami ka agai— itïtïdai Gïr Nukadakami tïïtïkiïrï dukai.

¹¹ Daidi amaxi bii aidï Pabora ïmo umigi dan tajukami dai aagidimi óídakami ix kaiti Diuxi ñokidï.

¹² Dai bhodïrï ïmo imidagai aidïxi go kïïrhi Galión ïr gïï dunukamikatadai Akayïrï bai go judidiu bïïxkatai bui bhaakoi Pabora dai bhïiyi dai mïï dunukamiïrï kïi.

¹³ Daidi go judidiu itïtïdai go dunukami aidï, —Idi kïïrhi gïr aagidiña xi ïma dukai xadutuada aatïmï Diuxi dïï mos daidarxi gïr bïïtarï xi xadutuada aatïmï ix dukatai gïr aagidi gobai— itïtïdai ïgai go dunukami.

¹⁴ Daidi Pabora ka ñokia agaitadai bai go Galión bhaitïkioma ño daidi itïtïdai ïgai go judidiu aidï, —Daiñi, xi ïr soimaaxi idukamikamudai go Pabora aidï gia gïn bhai gïn duiñdamudai aanï.

¹⁵ Dïï aapimï mos ïïgi gïn ñokikïdï gïn bupui surhigïi dai ïïgi gïn sïïrhikamigakïdï. Kaxkïdï abïr ïïgi bhai duñi aapimï tudu. Aanï maiti ipïrhidi xi baakiagi go maaxiïrï— itïtïdai go dunukami.

¹⁶ Daidi gatïjai bubaidaragai go judidiu abhiadïrï.

¹⁷ Bhodïrï bhakoi bïïxi óídakami ami dai bhïiyi ïgai go judidiu kiupaigadïrï bhaitï kïakami. Sóstenes tïgidukana go bhaitï kïakami ïgai, dai go óídakami bhïkai dai anaaxi dunukami buitapi gïikakarai. Daidi go dunukami Galión mos nïidi dai mai buamï ïrhidi.

Pabora imi agai Antiokiamu

¹⁸ Bhodïrï Pabora anaaxi bii Korintoana bhai mui tasai. Dai gokiïrï diosagi ïgai go buaboitudadami dai bhïiyi boi Siriamajakoga. Dai Prisila ïmadï Akila oitadai ïpï. Ayi ïgai Cenkreïrï xako bhïiya agaitadai ïgai ïmo barko. Mai kia tïtïsakai barkoana Pabora guikoma bïïxi ïïgi gï kuupa sai podukai nïidiña odami xi ïïgidimi ïgai ïmo ñoki ix makïdï baasïkioma ka agaitadai ïgai saidi iduñi agai Diuxi bïïtarï. Dai bhodïrï ka tïtïsakai barkoïrï iji gïï sudagiana sïïrhi.

¹⁹ Daidi ayi ïgai ïmo gïï kiiki xako Efeso tïgidu. Ami bii go Prisila ïmadï Akila dai Pabora ïïgi oida agai imidagai. Dai mai kia imïkai Pabora abhiadïrï baa ïgai judidiu kiupaigadïrï dai ami gaataga agai judidiu ïmadï. Sïïrhikïdï gïn bupui ñokimi ïgai ïmadï go judidiu.

²⁰ Dïï bïïxkïrï ïïmadutai ïgai daañimi go Pabora sai tïbïpioma biïna ïgai gïn ïmadï dïï ïgai mai ami bii.

²¹ Bhaiyoma diosagi ïgai dïï gia itïtïdai, —Ix ipïldagi Diuxi otoma dibiamu aanï ïpamu dai gïn nïijadamu— itïtïdai. Dai bhodïrï tïsai ïgai ïmo barkoïrï dai jii Efesoañdïrï.

²² Daidi Cesareïrï ayi ïgai dai tïbai barkoañdïrï. Abhiadïrï maigo daana Jerusalenamu jii ïgai dai aïkai biaturhi go buaboitudadami. Dai mos biatuldakai maigo koi jii ïgai dai ayi xako Antiokiïrï tïgidu kiiki.

²³ Ami bii Pabora bhai tïbïpi. Dai gokiïrï jii ïgai dai dibida agai buaboitudadami Galasiïrï dai Frigiïrï óídakami. Bïïxi ïïmapïkïrï xako gïn ïmapidiña buaboitudadami dibiji ïgai dai gamaakaitai ñoki gaabïnakidimi.

²⁴ Aidïpïrï Efesoana ayi ïmo kïïrhi Apolos tïgidukami dai ïgai ïr judiu. Alejandreañdïrï oidakamikatadai ïgai dai kïïga maatï ñokai dai kïïga maatïtai aagai Diuxi ñokidï.

²⁵ Sïïrhikïdï kïïga maatïtuldikatadai ïgai Diuxi ñokidï. Dai bhai ïrhiarakïdï ñokaiña ïgai dai sïïrhi aagaiña ixtumaxi iduitadai Suxi. Dïï mosïkaxi go Juan bakuanaragadï maatïkatadai ïgai.

²⁶ Daidi ami dibia ïgai ïpï kiupaigadïrï judidiu dai gï aaga maakiagi ñoki ïpï. Kïïga mai duadimukatai aagai ïgai ñoki dai go Prisila ïmadï Akila kaïkatadai ñokidï dai báí sai oidana kiiyïrï. Dai ami go Prisila ïmadï Akila xioma kïïga maatïturhi Diuxi bogïdï.

²⁷ Daidi bhodïrï kaxi imia agaitadai Apolos maigobai xako Akaya tïgidu oidigi. Dai go buaboitudadami Efesoïrï óídakami soi dai otoxi ïmo ojixikami go buaboitudadami Akayïrï óídakami bïïtarï. Potïtïdai ïgai sai kïïgakïrï nïidiña ïgai go Apolos. Diuxi kïï tuigatadai go Akayïrï óídakami bïïtarï kaxkïdï ïïmadutai ïgai buaboitu. Dai Apolos ayi ami dai ïgai kïïga soi go ix makïdï ïr buaboitudadami.

²⁸ Ïgai ïmadï go judidiu ami óídakami gïn bupui ñokaitadai kabami go gaa óídakami buitapi dai Apolos ïgai dai gamaitïkïiña ñokidïkïdï. Mos aagaiña ïgai ix kaiti Diuxi ñokidï dai podukai gatïtïïgidi ïgai xi Suxi ïr Diuxi Otosadï Gïr Bhaitï Kïakamiga.