Hechos 17 - Northern Tepehuan Bible

Judidiu Tesalonikïrï óídakïdï bhaakoi Pabora dai Silas bui

¹ Daidi ka iimïkai go Pabora ïmadï Silas abhiadïrï sïïrhi dïgabusai ïgai Anfipoliana dai Apoloniana dai bhodïrï ayi ïgai Tesalonikïrï. Ami Tesalonikïrï kïakatadai ïmo kiupaigadï judidiu dai ami baa go Pabora ibhïxtaragai tasïrï.

² Podukai ibuadana ïgai bïïxi go gïïgïr kiikiïrï xako ajïiña ïgai. Baika ibhïxtaragai tasïrï baa ïgai ami kiupiïrï dai aataga ïmadï odami. Pabora mos gamaakaiña aatagi Diuxi ñokidïañdïrï buaboitulda ïrhiditai go odami.

³ Diuxi ñokidïañdïrï gatïtïïgiditadai ïgai sai Suxi gï agaitadai xi soimaaxi taatagi dai mukiagi dai ïpamu duakagi. Daidi potïtïdaiña ïgai, —Idi Suxi ix makïdï aagai aanï ïr Diuxi Otosadï Gïr Bhaitï kïakamiga— itïtïdaiña Pabora.

⁴ Ïïmadutai go judidiu buaboida kaï go aatagi dai uraba go Pabora ïmadï Silas. Dai bhai chïki bhaitï gukakami oki buaboitu ïpï ïmadï mui jaa odami griego ñokadami ix makïdï ïr xadutuadami Diuxi.

⁵ Dai gokïdï bhaakoi go judidiu ix makïdï mai buaboitu ïgamukatai ïgai. Dai mui ïmpagi ïgai kïkïïrhi paparugami dai soimaaxi ibuadami ix makïdï no kayana ajiopaitadai. Abïnaki ïgai bai bui surhigïna go buaboitudadami kaburhi gukakatai. Mos gïgïr ijiñakimi ïgai aidï dai mos xixokai ïgai bui ñokaitai go gaa. Daidi go judidiu ïgai ïmadï go soimaaxi ibuadami mïï ayi kiidïrï ïmo kïïrhi Jason tïgidukami dai daitu kitaagiña. Gaagaimitadai ïgai go Pabora ïmadï Silas dai bukia ïrhiditadai dai tïïgida agaitadai go odami.

⁶ Dïï mai tïï ïgai dai bhaiyoma bhïiyi ïgai go Jason ïmadï jaa buaboitudadami ix makïdï ami darajatadai dai bukai dudunukamiïrï. Ami dunukamiïrï gïgïr ijiñakimi go soimaaxi ibuadami ïgai daidi ikaiti, —Baasïki xibhïadïrï dada kïkïïrhi soimaaxi ñokadami. Dai nobai xibhïako xako ajiopaiña ïgai mos aipako baakoitudaiña ïgai óídakami gïn aatagikïdï. Dai xibi tanai dada ïgai dai pobuimi ïpï.

⁷ Dai idi Jason miadïgi go kïkïïrhi ïgai gï kiiyïrï dai maa xako gïn urhiña ïgai. Ïgai kïkïïrhi bïïxkatai mai ïïgidi tomarhi ïmo sïïrhikami ix makïdï gïr maa go gïï tïanïdami romano tïxi ïïgiadagi. Dai pokaiti ïgai ïpï sai oidaga ïmai gïï bhaitï kïakami Suxi tïgidukami ix makïdï gïr tïanïda agai dai mai xu go gïï tïanïdami romano— ikaiti go gïpiïrï bupadami.

⁸ Daidi go odami ïmadï dudunukami mos kaï go ñoki dai bhodïrï kabami xixorhi ïpïpï.

⁹ Dai go dudunukami gatáí tuminxi go Jason ïmadï go gaa buaboitudadami ix makïdï gïn buitutadai dai potïtïdai ïgai sai ïpamu maakia agaitadai go tuminxi xi ïïgiadagi ïgai ñokidï go dudunukami. Daidi go Jason ïmadï go buaboitudadami gamaa go tuminxi baidi go dudunukami dagito ix iimiagi ïgai.

Pabora ïmadï Silas ayi Bereana

¹⁰ Dai aidï tukarï mos tukagïkai go buaboitudadami otoi go Pabora ïmadï Silas Bereamu. Dai ïgai mos ayi Bereïrï dai sïïrhi iji judidiu kiupaigadïrï.

¹¹ Go óídakami ami bamioma kïïga tutuiga xi bhai go Tesalonikïrï óídakïdï. Ïgai gia bhai gïn ïrhiarakïdï kaïkana aatagidï Pabora ïmadï Silas. Dai bïïx tasai gaagaiña Diuxi ñokidïrï xi bhai ïr buaboi ix dukatai aagaiña go Pabora.

¹² Dai podukai muidutai go judidiu buaboitu dai mui oki griego ñokadami ïpï ix makïdï ïr bhaitï gukakamikana ïmadï bhai muidutai kïkïïrhi griego ñokadami ïpï.

¹³ Dai aidïxi máí go judidiu Tesalonikïrï óídakami xi Pabora aagidi Diuxi ñokidï Bereïrï ïpï bai gamo iji dai xixorhitu go oidakami ami ïpï.

¹⁴ Dadi go buaboitudadami otoma otoi go Pabora maigobai kostamu. Dïï go Silas ïmadï Timoteo anaaxi bii Bereana.

¹⁵ Jaa buaboitudadami oitadai go Pabora. Ïgai baidaja go Pabora Atenasana ukami dai ami dagito dai aa surhi. Baidi go Pabora otoxi ñoki ïgaikïdï sai aagidana ïgai go Silas ïmadï Timoteo sai obaidana dai gamo Atenasamu iimïna ïpï.

Pabora maa ñoki Atenasïrï

¹⁶ Ami Atenasïrï nïnïrakatadai Pabora xi dadiagi go Silas ïmadï Timoteo. Dai kabami soi gï ïrhi Pabora nïiditai mui ubixi ami ix makïdï óídakami xadutudai Diuxi dukai.

¹⁷ Daidi judidiu kiupaigadïrï gaatagaiña Pabora go judidiu ïmadï dai jaa ïmadï ïpï ix makïdï maiti ïr judidiu dai ïr xadutuadami Diuxi. Bïïx tasai gamaakaiña Pabora ñoki no plasana dai aatagidiña ïïgi xorai ami darakana.

¹⁸ Dai ïïmadutai go ix makïdï kaï aatagidï ïr mamaatïtuldiadami jaa buaboidaragai ix makïdï epikureo dai estoiko tïtïgidukana buaboidaragai. Ïgai bui ño go Pabora aidï daidi ikaiti, —Go Pabora mai maatïtai ñokai— ikaiti. —Mai maatï aatïmï ixtumaxi gïr aagida ïrhidi gobai— ikaiti. Dai jaa ikaiti, —Gïr aagidadankaiti kaiti gobai xibhïadïrï óídakami diuxigadï— ikaiti. Go Pabora aagidiña aidï sai mutadai Suxi dai ka duakatutadai ïpamu, xi gokïdï go odami pokaititadai sai ïmai diuxi aagaiña ïgai.

¹⁹ Daidi baidaja ïgai go Pabora Areopagïrï xako gïn ïmpaidiña odami dai bhai buadana aatagi dudunukami ïmadï. Ami ïmpaiñdaragïrï go odami baan kïïxi go Pabora daidi itïtïdai, —Gïr aagidañi ix tïiya ïrhidi aapi go utudui aatagikïdï ix makïdï gïr aagiditadai aapi— itïtïdai.

²⁰ —Tomarhi ïmo imidagai mai kajiomakana aatïmï aatagi podukai. Xibi ipïrhidi aatïmï pïxi gïr aagidagi ixdukatai ikaidaga gï aatagi— itïtïdai go ix makïdï gïn ïmpaiditadai.

²¹ Aidïpïrï go Atenasïrï óídakami ïmadï jaa xibhïadïrï óídakami ix makïdï ami óídatu mos bïïx tasai darajatai gaatagaiña ixtuma tïgibudagai utudui kaidagakana.

²² Daidi Pabora kïkiba ïmpaiñdaragïrï ami Areopagïrï daidi ikaiti, —Aapimï Atenasïrï óídakami, nïidi aanï ix bia aapimï mui sasanto dai kïïga xadutudai ïgai.

²³ Nobai aimïraitadai aanï dai tïï mui ïïmapïkïrï xako ibuayi aapimï xadutudaragai ïgai bïïtarï. Dai tïï aanï ïmo daxdakarui ïpï dai ami go daxdakaruana ojixi sai, IDI DAXDAKAUI ÏR ÏMAI DIUXI BÏÏTARÏ IX MAKÏDÏ AATÏMÏ MAI MAATÏ. XÏDUÑADA OIDAKAGI ÏMAI DIUXI XIBHÏAKOGA DAI AATÏMÏ MAI MAATÏ, ikaiti go ojixikami. Xibi aanï gïn aagidamu xorai idi ix makïdï xadutudai aapimï mai maatïkatai— itïtïdai Pabora.

²⁴ —Ïgai ïr Diuxi ix makïdï idui oidigi dai bïïxi aïkatai ix makïdï oidaga. Ïgai tïanïi tïbagiïrï dai bïïxi oidigïrï. Ïgai mai kiupiana oidaga ix makïdï ibuayi odami.

²⁵ Xadïrï gï dagitona Diuxi xi odami soikïdagi. Ïgai mai tïgito ixtumaxi di. Ïgai tudu dai gïr maakai bïïxkatai gïr iibhïdaga dai gïr ibhïkiga ïmadï bïïxi aïkatai ixtumaxi— itïtïdai Pabora.

²⁶ —Diuxi mos arhi ïmo kïïrhi idui tukamïrï dai ïgiañdïrï idui ïgai bïïxi go naana maaxi ñokadami odami bai óídakaiña aipakoga oidigi daama— itïtïdai. —Diuxi tïjai sai bïïxi oidigi daama óídakana odami. Tukamïrï mai kia iduitadai Diuxi go naana maaxi ñokadami dai ïkiaxdïrï podukai gï tïgito dai dáí xïï tïbïpi óídakagi odami dai xakoga.

²⁷ Diuxi idui odami sai gaagana ïgai Diuxi tudu. Tomaxi mai nïadatai dukai gaagagi ïgai dïï bïïxkïrï Diuxi ipïrhidi xi tïïgiagi ïgai. Daiñi, tomax dukai Diuxi kïï gïr miadïrï daja bïïxkatai aatïmï.

²⁸ Diuxi gubukadadïkïdï tudu duduaka aatïmï dai ajiopai dai óídaga. ¿Mai ix pokaiti ïmadutai gïn aaduñi ix makïdï ïr ojadami? Ïgai oja ïmo xigian kaitikïdï ñoki daidi ikaiti, —Aatïmï ïr maamaradï Diuxi ïpï— ikaiti.

²⁹ Buaboi aba tudu xi ïr maamaradï aatïmï Diuxi. Kaxkïdï tudu, ¿Dukatai pobïr ïrhiadana aatïmï xi Diuxi ïr ïmo ubixi maaxi ix makïdï odami idui? Ïgai maiti ïr ïmo odami duñidï toma xïï kabami saitudagakagi odami ix makïdï iduña agadagi. Ïgai maiti ïr oro tomarhi plata tomarhi odai ïpï.

³⁰ Ïïkioma óídakami mai maatïkatai buaboidaiña pomaaxi. Kaxkïdï aidïpïrï Diuxi maiti ipïrhiditadai xi bui bhamukagi. Dïï xibi gia Diuxi kaxi gatïjai sai ïmadukai gïn tïtïgitoagi bïïxi odami aipako óídakami.

³¹ Daiñi, Diuxi ka dáí ïmo kïïrhi xi ïgai nïijadamu oidigi daama óídakami dai ïgai aagadamu ix makïdï ïr kïïga ibuadami dai ix makïdï ïr soimaaxi ibuadami. Kïï nïijadamu ïgai dai sïïrhi aagadamu. Dai Diuxi ka dáí ix tuma tasïrï pobï gï duñagai gobai ïpï. Kïï maatï aatïmï xi ïr buaboi ka agai gobai, Diuxi duakaturhi go kïïrhi ïgai aidïxi mutadai ïgai kaxkïdï— itïtïdai Pabora.

³² Dai go odami ami ïmpaiñdaragïrï kaï go Pabora xi aagai ïgai ïmo kïïrhi ix makïdï muu dai ïpamu duakatu daidi jaa mos parunadan kaititadai kaïkai. Dïï gia jaa itïtïdai sai, —Ïpï daamïrï kaïkamu aatïmï bamioma gï aatagi, aapi Pabora— ikaiti jaa.

³³ Daidi busai Pabora abhai ïmpaiñdaragaiñdïrï dai jii.

³⁴ Daidi ïïmoko ix makïdï ami darajatadai buaboitu Suxi Kristo dai oi go Pabora. Ïmoko Dionisio tïgidukana. Ïgai ïr bhaitï kïakamikana ami Areopagïrï. Dai ïmo oki Damaris tïgidukami buaboitu ïpï ïmadï jaa odami ïpï.