Hechos 16 - Northern Tepehuan Bible

Timoteo oi go Pabora ïmadï Silas

¹ Daidi go Pabora ayi xako Derbiïrï dai Listrana tïtïïgidu kiiki. Ami tïï ïgai ïmo buaboitudadami Timoteo tïgidukami. Ïgai ïr maradïkatadai ïmo oki judiu buaboitudadami ïpï dai ogadï ïr griego ñokadami dai maiti ïr judiu.

² Go Listrana dai Ikoniana óídakïdï buaboitudadami kïï tuigakami agaiña go Timoteo.

³ Kaxkïdï Pabora ipïrhitadai xi baidakagi go Timoteo dïï mos gatïjai sai gï circuncidandoagi ïpïgioma bai mai bhakoikagi go judidiu ami óídakami, bïïxkatai ïgai maatïkatadai xi ogadï ïr griego kaxkïdï.

⁴ Daidi Timoteo oi go Pabora ïmadï Silas. Dai gadibiji ïgai buaboitudadami muiyapïrï xako ïr gïgïr kiiki dai aagidi sai gï agaitadai xi ïgiada ïgai go ojai ix makïdï iduitadai go bhaibuxtama dan goka ojotoxikami ïmadï go gaa bhaitï gukakami.

⁵ Dai podukai bamioma gubukaturhi ïgai go buaboitudadami sai kabakan kïkibagi buaboidaradï dai bïïx tasai jaa buaboitudaiña ïpï dai gïn urabaiña.

Pabora tïïtïkiïrï dukai tïï ïmo kïïrhi Masedoniïrï oidakami

⁶ Go Pabora ïmadï go gaa imia ïrhiditadai xako Asia tïgidu oidigi dai ami aagadagi Diuxi ñokidï ïpï dïï Diuxi Ibhïadï mai dagito xi kaxkïdï bhaiyoma sïïrhi dïgabusai ïgai xako Frijia dai Galasia tïtïïgidu oidigi.

⁷ Dai bhodïrï ayi ïgai miadïrï xako Misiana tïgidu dai oijada agaitadai gïn imidagai Bhitiniamakoga dïï mos Suxi Ibhïadï mai dagito ix gamo iimia ïgai ïpï.

⁸ Daidi bhodïrï Misiana sïïrhi dïgabusai ïgai, dai maigo koida ayi xako Troas tïgidu bhaabhaki.

⁹ Dai aidï tukarï tïïtïkimi Pabora ïmo kïïrhi Masedoniañdïrï oidakami sai buidïrï kïïka dai daañimi daidi ikaitimi, —Gimi Masedoniamu dai gïr soiña— ikaitimi.

Lukas oi go Pabora abhiadïrï Troasañdïrï

¹⁰ Kaxkïdï otoma bhai gïr dui aatïmï dai iimia ragai Masedoniamu. Kïïga buaboidaitadai aatïmï ix gïr baiditadai Diuxi tïsai ami oidakami buitapi aitulda go bhai ïrhiaragai ñoki.

¹¹ Ami Troasïrï tïtïsai aatïmï ïmo barkoïrï dai sïïrhi iji xako Samotracia tïgidu oidigi. Dai gïn xadiko Neapolixiïrï ayi aatïmï dai ami tïapai barkoañdïrï.

¹² Dai abhiadïrï iji aatïmï Filipoamu. Go Filipo ïr ïmo gïdukamioma kiiki ami Masedonia oidigïrï. Dai ami Filipoïrï tïanïitadai go Romanos. Ami tudu gïr urhi aatïmï chïki tasai.

¹³ Daidi aïkai go ibhïxtaragai tasai bai maigobai kiikiañdïrï bubuaja aatïmï lachi dai mïï ayi ugidïrï ïmo gïï aki. Ami gïn ïmpaidiña odami dai gadaanïiña Diuxi. Daidi ami daraiba aatïmï dai gaatagidi oki ix makïdï ami gïn ïmpaiditadai.

¹⁴ Ïmoko Lidia tïgidukatadai. Ïgai ïr Tiatirïrï oidakami daidi ïr gaagaradami ikuxi moraduakami. Idi oki kïïga xadutudai Diuxi. Dai kaïkatadai ïgai aatagidï Pabora dai Diuxi maa tïgibudagai xi ïïgida kaïkana.

¹⁵ Dai bhodïrï go Lidia gï bakoi ïmadï bïïxkatai ix makïdï kiidïrï óídakatadai. Daidi gïr daañimitadai ïgai dai pobïrtïtïdai, —Mïxi buaboitudadami gin ïrhiadagi aapimï kïïgakïrï aidï abïr gin kiiyïrï gïn urhiña asta xïïxkadï iimi agadagi aapimï tabhiadïrï— itïtïdai ïgai. Muiyoko pobai gïr tïtïdai ïgai dai aatïmï bhai aa dai gamo iji.

Gïn maamaixatu Pabora ïmadï Silas

¹⁶ Ïmo imidagai akiamu iimïdami aatïmï xako gadaanïiña odami Diuxi dai gïr buidïrï ayi ïmo arhi oki. Idi arhi oki mos ïr soigadï dukamitadai jaa ami óídakami. Biakatadai ïgai ïmo diabora tïañikarudï ïrana ix makïdï mamaakaiña tïgibudagai xi go arhi oki ïkiaxdïrï ka aagaiña ixtuma daibuña agaiña. Ïgai amudï mui maitïkïiña tuminxi ïgaikïdï.

¹⁷ Idi arhi oki aipako gïr oidatukïiña, aatïmï ïmadï Pabora tudu, dai iñakidana daidi ikaitidana, —Idi kïkïïrhi ïr pipioñigadï Diuxi go bïïxi adama bhaitï kïakïdï. Gobai gïn aagidimi ixdukatai kïïgakïrï bubuakiagi aapimï— ikaitidana go arhi oki.

¹⁸ Mui tasai mos pobuayi ïgai dai tïbïpikïdï ojogi Pabora mos kaïkatai dai ajako kïkiba daidi bhagaimi go diabora tïañikarudï ix makïdï arhi oki ïrana dakatadai, —Suxi Kristo gubukadadïkïdï an gï aagidi pïsai busaiña go okiañdïrï— itïtïdai. Mos potïi ïgai dai otoma busai go diabora tïañikarudï.

¹⁹ Daidi go gaa ix makïdï ïr amudï go oki maatï tïï ix ka mai bamioma gamaitïkïdamu tuminxi busaikai go diabora tïañikarudï daidi bui ïgai go Pabora ïmadï Silas dai gubudakïdï baidaja ïgai dai dudunukami buidïrï tutui plasana.

^20-21 Daidi itïtïdai ïgai go dudunukami aidï, —Idi kïkïïrhi ïr judidiu dai tami dada gobai dai gïr aagidimi tïsai ïïgiadagi ïmai bituldaragai ix makïdï mai bia aatïmï oigaragai xi ïïgiadagi. Aatïmï ïr Romanos tudu dai gïr sïïrhikamiga maiti gïr maakai oigaragai xi pobuadagi aatïmï. Podukai gïr aagidimi gobai dai bhakoitudai óídakami— itïtïdai ïgai dudunukamiïrï gukatai.

²² Dai ami óídakami bïïxkatai kaburhi gukiba dai bui surhi go Pabora ïmadï Silas. Daidi dudunukami gatïjai sai upasdana yukuxidï dai sai gïikarsana.

²³ Tïbïpi gïikarai ïgai dai gokiïrï maamaixa. Dai gatïjai ïgai go maixakarui nukadakami sai kïïga nukadakana.

²⁴ Daidi go maixakarui nukadakami baidaja go Pabora ïmadï Silas dai maixakaruana xako bïïxi ïr gatukabioma kuu. Dai ami uxi maixakaruïrï baapa ïïkasodï ïpï dai anaaxi bia.

²⁵ Ami tudu darajatadai go Pabora ïmadï Silas daidi ïraan tukarï gaatagataidai Diuxi ïmadï dai ganïyitadai oigïda ñokaitai Diuxi bïïtarï dai go gaa maamaixapikïdï mos kaïkatadai.

²⁶ Daidi todian dukai kabami gigidurhi ami oidigi dai oiñitu go maixakarui simientogadï. Daidi kupiokan tïi bïïxi kukuparagadï go maixakarui, dai upai kadena ixtukïdï bupurakatadai maamaixapikïdï.

²⁷ Ami kosokatadai go nukadakami maixakarui dai nïnïabakai tïï ix kukupiokiñikatadai kukuparagai dai busaitu gï maxtaga dai ïïgi gï mua agaitadai poïrhiditai ix ka bubuakatadai go maamaixapikïdï.

²⁸ Dïï mos Pabora gïgïrï ñokidi daidi itïtïdai, —Maiti gï mua aapi kïïrhi, tami aatï daraja bïïxkatai kia— itïtïdai.

²⁹ Daidi go maixakarui nukadakami gatáí ïmo kudakarui dai mïraitai baa xako darajatadai go Pabora ïmadï Silas. Ami buidïrï kuiki ïgai dai gigibukimi tukugadï duadimukatai.

³⁰ Dai bhodïrï bubaitu ïgai go Pabora ïmadï Silas abhiadïrï dai gatïkakai daidi itïtïdai, —Gin aagidabïrai aapimï, ¿ix dukatai duna aanï dai kïïgakïrï busaiña?— itïtïdai.

³¹ Daidi Pabora ïmadï Silas itïtïdai aidï, —Buaboitudañi aapi Suxi Kristo. Mos buaboitudakai kïïgakïrï busaimu aapi ïmadï gï aaduñi ïpï ix makïdï gï kiiyïrï óídaga— itïtïdai.

³² Daidi bhodïrï Pabora ïmadï Silas aataga ïmadï go maixakarui nukadakami dai ïmadï ix makïdï kiidïrï óídakatadai. Aatagidi ïgai Diuxi ñokidï.

³³ Dai kia ïr tukarïkatadai baidi go maixakarui nukadakami bakuañdi tukugadï Pabora ïmadï Silas mïx xako saasaraitadai. Dai bhodïrï otoma gï bakoi go maixakarui nukadakami ïmadï aaduñdï ïpï ix makïdï kiidïrï óídaga.

³⁴ Dai gokiïrï baidakai ïgai go Pabora ïmadï Silas gï kiiyamu dai bhibhi. Dai kïï bhai gï ïldatu go kïïrhi buaboitudakai dai aaduñdï ïpï kïï bhai gïn ïjïrhi ïpï.

³⁵ Bhodïrï xadiko kiamoko go dudunukami otoxi ñoki sandarukïdï go maixakarui nukadakami sai dagitona ïgai go Pabora ïmadï Silas.

³⁶ Daidi go nukadakami maixakarui potïtïdai go Pabora aidï, —Go dudunukami kaxi gin otoi ñoki ansaidi gïn dagitona. Imibïrai tudu dai maiti abïr ñokada aidï— itïtïdai.

³⁷ Dïï mos Pabora itïtïdai go sandaru ix makïdï ami dibiatadai aidï, —Cho daiñi— itïtïdai. —Kaxi gïr tïañitu ïgai gïikarsagi bïïxi odami buitapi maiti gïr dagitokai tïx ñokia aatïmï, dai gïr maamaixa bïïxi. Dai aatïmï ïr romano di. Ïgai mai bia sïïrhikami xi pobai gïr buidadagi aatïmï ix makïdï ïr romanos tudu. Dai xibi mos ïxto gïr dagitoda ïrhidi ïgai. Podukai gia cho— itïtïdai. —Aagidabïrai bhaiyoma sai ïïgi dadana ïgai dai gïr bubaidana tabhiadïrï— itïtïdai Pabora go sandaru.

³⁸ Daidi go sandadaru mïï aagidi aidï go dudunukami podukai baidi ïgai arhiï duduadimu maatïkai xi ïr romanos go Pabora ïmadï Silas.

³⁹ Daidi iji ïgai mïïka xako darakatadai Pabora ïmadï Silas dai daañimi sai oigïldana. Dai itïtïdai ïgai aidï, —Gïr oigïdakai abïr iimi tabhi Filipoañdïrï— itïtïdai.

⁴⁰ Dai go Pabora ïmadï Silas sïïrhi iji kiidïrï Lidia mos bubuakïkai maixakaruañdïrï. Ami tïï ïgai go gaa buaboitudadami dai abïnaki ïgai aatagikïdï dai bhodïrï iji abhiadïrï.