Hechos 14 - Northern Tepehuan Bible

Ikoniïrï aatadui Pabora ïmadï Bernabe

¹ Daidi go Pabora ïmadï Bernabe baapa judidiu kiupaigadïrï aïkai ïgai Ikoniïrï. Arhiïxi kïïga ñiño ïgai bai mui odami buaboitu, modukai judidiu ïmadï ix makïdï maiti ïr judidiu.

² Dïï go gaa judidiu ix makïdï maiti ipïrhi ix buaboitudagi ïgai maa aatagi go ix makïdï maiti ïr judidiu sai ïgai kïïdaidana go buaboitudadami.

³ Kaxkïdï go Pabora ïmadï Bernabe anaaxi bii bhai tïbïpi. Dai mai duduadikuitai ñokaiña Gïr Nukadakami bïïtarï. Aagaiña ïgai soiñigadï Diuxi ix makïdï urhiñdimi ïgai odami. Dai Diuxi maa gubukadagai saidi ibuadana ïgai naana maaxi ix makïdï ïïgi Diuxi ibuayi. Podukai Diuxi tïtïgidi odami xi ïr buaboi ñokidï Pabora ïmadï Bernabe.

⁴ Dïï go Ikoniïrï óídakami aipako gïn bupui ñokaitadai. Ïïmoko kïïga ñokaiña go Pabora dai Bernabe bïïtarï dai jaa kïïga ñokaiña go judidiu bïïtarï.

⁵ Muidukatadai go Pabora bui ñokadami modukai judidiu ïmadï ix makïdï maiti ïr judidiu dai ïgai mïï aataga ïmadï dudunukami dai gaaga agai ixdukatai maikarsagi go Pabora dai Bernabe. Koda ïrhiditadai aidï.

⁶ Dïï máí Pabora ïmadï Bernabe dai dïgabuna boopoi dai ayi ïmo oidigïrï xako Likoniana tïgidu dai ami ayi ïgai kiiki xako Listrana dai Derbiana tïtïgidu. Dai ayi ïgai jaa kiikiïrï ïpï nobai Likoniana ïpï.

⁷ Ami oidigïrï aatagidi ïgai óídakami dai aagidi sai Suxi Kristo ïr kïïgakïrï bubiadami.

Go Listrana óídakami bhakoi Pabora dai Bernabe bui

⁸ Listraïrï oidakatadai ïmo kïïrhi dai maiti ixtutuidikatadai ix aimïrdagi. Ïïgi podukai busai ïgai dai mos daakana. Tomarhi ïmo imidagai mai aimïraiña ïgai.

⁹ Dai ïgai dakatai kaïkatadai aatagidï Pabora. Daidi go Pabora gï tïgito tïï ix buaboitu ïgai ix Diuxi ixtutuidikïi xi duadiagi.

¹⁰ Daidi Pabora gïgïrï itïtïdai, —Kïkibañi— itïtïdai. Dai go kïïrhi mos tuarhi tudai aidï dai ka aimïrai.

¹¹ Dai go odami iñakimi nïiditai ix Pabora ka duaditadai ïgai daidi ikaitimi, —Tïapaitiki didiuxi tïbagiañdïrï dai odami maaxi titioditu— ikaiti odami. Likoniana ñoki ñokidïkïdï iñakimi ïgai.

¹² Daidi go odami didiuxi aagaiña go Bernabe ïmadï Pabora. Seus tïgidu ïmo diuxigadï ïgai dai po gïn ïrhidiña ïgai sai go Bernabe ïr Seus dai poduu aagaiña. Dai Pabora Hermes aagaiña ïgai. Bamioma aatagaraga go Pabora kaxkïdï.

¹³ Ami kiiki ugidana kïakatadai kiupaigadï Seus. Daidi ïmo parhi ix makïdï buaboitudai go Seus mïï buapi mui yooxigai ïmadï tuturu dai kodituda agai go Pabora ïmadï Bernabe. Podukai go parhi ïmadï go gaa óídakami iduña ïrhiditadai ïmo xadutudaragai maaxi Pabora dai Bernabe bïïtarï. Abhai kiikiïrï ugidïrï xako ïmo gïï kuuparagana daibunuga boi ami bua ïgai go tuturu.

¹⁴ Dïï go Pabora ïmadï Bernabe máí xi poduña agaitadai ïgai dai saasarai ïïgi gïn yukuxi soi ïrhiaragaikïdï bai nïidiña odami ix maiti ïr kïïga ix xadutuadagi odami Diuxi dukai. Dai baapa ïgai odami saagida dai iñakimi daidi itïtïdaimi,

¹⁵ —¿Kïkïïrhi, tuimïxi aidï gïr xadutudai podukai? Aatïmï mos ïr odami ïpï di. Gïn ïpïan dukami aatïmï. Dada aatïmï dai gïn aagida ragai ïmo bhai ïrhiaragai aatagi. Gï aagai xi ka mai buaboitudada aapimï gobai ix makïdï maiti ïr soiñi, gobai ix makïdï didiuxi aagai aapimï tudu. Gï aagai mïx buaboitudagi Diuxi bhaiyoma. Ïgai gia ïr oidakami dai ïr buaboi. Buaboitudabïrai tudu go kïïsakami tïbagi ïmadï oidigi dai gïï sudagi dai bïïxi ixtumaxi oidaga.

¹⁶ Ïïkioma, mai kia dibiakai Suxi, Diuxi daadagitoiña odami ix makïdï maiti ïr judidiu saidi xadutuadana ïïgi ixtumaxi xadutuada ïrhiada ïgai.

¹⁷ Dïï tomaxi pobuadana ïgai Diuxi bïïxkïrï gï mamaaxidi ix ïr kïï tuigakami ïgai. Ïgai kïïga otosaiña duki bai kïïga bañidana odami ïïxidï. Idui ïgai sai kïïga bhai gï buadana kuadagai bai biaka aatïmï gïr bhai ïrhiaraga— itïtïdaimi Pabora ïmadï Bernabe.

¹⁸ Dïï tomaxi potïi ïgai, go odami apia kia koda ïrhiditadai go tuturu dai xadutuada agaitadai, dïï go Pabora ïmadï Bernabe maiti gïn dagito.

¹⁹ Dai aidïpïrï ami dada judidiu Antiokiañdïrï dai Ikoniañdïrï óídakami. Dai ïgai bui ñokaitadai go Pabora dai bhaakoitu go odami ïgai bui. Baidi go óídakami maikakarai go Pabora mua ïrhiditai. Dai bhodïrï ka maikarsakai tïbaimu ïgai go Pabora dai busaitu kiikiañdïrï maigobai dai ami bia po gïn ïrhiditai ix ka muatadai.

²⁰ Dai gokiïrï go buaboitudadami ami gukatadai xako kaatïtadai Pabora bai ïgai bañi dai baa ïpamu kayamu. Ami bii ïgai ïmo tukagi dai xadiko jii ïgai Derbiamu ïmadï Bernabe.

Ayi Pabora Antiokiïrï ïpamu

²¹ Ami Derbiïrï aagidi Pabora go bhai ïrhiaragai aatagi. Dai mui odami buaboitu bai ïgai gamaatïturhi ixdukatai oijadagi Diuxi. Bhodïrï aa surhi go Pabora ïmadï Bernabe dai ayi Listrana dai abhiadïrï iji Ikoniamu dai gokiïrï ayi Antiokiïrï ïpamu.

²² Dai dïgabunukai ïgai bïïxi go kiikiïrï ïgai gamaakaiña gubukadagai abhana go buaboitudadami daidi gaabïnakidiña xi kïïgakïrï buaboidaiña ïgai. Dai aagidimi ïgai sai gï agaitadai kia xi odami naana maaxi soi ïrhiaragai taatagi xi gokiïrï ayimu ixtuigako gatïanïda agai Diuxi.

²³ Dai bïïxi aipakoga xako gïn ïmpaidiña buaboitudadami go Pabora ïmadï Bernabe darai bhaitï gukakami bai ïgai nukadakana go buaboitudadami. Dai kaxi po duñakai ïgai sai bhodïrï gadáí ïgai Diuxi go buaboitudadami bïïtarï mai dïïkai kuadagai. Daidi itïtïdai ïgai Diuxi, —Aapi Diuxi ïr nukadakami ka agai idi buaboitudadami— itïtïdai ïgai daanïitai.

²⁴ Dai bhodïrï iji Pabora ïmadï Bernabe dai Pisidiana sïïrhi dïgabusai dai ayi xako Panfilia tïgidu oidigi.

²⁵ Dai ami Panfilia oidigïrï ayi ïgai xako Perjeana tïgidu ïmo gïï kiiki. Ami aagidimi ïgai odami ix kaiti Diuxi ñokidï dai bhodïrï maigo koida ayi ïgai Ataliana.

²⁶ Go Atalia gïï sudagi ugidana bipiïyi. Dai ami tïtïsai ïgai ïmo barkoïrï dai iji Antiokiamu. Baasïkioñdïrï go buaboitudadami Antiokiïrï gadáítadai Diuxi sai soiñana go Pabora ïmadï Bernabe aaduindadïrï ix makïdï iduitadai ïgai aidï.

²⁷ Dai ami Antiokiïrï mos aïkai idui ïgai ïmo ïmpaiñdaragai bïïxi go buaboitudadami ïmadï dai aatagidi bïïxi ixtumaxi iduitadai Diuxi gïn soikïitai gïn aaduindagïrï. Dai aagidi ïpï sai Diuxi ka urhinditadai oigaragai odami ix makïdï maiti ïr judidiu xi ïgai buaboitudada ïpï.

²⁸ Daidi Pabora ïmadï Bernabe amaxi bii bhai tïbïpi buaboitudadami ïmadï.