Hechos 12 - Northern Tepehuan Bible

Ïmo Diuxi tïañikarudï maixakaruañdïrï busaitu go Piduru

¹ Aidï tuigako go Rey Erodïxi soi buadatadai go buaboitudadami dai sandarugadï bui ïïmoko dai maamaixa.

² Dai go Erodïxi gatïjai muaragai go Jakobo maaxtaikïdï ïpï. Juan xïgidï gobai ix makïdï gï muatu.

³ Dai gokiïrï go Erodïxi nïidi ix bhai gïn ïrhi go judidiu muakai ïgai go Jakobo xi kaxkïdï maixapikami bhïiyi ïgai go Piduru ïpï. Aidï ibuadatadai go judidiu go bagimi ix makïdï pan mai biakami kopodakarui bagimi tïgidu. Aidïpïrï tudu gï bhïitu go Piduru.

⁴ Dai gï maixatu ïmo maixakaruïrï xako bhaibuxtama dan naadami sandaru nukadakana. Maamakuadutai gukakana ïgai dai nukadakana. Go Erodïxi busaida agaitadai go Piduru dai baan kïïsa agaitadai dudunukami buitapi dai odami buitapi kugaidakai go bagimi.

⁵ Dai kia maixapikatadai Piduru aidï dai kïïga nukatikatadai. Daidi go buaboitudadami kabami daañimi Diuxi ïgai bïïtarï.

⁶ Daidi kaxi gï baan kïsa agaitadai go Piduru dudunukamiïrï dai aidï takabioma tukarï kosokatadai Piduru dai bïï gokapadïrï daraka sandaru dai nukada. Goka sandaruañdïrï burhikatadai go Piduru goka kadenakïdï. Dai jaa sandaru nukadakatadai kitaagiña.

⁷ Daidi todian dukai ami gï maaxitu ïmo Diuxi tïañikarudï dai kïïga kudidikami bii go maixakarui. Daidi Diuxi tïañikarudï taata go Piduru kotabadï ïmo padïrï dai nïñitu daidi potïtïdai, —Otoma bañigi— itïtïdai. Tai otoma upai go kadena ixtukïdï burhikatadai Piduru ïïkadï.

⁸ Daidi Diuxi tïañikarudï itïtïdai aidï, —Gïixatudañi gï gibura dai gï aada gï sususaka— itïtïdai. Dai aidïxi ka podui go Piduru baidi Diuxi tïañikarudï itïtïdai, —Gï tuiñi gï chamaraga daidi gin oida— itïtïdai.

⁹ Daidi bhodïrï busai go Diuxi tïañikarudï dai go Piduru oidi mai maatïkatai xi ïr buaboi ix cho ïpï ix makïdï buididi Diuxi tïañikarudï. Bhaiyoma tïïtïki ïrhidi ïgai.

¹⁰ Dïï bïïxkïrï dïgabusai ïgai xako gukatadai miadïrïioma gukakami sandaru dai gokiïrï dïgabusai xako maigobioma gukatadai jaa dai aidïxi ka ayi ïgai xako kïïka ïmo gïï baiñomi kuuparagai kayamakoga kïakïdï bai go kuuparagai ïïgi gï kupioko. Dai bubuaja ïgai dai ïmapai iji lachi dai todian dukai ka mai tiputa go Diuxi tïañikarudï.

¹¹ Dai aidï gia máí go Piduru xi ïr buaboi daidi ikaiti, —Xibi gia ka máí aanï xi ïr buaboi ix Diuxi otoi gï tïañikarui dai ïgai kïïgakïrï gin busaitu xi ka mai soi gin buidadagi go Erodïxi dai ix ka mai biakagi aanï ix soimaaxi taatakagi go soimaaxkami ix makïdï gin duña agaitadai go judidiu— ikaiti Piduru.

¹² Dai aidïxi ka maatï tïï ïgai ix kïïgakïrï busaitadai jii ïgai kiidïrï ïmo oki Maria tïgidukami. Idi Maria ïr Juan Markos dïïdï. Dai ami kiiyïrï gïn ïmpaidakatadai mui odami dai gadaanïitadai Diuxi go Piduru bïïtarï.

¹³ Kidigamadïrï kïakatadai go Piduru dai sonïitadai kuuparagai kayamadïrï kïakïdï dai busai ïmo arhi oki Roda tïgidukami dai nïida agai xorai ïgai.

¹⁴ Dai maatïkai go Piduru ñokidï mai kupiokidi mos ïï bhai ïldakai dai bhaiyoma ïpamu tukabiako mïï dai aagida agai go gaa sai kitaagiña kïïka go Piduru.

¹⁵ Daidi go tukabi darakakïdï itïtïdai aidï, —Cho, buirutapïtiki aapi. Xadïrï ïr buaboikana xi kidigana kïakagi Piduru— ikaiti ïgai. Dïï mos go arhi oki apia aagidi saidi ïr buaboi. Daidi go gaa ikaiti aidï, —Xadïrï ïr Pidurukana gobai, mos ïr tïañikarudï ïrhi aanï gobai— ikaiti.

¹⁶ Daidi go Piduru apia soñiditadai baidi go odami kupioko dai ka mai tïï ixdukatai gïn tï tïgitoagi tïïgakai xi gia ïr Pidurukatadai dai mïïka kïakatadai.

¹⁷ Dïï mos go Piduru gï nobikïdï aagidi sai gïn dodorhimadana dai bhodïrï aagidi ïgai ixdukatai Diuxi busaitu maixakaruañdïrï. Daidi itïtïdai ïgai go odami aidï, —Aagidabïrai go Jakobo ïmadï go gaa buaboitudadami ïpï ixdukatai pogïdui— itïtïdai. Dai bhodïrï xibhïakoga jii go Piduru abhiadïrï.

¹⁸ Daidi ka maaxikai oidigi, go sandaru mos aipako bopoimitadai duduadimukatai mai maatïkatai xïï dui go Piduru.

¹⁹ Daidi go Erodïxi tïjai sandaru sai gaagana go Piduru dai aidïxi ka mai tïï ïgai taidi Erodïxi báí go sandaru ix makïdï nukadakatadai go maamaixapikïdï dai tïkakai ix tumaxi pogïduitadai dai bhodïrï aatagakai gatïjai kodaragai. Dai bhodïrï jii Erodïxi Judeañdïrï dai Cesareïrï oidatu.

Ugidagai go Erodïxi

²⁰ Aidïpïrï go Rey Erodïxi bui bhamukatadai go Tiroana dai Sidonïrï óídakami. Go Erodïxi gïïpi tïanïitadai oidigi dai abhiadïrï kuadagaigadïañdïrï kuadana go Tiroana dai Sidonïrï óídakami, kaxkïdï bhai duña ïrhiditadai ïgai ïmadï go Rey. Dai aagidi ïgai ïmo kïïrhi Blasto tïgidukami ix makïdï ïr sonoïrï kïakamigadïkatadai go Rey bai ïgai buaboitu gïn ñoki dai gïn soi. Maa ïgai oigaragai xi go Tiroana dai Sidonïrï óídakami baan gukibagi buidïrï go Rey dai bhai duñagi ñoki sai ka mai bhaamukana ïgai.

²¹ Daidi go Rey Erodïxi otoxi ñoki dai aagidi ix makïdï tasïrï iimia ïgai. Dai aidï tasïrï go Erodïxi gï aayi kïkïïgadukïdioma yukuxi dai go gïï daikarudïrï daibakai gamaa ïgai ïmo aatagi aaduñdï.

²² Daidi go odami ijiña kaïkai daidi ikaiti, —Gia bamioma ïr gïdukami go Erodïxi xi tomax tuma ïmai odami— ikaitiña. —Ïmo diuxiaba gobai— ikaitiña.

²³ Kia iñakaitadai odami dai todian dukai ami dibia ïmo Diuxi tïañikarudï dai muragi go Erodïxi mai xadutudaitai ïgai Diuxi. Daidi gokiïrï batopadagai kuayi tukugadï xi ïgai muu.

²⁴ Dai aidïpïrï go buaboitudadami muiyapïrï aipakoga aagidi Diuxi ñokidï bai mui óídakami buaboitudaimi.

²⁵ Dai go Bernabe ïmadï Saulo nonora Antiokiamu ka kugaidakai gïn aaduindaga Jerusalenïrï dai baidati ïgai go Juan Markos ïpï.