Hechos 11 - Northern Tepehuan Bible

Piduru agai ixdukatai pogïduitadai Cesareïrï

¹ Daidi Suxi ojotosadï ïmadï go gaa buaboitudadami Judeïrï óídakami kajioma xi jaa odami ix makïdï maiti ïr judidiu ka buaboitudatadai Diuxi ñokidï ïpï.

² Dai aïkai go Piduru ïpamu mïï daana Jerusalenïrï baidi go judidiu ix makïdï ïr buaboitudadami ñokidi,

³ daidi itïtïdai, —¿Tui pïxi aidï dibiji gobai ix makïdï maiti ïr judidiu dai ïmadï gauu?— itïtïdai.

⁴ Daidi Piduru aagidi bïïxi ix tumaxi pogïduitadai daidi itïtïdai,

⁵ —Aanï mïï Jopeïrï dakatai gadaanïitadai Diuxi dai tïï aanï ïmo gïï ikuxi suayi maaxkami dai tïbagiañdïrï tïapanïi. Ayi gobai xako dakatadai aanï dai bïï maakoba xiixixonañdïrï daagïkami imïi.

⁶ Dai tïgito nïidi aanï bai ami suayïrï imïi buxtaki dai kïkïixi dai ujurugi.

⁷ Dai kaï aanï ïmo ñoki baidi pobai in tïtïdai, —Kïkibañi Piduru dai koda dai uga—.

⁸ Dïï aanï itïtïdai aidï, —Cho Gin Nukadakami, tomarhi ïmo imidagai maiti ïr kuadami aanï gobai. Daidarxi gobai aatïmï judidiu bïitarï di— antïtïdai aanï.

⁹ Dai ïpamu kaï aanï go ñoki tïbagiañdïrï bai pobai in tïtïdai, —Diuxi kaxi gamaa oigaragai mïxi kuada gobai dai xibi maiti gï agai xi tukurakami aagada aapi gobai— ikaiti go ñoki.

¹⁰ Baikojo pobï gï dui gobai bai ïpamu tïsai tïbagiamu go suayi maaxkami— itïtïdai Piduru.

¹¹ —Dai bhodïrï tïbagiamu dui go suayi maaxkami dai ami dada baika kïkïïrhi dai gin gaagaimi. Ojotosadï ïgai ïmo Cesareïrï oidakami.

¹² Dai Diuxi Ibhïadï gin aagidi ansai oidana mai buamï in ïrhiatugaitai. Dai naadami buaboitudadami Jopeïrï óídakami gin oi ïpï. Bïïxkatai aatïmï ayi kiidïrï ïmo kïïrhi Kornelio tïgidukami.

¹³ Dai go Kornelio gïr aagidi sai tïïtadai ïgai ïmo Diuxi tïañikarudï dai sai go tïañikarui itïtïdaitadai, —Aapi Kornelio, otosañi kïkïïrhi Jopamu bai mïï baidana ïmo kïïrhi Ximuñi Piduru tïgidukami.

¹⁴ Ïgai gï aagidamu ix kaiti Diuxi ñokidï dai ixdukatai kïïgakïrï busiagi aapi ïmadï bïïxi ix makïdï gï ïmadï óídaga— itïtïdai Diuxi tïañikarudï. Pogïdui tudu— ikaiti go Piduru

¹⁵ —Dai utudama gin aagakai gamaa aanï ñoki bai dibia Diuxi Ibhïadï bïïxkatai ïgai ïmadï ïpïan dukai ix dukatai dibiatadai ïgai aatïmï gïr ïmadï tukamïrï.

¹⁶ Daidi gin tïgito aanï ix kaititadai gïr Nukadakami baasïkioma. Ïgai ikaiti aidï sai, —Go Juan sudagikïdï gabapakonaiña odami, dïï aanï aagai ix aapimï gïn bapakoñikamu Diuxi Ibhïadïkïdï bhaiyoma— ikaiti Gïr Nukadakami

¹⁷ Dai dibiakai Diuxi Ibhïadï ïgai ïmadï maatï tïï aanï sai podukai ix dukai gïr maa Diuxi Ibhïadï, ïmo oidaragai dukai, podukai ïpï maa ïgai Ibhïadï ix makïdï maiti ïr judidiu ïpï. Kaxkïdï, xadïrï ipïldana aanï xi sobhidagi Diuxi, in ïrhidi aanï nïiditai— ikaiti Piduru.

¹⁸ Daidi go buaboitudadami Jerusalenïrï ka mai bui ñiño kaïkai aatagidï Piduru. Bhaiyoma bhai gïn ïldan kaiti ïgai Diuxi bïïtarï daidi ikaiti, —Kaxi ti maa Diuxi oigaragai go ix makïdï maiti ïr judidiu ïpï sai ka ïma dukai gïn tïtïgitoagi ïgai dai kïïgakïrï óídakagi— ikaiti go judidiu.

Go Antiokiïrï óídakami buaboitu ïpï

¹⁹ Aidï abhiadïrï xi go judidiu muatadai go Tibañi, gïn aaga soi buimi ïgai go gaa buaboitudadami ïpï. Dai ïïmoko go gaa buaboitudadami dïgabuna bopoi aidï. Ïïmoko iji Fenisiamu dai jaa Chipreamu dai jaa Antiokiamu. Ga aagada iimïitadai ïgai Diuxi ñokidï dïï mosïka judidiu aagidimi ïgai dai jaa odami gia cho.

²⁰ Dïï gia ami Antiokiïrï dada jaa buaboitudadami ïpï Chipreañdïrï dai Cireniañdïrï óídakami dai ïgai gia aagidi odami ix makïdï maiti ïr judidiu ïpï sai Suxi Gïr Nukadakami ïr kïïgakïrï bubiadami.

²¹ Diuxi kïïga soi go buaboitudadami ïgai dai ami kïïga mui odami ix makïdï maiti ïr judidiu buaboitu ïpï dagitokai gïn ïïkidadï buaboidaragai dai xibi ka oidami bii ïgai Gïr Nukadakami.

²² Dai go buaboitudadami Jerusalenïrï óídakïdï kajioma sai ka buaboitudai odami Antiokiïrï ïpï dai gamo otoi ïgai go Bernabe.

²³ Ayi go Bernabe Antiokiïrï dai kïï bhai gï ïldatu nïiditai xi Diuxi kïïgakïrï nïiditadai go buaboitudadami ami. Dai abïnaki ïgai go buaboitudadami xi ïgai gupurtudana gïn iibhïdaga sai apia oijadana ïgai Gïr Nukadakami.

²⁴ Kïï tuigakami aidï go Bernabe dai kïïga buaboitudai Diuxi dai kïïga ïïgidiña Diuxi Ibhïadï. Dai mui odami buaboitu Diuxi ñokidï ami Antiokiïrï.

²⁵ Dai gokiïrï jii go Bernabe Tarsoamu dai gaaga agai go Saulo. Dai tïïgakai baidakai Antiokiamu.

²⁶ Dai anaaxi bii ïgai ïmo umigi go buaboitudadami ïmadï dai gamamaatïtuldaiña Diuxi ñokidï. Ami Antiokiïrï óídakami ïgai dai tukamïrï Kristianos tïïtï go buaboitudadami.

²⁷ Dai aidï tuigako Jerusalenañdïrï dada chïki aagadami Diuxi ñokidï dai ayi Antiokiïrï.

²⁸ Dai Diuxi Ibhïadï maa gubukadagai ïmoko Agabo tïgidukami dai ïgai kïkiba buaboitudadami ïmpaiñdaradïrï daidi ïkiaxdïrï aagidi sai ayi agaitadai ïmo gïï bhiugigai bïïxi oidigi daama. Dai buaboi busai gobai aidïxi dakatadai go gïï dunukami Klaudio tïgidukami.

²⁹ Daidi go buaboitudadami Antiokiïrï bhai dui ñoki dai otosda agai soiñi go buaboitudadami Judeïrï. Dai bïïxkatai ïmpagi xïïjïki ixtui.

³⁰ Dai bhodïrï tïïgi ïgai go soiñi go Bernabe ïmadï Saulo sai ïgai bhïidakaiña Judeamu dai mïï tïïgidana go bhaitï gukamigadï buaboitudadami ami.