Hebreos 9 - Northern Tepehuan Bible

Go gïï kiupai Jerusalenïrï ïr ïmo maaxidaragai dukai Suxi Kristo aaduindadï bïïtarï

¹ Daiñi, go ïïkidadï sïïrhikami ix makïdï maa Diuxi go Moises, gobai aagai ixdukatai gï agaitadai xi ibuadagi xadutudaragai Diuxi bïïtarï go ikuxi kiupiïrï ïïki. Go kiupiïrï tudu ix makïdï idui go óídakami ïïki dai tami oidigi daama kïakatadai.

² Ami kiupiïrï gokadukatadai tutukabi. Go ïpïgadï tukabiïrï kïakatadai ïmo tutusakaru kukudagi dai ïmo mesa. Dai ami mesa daama bïïtïkatadai go pan ix makïdï gï dadaxdi Diuxi.

³ Ïmo padïrï go tukabi nagiïjïtadai ïmo gïï ikuxi kobokami dai ibhïadïrï go ikuxi oidakatadai ïmai tukabi tukabioma kïakïdï. Ami go bïïxi adaama xadutudikïdï tukabi tïgidu.

⁴ Ami go tukabiïrï ix makïdï bïïxi adaama xadutudikïdï tïgidu ami dakatadai go daxdakarui kubhimadarhi dai go kajoñi ix makïdï sïïrhikami kiidï tïgidu. Go kajoñi bïï sudakami gï tïkimagi oro. Dai ïrana dakatadai ïmo ayi orokïdï duñixikami dai biakatadai maná. Dai ami kajoñiïrï kaatïkatadai uxiaradï go Aaron ïpï ix makïdï iipoi ïïki. Dai ami bïïtïkatadai go ojodai kaakaparakami ix makïdï ami ojixikatadai go sïïrhikamigadï go Moises ïpï.

⁵ Dai ami go kajoñi daama gukatadai goka uubixi ix makïdï ïpïamaaxi tïtïañikarudï Diuxi. Ïmo maaxidaragai dukai bïïtarï ïgai xako daja Diuxi. Dai ajana ïgai. Dai ami go kajoñi iñaparadï daama tarañdi ïgai ajaanadï. Ami go kajoñi iñaparadï daama tudu ïr xako bhai gï buadana soimaaxkamigadï óídakami Diuxi ïmadï. Ami ukami gïn aagidamu aanï xibi bïïtarï ix maaxkatadai gobai.

⁶ Go odami idui go kiupai ïïki tudu. Dai aidïxi ka bhai gï duitadai gobai sai abhiadïrï bhaitiakoga go dadaxdadami biakana xi dudatai bapakïdagi go tukamïrï tukabiïrï. Ami dudatai ibuadana ïgai xadutudaragai Diuxi bïïtarï. Ami ukami biakatadai ïgai oigaragai xi bapakïdagi tudu.

⁷ Dai mosïkaxi go bhaitï kïakamigadï go dadaxdadami biakana oigaragai xi bapakïdagi go bïïxi adaama xadutudikïdï tukabiïrï ix makïdï tukabioma daja. Umiïrï bapakïiña ïgai ami dai biakana xi ami buapagi ïmo ïrai daxdaragai ixtukïdï bhai duñagi soimaaxkamigadï dai go gaa óídakami soimaaxkamigadï ïpï. Ïma dukai mai tipukatadai oigaragai xi bakiagi ami.

⁸ Pomaaxkatadai go ïïkidadï sïïrhikami tudu. Dai gokïdï gïr maatïturhi Diuxi Ibhïadï sai mai tipukatadai oigaragai go óídakami bïïtarï xi aiyagi ïgai xako daja Diuxi. Pomaaxkatadai asta aidïxi ukami kia namïakatai go ïïkidadï sïïrhikami tudu. Aidïxi kia kïakatadai go kiupai ix makïdï ïr duñidïkatadai ïïgi odami, aidï mai tipukatadai oigaragai óídakami bïïtarï ix bapakiagi Diuxi buitapi.

⁹ Dïï gia bïïxi gobai ix makïdï aagai go ïïkidadï sïïrhikami gobai mos ïr ïmo maaxidaragai dukai aagaitai go aaduindagai ix makïdï idui Suxi Kristo. Daiñi, go dadaxdadami ix makïdï oidiña go ïïkidadï sïïrhikami ibuayi aaduindadï ïmo kiupiïrï ix makïdï tami oidigi daama kïïga dai ïgai maiti ixtutuidikïi xi kïïgakïrï bubiadagi óídakami. Dïï gia Suxi Kristo gia baa go kiupiana ix makïdï tïbagiana kïïga dai ïgai gia ixtutuidikïi xi kïïgakïrï bubiadagi óídakami. Bïïxi go oidaragai ïmadï daxdaragai ix makïdï buapaiña go óídakami go kiupiïrï ïïgiditai ïgai go ïïkidadï sïïrhikami, bïïxi gobai mai bhaigakatadai xi kïïgakïrï buañixikami biagi iibhïadï go odami ix makïdï buapaiña tudu.

¹⁰ Go ïïkidadï sïïrhikami gïr tïanïiña saidi ibuada aatïmï naana maaxi xadutudaragai dïï mosïkaxi aagai gobai ixtumaxi ibuada aatïmï gïr tukugakïdï dai maiti gïr aagidi gobai ix tuma buadagi aatïmï gïr ibhïdagakïdï. Dukami, gïr daidi gobai ïïmo maaxi kuadagai gïr daidi ïïmo maaxi idagai ïpï. Pomaaxkatadai ïïkioma aidïxi kia namïakatadai go ïïkidadï sïïrhikami tudu dïï xibi ka mai pomaaxi gobai. Xibi namïaturhi Suxi Kristo ïmo utudui sïïrhikami kaxkïdï.

¹¹ Xibi Suxi Kristo ïr ï gabhaitïkïakami dadaxdadami gïr bïïtarï tudu. Dai ka bhai dui ïgai gïïpi bhai ïrhiaragai gïr bïïtarï. Ïgai gia baa go bïïxi adaama xadutudikïdï kiupiïrï ix makïdï maiti ïr duñidï odami. Go kiupai ix makïdïrï baa ïgai mai biïga toma lïïchi. Mai tami oidigi daama kïïka ïgai kaxkïdï. Mïï tïbagiana kïïka tudu.

¹² Dai aidïxi baa ïgai amïka bhïkai ïgai ïrai ïpï ïmo daxdaragai bïïtarï. Dïï mai xu xi bhïkai ïgai ïradï buxtaki. Dukami mai bhïkai ïgai ïradï xixibato ïmadï baakaxi maamaradï. Ïïgi ïradï bhïkai ïgai bhaiyoma dai podukai bhai dui ïgai kïïgakïrï bubaidaragai gïr bïïtarï. Kaxkïdï mos arhi ïmo imidagai baa ïgai ïradïkïdï dai ka maiti gï agai xi muiyoko bapakïdagi ïgai. Ka bhai duñixi go kïïgakïrï bubaidaragai bïïxkïrï bïïtarï tudu.

¹³ Ïïkioma aidïxi kia namïakatadai go ïïkidadï sïïrhikami aidï sïïrhikïdï ïmapion maaxkatadai. Aidïpïrï xi ïmo odami taatagi ïmo ixtumaxi ix makïdï daidarxi, dukami xi taata ïgai ïmo mukiadï, ka mai biakana ïgai oigaragai ix ibuadagi xadutudaragai Diuxi bïïtarï. Ka tukurakatadai tukugadï Diuxi buidïrï kaxkïdï. Dïï gia go dadaxdadami bauxidiña go odami buxtaki ïradïkïdï dai podukai buanaiña go odami tukugadï sai bhaigakana xi ibuadagi xadutudaragai Diuxi bïïtarï. Bauxidiña ïgai ïradïkïdï xixibato tudu xiïpï tuturu xiïpï bauxidiña sudagikïdï ïmadï mataigadï baka maara ix makïdï bïïxi naato mïmïidiña ïgai. Podukai buanaiña ïgai go odami xadutudaragai bïïtarï. Dïï gia mosïkaxi tukugadï buanaiña ïgai podukai. Mai bhaigakana ix buanadagi ibhïadï odami podukai.

¹⁴ Dïï gia xibi Diuxi Ibhïadï ix makïdï bïïxkïrï bïïtarï oidaga, maa gubukarhigai go Suxi Kristo sai ïïgi gï dasana ïgai ïmo daxdaragai dukai. Dai Suxi gia mai bia toma lïïchi soimaaxkami abhana dai muu ïgai ïmo daxdaragai dukai gïr bïïtarï sai podukai kïïga buanaiña ïgai gïr soimaaxkamiga. Ïgai gia mai xu xi mosïkaxi buanai gïr tutukuga ix dukai ibuadana go ïïkidadï dadaxdadami. Suxi Kristo gia asta gïr ibhïdaga bïïxi buañixikami biayi. Kïïga buanai ïgai bïïxi go naana maaxi ixtumaxi ix makïdï ibuadana aatïmï ix makïdï maiti ïr soiñikana. Buañixikami gïr biayi ïgai sai bhaigakana aatïmï xi ibuadagi xadutudaragai Diuxi bïïtarï tudu. Gïïpi bamioma kïïgadukami idui Suxi Kristo daaxdaragai xi bhai go ïïkidadï dadaxdadami. Suxi daxdaradï gia mai biïga toma lïïchi ixtukïdï kïïgakïrï gïr buanadagi tudu.

¹⁵ Ïmo kïïgadukami daxdaragai idui Suxi Kristo mukukai gïr soimaaxkamiga bïïtarï tudu. Dai kaxkïdï ixtui ïgai xi bhai duñagi ïmo utudui sïïrhikami gïr bïïtarï. Ïïkioma aidïxi kia namïakatadai go ïïkidadï sïïrhikami aidï kia gïpiïrï bïïtïkamikana aatïmï go soimaaxkamikïdï ix makïdï ibuadana aatïmï. Dïï gia Suxi Kristo bhai dui go kïïgakïrï bubaidaragai gïr bïïtarï mukukai ïgai. Daiñi, Diuxi bapaidi mui odami saidi ïr maamaradïkana. Dai pokaiti Diuxi saidi maaki agai naana maaxi ixtumaxi maamaradï bïïtarï ix makïdï tomarhi ïmo imidagai mai ugiatïi. Dai Suxi ïgai dai bhai dui Diuxi maamaradï bïïtarï saidi bhaigakana ïgai ix biakagi bïïxi ixtumaxi Diuxi maaki ïrhidi.

^16-17 Daiñi, go utudui sïïrhikami ix makïdï bhai dui Suxi Kristo bhaitoma ïpïamaaxi ïmo ojai ix makïdï ibuadagi ïmo odami aagaitai ixtuma bida agai maamaradï xïïxkadï mukiagi ïgai. Dai kïïga maatï aapimï sai tomaxi go maamaradï biakagi go paperhi ix makïdï idui ogadï bïïxkïrï mai bia ïgai oigaragai xi buiyagi buxtuidadï asta xïxkadï mukiagi ïgai. Mai namïakan duu go paperhi asta xïxkadï mukiagi ix makïdï idui tudu. Dai pomaaxi go utudui sïïrhikami ix makïdï bhai dui Suxi ïpï. Gï agaitadai ix mukiagi ïgai sai namïakana gobai.

¹⁸ Daiñi, kïï maatï aapimï sai go ïïkidadï sïïrhikami gï namïaturhi ïradïkïdï buxtaki ix makïdï gï koditu.

¹⁹ Kaxkïdï tudu aidïxi gï namïaturhi go Moises sïïrhikamgadï aidï aagidi ïgai go odami bïïxi ixtumaxi gatïanïitadai Diuxi go sïïrhikamiïrï. Dai bhodïrï bapauxidi ïgai go odami ïmadï go sïïrhikami ojixikami ïradïkïdï baka maamaradï dai xixibato. Bhïiyi ïgai lïïchi boopoi bïgikami ïmadï arhi maamaradï uxi isopo tïgidukami dai badaitu ïrakïdï ïmadï sudagi dai gokïdï bauxidi.

²⁰ Daidi potïtïdai ïgai go odami gabauxiditai, Idi ïrakïdï ka namïakami bipiïyi go sïïrhikami ix makïdï bhai buayi Diuxi gïn ïmadï xibi, itïtïdai.

²¹ Dai podukai ïpï bauxidi ïgai go ikuxi kiupai ïpï ïmadï bïïxi go aaduinkaru ami ixtukïdï gï ibuadana xadutudaragai Diuxi bïïtarï.

²² Kaxkïdï tudu go Moises sïïrhikamigadï ikaiti sai gï agai xi buxtaki ïrakïdï buanadagi bhaitoma bïïxi ixtumaxi. Gobai itïiya ïrhidi sai gï agai xi mukiagi ïmo ixtumaxi odami bïïtarï sai buañixikami biyagi ïgai Diuxi bïïtarï. Ïma dukai mai tipu ix dukatai oigïldana Diuxi go soimaaxkamigadï odami tudu.

^23-24 Daiñi, go kiupai ix makïdï tami oidigi daama kïïka, ix makïdï odami idui, gobai mos ïr ïmo maaxidaragai dukai bïïtarï go kiupai ix makïdï tïbagiïrï kïïka ix makïdï Adaama Xadutudikïdï tïgidu. Dai tomaxi mosïkaxi ïr ïmo maaxidaragai bïïtarï gobai bïïxkïrï gï agaitadai xi kodagi buxtaki dai aaxtagi ïradï sai buanan duñagi go kiupai ix makïdï odami idui. Ïbogiami podukai gï bhaigakana xi ibuadagi xadutudaragai ami. Dai gï agaitadai xi podukai buanan duñagi bïïxi go aaduinkaru ix makïdï ami kiupiana darakatadai ïpï. Dïï gia amïka xako baa Suxi Kristo bhai buadatai gïr bïïtarï, ami gia maiti ïr odami duñidï dai maiti ïr mosïkaxi ïmo maaxidaragai gï dukami. Baa ïgai amïka tïbagiana xako buaboikïdï ïr go Adaama Xadutudikïdï tudu. Ami baa Suxi dai ami kïïka ïgai Diuxi buitapi dai ami gïr daanturhimi ïgai. Ami bua ïgai ïmo gïïpi bamioma kïïgadukami daxdaragai xi bhai go buxtaki daxdaragai. Ïïgi gï daxi ïgai tudu gïr bïïtarï.

²⁵ Dai maiti gï agai xi muiyoko gï daxdadagi Suxi Kristo ix dukatai ibuadana go dadaxdadami go buxtaki. Umiïrï bapakïiña go bhaitï kïakamigadï go dadaxdadami go tukabiïrï xako bïïxi adaama xadutudikami tukabi tïgidu tudu dai ami dadaxdaiña ïgai ïradï buxtaki.

²⁶ Dïï gia Suxi Kristo aaduindadï ix makïdï idui ïgai mai ïpïamaaxi go ïïkidadï dadaxdadami aaduindadï. Xi ïpïamaaxkamudai gobai aidï gia biakmudai Suxi xi dudatai ibuadagi daxdaragai aidïxi abhiadïrï kïïkiba go oidigi asta xibi ukami. Dïï gia mai pomaaxi Suxi Kristo aaduindadï tudu. Ïgai gia mosïkaxi ïmo imidagai dibia tami oidigi daama xibi ka ugiti agaitai oidigi. Dai aidïxi dibia ïïgi gï dáí ïgai ïmo daxdaragai dukai mosïkaxi ïmo imidagai dai podukai maigobai dáí ïgai gïr soimaaxkamiga bïïxkïrï bïïtarï.

²⁷ Daiñi, odami mos arhi ïmo imidagai mumukui. Dai gokiïrï arhi ïmo imidagai aagada agai Diuxi ix bhai kïïga dui ïgai xiïpï xi mai kïïga dui ïpï.

²⁸ Dai podukai ïpï Suxi Kristo ïïgi gï dáí mosïkaxi ïmo imidagai ïmo daxdaragai dukai. Podui ïgai bhai buadatai mui óídakami bïïtarï soimaaxi ibuadamikatai óídakami. Dai gobai ix makïdï idui ïgai, gï dasakai ïgai mos arhi ïmo imidagai ïmo daxdaragai dukai óídakami bïïtarï, gobai bïïxkïrï bïïtarï namïaka agai. Dai gokiïrï ïpamu dibiagai ïgai dïï mai daamioma ïpamu bhai buada agaitai gïr soimaaxkamiga bïïtarï. Bhaiyoma dibiagai ïgai dai kïïgakïrï bubaida aagai bïïxkatai ix makïdï bhai ïrhiarakïdï nïnïraka ix dibiagi ïgai ïpamu. Ka bhai dui ïgai kïïgakïrï bubaidaragai bïïxkïrï bïïtarï tudu.