Hebreos 8 - Northern Tepehuan Bible

Suxi Kristo ïr go bïïxi adaama bhaitï kïakami dadaxdadami ix makïdï bïïxi bhai buayi gïr bïïtarï

¹ Kïïga gï maatï tudu gobaikïdï ix makïdï oja aanï tami ukami sai aatïmï gïr bïïtarï Suxi Kristo ïr go bhaitï kïakami dadaxdadami. Dai gï maatï ïpï sai bamioma namïga ïgai xi bhai bïïxi go ïïkidadï bhaitï gukakamigadï dadaxdadami. Ka daiba ïgai sïïrhixapadïrï xakoga dakatai gatïanïi Diuxi amïï tïbagiana. Ami tudu kabami xadutudikami bii Suxi.

² Ami ibuayi ïgai aaduindadï bhaitï kïakami dadaxdadamikatai ïgai. Ibuayi ïgai aaduindadï go gïï kiupiana tïbagiana ix makïdï kïïgakïrï ïr Diuxi kiupaigadï tudu dai ix makïdï Diuxi idui dai maiti ïr odami duñidï gobai kiupai toma lïïchi.

³ Daiñi, ïkioma Diuxi darasaiña go bhaitï gukakami dadaxdadamigadï go judidiu. Darasaiña ïgai saidi dadaxturhiña ïgai go óídakami. Dai Suxi Kristo ïr gabhaitïkïakamigadï go dadaxdadami ïpï. Dai kaxkïdï gï maatï sai Suxi Kristo gï agaitadai xi daasagi ïmo daxdaragai ïpï.

⁴ Dai xibi tïbagiana ibuayi ïgai aaduindadï. Ix tami oidigi daama dakamudai ïgai kia aidï gia maiti ïr dadaxdadamikamudai ïgai. Kaxkïdï tudu tami oidigi daama kaxi oidaga go ïïkidadï dadaxdadami dai ïgai kaxi ibuayi daxdaragai Diuxi bïïtarï. Kaxi ibuayi ïgai ix makïdï aagai go Moises sïïrhikamigadï. Mai biïga ïmai xi daamioma ibuadagi ïgalbaaxi aaduindagai tudu.

⁵ Dïï gia go dadaxdamigadï go judidiu ibuayi aaduindadï ïmo kiupiïrï ix makïdï mos ïr ïmo maaxidaragai dukai bïïtarï go buaboikïdï kiupai ix makïdï tïbagiana kïïka. Kaxkïdï aidïxi kaxi iduña agaitadai Moises go kiupai amïï oidigana Diuxi sïïrhi ñokidi daidi potïtïdai, Aapi Moises, xïxkadï iduñagi aapi go kiupai ix makïdï gï tïjai aanï kïïga gï tïgito nïida dai kïïga iduñi ixdukatai gï aagidi aanï amïï tubidakana, itïtïdai. Go kiupai ix makïdï ibuadatadai go Moises ïr ïmo maaxidaragai dukamikatadai bïïtarï go tïbagiana kiupai tudu. Kaxkïdï gï agaitadai xi kïïga iduñagi ïgai ixdukatai Diuxi aagiditadai aidïxi maa ïgai ñoki amïï Sinaí tubidakana.

⁶ Gin aaduñi, ka aagai aanï ix maaxi aaduindadï go dadaxdadamigadï go judidiu. Tami idi oidigi daama ibuadana ïgai aaduindadï tudu. Dïï gia Diuxi maa ïmo aaduindagai gïïpi bamioma namïakami go Suxi Kristo. Gïïpi bamioma namïakami xi bhai go dadaxdamigadï go judidiu aaduindadï tudu. Suxi Kristo namïaturhi ïmo utudui sïïrhikami gïr bïïtarï ix makïdï gïïpi bamioma kïïgadu xi bhai go ïïkidadï sïïrhikami. Go utudui sïïrhikamiïrï gïr aagidi Diuxi saidi gïr maaki agai ixtumaxi gïïpi bamioma kïïgadukami xi bhai ix makïdï biakana óídakami oiditai go ïïkidadï sïïrhikami tudu. Agia ïr buaboi sai bamioma namïga Suxi aaduindadï xi bhai aaduindadï go Judidiu dadaxdadamigadï ix makïdï ibuadana ïgai oiditai go ïïkidadï sïïrhikami.

⁷ Daiñi, go ïïkidadï sïïrhikami ix makïdï oja go Moises maiti ixtui ix kïïgakïrï buañixikami biagi óídakami. Dai kaxkïdï gï agaitadai ïpï ïmai sïïrhikami utudui.

⁸ Diuxi pokaiti saidi go odami ïïgi ïr duñidï sai go sïïrhikami maiti ixtui xi buañixikami biagi. Kaxkïdï potïtïdai ïgai go Israelitas sai, Aanï ïr gïn Tïanïdamiga, dai aanï pokaiti sai ayimu ixtuigako bhai duñimu aanï ïmo utudui sïïrhikami go Israelitas bïïtarï dai go Judaïrï óídakami bïïtarï ïpï.

⁹ Go utudui sïïrhikami mai ïpïamaaxkamu go ïïkidadï ix makïdï bhai dui aanï ïïkidadï gïn aaduñi ïmadï aidïxi bubaitu aanï Ejiptuañdïrï. Kïïga nukadakatadai aanï gïn aaduñi ïïkidadï aidï. Kïïga nukadatadai aanï gïn aaduñi Israelitas aidï tudu. Dïï ïgai mai ïïgidi go sïïrhikami ix makïdï bhai dui aanï ïgai bïïtarï. Kaxkïdï dagito aanï dai ka mai nukagi, ikaiti Diuxi.

¹⁰ Dïï gia kia gokiïrioma ayimu ix tuigako bhai duñimu aanï ïmo utudui sïïrhikami ïgai bïïtarï, ikaiti. Dai aidï gia tïgibudadïrï dasamu aanï gin sïïrhikamiga dai ibhïgadïrï ïpï sai kïïga maatï kaïkana ïgai dai kïïga ïïgidiña. Aidï gia mosïkaxi aanï gin buaboitudadamu ïgai Diuxigadïkatai aanï. Dai amaxi gia gin aaduñi aagadamu aanï ïgai dai kïïga nukadamu aanï, ikaiti Diuxi.

¹¹ Amaxi ka maiti gï agadamu xi go Israelitas aipako gïn tïtïïgiadagi ñoki saidi gin maatïkana ïgai. Ka kïïga gin maatïkamu ïgai bïïxkatai kaxkïdï. Mai xudu xi ïr gïïgïr tïtïanïdamikagi xi ïr arhi odami dukaikagi ix makïdï mai tïanïi toma lïïchi ïpï. Bïïxkatai ïgai kïïga gin maatïkamu aidï, ikaiti.

¹² Amaxi oigïldamu aanï bïïxi soimaaxkamigadï. Ka mai tïgitomu aanï soimaaxkamigadï ïpamu tomarhi ïmo imidagai, ikaiti Diuxi ïïki.

¹³ Ka pokaiti Diuxi saidi bhai duña agai ïmo utudui sïïrhikami dai gobai itïiya ïrhidi sai ka mai namïatu ïgai go ïïkidadï sïïrhikami. Gobai ka daibusai dai otoma ugiti agai.