Hebreos 7 - Northern Tepehuan Bible

Go Melkisedek bamioma ïr namïakami xi bhai go Abraam

¹ Go Melkisedek tudu ïr reykatadai Salemïrï. Ïmo dadaxdadamikatadai ïgai ïpï bïïtarï Diuxi. Bïïtarï Diuxi ix makïdï bïïxi adaama gatïanïi tudu. Dai ïmo imidagai ïmo kokodiañdïrï imïitadai go Abraam. Aidïpïrï maitïtadai ïgai maakoba reyes kokodiïrï. Dai nobai kokodiañdïrï imïitadai go Abraam tudu dai go Melkisedek mïï buidïrï ayi dai aagidi ïmo bhai ïrhiaragai ñoki Diuxi amadïrï.

² Daidi go Abraam kïïga xadutugi go Melkisedek dai maa ïmo oidaragai. Maa ïgai jaa go maitïki ix makïdï popoki ïgai go maakoba reyes kokodiïrï. Ïïmoko maa ïgai bhabhaibuxtamaiñdarï ix makïdï maitïtadai ïgai go reyes kokodiïrï tudu. Podukai maa ïmo oidaragai go Abraam go Melkisedek. Dai go Melkisedek tïtiaradï itïiya ïrhidi —Go rey ix makïdï sïïrhi aatabuayi—. Dai reykatadai ïgai Salemïrï dai go Salem itïiya ïrhidi ïmo ibhïxtaragai.

³ Dai maiti gï maatï xorai ïr dïïdïdïkatadai go Melkisedek ïpï dai tomarhi xorai ïr aaduñdïkatadai ïkidadï. Mai taadaga xïkidï busai ïgai tomarhi xïkidï muu ïpï. Bïïxkïrï bïïtarï ïr dadaxdadami ïgai tudu ïpïan dukai Suxi. Ïpïan dukami ïgai Maradï Diuxi tudu ix makïdï bïïxkïrï bïïtarï ïr dadaxdadami tudu.

⁴ Gïn tïgitobïrai xïï kabami ïr namïakamikatadai go Melkisedek tudu. Bamioma namïakatadai ïgai xi bhai asta go Abraamkaru tudu. Daiñi, go Abraamkaru ïr ïmo gïr piipixara ix makïdï kabami ïr namïakamikatadai ïïki. Dai asta go Abraam bïïxi kïïga xadutugi go Melkisedek maakakai ïgai jaa go buxtuidadï ix makïdï bhïitadai ïgai kokodiïrï. Kaxkïdï gï maatï sai bamioma namïakatadai go Melkisedek xi bhai xi go Abraam. Go Abraam maa ïïmo oidaragai bhabhaibuxtamaiñdarï ix makïdï gabhïitadai ïgai tudu.

⁵ Dai go Melkisedek bamioma ïr namïakami xi bhai go piipixaradï go Lebikaru ïpï ix makïdï ïr dadaxdadamikatadai ïpï. Daiñi, go Moises sïïrhikamigadïrï ikaiti sai go Lebi piipixaradï bia sïïrhikami xi tanïdagi chïchïki buxtuidadï bïïxkatai go gaa Israelitas. Ga taanïiña ïgai go piipixaradï go Abraam tudu dïï gia mosïkaxi go Lebi piipixaradï biakana oigaragai xi podukai gataanïdagi.

⁶ Dïï gia go Melkisedek maiti ïr pipiixaradï go Lebi dïï bïïxkïrï bui ïgai chïki buxtuidadï go Abraam dai aagidi ïmo bhai ïrhiaragai ñoki Diuxi amadïrï. Aagidi ïgai ïmo bhai ïrhiaragai bïïtarï Abraam ix makïdï Diuxi ka aagiditadai, sai muiduka agai piipixaradï tudu.

⁷ Dai kïïga gï maatï sai xorai gamaakadagi ïmo bhai ïrhiaragai Diuxi amadïrï bamioma namïga xi bhai ix makïdï bhïiyagi go bhai ïrhiaragai. Maatiga maaxi gobai. Kaxkïdï gï maatï sai bamioma ïr ïmo namïakamikatadai go Melkisedek xi bhai go Abraam.

⁸ Daiñi, go dadaxdadami ix makïdï ïr piipixaradï go Lebi budana chïchïki buxtuidadï go óídakami. Buyiña chïchïki ix makïdï kiupiïrï gatïïgidiña óídakami tudu. Dai go dadaxdadami ïgai mumukui ïpïan dukai toma xorai dai ïgai. Dïï gia go Melkisedek mai taadaga ix mukiagi ïgai. Dai ïgai buiyi asta chïki buxtuidadï go Abraam. Kaxkïdï gï maatï sai bamioma namïga go Melkisedek xi bhai go gaa dadaxdadami ix makïdï ïr piipixaradï go Lebi.

^9-10 Dai ïkobïrakoga go Lebi ïr ïmo pipiixaradïkatadai go Abraam. Dai kaxkïdï aidïxi go Abraam gatïïgi chïki buxtuidadï go Melkisedek, aidï go Lebi kia ïrana dakan dutadai go Abraam mai kia dibiakai go Lebi oidigi daama. Dai kaxkïdï tomaxi go Lebi biakatadai sïïrhikami xi óídakami óídagi óídaragai buxtuidadïañdïrï bïïxkïrï maakian dui Lebi chïki buxtuidadï go Melkisedek ïpï. Ïrana dakatadai ïgai go Abraam aidïxi mïï buidïrï ayi go Melkisedek tudu aidïxi maa go Abraam ïmo óídaragai go Melkisedek ïïki.

¹¹ Daiñi, aidïxi maa Diuxi go sïïrhikami go Israelitas aidï darai ïgai go Lebi piipixaradï saidi ïr dadaxdadamikana. Darai ïgai go Aaron ïmadï maamaradï tudu. Ïgai ibuadana daxdaragai go óídakami bïïtarï ix dukatai aagai go Moises sïïrhikamigadïrï. Dïï gia tomaxi dudatai ibuadana ïgai daxdaragai bïïxkïrï maiti ixtui ïgai xi kïïgakïrï buañixikami biagi go óídakami. Kia biïgatadai bamioma ixtumaxi. Kaxkïdï biïgatadai ix ïmai daxdadami dibiagi ix makïdï ïma maaxkagi. Ix makïdï mai ïpïamaaxkagi go piipixaradï go Lebi dai Aaron tudu. Gï agaitadai ïmoko ix makïdï ïpïamaaxkana go Melkisedek bhaiyoma. Kia biïgatadai ïmo daxdadami ix makïdï gia kïïgakïrï buañixikami biana go óídakami tudu.

¹² Dai go sïïrhikamigadï Moises podukai aagai sai mosïkaxi go Lebi dai Aaron piipixaradï biakana oigaragai xi ïr dadaxdadamikagi. Dai kaxkïdï ix Diuxi dasagi ïmai daxdadami utudukami ix makïdï maiti ïr pipiixaradï go Lebi dai Aaron, gobai itïiya ïrhidi sai gï agai xi bhai duñagi ïgai ïmai sïïrhikami utudui ïpï. Gobai maatiga maaxi.

¹³ Dai xibi go daxdadami ix makïdï aagai aatïmï, ix makïdï kïïgakïrï buañixikami bipiayi odami, ïgai ïr Suxi Gïr Nukadakami. Ïgai gia maiti ïr pipiixaradï go Aaron dai Lebi. Suxi aaduñdï ïïkidadï tomarhi ïmo imidagai maiti ïr dadaxdadamikana ïkioma tudu.

¹⁴ Suxi ïr go daxdadami ix makïdï aagai aatïmï dai ïgai ïr pipiixaradï go Juda bhaiyoma. Dai go Moises sïïrhikamigadï mai podukai aagai sai go Juda piipixaradï ïr dadaxdadamika agai. Gïïpi ïma maaxi dadaxdadami go Suxi tudu xi bhai go ïïkidadï dadaxdadami.

Go Suxi ïr dadaxdadami bïïxkïrï bïïtarï ïpïan dukai go Melkisedek ix makïdï ïr dadaxdadamikatadai ïïki

^15-16 Daiñi, Diuxi idui ïmo ixtumaxi utudukami gamaakakai ïgai sïïrhikami go Suxi Kristo saidi ïr dadaxdadamikana ïpïan dukai go Melkisedek. Mai ïpïan dui ïgai ix dukatai ibuadana go óídakami ïkioma, ix dukatai aagai go Moises sïïrhikamigadï tudu. Go sïïrhikamigadï Moises ikaiti sai mosïkaxi go piipixaradï go Lebi bia oigaragai ix ïr dadaxdadamikana. Dai go Suxi Kristo gï daasatu saidi ïr dadaxdadamikana tomaxi maiti ïr pipiixaradï ïgai go Lebi. Suxi Kristo bïïxkïrï bïïtarï oidaga tudu dai kaxkïdï Diuxi ïmo dadaxdadami dáí. Kïïga maatiga maaxi sai gïïpi bamioma ïr namïakami go Suxi Kristo xi bhai go dadaxdadami ix makïdï aagaiña go Moises sïïrhikamigadï tudu.

¹⁷ Kaxkïdï go ojadami oja ïmo nïidagai ïïki aagaitai Suxi Kristo daidi ikaiti ïgai sai, Aapi ïr ïpïan dukami go Melkisedek. Aapi bïïxkïrï bïïtarï oidaga dai bïïxkïrï bïïtarï ïr dadaxdadamika agai aapi, ikaiti go nïidagai aagaitai Suxi.

¹⁸ Podukai dasakai Diuxi go Suxi saidi ïr dadaxdadamikana ka maigobai dáí ïgai go ïïkidadï sïïrhikami. Maigobai dáí ïgai go Moises sïïrhikamigadï tudu. Go ïïkidadï sïïrhikami mai biakatadai gubukarhigai ix soikïdagi óídakami kaxkïdï.

¹⁹ Go ïïkidadï sïïrhikami toma lachi mai soi óídakami ix kïïga biïna Diuxi ïmadï tudu. Dïï xibi gia mamaakai Diuxi sïïrhikami go Suxi Kristo saidi ïr dadaxdadamikana. Dai podukai gïr maa ïgai ïmo kïïgadukamioma buaboidaragai ix makïdï gia kïïga gïr soikïi dai kïï kabaka. Kïïga maatï aatïmï tudu sai go utudui buaboidaragaikïdï gia kïïga bia aatïmï oigaragai ix aiyagi Diuxi buitapi dai biagi ïmo urabagi ïgai ïmadï.

^20-21 Aidïxi maa Diuxi sïïrhikami go Suxi saidi ïr dadaxdadamikana, aagidi ïgai ïmo xadutudikami ñoki daidi potïtïdai sai, Kaxi gï dáí aanï saidi bïïxkïrï bïïtarï ïr dadaxdadamikana aapi, itïtïdai. Ka aagai aanï ïmo xadutudikami ñoki tudu dai xadïrï dagitona aanï gin ñoki dai ïmadukai iduñagi, itïtïdai. Daiñi, aidïxi maa Diuxi go ïïkidadï sïïrhikami go óídakami dai darai ïgai go ïïkidadï dadaxdadami aidï mai aagidi Diuxi ïmo xadutudikami ñoki podukai. Dïï gia aidïxi dáí ïgai go Suxi Kristo aidï gia aagidi ïgai ïmo xadutudikami ñoki aagaitai sai bïïxkïrï bïïtarï ïr dadaxdadamika agai Suxi.

²² Daiñi, Diuxi ka aagai sai bïïxkïrï ïr dadaxdadamika agai Suxi Kristo. Kaxkïdï gï maatï sai bamioma kïïgadu go utudui sïïrhikami ix makïdï bhai dui Diuxi óídakami ïmadï aidïxi maa ïgai sïïrhikami go Suxi. Bïïxkïrï bïïtarï oidaka agai Suxi Kristo tudu dai kaxkïdï bïïxkïrï bïïtarï kïïgaduka agai go utudui sïïrhikami ïpï.

²³ Go ïïkidadï dadaxdadami muidukana. Kaxkïdï tudu mumukïiña ïgai dai mai bhaigakana ix bïïxkïrï bïïtarïkagi aaduindadï.

²⁴ Dïï gia Suxi bïïxkïrï bïïtarï oidaga dai mai ugutai oijada agai aaduindadï dadaxdamikatai ïgai bïïxkïrï bïïtarï.

²⁵ Kaxkïdï bia ïgai gubukarhigai ix kïïgakïrï bubiadagi odami ix makïdï urapïkïdagi Diuxi buaboitudaitai ïgai Suxi Kristo. Bïïxkïrï bïïtarï daja Suxi tudu dai bïïxkïrï bïïtarï apia gadaanturhiada agai ïgai xorai urabagi.

²⁶ Suxi Kristo tudu ïr go adaama kïïgadukïdï dadaxdadami ix makïdï bamioma kïï bhaiga ix gïr soikïdagi. Kïïga ïko daja ïgai go soimaaxkamiañdïrï tudu mai biakatai ixtukïdï gïpiïrï kaatïkagi. Kïï buañixi ïgai dai ka ïkobai daja ïgai soimaaxi ibuadamiañdïrï amïï tïbagiana dakatai ïgai. Dai bïïxi adaama bia ïgai xadutudaragai amïka tïbagiana dakatai ïpï.

²⁷ Daiñi, go ïïkidadï bhaitï gukakamigadï go dadaxdadami biakana ix bïïx tasai daxdadagi buxtaki. Po buadana ïgai bhai buada ïrhiditai ïïgi soimaaxkamigadï bïïtarï dai go óídakami soimaaxkamigadï bïïtarï ïpï. Dïï gia Suxi mai bia xi pobuadagi. Ïgai gia mosïkaxi ïmo daxdaragai idui ix makïdï bïïxkïrï bïïtarï namïga. Podukai idui ïgai aidïxi ïïgi gï dáí ïgai ïmo daxdaragai dukai gïr soimaaxkamiga bïïtarï. Ïgai tudu ïr go dadaxdadami bïïxi adaama kïïgadukïdï ix makïdï tïgitokatadai aatïmï.

²⁸ Go kïkïïrhi ix makïdï ïr dadaxdadamikana ix dukatai aagaiña go Moises sïïrhikamigadï ïgai mai gupukana. Mos ïr odamikana ïgai ïpïan dukai toma xorai tudu. Dïï gia gokiïrï Diuxi aagai ïmo xadutudaragai ñoki ix makïdï daamioma namïga xi bhai go Moises sïïrhikamigadï. Dai go xadutudaragai ñokikïdï dáí ïgai ïïgi Maradï saidi ïr dadaxdadamikana. Diuxi Maradï tudu ïr go kïïgadukïdï bhaitï kïakamigadï go dadaxdadami. Dai ïgai bïïxkïrï bïïtarï oidaka agai.