Hebreos 6 - Northern Tepehuan Bible

¹ Kïïga ïr buaboi tudu ixdukai aagai aanï sai go ñoki ix makïdï gatïtïïgidi aatïmï ïr kuadagai gï duu odami iibhïadï bïïtarï. Dai kaxkïdï ka maiti gï agai xi apia aagada aatïmï ï galbaaxi aatagi ix makïdï ka máí aatïmï aidïxi tukamïrï buaboitu aatïmï Suxi Kristo. Gobai ïr simientogadï dukai gïr buaboidaraga dai ka maiti gï agai xi ïpïpï dasagi ïmo simientogadï daamioma. Gï agai bhaiyoma xi apia bhaitïkioma oijada aatïmï go tïïgidaragai ñoki aagaitai Suxi. Gï agai tudu xi aagadagi ñoki ix makïdï ïr go gubuakami buaboitudadami bïïtarï. Tukamïrï máí aatïmï tudu sai gï agai xi gajiadïrï biagi aatïmï ïïgi gïr aaduindaga ix makïdï maiti ïr soiñikana. Maiti gïr soikïiña gobai xi kïïgakïrï óídakagi aatïmï tudu. Máí aatïmï saidi gï agai bhaiyoma xi buaboitudadagi aatïmï Diuxi tudu dai mai xu xi buaboitudada aatïmï ixtumaxi ibuadagi aatïmï.

² Ka máí aatïmï go bakuanaragai aatagi ïpï. Dai ka máí aatïmï ix tuixi go bhaitï gukakami buaboitudadami go odami daama darasai ïkadï. Ka máí aatïmï ïpï sai duduaka agai koidadï dai sai Diuxi aaga agai xorai kïï dui dai xorai mai kïï dui. Bïïxi gobai ka máí aatïmï aidïxi tukamïrï buaboitu aatïmï.

³ Dai xibi ix gïr maakiagi oigaragai Diuxi gatïtïïgiadamu aatïmï tami idi ojiïrï go bamioma gïrakami aatagi dai ka mai aagadamu aatïmï go tukamïrï aatagi ïpamu.

⁴ Gï agai xi apia bhaitiakoga oijada aatïmï gïr aatagi tudu. Tadu ka aa surhi ïmadutai aapimï dai dagito buaboidaradï. Kaxkïdï tudu odami ix makïdï ka máítadai ixtumaxi ïr buaboi dai aa surhiagi dai dagitoagi go buaboidaragai, ïgai ka mai bhaigakamu ix tomarhi ïmadutai ïmadukai gïn tïgituldagi ïpamu. Ka taata ïgai ixtumaxi kïïgadukami gïr maakai Diuxi tïbagiañdïrï tudu dai ka biatu Diuxi Ibhïadï abhana.

⁵ Kaxi kaïkana ïgai xïï yoobikan dukai ñokidiña Diuxi. Dai ka taata ïgai ix taadagaka agai gubukarhigadï Diuxi xïïxkadï kaxi kïïgakïrï gatïanïdagi ïgai ïpï.

⁶ Daiñi, xi ïmo odami bïïxi ka taatagi gobai dai bïïxkïrï ïpamu aa gïxiagi, ix ka ïmo mukiadï dukai biiyagi ibhïadï ka dagitokai buaboidaradï, ïgai xadïrï ixtutuidiña ïmai xi ïma dukai gï tïgituldagi ïpamu. Xadïrï gï bhaigakana gobai. Daiñi, xïïxkadï dagitoagi ïgai Suxi Kristo ka ïpïan buayi ïgai go odami ix makïdï Suxi kuruxigadï buidïrï gukatadai dai gaparunaitadai aidïxi muu ïgai. Ïpïan dukami gobai xi kuruxiana xixamudai ïgai ïpamu Suxi Kristo. Ïmo gïdukami parunaragai gobai Suxi buidïrï tudu dai jaa odami gïn tïgito nïijadamu dai parunadamu ïpï. Agia maiti gï agai gobai.

⁷ Daiñi, gïn aagidamu ïmo maaxidaragai sai maatïkana aapimï ix maaxi odami ix makïdï buaboitudai dai ix maaxi ix makïdï mai buaboitudai ïpï. Bhaitoma ïpïan buayi ïgai dïdïbïrai xako gaïïsïi óídakami. Ïïmo dïdïbïrai kïkïïgadu dai kïïga bui go naana maaxi bhai ïrhiaragai ix makïdï gamamaakai Diuxi. Dudatai dukuiña tami oidigi daama tudu. Dai go kïïgadukami dïbïraïrï kïïga bapakïi go sudagi xïxkadï dudukiagi dai otoma badïrïi gobai. Pomaaxkami dïbïriana gia kïïga bhai gï buayi ïxikami odami bïïtarï.

⁸ Dïï gia ïmo dïbïriana xi bubuakïdagi go ïïgi sïïxidakami ïmadï basoi aidï gia ka maiti ïr soiñi gobai. Dai go tuidakami go dïbïrai kïïga mïidada antaada dai bïïxi naato xia buadagi gobai. Daiñi, dïbïrai ix makïdï pomaaxkagi otoma gï mïmïituldaiña gobai ïmadï modukai go ïxikami dai bïïxi xia gï buayi gobai. Gobai ïr ïmo maaxidaragai bïïtarï soimaaxi ibuadami tudu ix makïdï biakamu gïgïbidaragai.

⁹ Pomaaxi tudu. Dïï gia buaboitudai aatïmï sai mai po gïn duñimu aapimï. Kïïga gïn oigïdai aatïmï dai buaboitudai aatïmï sai mai ïpïamaaxi aapimï go dïbïrai ix makïdï xia gï buayi. Buaboitudai aatïmï bhaiyoma sai aapimï gia buimu naana maaxi kïkïïgadukami ix makïdï ïr bïïtarï odami ix makïdï ka kïïgakïrï bubuaka.

¹⁰ Kaxkïdï tudu Diuxi bïïxkïrï sïïrhi ibuayi. Dai ïgai kïïga gï tïgitoka agai xïï kabami gaatabuadana aapimï Diuxi bïïtarï dai xïï kïïga soikïi aapimï go gaa buaboitudadami ïpï. Xibi ukami kia pomaaxi ibuayi aapimï tudu dai gobai ïr ïmo maaxidaragai sai kïïga oigïdai aapimï Diuxi. Bïïxi gobai gï tïgitokamu Diuxi tudu daidi gïn maakimu go bhai ïrhiaragai ix makïdï ïr sïïrhi gïn bïïtarï kïïga ibuadatai aapimï.

¹¹ Ipïrhidi aatïmï sai apia kabami gïn aajagïda aapimï tudu oigïdaitai aapimï jaa dai kïïga oigïdaitai Diuxi ïpï asta xïïxkadï ukami óídakagi aapimï tami oidigi daama. Podukai abïr ibuada maatïkatai sai buimu aapimï gobai ix makïdï nïnïraka aapimï xi gïn maakiagi Diuxi.

¹² Kïïga maatï aapimï sai bia aapimï ïmo kïïgadukami nïnïraragai tudu. Dai kaxkïdï mai paparugakamu aapimï maatïkatai gobai. Dai bhaiyoma kabami gïn aagamu aapimï ïpïan dukai jaa ix makïdï kïïga buaboitudai ïpï. Kïïga gïn kapatudai ïgai go soimaaxi buidïrï tudu. Podukai ibuayi ïgai bhïiya ïrhiditai ixtumaxi Diuxi ka aagai sai gïr maaki agai. Dai podukai abïr ibuada aapimï ïpï.

¹³ Diuxi bïïxkïrï ibuayi ixtumaxi aagadagi ïgai tudu. Kaxkïdï ïïgi gï báí Diuxi daidi aagidi ïgai go Abraam saidi buaboikïdï iduñi agai ïmo bhai ïrhiaragai abhana. Aagidi ïgai ïmo xadutudikami ñoki ïïgi gï bapasaitai aidï daidi potïtïdai, Ïïgi aanï ïr nïijadami saidi buaboikïdï iduñimu aanï bïïxi ixtumaxi gï aagidi aanï, itïtïdai. Dai kïïga gï maatï sai xïïxkadï ïmo odami gï baasagi saidi buaboikïdï iduña agai ixtumaxi aagaiña ïgai ïmo xadutudikami ñoki aagaitai ïmo ixtumaxi kabami namïakami. Dukami aagaiña ïgai sai Diuxi ïr nïijadami saidi iduñi agai. Dïï gia Diuxi bïïtarï mai tipu ïmo gïdukamioma xi ïgai dai kaxkïdï ïïgi gï aa ïgai. Daidi potïtïdai ïgai go Abraam,

¹⁴ Aanï gï aagidi aapi Abraam saidi gï maakimu aanï ïmo gïdukami bhai ïrhiaragai. Kabami muidutudamu aanï gï piipixara tudu. Dai aanï ïr nïijadami saidi gin bapasai aanï pokaititai aanï saidi iduñimu aanï ixtumaxi gï aagidi aanï xibi, itïtïdai.

¹⁵ Dai tomaxi tïbïpi nïnïra go Abraam bïïxkïrï apia buaboitudaiña ïgai ixtumaxi aagidi Diuxi. Daidi gokiïrï bhïiyi ïgai ixtumaxi nïnïrakatadai ïgai. Diuxi idui ixtumaxi aagiditadai ïgai tudu.

¹⁶ Daiñi, xïïxkadï ïmo odami podukai aagadagi saidi iduñi agai ixtumaxi aagaiña ïmo ñoki xadutudikami aagaitai ïmo ixtumaxi kabami namïakami. Dai ka potïkai ïgai ka mai tipu bamioma ñoki. Ka gubukamikïdï bia ïgai xi iduñagi ixdukatai bia ïgai ñoki.

¹⁷ Dai podukai ïpï Diuxi aidïxi aagidi ïgai go Abraam ïïki sai buaboikïdï maaki agai ïmo bhai ïrhiaragai abhana aidï aagidi ïgai ïmo xadutudikami ñoki. Podukai aagidi ïgai ipïrhiditadai sai go Abraam ïmadï piipixaradï kïïga maatïkana sai Diuxi mai ïma dukai gï tïgito agaitadai. Ipïrhiditadai sai maatïkana ïgai sai buaboikïdï iduña agai ixtumaxi aagidi tudu. Kaxkïdï ïïgi gï báí Diuxi aagiditai ïmo xadutudikami ñoki. Podukai aagidi ïgai saidi maaki agai go bhai ïrhiaragai tudu.

¹⁸ Goka ñoki aagidi Diuxi go Abraam tudu sai podukai kïïga maatïkana aatïmï saidi iduñi agai ixtumaxi gïr aagidi. Ïmoko ïr go ñoki xako aagidi ïgai ïmo xadutudikami ñoki. Aagidi ïgai ïmo xadutudikami ñoki tudu dai kïïga maatï aatïmï sai Diuxi tomarhi ïmo imidagai mai yaatagïi. Gobai ïr go ïpïgadï ñoki ix makïdï aagidi Diuxi go Abraam. Dai go gïmai ñoki ïr xako ïïgi gï báí ïgai dai aagidi saidi buaboikïdï iduñi agai ixtumaxi aagidi ïgai. Gobai ïr ï goka ñoki ix makïdï aagidi Diuxi go Abraam. Dai kïïga maatï aatïmï sai Diuxi apia mo maaxi bïïxkïrï bïïtarï. Mai ïmapïbuayi ïgai tudu dai kaxkïdï maatï aatïmï sai ñokidï mai ïmapïduñimu ïpï. Goka ñoki gïr aagidi Diuxi tudu sai mai buamï gïr ïrhiadagi aatïmï kïïga maatïkatai saidi iduñimu ixtumaxi gïr aagidi. Sai mai buamï gïr ïrhidiña aatïmï tudu ix makïdï ka dagito bïïxi go ïma maaxi buaboidaragai dai ka mosïkaxi Diuxi buaboitudai xibi. Buaboitudai aatïmï sai ïgai kïïgakïrï gïr bubaidi tudu.

¹⁹ Podukai bia aatïmï ïmo kïïgadukami nïnïraragai dai gobai kïïga gïr soikïi gïr ibhïdagïrï sai bamioma kïïga gubuakana gïr buaboidaraga. Gïr bapaidadan buayi gobai sai bapakia aatïmï go adaama xadutudikïdï tukabiïrï. Sai bapakia aatïmï baasadïrï go gïï ikuxi nagiïkïdï tudu xako daja Diuxi.

²⁰ Ami tudu gïr bhaitï jii Suxi dai baa gïr bïïtarï gïr bhaitï kïakami dadaxdamikatai ïgai. Podukai gïr bhaitï kïakami dadaxdadamiga bii ïgai bïïxkïrï bïïtarï ïpïan dukai go Melkisedek ix makïdï oidakatadai ïïki.