Hebreos 5 - Northern Tepehuan Bible

Diuxi ïgai dai maa sïïrhikami go Suxi dai mai xu xi ïïgi ïgai bhïiyi go sïïrhikamigadï

¹ Daiñi, kïïga gï maatï sai bïïxi go kïkïïrhi ix makïdï ïr bhaitï gukakamigadï go dadaxdadami ïr ïko bubaidadï Diuxi. Ïïgi go kïkïïrhi aaduñdïañdïrï dadasaiña Diuxi go bhaitï gukakami dadaxdadami tudu. Dadasaiña ïgai saidi ibuadana ïgai aaduñdï bïïtarï ixtumaxi gï aagadagi Diuxi buitapi. Diuxi mamaakaiña sïïrhikami go kïkïïrhi ïgai saidi buapidiña oidaragai Diuxi go odami bïïtarï dai sai dadaxdiña Diuxi buxtaki go óídakami soimaaxkamigadï bïïtarï ïpï.

² Dai go bhaitï gukakamigadï go dadaxdadami soi gïn ïrhidiña nïiditai odami xïïxkadï ïmadutai mai maatïkagi ixtumaxi ïr kïïga dai kaxkïdï mai kïïga ibuadagi. Go bhaitï gukakami dadaxdadami ïr odamikana ïpïan dukai tomax tuma odami tudu. Dai kïïga maatïkana ïgai ix taadaga ïmoko xïxkadï mai gubuakagi go soimaaxkami buidïrï. Ïgai soimaaxi ibuadana ïpï tudu.

³ Kaxkïdï mai mosïkaxi go odami soimaaxkamigadï bïïtarï biakatadai ïgai xi ibuadagi daaxdaragai. Biakatadai ïgai xi ibuadagi daaxdaragai ïïgi soimaaxkamigadï bïïtarï ïpï.

⁴ Daiñi, kïïga maatï aapimï sai Diuxi ïgai dai maa sïïrhikami go Aaron ïïki saidi ïr gabhaitïkïakamikana ïgai go dadaxdadami bïïtarï. Ïmo odami mai bhaiga xi ïïgi bhïiyagi go sïïrhikami xi bhaitï kïakami dadaxdadami dukai daibagi tudu. Gï agai xi Diuxi ïgai dai maakiagi go sïïrhikami bhaiyoma ïpïan dukai aidïxi ïïki maa ïgai sïïrhikami go Aaron.

⁵ Dai pomaaxi Suxi Kristo ïpï. Ïgai mai ïïgi bhïiyi go sïïrhikami xi ïr bhaitï kïakamigadï go dadaxdadami. Mai ïïgi bhïiyi ïgai go sïïrhikami ipïrhiditai sai jaa ïmo gïdukami tïanïdami dukai nïijadagi tudu. Dai bhaiyoma Diuxi ïgai dai aagidi go Suxi Kristo saidi ïr ïmo gïdukami tïanïdami ïgai. Potïtïdai ïgai sai, Aapi ïr gin maara. Dai xibi aanï aagai sai gï Oga aanï, itïtïdai.

⁶ Dai Diuxi aagidi ïpï ïmai ñoki ïpï daidi potïtïdai, Aapi ïr ïmo dadaxdadamika agai ïpïan dukai go Melkisedek. Aapi gï sïïrhikamiga tomarhi ïmo imidagai mai ugiti agai ïpï ïpïan dukai ïgai tudu, itïtïdai.

⁷ Daiñi, aidïxi tami oidigi daama aimïraitadai Suxi Kristo kïïga maatïkatadai ïgai sai Diuxi bhaigakatadai xi soiñagi sai mai mukuna ïgai. Dai kaxkïdï suakaiña ïgai dai asta iñakaiña daanïitai Diuxi sai mai dagitona ix soimaaxi taatagi ïgai. Dïï gia bïïxkïrï kïïga xadutudaiña dai ïïgidiña ïgai Diuxi xi kaxkïdï Diuxi kaïkana ixtumaxi daanïdagi ïgai.

⁸ Suxi Kristo ïr Diuxi Maradï tudu dïï bïïxkïrï sïïrhikïdï soimaaxi taata ïgai. Dai soimaaxi taatakai ïgai máí kïïgakïrï ixtumaxi ïr ïïgidaragai Diuxi.

^9-10 Kïïga ïïgidi ïgai tudu tomaxi soimaaxi taata dai podukai bïïxi naato idui ïgai bïïxi aïkatai ixtumaxi gï agaitadai saidi ïr go bhaitï kïakïdï dadaxdadamikana ïgai gïr bïïtarï. Dai aidïxi kaxi iduitadai ïgai bïïxi ixtumaxi gï agai aidï gia Diuxi maa go sïïrhikami saidi ïr dadaxdadamikana ïgai bïïxkïrï bïïtarï. Dai kaxkïdï xibi kïï bhaiga Suxi Kristo ix kïïgakïrï bubiadagi odami bïïxkïrï bïïtarï ix makïdï ïïgiadagi. Diuxi ïgai dai maa sïïrhikami go Suxi tudu ïpïan dukai xi maa ïgai sïïrhikami go Melkisedek ïïki.

Gï agai go buaboitudadami xi apia bamioma gubuakami gukiadagi go buaboidaragadïrï

¹¹ Gin aaduñi, naana maaxi bamioma gïn aagida in ïrhidi aagaitai Suxi Kristo ix makïdï ïr bhaitï kïakïdï dadaxdadami gïr bïïtarï. Dïï xijaiga gin bïïtarï xi tïïgiagi ñoki ix dukatai gïn aagidagi. Sïïrhikïdï kapaka gïn momo kaxkïdï.

¹² Daiñi, aapimï ka bhai baasïkioma buaboitu dai kaxi gï agaitadai xi gatïtïïgiadamudai aapimï Diuxi ñokidï. Dïï bhaiyoma kia tïgito aapimï xorai gïn tïïgidagi ñoki. Kia tïgito aapimï xorai ïpamu gïn tïtïgiadagi asta go ñoki bamioma mai xijiakïdï Diuxi ñokidïañdïrï tudu. Gïn iibhïadïrï ïpïamaaxi aapimï arhi ix makïdï kia xixïïyi dai mai kia bhaiga ix kuadagi kuadagai kabakami. Pomaaxi aapimï gïn buaboidaraga tudu.

¹³ Ïmo odami ix makïdï kia ïr xïïñi dai kia xïïyi dai mai kuayi kuadagi kabakami, gobai mai kia maatï nïidi ixtumaxi ïr sïïrhi xi ibuadagi ïgai tudu.

¹⁴ Daiñi, go ñoki ix makïdï gï tïtïïgidi odami ïr kuadagai gï dukami go odami ibhïgadï bïïtarï. Dai kïïga gï maatï sai go gubuakami kuadagai ïr odami bïïtarï ix makïdï kaxi gubuka buaboidaradï. Ïgai ix makïdï ka gubuka buaboidaradï ïr go odami ix makïdï ka ïïmadai ix gïn tïgito nïijadagi dai aagadagi ixtumaxi ïr sïïrhi dai ixtumaxi maiti ïr sïïrhi ïpï.