Hebreos 4 - Northern Tepehuan Bible

Oidaga ïmo ibhïxtaragai buaboitudadami bïïtarï

^1-2 Diuxi aagidi go Israelitas sai maaki agai ïmo ibhïxtaragai ami go Kanaanïrï dai gobai ïr ïmo bhai ïrhiaragai aatagitadai go Israelitas bïïtarï. Dïï mai baapa ïgai ami. Dai aatïmï ïpï gïr aagidi Diuxi sai gïr maakai ïgai ïmo ibhïxtaragai ïpï dai kia bia aatïmï oigaragai ix bhïiyagi gobai. Gobai ïr ïmo gïdukami bhai ïrhiaragai ñoki dai kabami namïakami aatïmï gïr bïïtarï. Kaxkïdï gï agai xi kïïga gïn tïgito nïijada aapimï. Tadu mai bhïiyi ïmadutai aapimï go ibhïxtaragai ix makïdï gïr maakia ïrhidi Diuxi. Daiñi, muidutai go Israelitas po dui ïïki. Mai baapa ïgai Kanaanïrï xako bhai duitadai Diuxi ïmo ibhïxtaragai ïgai bïïtarï. Diuxi aagidi sai ka bhai duitadai ïmo ibhïxtaragai ïgai bïïtarï dai gobai ïr ïmo bhai ïrhiaragai ñokikatadai ïgai bïïtarï tudu. Dïï mai buaboida kaï ïgai kaxkïdï maiti idui soiñi go ñoki ïgai bïïtarï. Mai ïpïan dui ïgai jaa ix makïdï gia kïïga buaboida kaï go ñoki kaxkïdï.

³ Mosïkaxi aatïmï ix makïdï gia buaboitudai bia oigaragai ix bapakiagi ibhïxtaradïrï Diuxi tudu dai go gaa ix makïdï mai buaboitudai gia cho. Kaxkïdï pokaiti Diuxi ñokidïrï sai, Aanï Diuxi bhamuka buidïrï ïgai ix makïdï mai buaboitudai. Dai kaxkïdï pokaiti aanï bïïxi gin gubukarhigakïdï sai mai bapaaki agai ïgai go ibhïxtaragïrï ix makïdï bhai dui aanï, ikaiti Diuxi. Pokaiti ïgai tomaxi ka ïïki abhiadïrï kaxi bhai duitadai ïgai go ibhïxtaragai aidïxi mai kia tipukatadai go oidigi.

⁴ Dai kïïga gï maatï xibi ïpï sai bhai duñixi go ibhïxtaragai gïr bïïtarï. Kaxkïdï tudu Diuxi ñokidïrï ikaiti sai, Go kubarakami tasïrï ka mai aatadui Diuxi ïmo tasai ka bïïxi natorhikatai aaduindadï, ikaiti go ojai.

⁵ Dïï gia bïïxkïrï go ojiïrï ix makïdï ka aagai aanï gobai ikaiti ïpï sai, Go óídakami ix makïdï mai buaboitudai mai bia oigaragai xi bapakiagi amïka xako bhai dui aanï ibhïxtaragai, ikaiti go ojai.

⁶ Gobai itïiya ïrhidi sai Diuxi ka bhai dui ïmo ibhïxtaragai óídakami bïïtarï dai ipïrhidi xi ami bapakiadagi óídakami. Dïï gia go Israelitas kaï go aatagi ïïki aagaitai go ibhïxtaragai dïï mai ïïgidi ïgai Diuxi dai kaxkïdï mai baapa ïgai ami. Pogïdui gobai aidïxi kia oidakatadai go Moises tudu.

⁷ Mai baapa go Israelitas tudu dai kaxkïdï Diuxi gïr maakai oigaragai aatïmï xibi ix bapakiagi go ibhïxtaragïrï ix makïdï bhai dui Diuxi. Go odami mai baapa ïïki dïï gia gokiïrï mui umigikïdï aagidi Diuxi ïpamu go Dabidkaru go baaxi ñoki ix makïdï ka nïidi aatïmï. Potïtïdai ïgai sai, Xibi kia bia aapimï oigaragai xi biakagi go ibhïxtaragai ix makïdï gïn maakia ïrhidi Diuxi. Kaxkïdï xïïxkadï kaïkagi aapimï ix ñokadagi Diuxi maiti abïr kabakatuda gïn ibhïdaga buidïrï ïgai dai bhaiyoma abokan dukai abïr óídaga dai otoma ïïgiada, itïtïdai. Potïtïdai ïgai tudu dai gobai itïiya ïrhidi sai xibi ïr ix tuigako oidaga oigaragai odami bïïtarï xi bapakiadagi go ibhïxtaragïrï ix makïdï aagai Diuxi ïïki.

⁸ Kïïga maatï aatïmï tudu sai go ibhïxtaragai ix makïdï aagai Diuxi maiti ïr go Kanaan tïgidukïdï dïbïrai. Maiti ïr xako baapa go Israelitas oiditai ïgai go Josue ïïki tudu. Xi amikamudai, aidï gia ka biakamudai ïgai go ibhïxtaragai bapakïkai ïgai ami Kanaanïrï. Ka mai po kaitadamudai Diuxi sai oidaga ïmai ibhïxtaragai xibi tudu.

⁹ Kia oidaga ïmai ibhïxtaragai Diuxi aaduñdï bïïtarï tudu, ix makïdï ibhïxtaragai tasïrï gï dukami.

¹⁰ Daiñi, aidïxi kaxi iduitadai Diuxi go oidigi ka maiti aatadui ïgai go ibhïxtaragai tasïrï ka naatorhikatai aaduindadï. Dai podukai ïpï xibi xïïxkadï odami bhïiyagi go ibhïxtaragai ix makïdï bhai dui Diuxi aidï daadagitoi ïgai ïïgi aaduindadï. Gïn iibhïxtai ïgai ïpïan dukai xi gï ibhïxi Diuxi ïïki aidïxi ka natorhikatadai aaduindadï tudu.

¹¹ Gï agai xi kïïga gïr tïgito nïidagi aatïmï tudu daidi bhïiyagi go ibhïxtaragai ix makïdï bia Diuxi gïr bïïtarï. Tadu mai ïïgidi aatïmï Diuxi ïpïan dukai go Israelitas ïïki. Xi pobuadagi aatïmï aidï gia xia gïr duadamu aatïmï ïpï ïpïan dukai ïgai.

¹² Daiñi, bïïxi ñoki ix makïdï aagadagi Diuxi kïïga bia gubukarhigai sai bapakiagi gïr ïrana dai kïïga iduñagi aaduindagai. Bamioma kïïga bapakïi gobai gïr ïrana xi bhai ïmo kuxirui tomaxi bïï goka padïrï biakagi go kuxirui mumukahigadï. Ïmo kuxirui kïïga mukakami bhaiga xi bakiagi odïrï ukami dai maigobai dasagi asta obagadï. Dïï gia Diuxi ñokidï gia bapakïi gïr ïrana dai ajïi gïr ibhïdagïrï ukami dai gobai gïr aagidi ix bhai kïïgadu gïr tïgibudaga. Diuxi ñokidï gïr aagidi ïpï ix bhai kïïgadu ixtumaxi ibuada ïrhidiña aatïmï.

¹³ Mai tipu ixtumaxi ïxtokikagi Diuxi buitapi tudu. Bïïxi aïkatai mos maaxiko kaatïkana Diuxi buidïrï. Dai ïgai buitapi bia aatïmï xi aagadagi ix tumaxi dui aatïmï tami idi oidigi daama.

Bhaiga aatïmï xi mai duduadikoitai aiyagi Diuxi buitapi gïr soikïitai Suxi Kristo

¹⁴ Dïï gia Suxi Kristo ïr gabhaitïkïakami dadaxdadami gïr bïïtarï, ïgai tudu ix makïdï ïr Diuxi Maradï. Dai ka ayi ïgai amïka buidïrï Diuxi dai ami bhai dui gïr bïïtarï mai kïï ibuadatai aatïmï. Kaxkïdï gï agai xi mai ugutai aagada aatïmï gïr buaboidaraga aipakoga.

¹⁵ Daiñi, aatïmï óídakami sïïrhikïdï mai gupuka go soimaaxkami buidïrï. Dai kaxkïdï tïgito aatïmï xorai gïr soikïdagi. Dai Suxi Kristo ïgai dai gïr soikïi gabhaitïkïakami dadaxdamikatai ïgai. Dai ïgai kïïga maatï xïï mai gupuka aatïmï. Kïïga maatï ïgai ix taadaga xïïxkadï gïr tïgibudaga gïr abïnakiadagi ix mai kïïga ïïgiada aatïmï Diuxi tudu. Bïïxi taata ïgai gobai ix xïïxi taatamaiña aatïmï tudu. Dai tomaxi pomaaxi taata ïgai bïïxkïrï mai soimaaxi idui ïgai tomarhi ïmo imidagai. Dai bïïxkïrï ïgai tomaxi mai soimaaxi idui bïïxkïrï soi gïlda gïr nïidiña ïgai mai gupukatai aatïmï. Ïmo oidigi daama oidakami odami ïgai ïpï kaxkïdï.

¹⁶ Dai kaxkïdï ïpï gï agai xi mai duduadikoitai daanïda aatïmï Diuxi kïïga ïïmadan dukai. Kïï tuiga ïgai gïr bïïtarï tudu dai daanïkai aatïmï gïr tïïgidamu ïgai xïï soi gï ïrhidi ïgai gïr bïïtarï gïr soikïitai xïïxkadï tïgitokagi aatïmï.