Hebreos 3 - Northern Tepehuan Bible

Suxi bamioma namïga xi bhai Moiseskaru

¹ Gin aaduñi, Suxi ïgai daidi ïr bhai buadami gïr soimaaxkamiga bïïtarï go bhaitï kïakïdï dadaxdadamikatai ïgai. Dai kaxkïdï kïïga gï agai xi gïn tïgitokagi aapimï xorai go Suxi. Ïgai ïr Otosadï Diuxi tudu daidi ïr Bïïxi Adaama Dadaxdadami gïr bïïtarï. Aatïmï gïr bïïtarï tudu ix makïdï buaboitudai dai aipako aagaiña aatagi aagaitai ïgai. Gobai gï agai xi gïn tïgitokagi aapimï buaboitudadami. Aapimï tudu ïr ïko bubaidadï Diuxi ix makïdï bapaidi ïgai sai oidiña aapimï.

^2-3 Daiñi, go Suxi sïïrhikïdï ïr ïmo gïdukami tïanïdami. Bamioma ïr namïakami ïgai xi asta go Moiseskaru tudu. Dai kaxkïdï ïr sïïrhi xi bamioma xadutuadagi óídakami Suxi dai go Moises mai xu ï kaxi xadutuada ïgai. Kïïga ïr buaboi tudu sai Suxi apia kïïga oidiña aaduindadï biakatai ïmo sïïrhikami. Dai go Moises kïïga oidiña aaduindadï ïpï soikïitai ïgai Diuxi aaduñdï. Dïï gia go Suxi gïïpi bamioma bia sïïrhikami xi kïï namïakami aagadagi aatïmï dai go Moises mai xu ï kaxi. Suxi idui go Moises tudu. Daiñi, ïpïan dukami gobai ïmo kïkïïsadami baaki. Ïgai bamioma namïga xi bhai ïmo baaki ix makïdï idui ïgai ¿aba?

⁴ Maatiga maaxi tudu sai bïïxi go bhaabhaki bia kïsakami. Dai pomaaxi bïïxi ixtumaxi. Bïïxi ixtumaxi bia ibuadami. Dai Diuxi ïgai daidi ïr ibuadami bïïxi ixtumaxi oidaga.

^5-6 Daiñi, go Moises ïmadï go Suxi bïï gokatai kïïga idui aaduindadï. Go Moises kïïga ibuadana aaduindadï soikïitai ïgai Diuxi aaduñdï. Dïï gia mos ïmo pioñigadï Diuxi dukai aatadui ïgai. Dai bïïxi go aaduindagai ix makïdï idui go Moises ïïki mosïkaxi ïr ïmo maaxidaragai dukaikatadai aagaitai ixtumaxi idui Suxi Kristo. Go Moises ïmadï Suxi bïï gokatai kïïga idui aaduindadï tudu. Dïï Suxi gia mai ïmo pioñi dukai aatadui. Ïgai ïr Maradï Diuxi kaxkïdï dai tïanïi ïgai aaduñdï Diuxi. Kïïga gï maatï saidi aatïmï ïr aaduñdï Diuxi mai duduadikoitai oiditai aatïmï gïr buaboidaraga. Kïïga buaboitudai aatïmï dai nïnïraka aatïmï ixtumaxi gïr maaki agai Diuxi bïïna darakatai aatïmï Suxi Kristo tudu. Ix apia buaboitudada aatïmï podukai aidï gia kïïgakïrï ïr aaduñdï aatïmï Diuxi.

⁷ Kaxkïdï gïr maa ñoki Diuxi Ibhïadï ojadïrï Diuxi daidi ikaiti sai, Aanï ïr Diuxi dai xibi xïïxkadï kaïkagi aapimï ix gïn ñokiada aanï

⁸ maiti abïr kabakatuda gïn ibhïdaga gin buidïrï tadu maiti ipïrhiada aapimï xi gin ïïgiadagi. Maiti abïr ïpïan buada gïn aaduñi ïïki tudu aidïxi oidigana ajiopatadai ïgai dai gin bui surhi nïida ïrhiditai ix tuma duñagi aanï.

⁹ Gokobhai umigi aïkami nïidiña gïn aaduñi ïïki ixtumaxi ibuadana aanï ïgai bïïtarï dai bïïxkïrï idui ïgai naana maaxi soimaaxi gin buidïrï. Podui ïgai tudu nïida ïrhiditai ix bhai ïr buaboi sai kïï tuiga aanï.

¹⁰ Dai kaxkïdï bhamukana aanï ïgai buidïrï daidi ikaitiña aanï sai, Idi odami dudatai gin daadagitoi buaboituda ïrhiditai ïma maaxi ixtumaxi dai maiti ipïrhidi xi gin ïïgiadagi.

¹¹ Kaxkïdï bhamu aanï dai podukai aagidi sai ïgai ka mai bapaki agaitadai amïka xako Kanaanïrï tïgidu oidigi xako bhai duitadai aanï ïmo ibhïxtakan dukai oidakaragai ïgai bïïtarï.

¹² Gin aaduñi Diuxi amadïrï, gïn nukadabïrai tadu ïïmadutai aapimï soimaaxi ibuadagi mai ïïgiditai Diuxi soimaaxkatai gïn ibhïdaga buidïrï Diuxi. Po gï duña antaada ix maiti ipïrhiadagi aapimï xi kïïga buaboitudadagi Diuxi ix makïdï kïïga ïr duakakami.

¹³ Gï agai tudu sai bïïx tasai gïn mamaakadagi aapimï ñoki aipakoga asta xïïxkadï ukami oidakagi aapimï tami oidigi daama. Podukai abïr gupurtuda gïn iibhïdaga aipakoga. Maiti abïr gïn dagito ix gïn bupuirumadadagi go soimaaxkami tudu tadu kabakatu gïn ibhïdaga Diuxi buidïrï dai podukai ka maiti ipïrhiada aapimï xi ïïgiadagi.

¹⁴ Gï agai xi gïr mamaakadagi aatïmï ñoki aipakoga dai xi gïr abïnakiadagi ix apia buaboitudada aatïmï tudu. Kaxkïdï tudu kïïga maatï aatïmï sai gï agai xi apia kïïga buaboitudada aatïmï asta xïïxkadï ukami óídakagi aatïmï. Gï agai xi mo ïxi buaboitudada aatïmï ix duu buaboitu aatïmï tukamïrï tudu sai podukai kïïga biakana aatïmï ïmo urabaragai Suxi Kristo ïmadï.

¹⁵ Gïn tïgitobïrai ix kaiti Diuxi ojadï. Ami ikaiti sai, Xibi xïïxkadï kaïkagi aapimï ix ñokadagi Diuxi maiti abïr kapakada gïn ibhïdaga buidïrï ïgai. Bhaiyoma abïr abokan dukai óídaka dai kïïga ïïgiada. Maiti abïr ïpïan buada gïn aaduñi go Israelitas aidïxi bui surhi ïgai Diuxi ïïki oidigana tudu, ikaiti Diuxi ojadïrï.

¹⁶ Daiñi, ¿Maiti ix tudu go Israelitas dai oi go Moises dai bubuakai Ejiptuañdïrï? ¿Maiti ix tudu ïr ïgai ïgai dai maiti ipïrhi xi ïïgiadagi Diuxi tomaxi kaïkana ïgai ñokidï?

¹⁷ ¿Dai maiti ix tudu ïgai dai gokobhai umigi aïkami bhamutudakana Diuxi? Soimaaxi ibuadana ïgai oidigana tudu dai kaxkïdï amaxi oidigana bïtïkatadai tutukugadï ka kokai ïgai.

¹⁸ Mai ïïgidiña ïgai tudu xi kaxkïdï Diuxi ikaiti sai, Aanï Diuxi bhamuka buidïrï ïgai ix makïdï mai buaboitudai. Dai kaxkïdï pokaiti aanï bïïxi gin gubukarhigakïdï sai mai bapaaki agai ïgai go ibhïxtaragïrï ix makïdï bhai dui aanï, ikaiti Diuxi.

¹⁹ Mai buaboitu ïgai tudu dai kaxkïdï ka maiti ixtui ïgai bapakiagi dïbïradïrï xako biaka agaitadai ïgai ibhïxtaragai.