Hebreos 2 - Northern Tepehuan Bible

Gï agai xi ïïgida kaïkagi aatïmï go buaboikïdï aatagi

¹ Daiñi gin aaduñi, kaxi gïn aagidi aanï sai Diuxi maradï ïgai dai gïr aiturhi ñokidï Diuxi. Dai xibi aanï aagai sai bïïxi ix makïdï ojixi tami aagaitai Diuxi Maradï ïr buaboi. Kaxkïdï gï agai xi kïïga ïïgiada aatïmï go ñoki ix makïdï kaïkana aatïmï ix makïdï aagai Diuxi Maradï, tadu dagito aatïmï ix tumaxi ïr buaboi.

² Go tïtïañikarudï Diuxi ïgai dai aiturhi go ïïkidadï sïïrhikami gïr aaduñikaru ïïki dai go tïtïañikarudï Diuxi otïrhioma namïga xi bhai Gïr Nukadakami. Dïï gia tomaxi otïrhioma namïga ïgai xi Gïr Nukadakami bïïxkïrï kabami namïakana go sïïrhikami ix makïdï aiturhi ïgai gïr aaduñikaru ïïki. Xorai mai ïïgidiña gobai biakana xi taatamadagi gïgïbidaragai ix makïdï ïr sïïrhi tudu mai ïïgiditai ïgai.

^3-4 Dïï gia go utudui ñoki aagaitai go kïïgakïrï bubaidaragai bamioma namïga xi bhai go sïïrhikami ïkidadï. Gïr Nukadakami ix makïdï adaama namïga ïgai dai gïr aiturhi go utudui ñoki tudu dai mai xu xi go tïtïañikarudï ïgai dai gïr aiturhi gobai. Kaxkïdï bamioma namïga go utudui ñoki xi bhai go sïïrhikami ïïkidadï. Diuxi Maradï ïgai dai xibiapioma gïr aiturhi go utudui aatagi tudu aagaitai go kïïgakïrï bubaidaragai. Dai naana maaxi oidaga maaxidaragai saidi ïr buaboi aatagidï Suxi Kristo. Daiñi, kaxi gïr aagidakai ïgai go utudui aatagi bai go odami ix makïdï kaïkana kïïga gïr aagidiña ïpï saidi ïr buaboi gobai. Dai Diuxi ibuadana naana maaxi maaxidaragai ïpï sai podukai ïpï maatïkana aatïmï saidi ïr buaboi go utudui aatagi. Dai ïkobïrakoga xïïxkadï ipïrhiadagi Diuxi gamamaakai ïgai naana maaxi gubukarhigai go odami ix makïdï buaboitudai go aatagi ïpï. Diuxi Ibhïadï ïgai dai mamaakai go naana maaxi gubukarhigai buaboitudadami tudu. Dai nïiditai aatïmï sai go buaboitudadami biakana gubukarhigai Diuxi amadïrï saidi ibuada ïgai naana maaxi aaduindagai, gokïdï maatï aatïmï saidi ïr buaboi go aatagi ix makïdï buaboitudai ïgai ïpï. Naana maaxikïdï gï maatï saidi ïr buaboi go aatagi tudu. Sïïrhikïdï namïga go ñoki aagaitai go kïïgakïrï bubaidaragai tudu. ¿Kaxkïdï dukatai kïïgakïrï bubuakïna aatïmï ix mai buaboitudagi aatïmï? Gïr Nukadakami ïgai dai gïr aiturhi gobai di.

Diuxi darai go odami sai gatïanïiña ïgai oidigi daama

⁵ Dai gï agai xi maatïkagi aapimï ïpï sai Diuxi podukai aagai sai mai xu xi go tïtïañikarudï Diuxi ïr ïgai ix makïdï gatïanïda agai xïxkadï ka bhïiyagi aatïmï gïr utudui oidakaragai. Jaa ïgaikamu ix makïdï gatïanïda agai.

⁶ ¿Xorai ïgai ix makïdï gatïanïda agai tudu? Daiñi, Diuxi ñokidïrï ojixi ïmo ñoki aagaitai odami dai ami adukai aagai, Aapi Diuxi, mai tipu ix tuixi tïgito nïijada aapi odami mos ïï arhidukatai odami gï buidïrï. Dïï aapi bïïxkïrï buamï ïrhidi ïgai bïïtarï.

⁷ Tomaxi mai xii ïr namïakami odami bïïxkïrï darai aapi saidi gatïanïna ïgai oidigi daama. Odami mosïkaxi palïpi otïrhioma gatïanïi xi go tïtïañikarudï Diuxi tudu. Gïgïr Rey dukai darai aapi odami tudu sai gatïanïna ïgai bïïxi ixtumaxi idui aapi. Podukai maa aapi ïmo gïdukami xadutudaragai tomaxi maiti ïr namïakami ïgai.

⁸ Maa aapi sïïrhikami odami sai tïanïna ïgai bïïxi aïkatai tudu, podukai ojixi Diuxi ñokidïrï tudu. Ami ikaiti go ojai sai maa Diuxi sïïrhikami odami sai gatïanïna bïïxi aïkatiana tudu. Dai gobai itïiya ïrhidi sai mai bii tomarhi ïmo ixtumaxi ïkobïrakoga. Odami biaka agai sïïrhikami xi gatïanïdagi bïïxi aïkatai tudu. Dïï gia kïïga maatï aatïmï sai xibi mai kia nïidi aatïmï sai gatïanïdagi odami bïïxi aïkatïrï. Mai kia pogïdui gobai kaxkïdï mai kia gatïanïi gobai tudu.

Go Suxi chïki tasai dumarhioma bii xi tïtïañikarudï Diuxi ïmo odami busaikai ïgai

⁹ Dïï gia Suxi gia ka bhïiyi sïïrhikami dai kaxi gatïanïi ix dukai aagai go ojai. Baasïkioma chïki tasai dumarhioma bii ïgai xi go tïtïañikarudï Diuxi aidïxi ïmo kïïrhi busai ïgai. Dai taata ïgai go mukigami bïïxi óídakami bïïtarï. Po dui ïgai mos ïï kïï tuigakatai Diuxi gïr bïïtarï. Dïï gia xibi ka bhïiyi Suxi gïdukami xadutudaragai ïmo gïï gatïanïdamikatai xibi ix dukai aagai go ojai.

¹⁰ Daiñi, Diuxi ïgai daidi idui dai nukadai bïïxi ixtumaxi. Dai ïgai kïïgakïrï bubaida ïrhidi mui maamaradï dai baidaja ïrhidi maigobai xako maakimu ïgai ïmo gïdukami bhai ïrhiaragai dai xadutudaragai. Kaxkïdï kïï bhai maaxi idui Diuxi aidïxi dagito ïgai sai soimaaxi taatana Suxi gïr bïïtarï. Podui ïgai sai kïï bhai gï dukana Suxi Kristo ix gïr bhaitï imïdagi dai gïr tïïgidagi boi ix dukatai kïïgakïrï bubuakiagi aatïmï. Ïgai tudu bhai dui go kïïgakïrï bubaidaragai gïr bïïtarï.

¹¹ Daiñi, Suxi ïgai dai ïkobai gïr bubaidi Diuxi bïïtarï. Dai xibi Suxi Ogadï ïr aatïmï gïr Oga ïpï. Kaxkïdï mai xaïrai Suxi gïr aagaitai sai aatïmï ïr susukurhidï.

¹² Dai kaxkïdï ïpï Suxi potïtïdai Diuxi sai, Ñokadamu aanï gin aaduñi buitapi ix makïdï ïr gin mamaatïrdamiga. Ga aagiadamu aanï xïï kïï tuiga aapi tudu. Ganïdamu aanï ïpï gïr ïmpaiñdaragiana aagaitai xïï kïï tuiga aapi ïpï, itïtïdai.

¹³ Daidi ikaiti Suxi xibhïakoga ojadïrï Diuxi ïpï sai, Kïïga buaboitudai aanï Diuxi sai ïgai gin nukadai, ikaiti. Dai ïpï ïmai imidagai ikaiti ïpï Suxi sai, Tami daja aanï ïmadï maamaradï Diuxi ix makïdï gin nukaturhi ïgai, ikaiti.

¹⁴ Aatïmï tudu ïr maamaradï Diuxi ix makïdï aagai ïgai. Dai bia aatïmï gïr tukugadï dai mumukui aatïmï. Kaxkïdï gïr ïpïamaaxi tukuga bhïiyi Suxi. Biatu Suxi tukugadï ïpïan dukai aatïmï sai bhodïrï mukuna ïgai dai podukai popoidan dui ïgai gubukarhigadï go diabora ixtukïdï gïr buapidi ïgai go mukigami.

¹⁵ Aatïmï bïïxkatai ïbhïidiña go mukigami arhidukatai aatïmï abhiadïrï xi kaxkïdï soi dukai óídakaiña aatïmï. Mai bhaigakana aatïmï xi kïïgakïrï bubuakiagi go mukigamiañdïrï tudu. Maamaixapikami dukai óídakaiña aatïmï ïbhïiditai go mukigami aidï. Dïï gia Suxi muu gïr bïïtarï sai ka mai soi dukai óídakana aatïmï maamaixapikan dukai ka mai ïbhïiditai aatïmï go mukigami.

¹⁶ Dai kïïga maatï aatïmï sai dibia Suxi dïï mai xu xi dibia ïgai iduña agaitai ïmo soiñi Diuxi tïtïañikarudï bïïtarï. Bhaiyoma dibia ïgai iduña agaitai ïmo soiñi aatïmï buaboitudadami gïr bïïtarï. Aatïmï gïr bïïtarï ix makïdï ïr piipixaradï dukai go Abraamkaru tudu.

¹⁷ Suxi dibia go Ga bhaitïkïakami Dadaxdadami dukai bhai duña agaitai gïr soimaaxkamiga bïïtarï. Dibia ïgai dai gï muatu adaama kïïgadukïdï daxdaragai dukai gïr bïïtarï tudu. Podukai bïïxi naato aa namïki ïgai gïr soimaaxkamiga ixtukïdï buatulda dukai bitadai aatïmï Diuxi bïïtarï. Dai ïmo kïïgadukami gabhaitïkïakami dadaxdadami bia xi soi gï ïlda nïijada odami. Ïma dukai dukatai kïïga ibuadana ïgai aaduindadï bhai buadatai ïgai odami bïïtarï buitapi Diuxi Kaxkïdï gï agaitadai sai odami busiagi Suxi sai podukai ïmo kïïrhikatai kïïga maatïkagi ïgai ix taadakana aatïmï. Podukai soi gï ïrhi Suxi gïr bïïtarï dai kïïga idui aaduindadï gïr bïïtarï Diuxi buitapi.

¹⁸ Ka soimaaxi taata ïgai tudu gïr ïpïan dukai. Bïïxi máí ix taadaga aatïmï xïïxkadï go soimaaxi gïr abïnakiadagi gïr tïgibudagai sai soimaaxi ibuada aatïmï tudu. Gïr ïpïan taadatu ïgai dai kaxkïdï kïïga ixtutuidikïi ïgai xi gïr soikïdagi xïïxkadï ïïgiada antaadakagi aatïmï soimaaxi tïgibudagai. Suxi gia ïr go adaama kïïgadukïdï gabhaitïkïakami dadaxdadami tudu.