Hebreos 13 - Northern Tepehuan Bible

Tami aagai ix dukatai gï agai xi ibuadagi aatïmï ixtumaxi bhai ïrhidi Diuxi

¹ Gin aaduñi, ïmo aadunumï aapimï buaboitudadami dai gï agai xi mai ugutai gïn oigïdada aapimï aipakoga.

² Gï agai tudu xi bhai dukai miadïgiadagi gïn dadidakamiga tomaxi mai maatïkagi aapimï. Maiti gï maatï xi bhai maiti ïr tïtïañikarudï ïgai Diuxi kaxkïdï. Ïïmo óídakami ka miadïgidiña tïtïañikarudï Diuxi podukai, mai maatïkatai tudu.

³ Gï agai ïpï xi gïn tïgitokagi dai buamï gïn ïrhiadagi bïïtarï gïn aaduñi Diuxi amadïrï ix makïdï gïn maamaixatu buaboidaradïkïdï. Gï agai xi ïpïan taadakagi aapimï sai maamaixapikamudai ïmadï. Dai podukai ïpï gï agai xi buamï gïn ïrhiadagi aapimï bïïtarï gïn aaduñi ix makïdï soimaaxi taatamaimi soimaaxi buididitai jaa. Buamï abïr gïn ïrhiada ïpïan dukai sai aapimï gïn soi buidadamudai jaa ïpï. Po kaxi abïr oigïdada gïn aaduñi tudu.

⁴ Aapimï ix makïdï ka gaïmadï bii abïr xadutuada gïn aduñi dai kïïga abïr gïn tïtïgitoka dai mai ïmadï boopodagi ïmai. Kaxkïdï tudu Diuxi gïgïbitulda agai xorai ïmadï boopodagi ix makïdï maiti ïr aduñdï. Dai go ix makïdï mai kia gaïmadï bii, ïgai maiti gï agai ix gaïmadï boopodagi ïpï.

⁵ Dai maiti abïr adaimuada go tuminxi ïpï poïrhiditai sai gobai ïr gïn bhai ïrhiaraga. Gï agai bhaiyoma xi bhai gïn ïrhiadagi ixtumaxikïdï ka bia aapimï. Daiñi, ka ojixi Diuxi ojadïrï sai, Aanï Diuxi maiti gïn dagitomu tomarhi ïmo imidagai, ikaiti Diuxi ojadïrï.

⁶ Kaxkïdï bhaiga aatïmï xi mai buamï rïrhiadagi gïr ïmadï dakatai Diuxi, tomaxi mai xii mui ixtumaxi biakagi aatïmï. Dai asta bhaiga aatïmï ïpï xi pokaitadagi sai, Diuxi ïgai dai gin nukadai. Kaxkïdï ¿Ix tuixi buamï iñïrhidiña aanï xi gin buidadagi óídakami? Diuxi gin nukadai di. Daiñi, gï agai bhaiyoma xi bhai gïr ïrhiadagi ixtumaxikïdï bia aatïmï. Ka kïïga bia aatïmï ixtumaxi kabami namïakami gïr ïmadï dakatai Diuxi tudu. Dai gï agai ix mai duduadikuda aatïmï ïpï gïr nukadakatai ïgai.

⁷ Gin aaduñi, gïn tïgitodabïrai xïï kïïga óídakaiña gïn bhaitï gukakamiga Diuxi amadïrï. Gïn tïgitobïrai xïï sïïrhi óídakana ïgai ix makïdï gïn tïtïgidi Diuxi ñokidï tudu dai ïpïan dukai abïr buaboitudada dai óídaka.

⁸ Daiñi, Suxi Kristo mai ïmapïbuayi. Apia mo maaxkana ïgai tomax tuigako tudu.

⁹ Kaxkïdï maiti abïr gïn dagito sai ïmapïbuadagi gïn buaboidaraga ïpï. Maiti abïr bhïbhïda ïma maaxi tïgibudagai ix makïdï maiti ïr buaboi tudu. Dukami maiti abïr bhïbhïda tïgibudagai ix makïdï gïr daidi ïïmo kuadagai. Daiñi, xïïxkadï maatïkagi aatïmï xïï kïï tuiga Diuxi gïr bïïtarï dai buaboitudagi aatïmï, gobai gïr soikïi dai gïr mamaakai gubukarhigai gïr iibhïdagïrï. Dïï gia xorai oijadagi go sïïrhikami ïïkidadï ix makïdï gadaidi sai kuadana ïgai ïïmo kuadagai, gobai mai soikïi xi bhïiya ïgai gubukarhigai ibhïgadïrï. Dai xadïrï gïr soikïiña gobai aatïmï ïpï.

¹⁰ Gin aaduñi, Suxi Kristo idui ïmo daxdaragai gïr bïïtarï mukukai ïgai kuruxiana. Dïï gia go óídakami ix makïdï po gïn ïrhidi sai kïïgakïrï bubuaki agai oiditai go sïïrhikami ïkidadï, ïgai mai bhaiga xi Suxi daxdaradïañdïrï bhïiyagi soiñi. Maiti ibuayi soiñi Suxi daxdaradï go odami bïïtarï ix makïdï apia ibuada ïrhidi ix dukai ibuadana go Judidiu ïïki go ikuxi kiupiïrï tudu. Kïï maatï aapimï ixdukatai ibuadana go bhaitï kïakamigadï go dadaxdadami ïïki go ikuxi kiupiana. Bhïï aimïraiña ïgai ïradï buxtaki ami go kiupiana dai ami go xadutudikami tukabiïrï dadaxdiña ïgai Diuxi go óídakami soimaaxkamigadï bïïtarï.

¹¹ Dïï gia maigobai kiikiañdïrï bubaidiña ïgai tutukugadï go buxtaki ïmo boixibharu dukai, dai ami bïï nato mïmïidiña ïgai. Ami tudu daitudaiña ïgai bïïxi ixtumaxi ix makïdï galnaxi tukuragai dukai nïidiña ïgai.

¹² Dai podukai gï buididi Suxi Kristo ïpï. Ïgai gï baidakatu maigobai go kiiki saagidañdïrï ïpï dukami xi ïr ïmo tukuragaikamudai ïgai. Dai ami soimaaxi taata ïgai gïr soimaaxkamiga bïïtarï. Ami aaxi ïgai ïradï dai muu sai podukai ïkobai gïr bubaidana Diuxi bïïtarï.

¹³ Go óídakami soi dukai nïidiña go Suxi tudu dai kaxkïdï soi buididi podukai maigobai busaidakai go kiikiañdïrï. Kaxkïdï tï tai ïpïan dukai soimaaxi taata Suxi soi dukai gïr nïiditai jaa urabakatai aatïmï Suxi. Tï oijada Suxi tomaxi maigobai ïkobai gïr bubiadan duñagi óídakami soi dukai gïr nïiditai.

¹⁴ Idi oidigi mai kïïgakïrï ïr gïr kii tudu. Tami mosïkaxi chïki tasai bïïtarï óídaka ragai. Nïnïraka aatïmï ïmai kiiki kia tudu ix makïdï gokiïrioma kïkiba agai dai bïïxkïrï bïïtarïka agai.

^15-16 Gin aaduñi, Suxi Kristo ka bhai dui gïr bïïtarï ixdukatai aatagada aatïmï Diuxi ïmadï. Dai kaxkïdï gï agai xibi xi mai dagitokatai kïïga ñokadagi aatïmï Diuxi bïïtarï. Nïnïraka aatïmï ix gïr aiyagi go oidakaragai ïmo utudui kiikiïrï tudu. Kaxkïdï kïïga gï agai xi aagadagi aatïmï xïïxi bhai gïr ïrhidi Diuxi ïmadï tudu. Daidi maiti abïr dagitotai ibuadagi ixtumaxi ïr kïïga dai soikïdabïrai xorai tïgitokagi ïpï. Kaxkïdï tudu xïxkadï podukai ibuadagi aatïmï ixtumaxi ïr kïïga gobai ïr ïmo xadutudaragai Diuxi bïïtarï. Ïmo daxdaragai gï dukami gobai Diuxi bïïtarï tudu dai bhai gï ïrhidi ïgai gobaikïdï.

¹⁷ Gin aaduñi, ïïgiadabïrai gïn bhaitï gukakamiga Diuxi amadïrï. Kaxkïdï tudu gïn nukadai ïgai sai kïïga imïna gïn buaboidaraga. Dai biakamu ïgai ix Diuxi buitapi gukibagi dai aagadagi ixtuma dui ïgai gïn nukadatai. Kïïga abïr ibuada tudu sai ïgai bhai gïn ïrhidiña gïn nukadatai dai maiti abïr ibuada ixtumaxi ixtukïdï soi gïn ïrhiadagi ïgai.

¹⁸ Gin aaduñi, aanï ïmadï ix makïdï tami gin ïmadï daraka bïïxkatai kïï maatï gïr iibhïdagïrï sai maiti ibuadana aatïmï soimaaxi ixtukïdï gïpiïrï gïr bupadagi jaa. Dai ipïrhidi aatïmï xi apia bïïx tasai ibuadagi aatïmï ixtumaxi ïr kïïga tomax daibuñagi gïr ïmadï. Kaxkïdï abïr daanïda Diuxi gïr bïïtarï.

¹⁹ Dai aanï in bïïtarï bamioma ipïrhidi aanï sai daanïda aapimï sai otoma ixtuidana aanï xi amïka gïn dibidagi.

²⁰ Gin aaduñi Diuxi amadïrï, kïïga maatï aapimï sai Diuxi ïgai daidi gïr maakai ibhïxtaragai. Ïgai tudu duakaturhi go Suxi ix makïdï ïr gïr Nukadakami kïï tuigakami. Dai Diuxi ïr ïgai ix makïdï bïïxkïrï bïïtarï namïaturhi go utudui sïïrhikami ix makïdï bhai dui ïgai gïr bïïtarï mukukai Suxi Kristo dai aaxtakai ïradï.

²¹ Daanïi aanï Diuxi tudu sai gïn maakana ïgai bïïxi aïkatai ixtumaxi aapimï tïgito ixtukïdï ibuadana aapimï ixtumaxi ïgai ipïrhidi. Daanïi aanï saidi gïn soikïiña ïgai saidi Suxi Kristo gubukarhigadïkïdï ibuadana aapimï bïïxi ixtumaxi bhai ïrhidi ïgai. Gï agai sai bïïxi óídakami kïïga ñokadagi Suxi Kristo bïïtarï dai bïïxkïrï bïïtarï aagada xïïxi ïr gïdukami dai namïakami ïgai. Sai pogïduna gobai tudu.

²² Gin oigïdakai abïr kïïga ïïgiada idi ojai ix makïdï ïr ïmo maakaragai ñoki dukai gïn bïïtarï. Maiti xii tïbïdu gobai tudu.

²³ Gï agai xi maatïkagi aapimï sai ka busai go Timoteo maixakaruañdïrï. Dai ix otoma aiyagi ïgai tami aidï gia gin oijadamu ïgai xïxkadï gïn dibidagi aanï gamoko.

²⁴ Diuxkïdï abïr biatulda bïïxi gïn bhaitï gukakamiga Diuxi amadïrï ïmadï bïïxi go gaa buaboitudadami ami ïpï. Go buaboitudadami Italiañdïrï gïn otoxdi ïmo biatuldaragai aapimï ïpï.

²⁵ Gin aaduñi, ipïrhidi aanï sai Diuxi gïn tïïgidagi xïïxi kïï tuiga ïgai gïn bïïtarï. Mosïkaxi