Hebreos 12 - Northern Tepehuan Bible

Diuxi oigïdai maamaradï dai kaxkïdï soimaaxi taataturhidi ïgai ïmo maakaragai ñoki dukai

¹ Gin aaduñi Diuxi amadïrï, kaxi gïn aagidi aanï sai muidukana go óídakami ix makïdï kïïga buaboitudai Diuxi ïïki abhiadïrï. Gïr xikorhi gukakan duu ïgai gïr aagiditai sai mai ugutai buaboitudada aatïmï Diuxi tudu. Kaxkïdï ïpï tï tai aatïmï kabami gïr aga dai kïïga buaboitudaitai óídaka ïpï. Tï kabami gïr aga ïpïan dukai ïmo mïmïradami ix makïdï maigobai dadasai bïïxi ixtumaxi sobhikïdagi ix mïradagi ïgai. Tï maigobai dasa bïïxi ixtumaxi gïr sobhikïdagi saidi kïïga buaboidaitai óídakagi aatïmï tudu. Tï gajiadïrï bia bïïxi go soimaaxkami ix makïdï dudatai gïr sobhikïi. Gï agai tudu xi mai ojodatai oijadagi aatïmï go oidakaragai ix makïdï gïr maa Diuxi.

² Gin aaduñi, ix dukai ïmo mïradami bia xi kïïga gï tïgito nïidagi xako mïmïrai ïgai dai bia xi sïïrhi bhaitiakoga nïijadagi. Podukai ïpï aatïmï ïpï apia kïïga oijada ïrhiada aatïmï gïr buaboidaraga gï agai xi tïgito ajiopada aatïmï Suxi Kristo ixdukatai idui ïgai dai podukai ibuadagi aatïmï ïpï. Gïn tïgitobïrai tudu sai ïgai kïïga buaboitudaiña sai Diuxi maaki agai ïmo gïdukami bhai ïrhiaragai dai kaxkïdï gï kabakatu ïgai kuruxiana nagiïkatai. Kïïga maatïkatadai ïgai sai go kuruxi ïr ïmo gïgïbidaragai soimaaxi ibuadami bïïtarï tudu. Dïï bïïxkïrï mai buamï ïrhidi ïgai tomaxi xaïraraga xi óídakami podukai ïmo soimaaxi buadami dukai gïgïbituldagi xixakai kuruxiana. Dai xibi ka bhïiyi ïgai ïmo gïdukami xadutudaragai sïïrhixapadïrï daibakai ïgai Diuxi amïka xakoga dakatai gatïanïi Diuxi. Podukai go bïïxi adama gatïanïdami bii Suxi tudu.

³ Gin aaduñi, kïï maatï aapimï sai go Suxi kabami soimaaxi taata. Go óídakami soimaaxi ibuadami kabami kïïdaiña dai kabami soimaaxi buididiña tudu. Gïn tïgitobïrai gobai sai podukai mai ojodatai oijada aapimï gïn buaboidaraga dai sai mai ugitïna gïn gubukarhiga xïïxkadï soi gïn buidadagi óídakami ïpïan dukai xi duñi ïgai Suxi.

⁴ Gïn tïgitobïrai ïpï sai Suxi Kristo gï muatu buidïrï kïkibakai ïgai go soimaaxkami. Go soimaaxkami ix makïdï oidaga ïr gïr buidïrï kaatïkami duu tudu. Dai tomaxi buidïrï gugukimi aapimï go soimaaxkami bïïxkïrï mai kia taata aapimï go mukigami buidïrï gugukatai gobai.

⁵ Gin aaduñi, maiti abïr gajiadïrï bia go ojai xako ikaiti sai Diuxi mamaakai ñoki bïïxi maamaradï. Adukai ikaiti Gïr Nukadakami ami ojadïrï tudu, Gin maara, ikaiti. Kïïga gin ïgiada xïxkadï soimaaxi gï taatamiturhiadagi aanï. Po buayi aanï ipïrhiditai sai kïïga gï tïgitoagi aapi ïpamu xïxkadï mai kïïga ibuadagi aapi. Maiti dagito gï buaboidaraga gokïdï tudu.

⁶ Aanï ïr Ga Tïanïdami tudu dai podukai soimaaxi taatamiturhiña aanï bïïxi gïn maamara oigïdatai aanï. Dai mamaakai aanï gïgïbidaragai bïïxi óídakami ix makïdï gin maamara aagai aanï. Ix mai gïgïbituldagi aanï gobai itïiya ïrhidi sai maitï ïr gin maamara ïgai tudu, ikaiti. Po kaiti Diuxi ojadïrï tudu dai go ñoki gobai ïr aapimï gïn bïïtarï. Maamaradï aapimï Diuxi tudu kaxkïdï aapimï gïn ajïga gobai.

⁷ Daiñi, xïxkadï soimaaxi gïn taatamiturhiadagi Diuxi gobai ïr ïmo maakaragai ñoki dukai gïn bïïtarï. Gïn gupurtudabїrai dai mos taata go gïgïbidaragai. Gïn kabakadabïrai xïïxkadï soimaaxi gïn taatamiturhiadagi Diuxi tudu. Dai gïn tïgitobïrai sai pobuayi ïgai bïïxi maamaradï ïmadï. Mai xu xi mosïkaxi aapimïkïdï pobuayi ïgai. Kïïga maatï aatïmï tudu sai bïïxi gaoga mamaakai gïgïbidaragai maamaradï.

⁸ Dai pomaaxi Diuxi ïpï. Gïgïbai ïgai bïïxi maamaradï ïmo maakaragai ñoki dukai. Dai kaxkïdï ïpï gï maatï sai ix mai kia gïn maa Diuxi gïgïbidaragai gobai itïiya ïrhidi sai aapimï maiti ïr maamaradï kïïgakïrï.

^9-10 Daiñi, gïr ojoga ix makïdï biakana aatïmï tami oidigi daama gïr mamaakaiña ñoki xïïxkadï mai kïïga ibuadaiña aatïmï dai gokïdï ïïgidiña aatïmï. Kïïga xadutudaiña aatïmï tudu. Dai ïgai mosïkaxi chïki umigi bïïtarï gïr mamaakaiña ñoki. Dai gïr mamaakaiña ïgai ñoki ïïgi ixdukatai kïïgadu ïrhidi ïgai. Kïïga gï agai tudu xi ïïgiada aatïmï gïr ojoga ix makïdï bia aatïmï tami oidigi daama. Dïï gia bamioma gï agai xi ïïgiada aatïmï Diuxi gïr Oga. Ïgai tudu gïr maa gïr ibhïdaga dai kïïga gï maatï sai ïïgiditai aatïmï Diuxi kïïga óídakamu aatïmï. Kaxkïdï tudu ïr soiñi gïr bïïtarï xïïxkadï soimaaxi gïr taatamiturhiadagi Diuxi ïmo maakaragai ñoki dukai. Gobai ïr soiñi gïr bïïtarï sai ïkobai darakagi aatïmï soimaaxkamiañdïrï ïpïan dukami ïgai.

¹¹ Daiñi, bïïxkïrï xïxkadï soimaaxi gïr taatamiturhiadagi Diuxi gïr maakaitai ñoki, gobai mai bhai taadaga. Soi ïrhiaraga gobai bhaiyoma. Dïï gia xi ïïgiadagi aatïmï dai bhïiyagi aatïmï kïïgadukami tïgibudagai soimaaxi gïr taatamituldakai ïgai aidï gia xioma óídakana aatïmï ka buañixikami dukai óídakatai.

¹² Gin aaduñi, kïïga ïr buaboi tudu sai Diuxi soimaaxi taatamiturhiña maamaradï sai bhïna ïgai kïïgadukami tïgibudagai. Dai kaxkïdï abïr mai ojodatai oijada gïn buaboidaraga dai bhaiyoma abïr gïn kabakada go soimaaxi buidïrï.

¹³ Kïï sïïrhi abïr óídaka oiditai Gïr Nukadakami tudu. Podukai soikïdamu aapimï jaa buaboitudadami ix makïdï mai xii gupuka dai ix makïdï xijaidi oiditai buaboidaradï.

¹⁴ Kabami abïr gïn aaga gaagaitai ix dukatai xioma oidakagi jaa óídakami ïmadï kïïgakïrï gïn nïiditai aipakoga. Dai kabami abïr gïn aaga ïpï oidakatai ix dukatai gï agai xi oidakagi odami ix makïdï ïkobai daraka go soimaaxkamiañdïrï. Kaxkïdï tudu xorai mai ïkobai dakagi soimaaxkamiañdïrï mai biakamu oigaragai ix aiyagi Diuxi Gïr Nukadakami buitapi.

¹⁵ Gin aaduñi, kïï tuiga Diuxi gïr bïïtarï dai gïr maaki ïrhidi ïgai naana maaxi sai maatïkana aatïmï xïï kïï tuiga ïgai. Dïï gia gï agai xi gïn nukada ajiopada aapimï tadu ïmadutai aapimï mai bhïiyi. Gïn nukadakabïrai sai mai bhamukatai oidakagi ïmadutai aapimï tudu. Maiti abïr gïn dagito ix podukai mos apia imïda bhamudagai gïn saagida. Tadu gïn bupuidïrï gïn tutusadan buadagi go bhamudagai kaxkïdï tudu podukai muidutai aapimï gïn sarabida antaada go bhamudagai.

¹⁶ Kïïga abïr gïn nukadaka ïpï sai mai okimïrhiakagi aapimï ïmadutai. Kaxkïdï tudu xorai pomaaxkagi mai xadutudai Diuxi pobuadatai. Ka ïpïan buayi ïgai go Esau tudu ix makïdï oidakatadai ïïki. Daiñi, Diuxi maatadai go Esau ïmo kïïgadukami sïïrhikami gaxïgikatai ïgai dïï go Esau mai buamï ïrhidi go sïïrhikamikïdï. Mai namïakami dukai tïï ïgai tudu dai gagara lïïchi bhiayikïdï. Podukai mai xadutugi ïgai Diuxi tudu mos ïï lïïchikïdï gagarakai go sïïrhikami ix makïdï Diuxi maatadai.

¹⁷ Kïï maatï aapimï tudu saidi gokiïrï bhïiya ïrhiditadai ïgai sïïrhikamigadï ïpamu dai ka maiti ixtui. Tomaxi gokiïrï ipïrhiditadai ïgai xi mai gagaramudai ïgai sïïrhikamigadï dai asta suakaiña soi ïrhiarakïdï gagarakai. Ka mai kïï duitadai ïgai dai ka mai biakatadai gobai soiñi. Diuxi mai maa oigaragai ix bhïiya ïgai go sïïrhikami ïpamu. Dai podukai ïpï xorai okimïrhiakagi mai xadutuadan buayi Diuxi ïpï ïpïan dukai go Esau. Maiti gï agai xi pomaaxkagi tomarhi ïmadutai aapimï tudu.

Go buaboitudadami xibi bamioma namïakami bia ixtumaxi xi bhai ix makïdï biakatadai go Israelitas ïïki

¹⁸ Gin aaduñi, aapimï bia ïmo bhai ïrhiaragai kïïgadukamioma ix bhai ix makïdï biakatadai go Israelitas ïïki aidïxi Diuxi maa go ïkikïdï sïïrhikami. Daiñi, aidïxi buaboitu aapimï Suxi Kristo aidï gïn maa Diuxi ïmo utudui sïïrhikami ix makïdï kïïgadukamioma xi go ïïkidadï sïïrhikami. Aidïxi maa Diuxi go sïïrhikami ïkidadï go Israelitas kabami duadimudagatadai gobai. Aidïpïrï ïmo tubidakana ayi ïgai Sinaí tïgidukami. Dai ami gïïpi mïjïitadai táí dai tukamukatadai dai imïitadai ïmo gïï xiborhiki.

¹⁹ Kabami kaidatu ïmo trompeta ami dai gï kaidatu ïpï sai ño Diuxi bai go Israelitas duduadimu kaïkatai dai daañimitadai ïgai Diuxi sai ka mai ñokada ïgai.

²⁰ Karhioga koiyadan taadatugai ïgai duduadimukatai aidï kaïkatai ix ñokai Diuxi. Aidïpïrï Diuxi potïtïdai sai, Maiti gï agai ix taatagi aapimï go tubidaki. Ix ïmadutai aapimï taatagi aidï gia gï agai mïx maikarsagi ojodaikïdï dai muagi ix makïdï taata. Mai xudu xi ïr odamikagi ix makïdï taata xi ïr buxtakikagi ïpï tomax dukai gï agai mïx muagi, itïtïdai Diuxi.

²¹ Dai asta go Moises ïpï sïïrhikïdï duadimukatadai ixtumaxikïdï tïï ïgai tubidakana. Daidi ikaiti ïgai, Gigibukïi aanï nïiditai gobai, ikaiti ïgai.

²² Dïï gia aapimï buaboitudadami xibi mai iji ïmo tubidakïrï podukai aidïxi buaboitu aapimï go utudui sïïrhikami ix makïdï bhai dui Diuxi gïn ïmadï. Gïïpi bamioma bhai ïrhiaraga xako iji aapimï. Mai iji aapimï go Sinaí tubidakïrï ix dukai idui go Israelitas ïïki aidïxi maa Moises go ïïkidadï sïïrhikami tudu. Bhaiyoma sïïrhi bapakïi aapimï xako odaga Diuxi ka buaboitudakai aapimï. Daiñi, gobai ïr ïpïan dukami ix makïdï ibuadana gïn aaduñi ïïkidadï. Aïjïiña ïgai xako Zión Gidiïrï tïgidu xadutuada agaitai Diuxi ïïki. Ajïiña ïgai Jerusalenïrï tudu dai ami xadutudaiña ïgai Diuxi. Dai xibi buaboitudakai aapimï kaxi ïr ïpïandukami gobai ïpï ix ka aiyandui aapimï Ziónïrï ïpï dai go utudui Jerusalenïrï ix makïdï tïbagiana daja xakoga kabami muidu mirhi tïtïañikarudï Diuxi. Ayi aapimï Diuxi tudu dai xadutudai aapimï oigïda ñokaitai aapimï.

²³ Gin aaduñi, ka urabaka aapimï bïïxi go buaboitudadami. Ka bipiatu aapimï ïmo sïïrhikami dai ïmo bhai ïrhiaragai Diuxi amadïrï tudu ïpïan dukai bïïxi buaboitudadami. Daiñi, bïïxi odami ix makïdï ïr gaxixïgi bhïiyi sïïrhikamigadï ogadï. Dai bïïxi buaboitudadami ïr gaxixïgi duu, maamaradïkatai ïgai Diuxi. Bipiatu aapimï ïmo gïdukami bhai ïrhiaragai sïïrhikami tudu aidïxi Diuxi podukai aagai sai aapimï ïr maamaradï. Saidi aapimï ïr gaxixïgi duu tudu. Gin aaduñi, ka urabaka aapimï go buaboitudadami ix makïdï ka ojixi tïbagiana. Xibi ka buaboitudakai aapimï bapakïi aapimï Diuxi buitapi gïn iibhïdagakïdï. Dai ïgai ïr ix makïdï aagada agai xorai kïï dui dai xorai mai kïï dui. Ami Diuxi buitapi xako ajïi aapimï ami daraka go odami ix makïdï kïï buañixi iibhïadï daidi ka koi. Ka urabaka aapimï go buaboitudadami ix makïdï ka kïïgakïrï bubuaka. Ïgai ïr ix makïdï ka bhai duñixi iibhïadï Diuxi bïïtarï tudu.

²⁴ Gin aaduñi, aapimï buaboitudai Suxi Kristo ix makïdï bhai dui go utudui sïïrhikami gïr bïïtarï. Amïka Diuxi buitapi bhai dui ïgai sai kïïgakïrï bubuakïna aatïmï tudu. Buaboitudai aapimï go aaduindagai ix makïdï idui Suxi Kristo kuruxiana aaxtakai ïgai ïradï ami. Dai go Suxi ïradï ix makïdï aaxi ïgai kuruxiana mai ïpïamaaxi ïradï go Abelkaru ix makïdï gï aaxi aidïxi muu go Abel ïïki. Diuxi pokaiti sai go Abel ïradï gataanïitadai sai gï sïïrhiñana Diuxi go Kain ïmadï ïmo gamuakamikatai go Kain. Dïï go ïrai ix makïdï aaxi Suxi mukukai kuruxiana gobai gataanïi sai gïr oigïldana ïgai gïr soimaaxkamiga bhaiyoma. Gïïpi ïma maaxi gobai xi bhai go Abel ïradï tudu.

²⁵ Gin aaduñi, Diuxi gïn maakaimi ñoki xibi. Gïn nukadabïrai tudu, tadu maiti ipïrhiada aapimï xi ïïgiadagi. Tadu ïpïan dui aapimï go Israelitas aidïxi maiti ipïrhi xi ïïgiadagi Diuxi ïïki aidïxi tami oidigi daamïrï ño Diuxi. Diuxi gïgïbiturhi ïgai tudu mai ïïgiditai ïgai. Dai xibi tïbagiañdïrï gïn mamaakai ñoki Diuxi mai xu oidigi daamaiñdïrï dai kaxkïdï xïïxi bamioma gï agai xi ïïgidagi aapimï xibi. Tïbagiañdïrï ñokaitai ïgai tudu. Kaxkïdï xadïrï mai taatana aapimï gïgïbidaragai ix mai ïïgiadagi aapimï Diuxi tïbagiañdïrï ñokaitai ïgai xibi.

²⁶ Daiñi, aidïxi Diuxi ñokidi go Israelitas ami go Sinaí gidiïrï gigiburhi go oidigi ñokaitai ïgai. Dai xibi pokaiti Diuxi sai kabami gigibutuda agai oidigi ïpamu dïï gia xibi asta go tïbagi gigiburhi agai ïpï.

²⁷ Dai gobai itïiya ïrhidi sai xia duadamu ïgai bïïxi ixtumaxi idui ix makïdï mai bïïxkïrï bïïtarï kabaka agai, mai xudu xi ïr ixtumaxi tïbagiana xi ïr tami oidigi daama ïpï. Bïïxi xia duadamu ïgai. Poduñimu ïgai sai mosïkaxi biïna ixtumaxi gia bïïxkïrï bïïtarï kaapakana.

²⁸ Gin aaduñi, gobai ix makïdï bïïxkïrï bïïtarï kabaka agai ïr go utudui oidakaragai ix makïdï gïr maa Diuxi. Ami gïr utudui oidakaragïrï gïr nukadai Diuxi dai gïr oigïdaitai gïr tïanïi ïgai. Dai bïï mai ugiti agai gobai tomarhi ïmo imidagai. Kaxkïdï gï agai sai kïïga bhai gïr ïrhiada aatïmï Diuxi ïmadï sai podukai kïïga ñokada aatïmï ïgai bïïtarï dai kïïga xadutuadagi ixdukai ïgai ipïrhidi. Aa gia gï agai xi kïïga xadutuada aatïmï mos ïxi namïakatai ïgai.

²⁹ Kaxkïdï tudu xïxkadï gïr Diuxiga gïgïbituldagi soimaaxi ibuadami ïpïan dukai ibuayi ïgai ïmo táí ix makïdï nato mïmïidi bïïxi ixtumaxi mai buañixikagi.