Hebreos 11 - Northern Tepehuan Bible

Tami aagai mui óídakami ïïki ix makïdï kïïga buaboitudaiña

¹ Gin aaduñi, bïïxkatai ïgai ix makïdï buaboitudai Diuxi kïïga maatï sai biaka agai ixtumaxi nïnïraka ïgai Diuxiañdïrï. Dai kïïga maatï ïgai ïpï sai daibuña agai bïïxi ixtumaxi ix makïdï aagadagi Diuxi. Kïïga maatï ïgai tomaxi mai kia daibusai gobai dai tomaxi mai kia nïidi ïgai.

² Dai mui gïr aaduñi ïïkidadï ix makïdï óídakatadai ïïki kïïga buaboitudaiña Diuxi xi kaxkïdï kïïgakïrï nïidiña ïgai.

³ Daiñi, buaboitudai aatïmï Diuxi dai kaxkïdï kïïga maatï aatïmï sai go ïï ñokidïkïdï idui ïgai bïïxi ixtumaxi. Bïïxi ixtumaxi nïidi aatïmï idui ïgai tudu. Aidïpïrï mai tipukatadai kia bïïxi gobai ix makïdï nïidi aatïmï aipakoga xibi. Dai mos ño ïgai bai oidatu bïïxi gobai.

⁴ Gin aaduñi, kïïga gï maatï sai go Abel kïïga buaboitu Diuxi dai kaxkïdï bamioma kïïgadukatadai ïgai daasadï xi bhai go Kain daasadï. Go Abel buaboitu Diuxi dai kaxkïdï Diuxi kïïgakïrï tïï dai aagidi sai bhai gï ïrhidi go daxdaradïkïdï ix makïdï buapi ïgai. Dai xibi tomaxi go Abel ka muu bïïxkïrï ïgaikïdï mamaatïrïi aatïmï ixdukatai buaboitudagi aatïmï Diuxi ïpï.

⁵ Go Enokaru kïïga buaboitudaiña Diuxi ïpï dai kaxkïdï Diuxi apia dukai duakakami baidaja tïbagiamu. Mai taata ïgai mukigami tudu. Diuxi baidaja dai ka mai tiputa ïgai tami oidigi daamaiñdïrï. Diuxi ñokidïrï ikaiti sai Diuxi kïïga bhai ïrhidi go Enok ïmadï kaxkïdï baidaja ïgai.

⁶ Dai gokïdï gï maatï sai go Enok kïïga buaboitu Diuxi. Xi ïmo odami mai buaboitudagi xadïrï bhai ïrhidiña Diuxi ïgaikïdï tudu. Kaxkïdï tudu xorai uraba ïrhiadagi Diuxi gï agai xi buaboitudagi ix oidaga Diuxi. Dai gï agai ïpï xi buaboitudagi sai Diuxi kïïga buidada agai ïgai kabami gï aajagïitai gaagaitai urabaragai Diuxi ïmadï.

⁷ Go Noékaru kïïga buaboitu Diuxi ïpï xïxkadï Diuxi aagidi sai dupitulda agai go oidigi sudagikïdï. Dai tomaxi mai kia nïiditadai ïgai tomarhi ïmo imidagai ix dupikïdagi oidigi bïïxkïrï buaboitu ïgai Diuxi. Duadimuka antaadatu ïgai tudu gï tïgitokatai xïïxi ïr gïdukami Diuxi dai kïïga buaboidaitai ïïgidi. Kaxkïdï idui ïgai go gïï barko ixtukïdï kïïgakïrï busai ïgai ïmadï modukai aaduñdï. Kïïga buaboitu ïgai Diuxi tudu dai kaxkïdï kïïga ïïgidi. Dai podukai maaxiko aa ïgai ix go gaa oidakami oidigi daama kabami ïr soimaaxi ibuadami mai buaboidaitai ïgai Diuxi. Dïï go Noé gia buaboitu Diuxi dai kaxkïdï buañixikami bii ïgai Diuxi bïïtarï.

⁸ Go Abraamkaru kïïga buaboitu ïpï dai kaxkïdï buaboidaitai ïïgidi ïgai Diuxi. Diuxi aagidi sai dagitona kiidï dai sai imïna xibhïakoga xako Diuxi maaki agai ïmai dïbïrai xako oidakagi. Dai bïïxkïrï ïïgidi ïgai tomaxi mai maatïkatadai xako imi agai kia.

⁹ Dai apia buaboidaitai jii ïgai dai ayi go dïbïriana xako maa Diuxi sai ami oidakana ïgai. Dai ikuxi bhaabhakiïrï oidatu ïgai ami ïmo xibhïadïrï imïdami dukai. Dai go Isaak dai go Jakobo podukai óídatu ïpï ikuxi bhaabhakiïrï. Go Isaak dai Jakobo bïïtarïtadai go ñoki ïpï ix makïdï aagidi Diuxi go Abraam aidïxi potïtïdai ïgai sai maaki agai ïmo gïï dïbïrai.

¹⁰ Ikuxi bhaabhakiïrï oidakaiña go Abraam tudu nïnïrakatai ïgai ix aiyagi ixtuigako ïmo gïï kiikiïrï oidakagi ïgai. Nïnïrakatadai ïgai go gïï kiiki ix makïdï kïï kabakami kïïka dai ix makïdï Diuxi idui ixdukatai ïgai ipïrhidi. Gobai ïr ïgai ix makïdï nïnïrakatadai go Abraam.

¹¹ Dai go Sara kïïga buaboitu ïpï dai kaxkïdï ixtui ïgai ix maratagi tomaxi kaxi ïr okodamikatadai ïgai. Ka daibusaitadai ixtuigako maratadagi ïgai dïï bïïxkïrï kïïga buaboitu ïgai Diuxi sai ïgai bïïxkïrï ibuayi ixtumaxi aagadagi dai kaxkïdï maara ïgai.

¹² Dai go Abraam ïpï kaxi ïr kïrhiodamikatadai aidï. Dai ka maiti ixtutuidikïitadai ïgai ïpï ix gamaratudagi. Toma lïïchi mai biakatadai ïgai gubukarhigai maratudaragai bïïtarï. Gobai bïïtarï ïpïan ïxi gubuakamikatadai ïgai ïmo mukiadï tudu. Dïï bïïxkïrï buaboitudai ïgai Diuxi dai kaxkïdï abhiadïrï go Abraamaiñdïrï bubuakai sïïrhikïdï mui odami. Ïpïan ïïki go xixabugai tïbagiana xiïpï go orai ix makïdï go gïï sudagi ugidana bïïtï tudu.

¹³ Bïïxkatai ïgai ix makïdï aagai aanï, go Abraam dai go Isaak dai Jakobo, bïïxkatai ïgai kïïga buaboidaitadai Diuxi aidïxi koi ïgai. Kia kïïga buaboidaitadai ïgai tomaxi mai kia biakatadai ixtumaxi Diuxi aagidi sai maaki agai. Maatïkatadai ïgai sai tïbïpida agaitadai kia ix aiyagi gobai dai bïïxkïrï buaboitu. Mïkaxdïrï nïijadan dutadai ïgai ix makïdï Diuxi aagidi sai maaki agai dïï mai ayi gobai. Dïï bïïxkïrï bhai gïn ïrhidiña nïnïrakatai. Daidi ikaitiña ïgai, —Gïr oidakaraga tami oidigi daama mos ïr ïmo lïïchi imidagai dukai. Otoma daibuñimu gobai— ikaitiña.

¹⁴ Dai kïïga maatiga maaxi sai xorai pokaitadagi saidi mos ïr lïïchi imidagai dukai oidakaradï, gobai itïiya ïrhidi sai mai kia tïï ïgai tami oidigi daama go kïïgakïrï oidakaragai ix makïdï nïnïraka ïgai. Kia nïnïraka ïgai xako kïïgakïrï biaka agai oidakaradï tïbagiana tudu.

¹⁵ Go Abraam ïmadï aaduñdï tomarhi mai tïtïitoiña kiidï ïkidadï xajadïrï bubuakaitadai ïgai. Ix tïgitokamudai ïgai gobai aidï gia maatï xi ïpamu gamo iimimudai ïgai. Dïï mai podukai tïtïitoiña ïgai.

¹⁶ Dai bhaiyoma gaagaiña ïgai ïmo oidakaragai bamioma kïïgadukami xi go ïïkidadï kiidï. Ka tïbagiana óídata ïrhiditadai ïgai tudu dai ka mai tïtïitoiña ïkidadï oidakaradï mos ïï kïïga buaboidaitai ïgai ixtumaxi Diuxi aagidi. Kaxkïdï kïïga bhai gï ïrhidi Diuxi ïgaikïdï. Mai xia ïï Diuxi kaïkatai sai go Abraam ïmadï aduñdï podukai aagaiña sai ïgai ïr Diuxigadï tudu. Kaxkïdï bhai duñi Diuxi ïmo kiiki tïbagiana ïgai bïïtarï dai podukai mamaaxidi xïï kïïga bhai ïrhidi ïgaikïdï. Dai gï agai sai maatïkana aapimï sai podukai nïijadamu Diuxi bïïxkatai ix makïdï ïpïan dukai buaboitudai ix duu buaboitu go Abraam ïpï.

^17-18 Go Abram kïïga buaboidaitai ïïgidi Diuxi. Daiñi, Diuxi aagiditadai Abraam sai Isaakïdï kabami muida agai piipixaradï. Dai go Isaak ïr go arhi ïmadugadïkïdï maradïkatadai. Dïï bïïxkïrï go Abraam kïïga ïïgidi aidïxi Diuxi aagidi sai daxdana ïgai go Isaak nïida ïrhiditai sa bhai kïïga buaboitudai ïgai. Go Abraam kïïga buaboitudai dai daxda agaitadai go Isaak ïmo kañiru dukai Diuxi bïïtarï.

¹⁹ Buaboitudai ïgai sai Diuxi ixtutuidikïi xi ïpamu duakaltudagi go Isaak. Dai bhaitoma po ïrhiadan dui aidïxi Diuxi kïïgakïrï busaitu go Isaak ïmo kañirukïdï.

²⁰ Go Isaak kïïga buaboitu Diuxi ïpï. Kaxkïdï aagidi ïgai ïmo bhai ïrhiaragai ñoki maamaradï bïïtarï mai kia mukukai ïgai dai aagidi sai Diuxi maaki agai naana maaxi bhai ïrhiaragai. Mai kia gamaatadai Diuxi go naana maaxi bhai ïrhiaragai tudu. Dïï gia go Isaak kïïga buaboitudaitadai sai maaki agai dai kaxkïdï podukai aagidi ïgai go Jakobo dai go Esau tudu.

²¹ Dai go Jakobo kïïga buaboitu Diuxi ïpï. Kaxkïdï aidïxi karhioga muki agaitadai ïgai aagidi ïgai ïmo bhai ïrhiaragai ñoki bopoxikadï bïïtarï ix makïdï ïr maamaradï go Jose. Daidi koidamu kuiki modï ïpï dai aagai ïmo xadutudaragai ñoki Diuxi buidïrï. Dagïkatadai ïgai gikadï kaxi ïr kïrhiodamikatai ïgai aidï.

²² Dai go Jose kïïga buaboitu Diuxi ïpï. Kïïga buaboitu ïgai sai Diuxi bubaidi aagai aaduñdï Ejiptuañdïrï. Kaxkïdï ïkiaxdïrï podukai aagidi ïgai sai bubuaki agai. Dai asta aagidi ïpï ix dunana ïgai go oodïkïdï xïxkadï mukiagi ïgai. Aagidi sai kusukana oodï xïïxkadï bubuakiagi ïgai Ejiptuañdïrï tudu. Bïïxi gobai aagidi ïgai go Israelitas mos ïï kïïga buaboidaitai ïgai.

²³ Dai dïïdïdï go Moises kïïga buaboitu ïpï Diuxi dai kaxkïdï mai duduadikoi ïgai mai ïïgiditai go rey Faraon. Go Faraon gatïjaitadai kodaragai bïïxi go aarhi gïgïrhi maamaradï go Israelitas mos bubuakïkai aidï. Dïï go dïïdïdï go Moises bhaiyoma mai duduadikoitai kïïga ïxtotai nukagi go Moises baika masadai busaikai ïgai. Kïï tiodikatadai ïgai kaxkïdï.

²⁴ Go Moises kïïga buaboitu ïpï. Dai kaxkïdï ka kïrhitukai ïgai maiti ipïrhi xi urhidï duu biiyagi ïgai go Faraon. Maiti ipïrhi ïgai tomaxi go oki ix makïdï gïrhiditadai ïr maradïkatadai go gïï rey Faraon.

²⁵ Kïïga bhaigakatadai xi urabagi go Ejiptuïrï óídakami soimaaxkamigadïrï ix makïdï ibuadana ïgai dai podukai bhai ïrhiditai oidakagi lachi tudu. Dïï mos ïgai bhaiyoma ipïrhi sai maatïkana go óídakami sai ïgai ïr Israelita ix makïdï ïr aaduñdï Diuxi. Podukai ipïrhi ïgai tomaxi maatïkatadai ïgai sai go Ejiptuïrï óídakami soi dukai tïïgia agaitadai Israelitakatai ïgai. Dai maatïkatadai ïpï sai go Ejiptuïrï óídakami soimaaxi taatatulda agai ix dukai ibuadana ïgai bïïxi go Israelitas.

²⁶ Go Moises kïïga buaboidaitadai sai dibiagai ïgai ix makïdï ïr go Kristoka agai tudu. Dai tomaxi kïï bhaigakatadai ix biakagi naana maaxi ixtumaxi namïakami ix dagitoagi ïgai buaboidaradï dïï maiti ipïrhi ïgai. Bamioma namïakami dukai nïidiña ïgai buaboidaradï xi bhai ixtumaxi ami Ejipituana oidakatadai.

²⁷ Go Moises dagito go Ejipto tudu oiditai buaboidaradï dai mai buamï ïrhidi tomaxi go rey Faraon bhamukatadai ïgai bïïtarï. Kïïga oiditadai ïgai Diuxi tudu. Kïïga ïïgiditadai ïgai dukami xi nïijadagi ïgai tomaxi Diuxi mai maaxi odami bïïtarï.

²⁸ Go Moises kïïga buaboitu Diuxi tudu. Kïïga buaboitudai ïgai sai ïïgiditai ixtumaxi aagiditadai Diuxi sai podukai kïïgakïrï bubuaki agai go Israelitas abhiadïrï Ejiptuañdïrï. Dai kaxkïdï tïjai ïgai go Israelitas saidi ibuadana bïïxi ixtumaxi gï agaitadai go tukamidïrï Kïïgakïrï Bubaidaragai Bagimi bïïtarï. Aagidi ïgai sai ïramadana kukuparadï bïïxi kiikidïrï tudu sai mai bakïna Diuxi tïañikarudï sai mai kodana ïgai maamaradï gïgïrdukïdioma ix makïdï ïr kïkïïrhikatadai. Podukai aagiditadai Diuxi tudu.

²⁹ Dai go Israelitas ïpï go gïï sudagi ïrana sïïrhi dïgabusai buaboidaitai ïgai Diuxi ïpï. Kïïga dïgabusai ïgai tudu ïpïan dukami xi dïbïrai gakikamiïrï dïgabusai. Dïï gia go Ejiptuañdïrï óídakami gia aidïxi baapa ami dïgabuña agaitai ami bïïxkatai bhaikoi dai koi.

³⁰ Dai go Israelitas kïïga buaboidaitai iji go kiiki Jeriko tïgidukami xikorhi kubarakami tasai ïpï ix duu aagiditadai Diuxi. Dai bïïxi surhi go bhidabiki kurarai ix makïdï xikorhi gukatadai go Jeriko aidï.

³¹ Dai go oki Rahab ïpï, kïï maatï aapimï sai kïkïïrhimïrhigakatadai ïgai. Dïï bïïxkïrï buaboitu ïgai sai Diuxigadï go Israelitas buaboikïdï ïr Diuxi dai buaboitu ïpï sai Diuxi soikïda agai go Israelitas. Kaxkïdï mai muu ïgai ix dukai koi go gaa óídakami soimaaxi ibuadami ix makïdï gïn koditu ami Jerikoïrï. Buaboitu ïgai Diuxi tudu dai kaxkïdï kïïga miadïgidi ïgai go kïkïïrhi ix makïdï ami dada nïida agaitai ixdukatai maitiagi go Jerikoana óídakami. Ïxto ïgai go kïkïïrhi ami kiidïrï sai mai tïïgana go rey ami. Go rey koda ïrhiditadai go kïkïïrhi kaxkïdï. Po dui go Rahab kïïga buaboidaitai ïgai Diuxi tudu.

³² Kïï bhaigakatadai aanï xi gïn aagidagi muiyoma aatagi ix dukatai óídakaiña ïïki óídakami mos ïï kïïga buaboidaitai ïgai Diuxi. Dïï mai ajïga tasai ixdukatai gïn aagidagi. Ka maiti gïr ajïi tasai tudu ix aagada aanï ixtuma idui go Gedeón dai go Barak dai go Sansón dai Jefté dai Dabid dai Samuel ïmadï bïïxi go ñokituldiadamigadï Diuxi.

³³ Bïïxkatai ïgai kïïga buaboitudai Diuxi tudu. Dai kïïga buaboidaitai soikïiña ïgai aaduñdï sai gamaitiana xïxkadï bui surhigi agadagi jaa xibhïadïrï óídakami sandadarugadï. Kïï sïïrhi ibuadana ïgai ibuadatai ixtumaxi ïr kïïga ïpï kïïga buaboidaitai ïgai. Dai ïgai buaboidaitai buyiña naana maaxi ixtumaxi ix makïdï Diuxi aagidiña sai maaki agai. Dai Diuxi soi jaa buaboitudadami ïpï sai mai ugana go mamaabidi.

³⁴ Dai oidakatadai ïpï jaa ix makïdï taiyïrï gïn surhitu dai mai xïdui ïgai go táíkïdï. Dai Diuxi soi jaa sai mai kona kokodiïrï. Dai jaa ix makïdï mai gupukatadai kïïga gubukatu buaboidaitai Diuxi. Dai jaa bui surhigïiña mui sandadaru xibhïadïrï óídakami dai maitiña ïgai go sandadaru saidi go xibhïadïrï óídakami sandadaru mos dïgabuna bopoyiña. Po buadana ïgai buaboitudaitai Diuxi tudu.

³⁵ Ka mui aagai aanï ïïki óídakami ix makïdï kïïga buaboitudaiña Diuxi dïï kia biïga ïpï jaa. Daiñi, oidakatadai oki ix makïdï aaduñdï ïpamu gïn duduakatu ka kokai ïgai. Oidakatadai jaa ix makïdï óídakami soi buididiña ipïrhiditai sai dagitona buaboidaradï. Dïï ïgai bhaiyoma ipïrhidiña ix soimaaxi taatakagi maiti ipïrhiditai ix dagitoagi buaboidaradï. Buaboitudai ïgai sai biaka agai ïgai ïmo kïïgadukamioma oidakaragai gokiïrï xïxkadï gïn duduakatudagi ïgai ïpamu kaxkïdï.

³⁶ Go óídakami parunaiña jaa dai asta gïbaiña ikixanaikïdï dai bupuraiña kadenakïdï dai maamaixapaiña. Dïï bïïxkïrï apia buaboitudaiña ïgai.

³⁷ Go óídakami maixaiña jaa ojodaikïdï dai kodaiña. Dai jaa ïrana sïïrhi guikomaiña ïgai seruchukïdï dai jaa kodaiña ïgai maxtaikïdï ipïrhiditai sai dagitoagi buaboidaradï ïpï. Ïïmoko ïgai gïn aadatugaiña kañiñiru ojogidï dai jaa gïn aadatugaiña xixibato ojogidï ïpï. Aipakoga ajiopaiña ïgai kabami soititigamikatai. Go óídakami soi duu nïidiña dai soi buididiña bïïxi.

³⁸ Go ïïki óídakami ix makïdï aagai aanï kïïga buaboitudaiña Diuxi dai kïïga tutiakana tudu. Kïïga ajïakatadai ïgai xi ïmai oidigïrï óídakamudai xako gïïpi bamioma kïïgadukagi xi idi oidigi. Dïï bïïxkïrï aipakoga ajiopaiña ïgai xako ïgiga oidigi. Tutubidakai saagida ajiopaiña ïgai ïpï dai tïtïjobai gïn urhixaiña mos ïï soititigamikatai ïgai.

³⁹ Bïïxkatai ïgai kïïga buaboitu tudu dai kaxkïdï Diuxi kïïgakïrï nïidi. Dïï bïïxkïrï koi ïgai mai kia aïkai ixtumaxi ix makïdï Diuxi aagidi sai maaki agaitadai.

⁴⁰ Aatïmï gïr tïtïitoitadai Diuxi aidï, kaxkïdï mai otoma maa ïgai ixtumaxi aagidi. Podukai gï tïgito ïgai sai bamioma kïïgadu aatïmï gïr bïïtarï xi go ïïkidadï buaboitudadami nïnïrakagi kia asta xïxkadï bhïiyagi aatïmï ïpï ixtumaxi bia Diuxi gïr bïïtarï. Podukai gï tïgito Diuxi sai gïr aïna gobai bïïxkatai aatïmï buaboitudadami ïmapi tudu dai mai xu xi mosïkaxi go ïïki óídakami aiyagi gobai ïpïgioma. Podukai gï tïgito Diuxi dai kaxkïdï go buaboitudadami ïïkidadï mai otoma biatu ixtumaxi bia Diuxi bïïxkatai aatïmï gïr bïïtarï, ïgai ïmadï aatïmï ïpï tudu.