Hebreos 10 - Northern Tepehuan Bible

Go buxtaki ïradï mai kïïga buanaiña go soimaaxkamigadï óídakami

¹ Gin aaduñi, gï agai xi maatïkagi aapimï sai oidaka agai naana maaxi kïkïïgadukami ixtumaxi gokiïrioma kia. Dai go ïïkidadï sïïrhikami mosïkaxi ïr ïmo maaxidaragai gï dukami bïïtarï go kïkïïgadukami ixtumaxi ix makïdï dadi agai. Go ïïkidadï ixtumaxi ix makïdï aagai go sïïrhikami maiti ïr go kïkïïgadukami ixtumaxi ix makïdï dadi agai tudu. Go odami ix makïdï xadutuada ïrhidi Diuxi oiditai go ïïkidadï sïïrhikami bia xi apia umiïrï ibuadagi daxdaragai tudu. Dïï modukai mai kïïgakïrï buañixikami bipiïyi ïgai Diuxi bïïtarï. Go sïïrhikami ïïkidadï mai bia gubukarhigai xi kïïgakïrï buañixikami biagi odami kaxkïdï.

² Daiñi, go naana maaxi daxdaragai ix makïdï ibuadana óídakami, ix bhaigakamudai ïgai ix kïïgakïrï buañixikami biagi gobai go odami aidï gia ka buañixikami bimudai ïgai ibuadatai daxdaragai. Dai aidï gia ka mai biakamudai ïgai ix buamï gïn ïrhiadagi soimaaxkamigadï bïïtarï ka buañixikatai ïgai. Ka maiti gï agadamudai xi apia dadaxdadagi buxtaki tudu ix ka buañixikami bimudai ïgai ibuadatai ïmo daxdaragai.

³ Dïï gia mai buañixikami bipiïdana ïgai. Dai bhaiyoma bamioma tïtïitoiña ïgai saidi ïr soimaaxi ibuadami ïgai ibuadatai daxdaragai bïïxi umigiïrï podukai.

⁴ Kaxkïdï tudu gïr soimaaxkamiga maiti gï buanai xixibato ïradïkïdï tomarhi tuturu ïradïkïdï. Mai bhaiga aatïmï xi maigobai dasagi gïr soimaaxkamiga dadaxditai buxtaki Diuxi tudu.

⁵ Dai kaxkïdï aidïxi dibia Suxi Kristo tami oidigi daama potïtïdai ïgai Diuxi, Aapi Diuxi mai aagai go daxdaragai buxtakikïdï ix makïdï ibuayi óídakami dai tomarhi ïma maaxi daxdaragai ïpï. Dïï gia gin maa aapi gin tukuga ixtumaxi gï daxdagi aanï. Gobai gia bhai ïrhidi aapi, itïtïdai.

⁶ Go óídakami mui ibuayi daxdaragai mïikami dai jaa daxdaragai ïpï soimaaxkamigadï bïïtarï. Dïï aapi mai bhai ïrhidi gokïdï. Bïïxi gobai mai aagai aapi tudu.

⁷ Dai kaxkïdï aanï aagai sai aanï gia iduñimu ix makïdï gia bhai ïrhidi aapi Diuxi. Pomaaxi bïïtarï dibia aanï tudu. Ka podukai ojixi aapi Diuxi gï ojaïrï gin aagaitai aanï tudu, itïtïdai.

^8-9 Ami go ojiïrï xako ikaiti Suxi sai mai aagai Diuxi go naana maaxi daxdaragai ix makïdï ibuadaiña óídakami, ami agaitadai ïgai go daxdaragai ix makïdï gïr tïanïi go Moises sïïrhikamigadï. Ami ikaiti Suxi sai, Aapi Diuxi mai aagai go daxdaragai buxtakikïdï ix makïdï ibuayi óídakami tomarhi ïma maaxi daxdaragai ïpï, ikaiti. Dai podukai ka mai namïaturhi ïgai go Moises sïïrhikamigadï tudu potïkai ïgai. Dai bhodïrï potïtïdai ïgai Diuxi ïpï, Aanï gia iduñimu ixtumaxi bhai ïrhidi aapi Diuxi. Pomaaxi bïïtarï dibia aanï, itïtïdai ïgai. Dai ka potïkai ïgai ka gajiadïrï bia ïgai go Moises sïïrhikamigadï dai ka namïakami aa ïgai go utudui sïïrhikami ix makïdï bhai dui.

¹⁰ Kaxkïdï tudu Suxi gia idui ixtumaxi Diuxi ipïrhidi dasakai tukugadï gïr bïïtarï. Dai podukai ïkobai gïr bubaitu ïgai Diuxi bïïtarï. Gobai ïr go utudui sïïrhikami dai gobai gia mos arhi ïmo imidagai gï idui dai bïïxkïrï bïïtarï namïaka agai.

¹¹ Daiñi, go dadaxdadami ix makïdï oidiña go ïïkidadï sïïrhikami biakana xi kiupiïrï gukakagi bïïx tasai dai ami oijadagi aaduindadï. Biakana ïgai xi muiyoko ibuadagi ï galbaaxi aaduindagai dadaxditai buxtaki. Gobai mai bhaigakana xi maigobai dasagi soimaaxkamigadï óídakami kaxkïdï biakana ïgai xi apia oijadagi aaduindadï bïïx tasai.

¹² Dïï Suxi Kristo gia mos arhi ïmo imidagai idui ïmo daxdaragai ïïgi gï dasakai ïgai. Dai gokïdï bïïxkïrï bïïtarï bhai dui ïgai gïr soimaaxkamiga bïïtarï. Podui ïgai dai bhodïrï sïïrhixapadïrï daiba ïgai Diuxi xako bia ïgai ïmo gïdukami xadutudaragai.

¹³ Dai xibi ami nïnïraka ïgai asta xïïxkadï Diuxi bïïxi gamaitï go buidïrï bïïtïkamigadï. Aidï gia Suxi ïmo kïixakaru dukai nïijadagi buidïrï bïïtïkamigadï ka dumarhikami bipiïkai ïgai bïïxkatai.

¹⁴ Mos arhi ïmo daxdaragai idui ïgai tudu ïïgi gï dasakai ïgai. Podukai kïïgakïrï buañixikami bia ïgai bïïxkatai aatïmï ix makïdï ïr ïkobai bubaidadï Diuxi.

¹⁵ Ka mai biïga bamioma daxdaragai gïr soimaaxkamiga bïïtarï tudu. Suxi Kristo ka bïïxi bhai dui gïr bïïtarï kaxkïdï. Dai Diuxi Ibhïadï podukai aagai ïpï. Ïgai aagidi ïmo kïïrhi ïïki sai ojana ïmo ñoki Diuxiañdïrï imïdami. Dai adukai oja ïgai. Diuxi ikaiti sai,

¹⁶ Gokiïrioma kia ayimu ix tuigako bhai duñimu aanï ïmo utudui sïïrhikami óídakami bïïtarï, ikaiti. Dai aidï gia tïgibudadïrï dasamu aanï gin sïïrhikamiga dai ibhïgadïrï ïpï saidi kïïga maatï kaïkana ïgai dai kïïga ïïgidiña, ikaiti Diuxi Gïr Nukadakami. Dai bhodïrï ikaiti Diuxi ïpï,

¹⁷ Aanï agai sai aidï abhiadïrï bhaitiakoga ka mai tïtïgitokamu aanï soimaaxkamigadï go óídakami tomarhi ïmo imidagai ix makïdï ibuadana ïgai maiti gin ïïgiditai, ikaiti Diuxi.

¹⁸ Dai gobai itïiya ïrhidi sai ka oigïrhixikami bii gïr soimaaxkamiga. Dai itïiya ïrhidi ïpï sai ka maiti gï agai bamioma daxdaragai gïr soimaaxkamiga bïïtarï ka oigïrhixikatai gobai.

Idi ïr ïmo abïnakidaragai saidi oidiña aatïmï gïr buaboidaraga

^19-20 Gin aaduñi Diuxi amadïrï, ïkioma go bhaitï kïakamigadï go dadaxdadami bapakïiña ïbhïgidïrï go gïï ikuxi ix makïdï kiupiana nagiïkatadai. Ami aïjïiña ïgai xako bïïxi adaama xadutudikïdï tïgidu bhïï aimïraitai buxtaki ïradï. Dïï gia xibi bia aatïmï ïmo utudui baakigai sai aïna aatïmï Diuxi buitapi. Xibi Suxi Kristo ka aaxi ïradï mukukai gïr bïïtarï tudu. Dai kaxkïdï xibi bia aatïmï oigaragai xi mai duadikoitai aiyagi Diuxi buitapi. Ïkioma go gïï ikuxi sobhikïiña óídakami ix aiyagi xako daja Diuxi. Dïï gia Suxi Kristo dáí tukugadï mukukai gïr bïïtarï sai biakana aatïmï oigaragai ix aiyagi Diuxi sai podukai kïïgakïrï óídakana aatïmï.

²¹ Xibi bia aatïmï Suxi Kristo ix makïdï ïr gïr bhaitï kïakïdï dadaxdadamiga. Ïgai tudu ïr ix makïdï gatïanïi amïka kiidïrï Diuxi.

²² Suxi Kristo ka kïïga gïr buañidi gïr ibhïdaga sai ka mai gïpiïrï bïïtïkami dukai taadakana aatïmï. Gïr bakoi ïgai gïr ibhïdaga ïpïan dukai xi gï bautïxdagi ïmo odami kïï buañixikami sudagikïdï tudu. Ïgai ïr go buaboikïdï gabhaitïkïakïdï dadaxdadami gïr bïïtarï dai ka baa ïgai Diuxi buitapi gïr bïïtarï. Kaxkïdï xibi bhaiga aatïmï xi kïïga ïïmadan dukai ajiagi Diuxi buitapi ïpï mai duduadikoitai.

²³ Gin aaduñi, gï agai xi apia dukai kïïga buaboitudada aatïmï sai bhïiya ragai ixtumaxi gïr aagidi Diuxi sai gïr maaki agai. Diuxi bïïxkïrï ibuayi bïïxi ixtumaxi aagadagi ïgai kaxkïdï. Dai gobai ix makïdï Diuxi bia gïr bïïtarï gobai ïr gïr nïnïraraga ix makïdï aagidiña aatïmï óídakami xibi. Gï agai tudu xi apia kïïga buaboitudada aatïmï sai Diuxi gïr maakimu gobai.

²⁴ Gï agai ïpï xi kïïga gïr tïgito nïijada aatïmï aipakoga dai gaagadagi ix dukatai gïr soikïdagi. Podukai kïïgioma gïr oigïdadamu aatïmï bïïxkatai daidi ibuadamu aatïmï ixtumaxi ïr kïïga.

²⁵ Dai maiti gï agai xi ïpïan buadagi aatïmï jaa buaboitudadami ix makïdï ka maiti ipïrhidi ix gïn ïmapagiadagi. Gï agai bhaiyoma xi gïr abïnakiadagi aatïmï aipakoga dai gupukatudagi gïr buaboidaraga. Dai kïï maatï aatïmï sai ka otoma dibiagai Suxi Kristo dai kaxkïdï bamioma gï agai xi gïr gupurtudagi dai abïnakiadagi aatïmï aipakoga xibi.

²⁶ Maiti gï agai xi dagitoagi aatïmï gïr buaboidaraga tudu gin aaduñi. Kaxkïdï tudu xi ïmo odami maatïkagi ixtumaxi ïr buaboi dïï bïïxkïrï ka maiti ipïrhiadagi ix buaboitudagi go daxdaragai ix makïdï idui Suxi Kristo ïgai bïïtarï aidï gia ka mai tipu ïmai ïgai bïïtarï xorai bhai duñagi soimaaxkamigadï.

²⁷ Ix modukai maiti ipïrhiada ïgai ix buaboitudagi aidï gia ka mos duadimuka agai ïgai nïnïrakatai sai Diuxi aagadagi ix bhai kïïga dui ïgai ix mai kïïga dui ïpï. Dai gokiïrï taatamu ïgai gïgïbidaragai go gïï taiyïrï xako xia gïn duñimu go buidïrï bïïtïkamigadï Diuxi.

²⁸ Daiñi, kïïga maatï aapimï xïï kabami taata gïgïbidaragai go Israelitas ïïki xïïxkadï mai ïïgiditadai ïgai go sïïrhikamigadï go Moises. Dai idi utudui sïïrhikami ix makïdï gïr maa Diuxi gïïpi bamioma namïga xi bhai go Moises sïïrhikamigadï. Dïï tomaxi dumarhioma namïga go Moises sïïrhikamigadï tomax dukai kabami bïïtïkana gïgïbidaragai ix ïmo odami mai ïïgiditadai gobai. Kaxkïdï tudu ix oidakatadai goka xiïpï baika nïijadami sai ïmo odami mai ïïgidi go sïïrhikami aidï gia go dudunukami mai soi gïlda gatïanïna muaragai.

²⁹ Podukai gïgïbiturhiña ïgai ix makïdï mai ïïgiadagi go Moises sïïrhikamigadï tudu. Dai go utudui sïïrhikamigadï Suxi Kristo gobai gïïpi bamioma namïga xi bhai go Moises sïïrhikamigadï. Kaxkïdï gï maatï sai bamioma soi taadakamu ix makïdï mai buaboitudagi Suxi Kristo dai gajiadïrï dukai biagi. Gobai ïr ïpïan dukami xi ïmo tukuragai dukai nïijadagi ïgai Diuxi Maradï dai kïixonagi. Tukurakami dukai nïidi ïgai go aaduindagai ix makïdï idui Suxi Kristo aidïxi aaxi ïgai ïradï tudu. Dai Suxi Kristo ïradï ïgai dai namïaturhi go utudui sïïrhikami ixtukïdï ïkobai darakami bipiïyi aatïmï Diuxi bïïtarï. Daiñi, Diuxi Ibhïadï kïï tuiga gïr bïïtarï. Dai xi mai buaboituda ïrhiada ïmoko Suxi Kristo gobai ïr ïmo gïdukami parunaragai gï dukami Diuxi Ibhïadï buidïrï.

³⁰ Maiti gï agai xi gajiadïrï biagi aatïmï Suxi Kristo ka mai buaboituda ïrhiditai tudu. Daiñi, kïï maatï aatïmï ix kaiti Diuxi ojadïrï. Ïgai adukai ikaiti, Aanï ïr Diuxi dai gin sïïrhiñdamu aanï go soimaaxi ibuadami ïmadï. Maakimu aanï go gïgïbidaragai ix makïdï ajïga ïgai tudu, ikaiti Diuxi. Daidi ikaiti ïgai ïpï, Aanï ïr Ga Tïanïdami dai aagadamu aanï ix bhai kïï dui gin aaduñi ix mai kïï dui ïpï, ikaiti.

³¹ Daiñi, Diuxi buaboikïdï ïr go duakakami Diuxi dai kïïga gubuka ïgai. Kaxkïdï kabami ïbhiaraga bïïtarï ix makïdï Diuxi gïgïbituldagi.

³² Gin aaduñi, gïn tïgitobïrai ix dukatai óídakatadai aapimï aidïxi tukamïrï máí aapimï ixtumaxi ïr buaboi. Aidï gia maiti gïn daadagitoiña aapimï xi gïn maitiagi go soi ïrhiaragai tomaxi naana dukai soimaaxi taatamaiña aapimï.

³³ Ïïmo imidagai gïn parunaiña odami jaa óídakami buitapi dai soi gïn buididiña. Dai ïïmo imidagai soikïiña aapimï jaa ix makïdï pomaaxi taatamaiña ïpï. Dai asta ñokiturhiña aapimï.

³⁴ Soi gïn ïrhidiña aapimï ïgai bïïtarï ix makïdï gïn maamaixatudiña ïpï. Dai tomaxi go dudunukami gïn bopoidiña gïn buxtuidaga aapimï bïïxkïrï mai buamï ïrhidiña. Bhai gïn ïrhidiña aapimï bhaiyoma maatïkatai sai bia aapimï ixtumaxi bamioma kïïgadukami ix makïdï tomarhi ïmo imidagai mai ugiti agai.

³⁵ Aidï tukamïrï kïïga gubuakami dukai buaboitudaiña aapimï tudu. Dai xibi maiti abïr dagito gïn buaboidaraga. Apia abïr buaboitudada tudu. Kaxkïdï tudu buaboitudatai bhïimu aapimï ïmo gïdukami maitïki.

³⁶ Gï agai xi gïn gubukadadagi aapimï tudu saidi apia ibuada aapimï ixtumaxi Diuxi ipïrhidi. Podukai bhïimu aapimï bïïxi ixtumaxi ix makïdï gïr aagidi Diuxi sai gïr maaki agai.

³⁷ Daiñi, adukai ikaiti Diuxi ñokidïrï, Otoma dibiagai ïgai ix makïdï nïnïraka aapimï. Mai tïbïpida agai ïgai tudu.

³⁸ Dai gin aaduñi ix makïdï buañixi iibhïadï gin buaboitudadamu dai podukai kïïgakïrï óídakamu. Dïï gia ix makïdï ka maiti ipïrhiadagi ix gin buaboitudagi, ïgaikïdï gia mai bhai gin ïrhiadamu aanï, ikaiti Diuxi ñokidïrï.

³⁹ Dïï aatïmï gia maiti ïr ïgai ix makïdï daadagitoi go buaboikïdï buaboidaragai. Ïgai ïïgi gïpiïrï gïn surhigai dai xia gïn buayi dïï aatïmï gia cho. Aatïmï gia apia buaboitudai dai kïïgakïrï bubuakïi.