Hebreos 1 - Northern Tepehuan Bible

Diuxi otoi go Suxi sai gïr aituldana ñokidï

¹ Gin aaduñi, kïï maatï aapimï sai dudatai aiturhiña Diuxi ñoki gïr ïïki aaduñikaru. Dai naana dukai aiturhiña ïgai ïpï. Dïï gia mai ïmodïrï aiturhi ïgai bïïxi ñokidï dai bhaiyoma chïchïki ñoki aagidiña ïgai ñiñokituldiadamigadï bai ïgai aagidiña go óídakami Diuxi bïïtarï.

² Dïï gia xibiapioma Diuxi otoi ïmai kïïrhi bamioma namïakami xi go ñiñokituldiadamigadï Diuxi. Otoi ïgai Maradï tudu sai gïr aiturhiña ñoki xibi karhioga ugiti agaitai oidigi. Diuxi Maradï ïgai tudu ix makïdï idui go oidigi. Dai Diuxi ka aagai sai Maradï ïr tuidadïka agai bïïxi ixtumaxi ix makïdï idui ïgai.

³ Diuxi Maradï kïïga ïmadugan tuiga Diuxi ïmadï dai maatïkatai aatïmï Diuxi Maradï podukai máí aatïmï xïï gïïdu dai xïï xigiamaaxi Diuxi. Dai ñokidï Diuxi Maradï sïïrhikïdï gubuka. Go ïïgi ñokidïkïdï gatïanïi ïgai bïïxi ixtumaxi dai nukadai ïpï sai mai xia gï buadagi. Ïgai tudu bhai dui ix dukatai gï buanadagi gïr soimaaxkamiga gïr ibhïdagïrï. Dai bhodïrï kaxi gïr buanakai jii ïgai tïbagiamu dai ami daiba sïïrhixapadïrï Diuxi ix makïdï bïïxi adaama gubuka.

Suxi tïkabioma gatïanïi xi bhai go tïtïañikarudï Diuxi

⁴ Dai podukai ka daibakai Diuxi Maradï sïïrhixapadïrï Ogadï bhïiyi ïgai ïmo gubukarhigai tïkabioma xi go tïtïañikarudï Diuxi. Gïdukamioma bhïiyi ïgai sïïrhikami tudu.

⁵ Gobai maatiga maaxi sai bamioma gatïanïi ïgai xi bhai tïtïañikarudï Diuxi. Kaxkïdï tudu Diuxi potïtïdai sai, Aapi ïr gin Maara dai xibi aanï aagai sai gï Oga aanï, itïtïdai. Dai xadïrï potïdana ïgai ïmo tïañikarudï. Daidi ikaiti Diuxi ïpï ïïki aagaitai Maradï, Aanï ïr Ogadïkamu dai gobai ïr gin Maaraka agai, ikaiti Diuxi. Kaxkïdï gï maatï sai bamioma gatïanïi Diuxi Maradï xi bhai go tïtïañikarudï Diuxi.

⁶ Ïgai tudu ïr Ïpïgadï Maradï Diuxi. Dai aidïxi Diuxi otoi Maradï tami oidigi daama sai potïtïdai ïgai tïtïañikarudï sai, Gï agai aapimï bïïxkatai gin tïtïañikaruga xi xadutuada gin Maara dai aagada xïïxi ïr gïdukami gobai, itïtïdai.

⁷ Dai ïïki ikaiti Diuxi ïpï sai, Idui aanï gin tïtïañikaruga saidi ïr gin pipioñikana. Otosaiña aanï aipakoga bai kïïga gin ïïgidiña ïgai. Ïpïan dukami ïgai go ïbïrhi tudu. Gubuka go ïbïrhi dai kïïga gin ïïgidi ïpï. Otoma ibuayi gobai ixtumaxi aanï ipïrhiadagi. Dai gin tïtïañikaruga ïpïamaaxi táí ïpï. Go táí kïïga gin ïïgidi ïpï dai kïïga gubuka. Dai pomaaxi gin tïtïañikaruga ïpï. Kïïga gupuka ïgai dai otoma gin ïïgidi ïpï dai ibuayi ixtumaxi aanï ipïrhiadagi, ikaiti Diuxi.

⁸ Dïï gia gïïpi ïma dukai aagidi ïgai Maradï. Gïïpi bamioma namïakami aa ïgai tudu dai kaxkïdï potïtïdai sai, Aapi in Maara ïr Diuxi dai aapi gia bïïxkïrï bïïtarï biakamu sïïrhikami ix gatïanïda aapi ïmo gïï rey dukai, itïtïdai. Daidi ikaiti Diuxi ïpï aagaitai ïgai, Gin Maara gia kïïga sïïrhi aatabuada agai gatïanïitai ïgai, ikaiti.

⁹ Dai Diuxi potïtïdai ïpï sai, Aapi gin Maara sïïrhikïdï ojoidi ixtumaxi ïr sïïrhi dai mai ojoidi aapi ixtumaxi maiti ïr sïïrhi. Kaxkïdï gï maakimu aanï ïmo gïdukami sïïrhikami sai kïïga gï xadutudaiña jaa. Bamioma gï maakai aanï xadutudaragai dai bhai ïrhiaragai xi bhai bïïxi gï aaduñi ix makïdï gï urabaka tudu. Aanï ïr gï Diuxiga dai ka podukai aagai aanï, itïtïdai.

¹⁰ Dai potïtïdai ïgai ïpï sai, Aapi ïr go Tïanïdami dai aapi idui go oidigi ïïki aidïxi mai tipukatadai ixtumaxi kia. Dai aapi idui go tïbagi ïpï.

¹¹ Go oidigi ïmadï tïbagi bïïxi ugiti agai. Dïï aapi gia mai ugiti agai tomarhi ïmo imidagai. Go oidigi ïmadï go tïbagi gia kïkïïrhiokorïi ïpïan dukai yukuxi.

¹² Dai naanasamu aapi gobai ïmo ikuxi dukai. Maigobai daitudamu aapi gobai ïmo bixokorhi kïrhiñdadï dukai tudu. Dïï aapi ix makïdï ïr Tïanïdami aapi gia mo maaxika agai. Aapi gia mai ugiti agai, itïtïdai Diuxi go Maradï.

¹³ Dai potïtïdai ïgai Maradï ïpï, Dakañi tami gin sïïrhixapadïrï sai biakana aapi gïdukami xadutudaragai. Dakañi aapi asta xïxkadï ukami bïïxi maitï aanï gï buidïrï bïïtïkamiga. Aidï kïïga dumarhi bimu ïgai gï bïïtarï. Ïmo kïixakaru dukai nïijadamu aapi gï buidïrï bïïtïkamiga aidï mos ïï dumarhi biïkai ïgai gï bïïtarï maitïkai aanï, itïtïdai. Potïtïdai ïgai Maradï tudu dïï gia mai potïtïdai ïgai tomarhi ïmo tïañikarudï.

¹⁴ Go tïtïañikarudï Diuxi mos ïr pipioñigadï kaxkïdï. Dai Diuxi otosaiña ïgai sai soikïiña ïgai odami ix makïdï kïïgakïrï bubuaki agai. Sai soikïiña ïgai go buaboitudadami tudu.