Genesis 41 - Northern Tepehuan Bible

¹ Bhodïrï aidïxi go Jose ka maixapikatadai bhaibitukami goka umigi sai ïmo imidagai go gïï Rey Faraon tïïtïkimi aagaikïdï . Ïïgi gï tïïtïkimi ïgai xi go gïï aki Nilo ugidana kïïka.

² Dai ami akiañdïrï bubuaka bapakaxi kubarakami. Kïï titiodi dai kïï gigiïjï. Dai mos gukatai kuadana basoi abhai aki ugidana xako gïïgïr gïrai basoi.

³ Bhodïrï ïpï jaa ami akiañdïrï bubuaka ïpï kubarakami bapakaxi dïï ïgai gia soimaaxi, gagakiñi. Dai ami aki ugidana gukiba ïpï sonoana go kïï titiodikïdï.

⁴ Dai go soimaaxkïdï bïï naato ugiuju go kïï titiodikïdï. Daidi nïnï go Rey.

⁵ Dai bhodïrï ïpamu koi ïgai dai tïïtïkimi ïpamu. Tïïtïkimi ïgai kubarakami tïrhigi muradadï xigiamaaxkami kïï iibhaidakami. Dai mos arhi ïmo kïakamiañdïrï kubarakami muradadï.

⁶ Dai bubuaka ïpï kubarakami muradadï dïï ïgai arhiï soimaaxi, totobhiñika maaxi. Xarhiapadïrï daibusaitadai ïbïrhi dai ka bïï gaa dïbïrai tai dïïbhatu go tïrhigi dai totobipa.

⁷ Dai go ix makïdï soimaaxikatadai muradadï go tïrhigi bïï ugiuju go ix makïdï kïï iibhaidaga. Dai nïnïa go Rey ïpamu dai ka tïgito ix mos tïïtïkimi ïgai.

⁸ Bhodïrï xadiko ka mos duadimukan taadaga ïgai tïïtïitoitai go tïïtïkidï. Dai báí ïgai bïïxi go adibino ïmadï go mamaatïkami ix makïdï oidaga ami Ejipituana. Dai go Rey aagai tïïtïkidï dïï mai tipukatadai xorai aagagi ix tuma bïïtarïtadai tïïtïkidï. Dïï gia kajioma go Rey sai maixakaruana daja go Jose dai sai kïï maatï aagagi ix tuma bïïtarï tïïtïkidï odami.

¹⁴ Dai go Rey otoi sandadarugadï xi mïï maixakaruañdïrï buapana ïgai go Jose. Tai go sandadaru oton busaitu maixakaruañdïrï. Dai bhodïrï Jose gï ika kuupadï dai gï ayi jaa yukuxi. Kïï bhai maaxkami baakia ïrhiditai buidïrï go Rey. Dai mïï baa ïgai xako daja go Rey.

¹⁵ Dai go Rey potïtïdai go Jose, —Tïïtïkimi aanï dai mai tipu xorai gin aagidagi ix tuma bïïtarï go tïïtïki. Kajioma aanï sai aapi gia maatï aagagi ix tuma bïïtarï gïr tïïtïki— itïtïdai.

¹⁶ Dai Jose itïtïdai, —Gin oigïdañi gin Rey dïï aanï ïïgi xadïrï maatïkana ix tuma bïïtarï gï tïïtïki— itïtïdai go Jose. —Dïï gia Diuxi maatï dai gin aagidamu pai maatïkana aapi xi go ix makïdï aagai gï tïïtïki ïr ïmo soiñi ka agai gï abhana— itïtïdai.

²⁵ —Diuxi gï aagida ïrhidi aapi Rey ix maaxi imi agai umigi. Dai gï aagida ïrhidi ïpï ix tuma duña agai ïgai. Kaxkïdï gï maa ïgai podukai gï tïïtïki. Gokadu gï tïïtïki dïï mos arhi ïmo ñoki aagadankaiti bïï gokapïrï— itïtïdai.

²⁶ Dai Jose itïtïdai ïpï, —Xibi aanï gï aagidagi ix tuixi pomaaxi tïïtïki aapi. Ïpïgioma tïïtïkimi aapi kubarakami bapakaxi kïï gigiïkami— itïtïdai ïgai go Rey. —Go bapakaxi aagadankaiti kubarakami umigi dai kïï gïïpi ka agai kuadagai. Dai bhodïrï tïïtïkimi aapi go tïrhigi kubarakami muradakami kïï iibhaidakami. Gobai aagadankaiti kubarakami umigi dai kïï gïïpiga ka agai kuadagai ïpï. Mos ïpïan kaidaga bïï gokapïrï gï tïïtïki.

²⁷ Go kubarakami bapakaxi ix makïdï gagakiñi ïmadï go kubarakami tïrhigi muradadï ix makïdï totobipa go ïbïrhi, ïgai aagadankaiti kubarakami umigikïdï xudu ka mai tipuka agai kuadagai— itïtïdai Jose.

²⁸ —Pogïduñimu bïïxi gobai ix dukai aagai aanï tudu. Dai xibi Diuxi gï aagidimi ïkiaxdïrï pai maatïkagi aapi. Kaxkïdï pomaaxi gï tïïtïkitudai ïgai— itïtïdai ïgai go Rey.

²⁹ —Kubarakami umigi gïïpi ka agai kuadagai tomax xakoga tami Ejipituana— itïtïdai.

³⁰ —Dai bhodïrï daibuñimu go gïï bhiugigai kubarakami umigi. Arhiïxi soi taadakamu oidakami. Dai go bhiugigaikïdï gï xia duadamu dïbïradï xi ka bïï mai tïgitomu ïgai ix taadakana aidïxi gïïpigatadai kuadagai— itïtïdai Jose go Rey.

³¹ —Gin oigïdañi aapi Rey dai gin kaï— itïtïdai. —Ka mos bïï ugitimu go bidadï go kuadagai ix makïdï bhai tua odami aidïxi gïïpigakatadai kuadagai. Ka mai bimu toma lïïchi— itïtïdai Jose.

³² —Ïï ka podukai dáí Diuxi. Kïï maatiga maaxi xi oton daibuña agai gobai. Ka gokoaja tïïtïkimi aapi go baaxikïdï tïïtïki di— itïtïdai Jose go Rey.

³³ Daidi itïtïdai ïpï, —Xibi aapi gin Rey gaagamudai ïmo kïïrhi ix makïdï bïï sudakami bia tïgibudagai dai kïï maatï nïidi aaduindagai dai nukatulda bïï sudakami xako ukami tïanïi aapi— itïtïdai.

³⁴ —Dai xibi idi kubarakami umiïrï aidïxi kia gïïpiga ka agai kuadagai tami Ejipituana aagai ix darasa aapi gupudagai bipiakami ïpï xi tanïna oidakami lïïchi yoobaradï. Taatam kostarhiañdïrï ïïmo kostarhi tanïda ïgai.

³⁵ Kubarakami umigi kïï bhai gï duñimu ïjïxikami kia. Dai aapi Rey gï aagadamu xi maakiagi ïmo gubukadagai xi ïmpaida ïgai tïrhigi dai bhai tuakarukana bhai tuagi nobai gïïgïr kiikiïrï dai ami nukadakagi

³⁶ sai podukai ka mai tipukagi bhiugigai tanai Ejipituana xïxkadï daibuñagi go bhiugigai kubarakami umigi— itïtïdai. —Sai mai koiyagi oidakami bhiugigaikïdï— itïtïdai go Jose.

³⁷ Dai go Rey ïmadï sonoïrï gukakami bhai aa ix dukatai agaitadai go Jose.

³⁸ Daidi go Rey potïtïdai go sonoïrï gukakamigadï, —Xadïrï tïïgana aatïmï ïmai ix makïdï bia tïgibudagai ix xïïxi bia go Jose. Diuxi Ibhïadï abhana daja di— itïtïdai go Rey.

³⁹ Dai bhodïrï potïtïdai ïgai go Jose, —Diuxi ïgai dai gï tïïgi tïgibudagai. Kaxi mai tipu xorai gï ïpïan ïxi bia tïgibudagai dai gï ïpïan ïxi maatï nïijadagi aaduindagai. Aapi ïgai dai gï tïïgi Diuxi ix tumaxi pogïduña agai gokiïrioma dai mai xu ïmai gï tïïgi— itïtïdai.

^40-41 —Daiñi Jose— itïtïdai. —Xibi gï maakimu aanï gubukadagai xi tïanïda go gïï kiiyïrï xako oidaga aanï dai maigobai go óídakami ix makïdï tïanïi aanï biakamu sïïrhikami xi gï ïïgiadagi ïpï. Xibi mosïka aanï ïgai dai bamioma namïakamu ix aapi. Aanï kaxi ïr Rey di— itïtïdai.

⁴² Daidi go Rey bhïiyi aniyugadï biakami go seyu ixtukïdï namïakan kïakana aaduindadï dai dáí ïgai Jose masabigadïana. Bhodïrï maa ïgai yukuxi kïï bhai maaxkami dai ïmo bhaibukai oro. Podukai go Rey namïaturhi gubukadadï go Jose.

⁴³ Dai go Rey gatïjai sai tïsadïna Jose karogadïrï go sonoïrï kïakamigadï go Rey ix makïdï gï bapainxïkïi kaapayukïdï. Dai xudu karoïrï imïdana Jose sai bhaitï imïiña odami dai iiñokidiña go gaa odami daidi ikaitiña, —Kuikiburai aapimï odami— ikaitiña ïgai. Podukai gabhaitïkïakami kïkiba Jose ami Ejipituana.

⁴⁴ Bhodïrï go Rey potïtïdai go Jose, —Aanï ïgai dai ïr Rey dïï bïïxi oidakami Ejiptuïrï biakamu ix gï tanïdagi oigaragai dai oiñïdagi— itïtïdai.

⁴⁵ Dai go Rey ïmai dáí tïtiaradï go Jose ñokidïkïdï ami oidakami. Safna Panea tïïtï ïgai go Jose. Dai bhodïrï maa ïgai ïmo oki Asenata tïgidukïdï xi ïgai ïr oñigadïkana. Podukai gabhaitïkïakami dukai kïkiba Jose ami Ejipituana. Jose tubhadï Potifera tïgidu. Go gïï kiiki On tïgidukïdï oidakami ïgai dai ibuadana ïgai aaduindagai xadutudikami kiidïrï ix makïdï diuxi aagai ïgai.

⁴⁶ Ïmokobhai dan bhaibuxtama umigi biakatadai go Jose dai bhïiyi sïïrhikami abhana go Rey. Dai bhodïrï go Jose diosagi go Rey dai mos aipako aimïradan buadana ami Ejipituana.

⁴⁷ Bhodïrï kubarakami umigi kïï bhai gï dui ïjïxikami dai kïï gïïpigakatadai kuadagai.

⁴⁸ Dai Kubarakami umigi Jose mos ïmpaiñdimi chïchïki oidakami yoobaradï. Dai gïïgïr kiikiïrï xako muidu oidakami ami bhai tuajidana ïgai maitïkidï go dïdïbïrai ix makïdï miadïrï kaatï.

⁴⁹ Orai ix makïdï gïï sudagi ugidana bïïtïkana podukai ïmpagi Jose go tïrhigi. Ka maiti ixtui ïgai ix dukatai ïpïabidagi mosïï muidukatai. Bhodïrï kubarakan umigi mai kïï gï dui ïjïxikami dai go bhiugigai ayi mïï Kanaanïrï xako oidaga Jakobo go ogadï Jose.