Genesis 39 - Northern Tepehuan Bible

¹ Go gaagaradami gamo Ejiptuamu baidaja go Jose dai ïmo dunukami ami sabïrhi. Potifara tïgidu go dunukami ïgai. Kapitañigadï ïgai sandadaru ix makïdï nukadai kiidïrï go gïï Rey.

² Diuxi apia nukadaiña Jose ami Potifara kiiyïrï dajatai go Jose dai kïï ïrhi aaduindadï.

³ Potifara tïgito nïidi ix xïï kïï ïrhi aaduindadï dai máí sai Diuxi soikïiña go Jose.

⁴ Kaxkïdï Potifara kïï ïmagi go Jose dai nukaturhi bïïxi buxtuidadï dai aaduindadï.

⁵ Aidï abhiadïrï xi Potifara nukaturhi ïgai buxtuidadï sai aidï abhiadïrï Diuxi maa ix kïï ïldagi bamioma buxtuidadï ix makïdï nukaturhi ïgai Jose. Ka mos kïï gï ïrhi bïïxi aïkatai aaduindadï Potifara modukai kiiyïrï ïmadï maigobai dïdïbïradïana.

⁶ Go Jose kïï nukagi buxtuidadï xi ka bïï mai buamï ïrhiada antaadakana amudï. Mosïkaxi kuadagai tïïtïitoiña ïgai ix makïdï ïgai dai bamioma naakïda antaadakana. Dai kïï kïïrhiga maaxi go Jose. Kïï gubuka maaxi tudu.

⁷ Dai bhai tïbïpi aatadui Jose kiidïrï go Potifara. Tai oñigadï Potifara ojoida tïï dai aagidi sai abhana boiya ïgai.

⁸ Dïï gia go Jose maiti ipïrhi dai itïtïdai bhaiyoma —Gin amu gin nukaturhi buxtuidadï dai ka mai buamï ïrhidi ix nukadakagi.

⁹ Bïïxi gin tïïgi gin amu buxtuidadï. Dai gin maa gubukadagai ix tïanïda aanï go gaa pipioñigadï ïpï. Mosïka aapi gia mai bia aanï sïïrhikami ix podukai daibuskïdagi gï ïmadï gï xadutudaitai. Kaxi ïr oñigadï aapi di. Xadïrï galnaaxi ibuadana aanï podukai buidïrï Diuxi— itïtïdai.

¹⁰ Dai go oki bïïx tasai mos aagidiña sai bïïxkïrï abhana boona dai bïïxkïrï mai ïïgidiña ïgai.

¹¹ Ïmo imidagai ami kiiyïrï dibia Jose dai aataduña agai dai ka mai tipukatadai jaa pipioñi ami kiiyïrï. Dai ami dajatadai go oki dai maatï ïgai ix ïïgi daja ïmadï Jose.

¹² Dai baasaradïandïrï bhïiyi ïgai go Jose daidi itïtïdai, —Gin ïmadï iboi— itïtïdai. Dïï gia go Jose mos mïï dai anaaxi oki nobidïrï bia baasaradï.

^13-14 Daidi go oki daagïkatai bii baasaradï ka mïrakai go Jose. Daidi bai go oki ïgai go gaa pipioñi daidi potïtïdai, —Daiñi— itïtïdai. —Gin aduñi bua ïmo pioñi Hebreo dai xibi ïgai mos gïr parunai. Tami tukabi baa ïgai dai gin dadaagi agai dai aanï gïïgïr iiña.

¹⁵ Dai mos mïï ïgai iiñakai aanï dai tanaxi bia baasaradï— itïtïdai.

¹⁶ Bhodïrï go oki bhai dáí baasaradï Jose dai tïïgida agai aduñdï xïxkadï dibiagi ïgai.

¹⁷ Dai dibia aduñdï xi go oki aagidi go baa yaatagi ïpï daidi potïtïdai, —Go pioñi Hebreo ix makïdï bua aapi baa tami tukabi xako kokoso aanï dai gubudakïdï gin bhïiyi agaitadai.

¹⁸ Dïï gia gïïgïr iiña aanï xi ïgai no baaxi bia baasaradï dai daibuna mïï.

¹⁹ Ka podukai gin buididi gï pioñi tudu— itïtïdai. Daidi go amudï go Jose kabami bhamu kaïkatai aatagidï go oki.

^20-21 Dai bhïiyi ïgai go Jose dai maixa ïmadï jaa ix makïdï buidïrï bïïtïkatadai go gïï Rey. Dïï tomaxi maixapi go Jose bïïxkïrï apia nukati Diuxi dai maa ïgai tïgibudagai go kïïrhi ix makïdï tïanïi ami maixakaruana xi ïgai kïï ïmagi go Jose.

²² Kïï ïmagi ïgai go Jose dai kaxkïdï nukaturhi ïgai go gaa maamaixapikïdï. Saidi go Jose gatïanïna bïïxi go gaa maamaixapikïdï ix makïdï ibuadana aaduindagai ami maixakaruana.

²³ Gïr Nukadakami kïï ïldaturhi bïïxi aïkatai aaduindadï go Jose tudu. Xi kaxkïdï go nukadakami ami maixakaruana ka mai buamï ïrhidiña xi nïñiadagi aaduindadï go Jose.