Galatas 6 - Northern Tepehuan Bible

Pabora aagai ix maaxi óídaga aatïmï ïïgiditai Diuxi Ibhïadï

¹ Gin aaduñi Diuxi amadïrï, xi ïmadutai aapimï buaboitudadami gïpiïrï gïxiagi soimaaxi idunakai maiti gï agai aapimï ix makïdï ïïgidi Diuxi Ibhïadï xi kabami bhagaidadagi. Gï agai bhaiyoma xi kïï bhai maaxkami dukai maakadagi aapimï ñoki dai soiñagi sai ïpamu bhïiyagi ïgai kïïga tïgibudagai. Dai aapimï ix makïdï ïïgidi Diuxi Ibhïadï dai gamaakai ñoki gïn nukadabïrai ïïgi aapimï ïpï tadu soimaaxi iduña ïrhiadagi ïmadutai aapimï ïpï.

² Xïïxkadï bïïtïkan taadakagi ix tumaxi ïmadutai gïn aaduñi bïïtarï abïr soikïda. Podukai kïïgakïrï ibuadamu aapimï ixtumaxi gïr tïjai Suxi Kristo.

³ Daiñi, aanï aagai sai ïïgi gï buirumadai ïmoko ix pokaitadagi sai mai bia xi soikïdagi jaa xïïxkadï mai kïï ibuadagi ïgai. Ix mai soiña ïrhiada ïmoko jaa gobai itïiya ïrhidi sai ïmo gïdukïdï gï ïrhidi ïïgi dai gobai maiti ïr buaboi xi ïr gïdukïdï. Xorai mai soiña ïrhiada jaa maiti ïr ïmo gïdukïdï toma lïïchi tudu mos ïïgi po gï ïrhidi ïgai.

^4-5 Dai gï agai ïmoko ïïgi ix maatï nïijadagi ix bhai kïïga ibuayi. Bïïxkatai aatïmï bia ix ïjïgi ibuadagi ixtumaxi ïr kïïga tudu. Dai xorai maiti ibuadagi ixtumaxi ïr kïïga ïïgi ïr duñidï. Maiti gï agai xi ïmo gïdukïdï gï ïrhiadagi ïmoko nïiditai ixtumaxi ibuayi jaa tudu dai pokaititai sai kïïgioma ibuayi ixtumaxi ïr kïïga xi bhai jaa. Gï agai bhaiyoma xi mosïkaxi tïgito nïijada ïmoko ixtumaxi ibuayi ïïgi ïmoko dai maatïkagi sa bhai kïïgadu. Dai ix kïï ibuadagi ïmoko aidï gia biakamu ixtukïdï bhai gï ïrhiadagi nïiditai ïïgi aaduindadï.

⁶ Gaagadabïrai ixdukatai ibuadagi ixtumaxi ïr kïïga tudu. Dukami abïr oida soiñi xorai gïn tïtïgiadagi Diuxi ñokidï. Kïïga ïr sïïrhi podukai.

⁷ Dai xi pobuadagi aapimï aidï gia gokiïrï kïïga buimu aapimï gïn maitïki. Gin aagidamu aanï ïmo maaxidaragai gokïdï. Daiñi, xi ïmo odami gaïïxiagi ixtumaxi kïïgadukami aidï gia gokiïrï yoobamu ïgai ix tumaxi kïïgadukami ïi ïgai. Dïï gia xi soimaaxkami gaïxiagi ïgai aidï gia soimaaxkami yoobamu ïgai ïpï gokiïrï. Mai bhaiga ïmoko xi buirumadagi Diuxi tudu. Ïgai bïïxkïrï anoraidi odami ixtumaxi ajïakagi nïiditai ixtumaxi idui ïgai tudu.

⁸ Daiñi, xorai soimaaxi ibuadagi ïïgiditai ïïgi tïgibudadï ïgai ka ïxiandui soimaaxkami dai go ïï soimaaxkami yoobamu ïpï ïmadï go mukigami. Dïï gia xorai kïïga ibuadagi ïïgiditai Diuxi Ibhïadï ïgai gia gaïïxian dui ixtumaxi kïïgadukami dai go kïïgakïrï oidakaragai ix makïdï ïr bïïxkïrï bïïtarï gobai ïr yoobaradïka agai.

⁹ Kaxkïdï gï agai xi apia ïïgiadagi aatïmï Diuxi Ibhïadï dai kïïga ibuadagi. Maiti gï agai xi ojoadagi aatïmï gobai tudu. Kaxkïdï tudu gï maatï sai ayimu ixtuigako yoobamu aatïmï ixtumaxi kïïgadukami ix apia kïïga ibuadagi aatïmï.

¹⁰ Gin aaduñi, xibi kia oidaga oigaragai xi kïï buidadagi aatïmï jaa kia oidigi daama óídakatai aatïmï. Kaxkïdï gï agai aatïmï xi kïï buidadagi bïïxi óídakami ibuadatai ixtumaxi ïr soiñikagi ïgai bïïtarï dai bamioma bïïtarï ix makïdï ïr ïmo xïgïmï duu gïr ïmadï. Ix makïdï bia ï galbaaxi buaboidaragai ix makïdï bia aatïmï tudu.

Kugaitu Pabora ojadï aagaitai go odami ix makïdï gatïtïïgidi ñoki ix makïdï maiti ïr buaboi

¹¹ Xibi ïïgi aanï ibuayi idi kugatïrï ojai. Kaxkïdï kïï gïgïrdu gin oja tami. Ïïgi aanï ojai tami lïïchi tudu dai mai xu xi gin soikïi ïmai.

^12-13 Gin aaduñi, go circuncision ïr ïmo aaduindagai ix makïdï go ïïgi tukugadïkïdï ibuayi odami. Maiti ïr ibhïgadïkïdï tudu. Dai mai gubudakïdï gï agai xi gïn circuncidandoagi aapimï. Dïï gia gïn aagidamu aanï ix tuixi gubudakïdï gïn tïanïi jaa sai gïn circuncidandoagi aapimï. Buamï ïrhidi ïgai ix kaitiadagi go judidiu kaxkïdï. Dai pokaitada ïrhidi ïgai ïpï sai kïïga xadutudai ïgai go Moises sïïrhikamigadï kaxkïdï gïn tïanïi ïgai sai gïn circuncidandoagi aapimï. Dïï gia tomarhi ïïgi ïgai mai kïïga ïïgidi go Moises sïïrhikamigadï. Dai bïïxkïrï mai bhai aagaiña ïgai sai kïïgakïrï bubuakiagi aapimï mos buaboitudakai aapimï ixtumaxi idui Suxi Kristo kuruxiana. Gïgïrdukïdï gïn ïrhidi bhaiyoma dai ibuada ïrhidi aaduindagai ïïgi gubukarhigadïkïdï dai kaxkïdï gïn tïanïi ïgai sai gïn circuncidandoagi aapimï.

¹⁴ Dïï aanï gia xadïrï gïdukïdï gin ïrhidiña ibuadatai aanï ïmo aaduindagai ïïgi gin gubukarhigakïdï podukai. Mosïkaxi ïmo ixtumaxi gia pokaitada antaada aanï sai gia namïga dai gobai ïr go aaduindagai ix makïdï idui Suxi Kristo kuruxiana. Ami tudu kuruxiana bhai dui Suxi Kristo sai ka mai biakagi aanï xi ïïgiadagi go tïgibudagai ix makïdï oidaga tami oidigi daama. Ïmo mukiadï dukai gin bia ïgai bïïtarï go tïgibudagai gobai tudu. Dai xibi ïpïan dukai xi ïmo mukiadï ka maiti ïr soiñi podukai ka maiti ïr soiñi gin bïïtarï go tïgibudagai ix makïdï oidaga tami oidigi daama ïpï. Bïïxi gobai bhai dui Suxi kuruxiana gin bïïtarï.

¹⁵ Ami tudu kuruxiana gïr utuduturhi Suxi Kristo. Kaxkïdï maiti ïr ixtumaxi ix circuncidadukagi ïmoko ix cho ïpï. Maiti ïr ixtumaxi namïakami gobai. Dïï gia Diuxi gïr utuduturhi dai gobai gia ïr ixtumaxi namïakami.

¹⁶ Go aaduindagai ix makïdï idui Suxi Kristo gïr utudutuldakai ïgai gobai ïgai dai namïga. Dai ipïrhidi aanï sai kïï tuigakana Diuxi bïïxi go buaboitudadami bïïtarï ix makïdï buaboitudai sai gobai ïgai dai namïga. Dai ipïrhidi aanï sai gïn ibhïxtakan taadakagi ïgai iibhïadïrï. Go buaboitudadami tudu kïïgakïrï ïr aaduñdï Diuxi.

¹⁷ Xibi mosïkaxi ïpï ïmo ñoki gïn aagida in ïrhidi. Daiñi, oidaga ïïmoko aapimï buaboitudadami gïn saagida ix makïdï gin bui ñokaiña pokaititai sai maiti ïr buaboi gin aatagi. Dïï gia kïïga maaxi gin tukugïrï xako sasarai jaa ibuadatai aanï Suxi Kristo aaduindadï. Kaxkïdï xibi bhaitiakoga ka maiti gï agai xi gin bui ñokadagi tomarhi ïmadutai gin aatagikïdï ix makïdï gatïtïïgidi aanï.

¹⁸ Gin aaduñi, ipïrhidi aanï sai maatï taatakana aapimï gïn iibhïdagïrï xïï kïï tuiga Suxi Kristo Gïr Nukadakami gïn bïïtarï. Sai pobï duna gobai tudu. Mosïkaxi.