Galatas 5 - Northern Tepehuan Bible

Go Pabora aagidi go buaboitudadami Galasiana óídakami sai mai buamï gïn ïrhiadagi xïxkadï pokaitadagi jaa sai ïgai bia xi ïïgiadagi go sïïrhikami sai Diuxi kïïgakïrï nïijadana

¹ Ka aagai aanï sai aatïmï maiti ïr maamaradï duu go oki ix makïdï ïr pioñikatadai. Ka kïïgakïrï gïr bubaitu Suxi Kristo tudu dai ka maiti ïr go sïïrhikami pipioñigadï duu aatïmï dai ka mai bia aatïmï xi ïïgiadagi gobai. Kaxkïdï abïr mai ïpamu bhïiyi go tïgibudagai ix makïdï ikaiti sai bia aapimï xi ïïgiadagi go sïïrhikami sai kïïgakïrï gïn nïijadagi Diuxi. Ix pobuadagi aapimï aidï gia pipioñi duu bimu aapimï ïpamu di.

² Gïn aagidamu aanï ïmo ixtumaxi xibi dai gï agai xi kïïga gïn tïgito kaïkagi aapimï. Daiñi, Suxi Kristo ka bhai dui gïn bïïtarï sai ka maiti ïr pipioñi dukaikana aapimï. Ka mai gubuakïdï bia aapimï xi ïïgiadagi go sïïrhikami tudu. Dïï gia ix gïn circuncidandoagi aapimï ix dukai aagai judidiu sïïrhikamigadï po gïn ïrhiditai sai podukai kïïgakïrï gïn nïijadamu Diuxi aidï gia ka maiti gïn soiñamu ixtumaxi idui Suxi Kristo gïn bïïtarï. Ix pobuadagi aapimï pipioñi dukai bimu aapimï ïpamu di.

³ Daiñi, aanï aagai sai xorai kïï biiya ïrhiada Diuxi ïmadï ïïgiditai go sïïrhikami gobai mai bhaiga xi mosïkaxi lïïchi ïïgiadagi go sïïrhikami. Dai xi gï circuncidando agadagi ïmoko gobai ïr ïmo ïïgidaragai go sïïrhikami dai xi pobuadagi ïmoko aidï gia bia xi ïïgiadagi bïï sudakami go sïïrhikami ïpï.

⁴ Dai ix poïrhiada ïmoko sai kïï bimu Diuxi ïmadï ïïgiditai go sïïrhikami gobai itïiya ïrhidi sai ka gajiadïrï bipiayi ïgai Suxi Kristo mai buaboitudaitai ïgai. Diuxi kïï tuiga ïgai bïïtarï tudu dïï mos ïgai mai dagito xi Diuxi soiñagi.

⁵ Dïï gia aatïmï ix makïdï bia Diuxi Ibhïadï dai ïgai gubukarhigadïkïdï óídaga mai podukai ibuayi. Mai gajiadïrï biayi aatïmï Suxi Kristo tudu. Aatïmï gia kïï maatï sai buañixikami gïr aagai Diuxi dai kïïgakïrï gïr nïidi. Dai bhai ïrhiarakïdï nïnïraka aatïmï xi gïr ajiagi ixtumaxi kïïgadukami buañixikatai aatïmï.

⁶ Ka bïïna daraka aatïmï Suxi Kristo tudu xi kaxkïdï mai xudu xi circuncidadugakagi ïmoko xiïpï xi mai circuncidadugakagi ïpï. Maiti ïr ixtumaxi gobai. Xibi mosïkaxi namïga xi buaboitudagi aatïmï Suxi Kristo dai xi gïr oigïdadagi aipakoga. Podukai tudu gïr oigïdaitai aipakoga maaxitudai aatïmï sai kïïgakïrï buaboitudai aatïmï.

⁷ Gin aaduñi, gia kïïga ibuadana aapimï baasïkioma. Kïï oidiña aapimï go kïïgadukïdï buaboidaragai tudu. Dïï gia xibi ¿xorai ïgai dai gïn tïtïgidi ïma maaxi tïgibudagai dai gïn tïanïi sai ïïgiada aapimï go sïïrhikami sai kïïgakïrï gïn nïijadana Diuxi? Gïn sobhidimi ïgai xi ka mai ïïgiadagi aapimï gobai ix makïdï ïr buaboi.

⁸ Xadïrï gïn maakana Diuxi tïgibudagai podukai di. Diuxi ïgai dai gïn báí mïsai buaboitudana aapimï Suxi Kristo bhaiyoma. Kaxkïdï maatiga maaxi sai maiti ïr ïgai dai gïn mamaakai ïma maaxi tïgibudagai xibi.

⁹ Gïn nukadabïrai tudu dai mai dagito xi xia gï buadagi gïn buaboidaraga. Gïn aagidamu aanï ïmo maaxidaragai gokïdï. Daiñi, ix gï bïnaidagi lïïchi kopodakarui ïmo tuiyana bïïxi kopodarïi gobai. Tomaxi lïïchigakagi go kopodakarui bïïxkïrï bïïxi ajïi go tuiyi. Dai pomaaxi gïn buaboidaragakïdï ïpï. Xi gï bïnaidagi lïïchi tïgibudagai ix makïdï maiti ïr buaboi kïïga xia duada antaada bïïxi gïn buaboidaraga. Kaxkïdï abïr gïn nukada gokïdï.

¹⁰ Gin aaduñi, ka bïïna daraka aatïmï Suxi Kristo dai kaxkïdï aanï buaboitudai sai gïn soiñamu ïgai xi mai bhïiyagi aapimï ïma maaxi tïgibudagai ix makïdï maiti ïr go bhai ïrhiaragai aatagi. Kïïga ibhïxtakan taadaga aanï tudu buaboidaitai aanï sai Suxi Kristokïdï kïïgakïrï darakamu aapimï. Dïï gia Diuxi ïgai dai aagamu ix tuma gïgïbidaragai biaka agai ix makïdï soi buadana gïn buaboidaraga gïn tïtïïgiditai ïma maaxi tïgibudagai ix makïdï maiti ïr buaboi.

¹¹ Gin aaduñi, oidaga odami ix makïdï pokaitiña sai gatïtïïgidiña aanï aatagi ïpïan duki go gaa ix makïdï pokaiti sai gï agai xi gïn circuncidandoagi odami sai kïï biïna Diuxi ïmadï. Maiti ïr buaboi gobai. Xadïrï podukai gatïtïïgiadagi aanï ñoki. Daiñi, oidaga jaa ix makïdï bhakoikana gin bui dai soi gin buididiña gatïtïïgiditai aanï ixtumaxi ïr buaboi. Aagidiña aanï odami sai mai bia xi gïn circuncidandoagi sai kïïgakïrï nïijadana Diuxi tudu. Xi aagidamudai aanï sai gï agai xi gïn circuncidandoagi ïgai aidï gia ka mai soi gin buidadamudai go gaa. Dïï aanï bhaiyoma aagidiña odami sai gï agai xi buaboitudagi Suxi Kristo sai kïïgakïrï bubuakïna. Kaxkïdï gin bui bhakoikana jaa.

¹² Kabami ïr soi ïrhiaragai gin bïïtarï xi jaa soi gïn buidadagi gïn aagiditai sai gï agai xi gïn circuncidandoagi. Pobïnïrhidi ïgai sai bamioma kïïga bipiïyi Diuxi ïmadï ikitïkai lïïchi tukugadï. Soi gïn buidadan buayi ïgai aapimï pomaaxi aatagikïdï tudu. Dai kaxkïdï ipïrhidi aanï sai mai xu xi mosïkaxi lïïchi gïn ikitimudai ïïgi ïgai gïn circuncidanduitai. Ipïrhidi aanï bhaiyoma xi kïï gïïpi gïn ikitimudai ïgai asta xako ukami gïn kapuñtumudai ïïgi ïgai. Gobai kïïgadukamudai ïgai bïïtarï tudu ix makïdï soi gïn buididi gïn aagiditai sai gï agai xi gïn circuncidandoagi aapimï.

¹³ Daiñi gin aaduñi, Diuxi gïn báí mïsai kïïgakïrï óídakana aapimï. Gïn báí ïgai sai ka mai biakagi aapimï xi pipioñi dukai ïïgiadagi ïmo sïïrhikami tudu kabami gïn tïanïitai gobai. Ka kïïgakïrï gïn bubaitu ïgai tudu. Kaxkïdï kabami soi gin ïrhidiña aanï gïn aagiditai jaa sai bia aapimï xi ïïgiadagi go sïïrhikami. Maiti ïr podukai di. Daiñi, kïïga ïr buaboi tudu sai mai gubuakïdï bia aapimï xi ïïgiadagi go sïïrhikami sai podukai kïï biïna Diuxi ïmadï. Dïï gia maiti abïr po gïn ïrhiada ïpï sai bhaiga aapimï xi ibuadagi ïïgi ixtumaxi iduña ïrhiada aapimï oiditai ïïgi gïn tïgibudaga. Gï agai bhaiyoma xi aipakoga gïn soikïdagi aapimï gïn oigïdatai aipakoga.

¹⁴ Kaxkïdï tudu go sïïrhikami ikaiti, Oigïadabïrai jaa ïpïan dukai xi gï oigïdai ïmoko ïïgi, ikaiti go sïïrhikami. Dai ix kïïgakïrï gïn oigïdadagi aapimï podukai aidï gia ka mai tipukamu ïma maaxi ixtumaxi bamioma kïïgadukami dai go sïïrhikami ka mai taañimu bamioma ixtumaxi.

¹⁵ Dai sïïrhikïdï maiti gï agai xi gïn bupui surhigiagi aapimï aipakoga. Maiti gï agai tudu xi ïpïan buadagi aapimï googoxi ix makïdï aipakoga gïn kïkïiña gïn kïïdatai. Xïduñada xia buadagi aapimï gïn buaboidaraga dai gïn urabaraga gïn kokodaitai podukai.

Pabora aagidi go buaboitudadami sai ïïgiada ïgai Diuxi Ibhïadï

¹⁶ Gin aaduñi, bïïxi óídakami bia tïgibudagai ix makïdï ïïgi ibhïadïañdïrï imïi dai ix makïdï mai ïïgiada ïrhidi Diuxi. Kaxkïdï gïr ajïi tïgibudagai xi ibuada aatïmï naana maaxi soimaaxi. Dïï gia abïr oijada Diuxi Ibhïadï dai aidï gia ka maiti ibuadamu aapimï ixtumaxi ibuada ïrhidiña ïïgi gïn tïgibudagakïdï.

¹⁷ Daiñi, gïr ïrañdïrï imïi ïmo kokodi ix makïdï gïn bupui bïïtï ïïgi gïr tïgibudaga ïmadï Diuxi Ibhïadï. Ïïgi gïr tïgibudaga ipïrhidi xi ibuada aatïmï ixtumaxi Diuxi Ibhïadï maiti ipïrhidi. Dai Diuxi Ibhïadï ipïrhidi sai ibuada aatïmï ixtumaxi maiti ipïrhidi ïïgi gïr tïgibudaga ïpï. Gobai tudu ïr go kokodi ix makïdï gïr ïrañdïrï imïi. Gïr tïgibudagai ix makïdï gïr ïrañdïrï imïi ïgai dai maiti ipïrhidi xi ïïgiadagi Diuxi dai gobai gïr sobhikïi xi maiti ibuadagi aatïmï ixtumaxi kïïgakïrï iduña ïrhidi aatïmï.

¹⁸ Gin aaduñi, xïxkadï ïïgiadagi aatïmï Diuxi Ibhïadï aidï gia ka mai bia aatïmï xi buamï gïr ïrhiadagi ix bhai xi ïïgidi aatïmï go sïïrhikami ix cho ïpï. Kaxkïdï tudu xïxkadï ïïgiadagi aatïmï Diuxi Ibhïadï kaxi ibuadana aatïmï ixtumaxi Diuxi ipïrhidi.

¹⁹ Daiñi, kïï maatiga maaxi ixtumaxi ibuayi odami xïïxkadï ïïgiadagi ïgai ïïgi tïgibudadï. Ix makïdï ïïgidiña ïïgi tïgibudadï ïmadï bopoiña jaa aipakoga dai ibuadana naana maaxi buirudagai dai xaïraragai maaxi.

²⁰ Naana maaxi ibuadana odami ix makïdï ïïgidiña ïïgi tïgibudadï tudu. Diuxi dukai xadutudai ïgai ixtumaxi ix makïdï maiti ïr Diuxi. Kïkïïdarakana ïgai ïpï. Gïn kïïdaiña aipakoga dai gïn bupui ñokaiña. Ïjïgakoitïrïkana ïgai dai bhakoitudakana. Mosïkaxi ïïgi gïn bïïtarï buamï gïn ïrhidiña ïgai. Ïjïkobai buiyiña ïgai naana maaxi tïgibudagai dai ïjïkobai bipiïyiña oiditai go naana maaxi tïgibudagai ïpï.

²¹ Koimudadï tutiakana ïgai dai nabaakoitïrïkana. Dai ibuadana ïgai bagimi xako ibuadana naana maaxi buirudagai. Naana maaxi ibuadana ïgai podukai tudu. Dai kaxi gïn aagidi aanï ïkioma sai mai pobuadagi aapimï. Gïn aagidi aanï tudu sai xorai pobuadagi mai biaka agai oigaragai xi Diuxi ïr tïanïdamigadïkagi.

²² Dïï gia xïïxkadï ïïgiadagi aatïmï Diuxi Ibhïadï gïr ïrana aatabuayi ïgai dai bhai buayi naana maaxi kïïgadukami gïr ïrañdïrï. Ïïgiditai aatïmï Diuxi Ibhïadï oigïdaiña aatïmï jaa dai bhai gïr ïrhidiña dai gïr ibhïxtakan taadakana aatïmï gïr ibhïdagïrï. Kïïga gïr kabakadaiña aatïmï ïpï xïxkadï soimaaxi taatamadagi. Kïï tutiakana aatïmï jaa bïïtarï dai ibuadana ixtumaxi ïr kïïga. Bïïxkïrï ibuadana aatïmï ix tumaxi aagagi aatïmï ïpï.

²³ Ga aatabuadatai Diuxi Ibhïadï gïr ïrana kïïga bhai maaxkami dukai buididiña aatïmï jaa ïpï. Dai bhaigakana aatïmï xi ka mai ïïgiadagi ixtumaxi gïr tïanïdagi ïïgi gïr tïgibudaga. Bïïxi gobai ibuayi Diuxi Ibhïadï aatïmïrï xïxkadï ïïgiada aatïmï ïgai. Dai xïïxkadï ïïgiada aatïmï Diuxi Ibhiadï aidï gia ka mai tipu tomarhi ïmo sïïrhikami ix makïdï gïpiïrï gïr daitudagi.

²⁴ Daiñi, aatïmï ka bïïna daraka Suxi Kristo xibi dai ka ïkobai bii aatïmï gïr ïïkidadï tïgibudagaiñdïrï. Aatïmï gïr bïïtarï ka kuruxiana xixapikan dukai biyan dui gïr ïïkidadï tïgibudagai tudu dai kaxkïdï ka mai bia aatïmï xi ïïgiadagi gobai xïïxkadï gïr aagidagi sai iduña rïrhidi ixtumaxi.

²⁵ Diuxi Ibhïadï gubukarhigadïkïdï óídaga aatïmï tudu xi kaxkïdï tï bhaiyoma oijada ïgai bïïxi aïkatïrï.

²⁶ Maiti gï agai tudu xi gïgïrdukïdï gïr ïrhiadagi aatïmï ïïgi xiïpï xi gïr bupui bïïtïkagi xiïpï xi koimudadï tutiakagi aatïmï.