Galatas 4 - Northern Tepehuan Bible

Pabora aagai ixdukatai Diuxi maamaradï bipiïyi aatïmï dai ixdukatai bipiatu aatïmï go bhai ïrhiaragai ix makïdï Diuxi aagidi go Abraam Dai aagai ïgai ïpï ix tuma bïïtarïtadai go Moises sïïrhikamigadï ïïkioma mai kia dibiakai Suxi Kristo

¹ Gin aaduñi, gïn aagidamu aanï ïmo maaxidaragai aatagi sai maatïkana aapimï ix dukatai aatadui Diuxi saidi ïr maamaradïkana aatïmï. Daiñi, kïï maatï aatïmï sai kïkïïrhi biayiña buxtuidadï maamaradï. Dïï gia xïxkadï kia arhidukagi maradï mai bhaiga xi biakagi ogadï buxtuidadï kia asta xïxkadï ka gïï ïgai. Aidïxi mai kia gïï ïgai bhaitoma ïpïan dukamikana ïgai ïmo gapioñi tomaxi aji agai ogadï buxtuidadï.

² Biakana ïgai xi ïïgiadagi nukadakamigadï ïmadï tïtïgiadami ñoki tudu asta xïïxkadï pokaitadagi ogadï sai ka gïï ïgai dai aidï gia bhaiga xi biakagi ogadï buxtuidadï. Dai ïkioma mai kia buaboitudakai aatïmï Suxi Kristo arhi dukaikana aatïmï ix makïdï bia xi ïïgiadagi ïmo nukadakami kia.

³ Pomaaxkatadai aatïmï mai kia buaboitudakai aatïmï Suxi Kristo tudu. Arhi dai pipioñi dukaikana aatïmï. Aidï biakatadai aatïmï xi ïïgiadagi go naana maaxi sïïrhikami ix makïdï gïr aagidiña ix tumaxi gï agaitadai xi ibuadagi aatïmï. Pipioñi dukai óídakatadai aatïmï aidï biakatai ix ïïgiadagi go sïïrhikami. Bïïtïkana gïr oidakaragai aidï tudu.

⁴ Dïï gia Diuxi maiti ipïrhidi xi pipioñi dukai óídakagi aatïmï tomarhi xi ïr arhi dukaikagi ïpï. Kaxi ïr maamaradï aatïmï kaxkïdï. Ipïrhidi ïgai xi gïgïr odamikagi aatïmï tudu bai gïr maakana ïgai bïïxi ixtumaxi gïr ajïga maamaradïkatai aatïmï. Kaxkïdï ka aïkai ixtuigako Diuxi ipïrhi aidï bhai dui ïgai gïr bïïtarï xi ka bhaigakana aatïmï xi ka biakagi ixtumaxi gïr ajïga. Otoi ïgai Maradï tami oidigi daama tudu dai ïgai ïmo kïïrhi busai. Dai biakatadai ïgai xi ïïgiadagi go sïïrhikami

⁵ bai podukai bhai buadana kïïgakïrï bubaidaragai gïr bïïtarï. Podukai ïïgiditai ïgai go sïïrhikami kïïga bhai dui ïgai gïr bïïtarï sai ka mai biakana aatïmï xi ïïgiadagi go sïïrhikami sai kïï biïna aatïmï Diuxi ïmadï. Bhai dui ïgai sai ka maiti ïr arhi dukaikagi aatïmï xiïpï pipioñi dukaikagi dai bhaiyoma xibi ïr maamaradï aatïmï Diuxi. Xibi gïgïr odami duu aatïmï dai bia aatïmï sïïrhikami xi biakagi ixtumaxi bia Diuxi gïr bïïtarï.

⁶ Dai kïï maatiga maaxi saidi ïr Diuxi maamaradï aapimï xibi. Daiñi, Diuxi gïn maa ïïgi Ibhïadï dai xadïrï gïn maakimudai Ibhïadï ix maiti ïr maamaradïkagi aapimï. Ïgai ïr ï galbaaxi Diuxi Ibhïadï ix makïdï Diuxi Maradï biakana ïpï. Dai xibi gïr maakai ïgai ïmo kïïgadukami ïmadaragai Diuxi ïmadï gïr ïrana dakatai. Gïr maakai ïmadaragai sai gïgïr ñokaiña aatïmï aatagaitai Diuxi dai sai —gïr Maama— dai —gïr Oga— aagaiña aatïmï Diuxi.

⁷ Kïï maatiga maaxi sai bïïxkatai aapimï ïr maamaradï Diuxi tudu. Dai kaxkïdï kïïga gï maatï ïpï sai Diuxi ka bhai dui gïn bïïtarï sai gïn ajïakagi buxtuidadï ïpï. Maamaradï aapimï ïgai di.

⁸ Dïï bïïxkïrï duadikui aanï xïduñada ïpamu oi aapimï gïn ïïkidadï buaboidaragai dai go aaduindagai ix makïdï idui aanï gïn saagida ka maiti ibuadagi soiñi. Daiñi, ïkioma didiuxi dukai nïidiña aapimï naana maaxi ixtumaxi dukami uubixi maaxi dai biakana aapimï xi gaatabuadagi pipioñi dukai ïïgiditai pomaaxi buaboidaragai. Aidï mai kia maatïkatadai aapimï ïgai ix makïdï ïr Diuxi kïïgakïrï kaxkïdï.

⁹ Dïï xibi gia kïïga maatï aapimï Diuxi, xiïpï bamioma kïïgadu ix tïiyagi aanï sai Diuxi ïgai dai kïïga gïn maatï bhaiyoma. Kaxkïdï ¿ix tuixidï ïpamu buaboituda ïrhidi aapimï sai bamioma kïïga gïn nïijadamu Diuxi ïïgiditai aapimï naana maaxi sïïrhikami dai ïïgiditai naana maaxi tïgibudagai ïkidadï ix makïdï maiti ïr soiñi?

¹⁰ Bamioma xadutudai aapimï ïïmo tasai dai ibuayi bagimi poïrhiditai sai podukai kïïgakïrï gïn nïijadamu Diuxi tudu.

¹¹ Daiñi, gobai ïr go buaboidaragai ix makïdï biakana aapimï ïkioma dai pipioñi dukai gïn aaduinturhiña gobai. Kaxkïdï duadikui aanï ix gïn daibuñagi oiditai aapimï gïn ïïkidadï buaboidaragai ïpamu. Xïduñada ka maiti gïn soi go aaduindagai ix makïdï idui aanï gïn saagida tudu.

Go Pabora tïkakai go Galasiïrï óídakami ix tuixi ka mai bhai ïrhiarakïdï kaïkana aatagidï

^12-13 Gin aaduñi, kïï maatï aapimï sai aanï ïr ïmo judiu dïï gia ka mai buaboitudai aanï sai gubuakïdï bia aanï xi ïïgiadagi go sïïrhikami bai kïïgakïrï gin nïijadagi Diuxi. Gajiadïrï bia aanï bïïxi gobai dai kaxi gïn ïpïan dukai oidaga aanï aapimï ix makïdï maiti ïr judidiu. Aapimï ix makïdï maiti ïr judidiu mai buaboitudai sai gubuakïdï bia xi ïïgiadagi go Moises sïïrhikamigadï sai kïïgakïrï gïn nïijada Diuxi tudu. Dai xibi gïn daanïi aanï sai apia dukai óídakagi aapimï mai gubuakïdï gïn tïanïitai go sïïrhikami. Gin aaduñi, gïn tïgitobïrai xïï kïïga gin miadïgidi aapimï aidïxi tukamïrï gïn dibiji aanï. Mai soi dukai gin nïidiña aapimï aidï tomaxi ïr kokoadïkatadai aanï. Kïï maatï aapimï tudu saidi ïr kokoadïkatadai aanï dai kaxkïdï ami bii aanï gïn ïmadï. Kaxkïdï ami bii aanï dai gïn aatagidï go bhai ïrhiaragai aatagi.

¹⁴ Tomaxi soi gïn buadana aapimï gin soikïitai kokokatai aanï bïïxkïrï mai soi dukai gin nïidiña aapimï dai bhaiyoma kïïga kaïkana aapimï gin aatagi dukami xi ïr Diuxi tïañikarudïkamudai aanï. Dai asta gin kaïkana aapimï dukami xi ïr Suxi Kristokamudai aanï ïpï. Kïïga gin nïidiña aapimï dai kïïga kaïkana gin aatagi tudu.

¹⁵ Aidï kïïga bhai gïn ïrhidiña aapimï kaïkatai go bhai ïrhiaragai aatagi. Aanï po in ïrhidi sai gin maaki antaadatadai aapimï asta gïn bupuji gin soiña ïrhiditai aidï. ¿Dai xibi xïdui go bhai ïrhiaragai ix makïdï biakatadai aapimï aidïxi tukamïrï kaï aapimï go bhai ïrhiaragai aatagi?

¹⁶ Aidï bhai gïn ïrhidiña aapimï ¿dai xibi ix tuixi ïmo gïn buidïrï kaatïkami dukai gin nïidi aapimï gïn aagiditai aanï ixtumaxi ïr buaboi?

¹⁷ Daiñi, kïï maatï aanï sai oidaga jaa ix makïdï ipïrhidi sai ïmo gïn buidïrï kaatïkami dukai gin nïijadagi aapimï. Ïgai gïn aagidiña naana maaxi aatagi ix makïdï maiti ïr buaboi. Ïgai kabami gaagadan buayi ixtumaxi ïr soiñi aapimï gïn bïïtarï dai maiti ïr buaboi. Mos ipïrhidi ïgai xi urabagi aapimï kaxkïdï pobuayi ïgai. Gïn oigïdadan buayi ïgai tudu dïï maiti ïr buaboi. Bhaiyoma pobuayi ïgai ipïrhiditai sai ka maiti gin urabagi aapimï. Ipïrhidi ïgai xi mosïkaxi ïgai urabagi aapimï tudu. Ipïrhidi ïgai xi ïkobai gïn biagi aatïmïañdïrï ix makïdï aagai ixtumaxi ïr buaboi. Kaxkïdï gïn oigïdadan buayi ïgai.

¹⁸ Daiñi, kïï bhai maaxi xïxkadï jaa gaagagi ixtumaxi ïr kïïga gïn bïïtarï. Dïï gia gïn nukadabïrai tadu gïn buirumadagi ixtumaxi pobuadatai dai mai kïïgakïrï gïn oigïdaitai. Aanï gia kïïgakïrï gïn oigïdai dai bïïxkïrï gaagai ixtumaxi ïr kïïga gïn bïïtarï tomaxi mïkaxi dakagi aanï.

¹⁹ Gin aaduñi Diuxi amadïrï, sïïrhikïdï buamï gïn ïrhidi aanï aapimï gïn bïïtarï. Gin maamara xixïñi dukai gïn nïidi aanï tudu gïn oigïdaitai aanï. Dai naana maaxi tïtïitoi aanï aapimïkïdï buamï iñïrhiditai. Asta ïpïan taadakana aanï xïïxkadï ïmo oki karhioga duadi agadagi ïmo aarhikïdï. Potadakana aanï buamï iñïrhiditai tudu. Dai mos apia potadakamu aanï asta xïïxkadï ïpïan tutiakagi aapimï Suxi Kristo ka kïïga gïrakai gïn buaboidaraga.

²⁰ Gia gïn ïmadï daka in ïrhidi aapimï gin aaduñi. Aidï gia bhaigakamudai aanï xi kïïga aatagadagi gïn ïmadï. Dïï xibi kia mïkaxi daja aanï dai arhiïxi buamï in ïrhidi aapimïkïdï. Kaxkïdï bia aanï xi gïn ojidagi podukai.

Go Pabora aagai ïmo maaxidaragai aagaitai go Sara ïmadï go Hagar

²¹ Gin kaïkabïrai aapimï ix makïdï ïïgiada ïrhidi go sïïrhikami po gïn ïrhiditai sai podukai kïïgakïrï gïn nïijadamu Diuxi. ¿Kïïga mïx maatï ix kaiti go sïïrhikami dai kaxkïdï ïïgiada ïrhidi?

²² Daiñi, ami go sïïrhikamiïrï ikaiti sai go Abraamkaru maamara goka kïkïïrhi. Ïmoko maara ïgai ïmadï ïmo oki ix makïdï ïr pioñikatadai sosiaxikami dukai. Hagar tïgidukatadai go oki. Dïï gia go gïmai gia oñigadï ïmadï marai ïgai. Sara tïgidu oñigadï go Abraam dai ïgai gia maiti ïr pioñikatadai.

²³ Dai go maradï go pioñi mos busai ïpïan dukai tuma xorai, odami gubukarhigadïkïdï tudu. Ïgai gia ïr ïïgi odami tïgibudadïkïdï dai dibia. Dïï gia go gïmai ix makïdï dïïdï maiti ïr pioñi ïgai gia Diuxi gubukarhigadïkïdï dibia. Diuxi aagiditadai go Abraam sai marata agai tudu xi kaxkïdï marai ïgai.

²⁴ Dai go Hagar ïmadï go Sara bïï goka maaxidaragai dukai bii ï goka ñoki bïïtarï ix makïdï bhai dui Diuxi odami ïmadï. Go Hagar ïr go pioñikatadai dai ïr ïmo maaxidaragai dukai bïïtarï go ñoki ix makïdï bhai gï dui ïmo tubidakana Sinaíïrï xako Diuxi maa go sïïrhikami go Moiseskaru.

²⁵ Arabiana bipiïyi go Sinaí. Go Hagar ïr ïmo maaxidaragai bïïtarï go Jerusalen ix makïdï nïidi aatïmï xibi tudu dai bïïtarï go judidiu ïpï ix makïdï ami Jerusalenïrï óídaga. Ïgai judidiu pobïn ïrhidi sai bia xi ïïgiadagi go sïïrhikami sai Diuxi kïïgakïrï nïijadana tudu. Dai kaxkïdï pipioñi sosiaxikami duu óídaga ïgai ïïgiditai go sïïrhikami. Kaxkïdï go Hagar ïr ïmo maaxidaragai dukai ïgai bïïtarï. Kaxkïdï tudu go Hagar ïr ïmo pioñikatadai.

²⁶ Dïï gia aatïmï ix makïdï buaboitudai maiti ïr maamaradï dukami aatïmï go Hagar. Maamaradï aatïmï go Sara bhaiyoma ix makïdï maiti ïr pioñikatadai. Dai go Sara ïr ïmo maaxidaragai bïïtarï go tïbagiañdïrï Jerusalen. Ami tudu óídakami bïïxkatai aatïmï ix makïdï ka kïïgakïrï bubuaka dai ka maiti ïr pipioñi dukai aatïmï.

^27-28 Aatïmï ix makïdï buaboitudai kïïgakïrï ïr piipixaradï go Abraam ïmadï Isaak tudu ix makïdï ïr go maradï go Sara. Aatïmïkïdï buaboi busai go ñoki ix makïdï Diuxi aagidi go Abraam aidïxi potïtïdai ïgai sai muiduka agai maamaradï. Aatïmï gïr agaitadai Diuxi ïïki tudu. Dai bamioma muidukamu aatïmï xi bhai xi ix makïdï ïr maamaradï dukai go pioñi Hagar tïgidukïdï. Kïïga gï maatï sai bamioma muidukamu aatïmï xi bhai ïgai tudu. Kaxkïdï tudu Diuxi ñokidïrï ojixi ïmo ojai aagaitai go Sara. Ami ojixi sai, Aapi oki ix makïdï mai bhaigakatadai xi mamaatadagi, aapi tomarhi mai taatamaiña ix gï duadiagi aarhikïdï. Dai ïkobïrakoga gï aduñi ïmadï bitadai ïmai. Dïï xibi gia aapi Sara iñakidañi aapi bhai ïrhiarakïdï. Xibi bamioma muidu gï maamara xi bhai xi maamaradï go oki ix makïdï ïmadï daja gï aduñi di, po tudu kaiti go ojai aagaitai go Sara ïmadï maamaradï. Aatïmï tudu ïr go maamaradï go Sara ix makïdï agaitadai Diuxi aidï. Piipixaradï aatïmï go Isaak tudu dai dïïdï go Isaak ïr go Sara dai ïgai maiti ïr ïmo pioñikatadai. Daiñi gin aaduñi, aatïmï ix makïdï buaboitudai ïr go maamara ix makïdï agaitadai Diuxi aidïxi potïtïdai ïgai go Abraam sai muiduka agai maamaradï.

²⁹ Dïï gia kïï maatï aapimï sai go maradï go pioñi soi dukai nïidiña maradï go oki ix makïdï maiti ïr pioñikatadai. Dai apia pomaaxi xibi. Go odami ix makïdï ïr pipioñi duu po gïn ïrhiditai sai bia xi ïïgiadagi go sïïrhikami ïgai parunaiña dai asta soi buididiña ix makïdï ka maiti ïr pipioñi duu ka buaboitudakai ïgai.

³⁰ Dai maiti gï agai xi dagitoagi aapimï xi gïn uurapïkïdagi go gaa ix makïdï pokaiti sai gï agai xi ïïgiadagi go sïïrhikami sai kïïgakïrï nïijadana Diuxi. Daiñi, Diuxi ojadïrï ojixi ïmo ñoki aagaitai go Abraam ïmadï buxtuidadï. Ami Diuxi potïtïdai go Abraam, Daiñi, go oki ix makïdï ïr pioñi ïmadï modukai maradï maiti gï agai tudu xi ïgai bïïtarïkagi go bhai ïrhiaragai ix makïdï gï maakimu aanï. Gï agai xi bïïtarïkagi gobai go maradï go oki ix makïdï maiti ïr pioñi, itïtïdai Diuxi.

³¹ Dai aatïmï gïr ayi go bhai ïrhiaragai ix makïdï Diuxi aagidi go Abraam xi kaxkïdï maatiga maaxi sai aatïmï maiti ïr maamaradï go pioñi. Maamaradï duu aatïmï ix makïdï maiti ïr pioñikatadai bhaiyoma.