Galatas 2 - Northern Tepehuan Bible

Go Pabora aagai ïmo maaxidaragai aatagi sai maatïkana go Galasiïrï óídakami saidi ïr buaboi ix dukatai gatïtïïgidi ïgai go bhai ïrhiaragai aatagi

^1-2 Dai bhodïrï tïbïpikïdï, ka daibunukai bhaibuxtama dan maakoba umigi abhiadïrï xi jiitadai aanï Jerusalenañdïrï, Diuxi gin tïtïgidi sai gï agaitadai xi imiagi aanï ïpamu gamo Jerusalenamu. Xi kaxkïdï jii aanï Jerusalenamu ïmadï Bernabe dai gïr oi go Tito ïpï. Dai aïkai aatïmï amïka antai ïkobai aataga ïmadï go bhaitï gukakamigadï go buaboitudadami ix makïdï bamioma xadutudaiña go buaboitudadami tudu. Dai aagidi aanï ix kaiti go aatagi ix makïdï tïtïgidiña aanï go odami ix makïdï maiti ïr judidiu. Aagidiña aanï go bhai ïrhiaragai aatagi go ix makïdï maiti ïr judidiu tudu. Aagidiña aanï go aatagi ix makïdï ikaiti sai go odami kïï bipiïyi Diuxi ïmadï buaboitudakai ïgai Suxi Kristo. Mai xu xi aagidiña aanï go odami sai gï agaitadai xi ïïgiadagi ïgai go Moiseskaru sïïrhikamigadï xiïpï xi gïn circuncidandoagi ïpï. Kïï maatïkatadai aanï sai mai namïakami dukai bii agaitadai gin aaduindagai ix go bhaitï gukakami mai bhai aagamudai sai kïïgadu ix duu aagai aanï go bhai ïrhiaragai aatagi. Kaxkïdï ïkobai aataga aanï ïgai ïmadï ïpïgioma. Dai kïï bhai aa ïgai sai kïïgadu gin aatagi.

³ Daiñi, go bhaitï gukakami ïgai gin ïpïan dukai aagai. Ïgai ïpï pokaititadai sai go Tito mai biakatadai xi gï circuncidandoagi sai kïï biïna Diuxi ïmadï. Mai biakatadai ïgai xi gï circuncidandoagi tomaxi maiti ïr judiukatadai ïgai.

⁴ Maiti gï circuncido go Tito tudu tomaxi go odami ix makïdï buaboitudadami gïn aagaiña ïïgi dai maiti ïr buaboitudadami, ïgai gia pokaititadai sai gï agaitadai ix gï circuncidandoagi ïgai. Go odami ïgai kajiomatadai ïmo aatagi aatïmïkïdï ix makïdï bïïna daraja Suxi Kristo. Kajioma ïgai sai ka mai gubuakïdï bia aatïmï xi ïïgiadagi go Moises sïïrhikamigadï tudu. Dai mai bhai ïrhidi ïgai gokïdï. Ami ayitadai ïgai gïr saagida dai ïxto dukai nïida ïrhiditadai ix dukatai ibuadana aatïmï. Ipïrhiditadai ïgai xi gubuakïdï ïïgiadagi aatïmï go sïïrhikami ïpamu dai xi gïr circuncidandoagi aatïmï.

⁵ Dïï mai ïïgidi aatïmï toma lachi. Ix ïïgiadamudai aatïmï aidï gia ka saagida aagamudai aatïmï ïma maaxi aatagi dai ka maiti ïr go bhai ïrhiaragai aatagikamudai kïïga. Dai aatïmï ipïrhidi xi apia buaboitudada aapimï ix makïdï kïïgakïrï ïr go bhai ïrhiaragai aatagi. Kaxkïdï mai ïïgidi aatïmï ix makïdï pokaiti sai gï agai buaboitudadami ix gïn circuncidandoagi.

⁶ Daiñi, go Santiago dai go Piduru dai go Juan ïr go bamioma tïtïanïdami buaboitudadami saagida dai go buaboitudadami kïïga xadutudai ïgai. Dai ïgai maiti gin aagidi ix dukatai gatïtïïgiada aanï ñoki dai bhaiyoma bhai aa sai kïïgadu ix dukatai aagai aanï go bhai ïrhiaragai aatagi.

^7-9 Bhai aa ïgai tudu sai kïïgadu ix duu aagai aanï sai go buaboitudadami mai bia xi ïïgiadagi go sïïrhikamigadï Moises dai sai maiti gï agai xi gïn circuncidandoagi ïgai ïpï sai kïï biïna Diuxi ïmadï. Kïïga maatï tïï ïgai sai Diuxi kïï tuiga gin bïïtarï gin maakaitai ïmo sïïrhikami. Kaxkïdï bhai aa ïgai sai kïïgadu gin aatagi. Maatï tïï ïgai tudu sai ïpïan dukai xi Diuxi maa sïïrhikami go Piduru ix tïtïgiadagi ïgai ñoki go judidiu podukai gin maa Diuxi sïïrhikami aanï xi tïtïgiada aanï ñoki go ix makïdï maiti ïr judidiu. Sai tïtïgiada aanï go bhai ïrhiaragai aatagi tudu. Dai asta pobai in tïtïdai go bhaitï gukakami sai aanï ïmadï go Bernabé ïr ïmo aadunumï ïgai ïmadï. Dai gïr aagidi ïgai sai aatïmï aituldana aatagi go odami ix makïdï maiti ïr judidiu dai ïgai aitulda aagai aatagi go ix makïdï gia ïr judidiu. Pobai gïr tïtïdai go kïkïïrhi ix makïdï odami bamioma xadutudai tudu. Dïï gia gï agai xi maatïkagi aapimï sai Diuxi ïmadugan dukai nïidi bïïxi odami dai kaxkïdï aanï in bïïtarï go bhaitï gukakami mos ïr kïkïïrhi ïpïandukai toma xorai tomaxi odami gia bamioma tïtïanïdami dukai nïidi. Kïïga bhai aa ïgai tudu sai kïïgadu gïr aaduindaga dai maiti gïr aagidi ïgai sai ïma dukai gatïtïïgiada aatïmï aatagi.

¹⁰ Mosïkaxi gïr aagidi sai apia aagada aatïmï go bhai ïrhiaragai aatagi dai sai soikïiña aatïmï soititigami dai gobai tomax dukai kaxi iduña in ïrhiditadai aanï.

Go Pabora aagidi go buaboitudadami Galasiïrï óídakami sai go Piduru mai kïï iduitadai ïmo imidagai dai sai kaxkïdï Pabora bhagaiditadai ïgai

^11-12 Ïpï ïmo ixtumaxi gïn aagidamu aanï sai maatïkana aapimï saidi ïr buaboi ix dukai aagidiña aanï go bhai ïrhiaragai aatagi. Daiñi ïmo imidagai Antiokiïrï dajatadai aanï ïmadï muidutai gïr aaduñi buaboitudadami dai ami dajatadai go Piduru ïpï. Dai kïï maatï aapimï sai ami Antiokiïrï go buaboitudadami muidukïdioma maiti ïr judidiu dai ïgai mai ïïgidi go Moises sïïrhikamigadï. Dai go ix makïdï gia ïr judidiu pokaiti sai gia gï agai xi ïïgiada gobai. Kaxkïdï go judidiu soimaaxi ibuadami dukai nïidiña go gaa ix makïdï maiti ïr judidiu dai mai ïïgidi go sïïrhikami dai kaxkïdï mai kuadana ïgai ïmadï. Dai aidïxi ami darakatadai aatïmï go Piduru kïïga kuadatadai ïmadï go ix makïdï mai ïïgidi go sïïrhikami. Kïïga maatïkatadai ïgai sai pokaiti go bhai ïrhiaragai aatagai sai mai bia ïgai xi ïïgiadagi go Moises sïïrhikamigadï sai kïï biïna Diuxi ïmadï. Kaxkïdï ïmadï gakuadatadai ïgai. Dïï gokiïrï ami dada chïki judidiu Jerusalenañdïrï. Ojotosadïkatadai ïgai go Santiago. Dai dadakai ïgai sai go Piduru ka maiti ipïrhi xi urabagi go buaboitudadami ix makïdï maiti ïr judidiu dai ka mai gakuadana ïgai ïmadï. Ïbhïiditadai ïgai ix ñokadagi go judidiu ix makïdï dadatadai Jerusalenañdïrï kaxkïdï.

¹³ Dai muidutai go buaboitudadami judidiu tïï ix dukatai ibuadana go Piduru dai ka maiti ipïrhi xi urabagi go gaa buaboitudadami ix makïdï maiti ïr judiu ïpï. Dai asta go Bernabé ka maiti ipïrhi xi gaugiagi ïmadï go ix makïdï maiti ïr judidiu ïpï nïiditai ix dukatai idui go Piduru.

¹⁴ Dïï gia aidïxi nïidi aanï sai mai kïïga ibuayi ïgai ixdukatai aagai go bhai ïrhiaragai aatagi antai bui kïkiba go Piduru dai kabami bhagaidi. Ñokidi aanï ïgai bïïxkatai go gaa buitapi tudu. Potïtïdai aanï, —¿Ix tuixi pomaaxi ibuayi aapi Piduru?— antïtïdai aanï. —¿Mai ix ïmo mai judiu duu ibuadana aapi gakuadatai ïmadï ix makïdï maiti ïr judidiu? ¿Dai xibi ix tuixi gubuakïdï aagidimi aapi go ix makïdï maiti ïr judidiu sai ïïgidiña ïgai go Moises sïïrhikamigadï? Gobai ka maiti ïr go bhai ïrhiaragai aatagi di. Aagidimi aapi go odami sai judidiu dukai ibuadagi ïgai tudu. Dai xibi baasïki ïïgi aapi mai ïmo judiu dukai ibuadatadai gakuadatai aapi ïmadï ix makïdï maiti ïr judidiu. ¿Dai xibi ipïrhidi pïxi xi go ix makïdï maiti ïr judidiu xi judidiu dukai ibuadagi gubuakïdï biakatai xi ïïgiadagi go sïïrhikami? Gobai ka maiti ïr go bhai ïrhiaragai aatagi— antïtïdai aanï.

^15-16 Dai potïtïdai aanï go Piduru ïpï, —Daiñi— antïtïdai aanï. —Asta aatïmï ix makïdï kïïgakïrï ïr judidiu gïr dïïdï amadïrï, asta aatïmï ïpï kïï bipiïyi Diuxi ïmadï ïpïan dukai go ix makïdï maiti ïr judidiu. Mos buaboitudaitai aatïmï Suxi Kristo tudu. Gobai gia ïr go bhai ïrhiaragai aatagi. Daiñi, tomarhi aatïmï judidiu tomarhi go gaa ix makïdï maiti ïr judidiu dai ix makïdï soimaaxi ibuadami aagaiña aatïmï tomarhi ïmadutai aatïmï mai kïï bipiïyi Diuxi ïmadï ïïgiditai go sïïrhikami— antïtïdai.

¹⁷ —Daiñi— antïtïdai aanï go Piduru. —Aatïmï buañixikami gïr ïrhidiña ïkioma judidiukatai aatïmï dai ïïgiditai aatïmï go sïïrhikami. Dïï gia buaboitudakai aatïmï Suxi Kristo ka máí aatïmï sai ïpïan ïxi soimaaxi ïr ibuadami aatïmï xi go gaa ix makïdï maiti ïr judidiu. Aidï abhiadïrï ka mai buaboitudai aatïmï sai go sïïrhikami kïïgakïrï gïr bubiadamu. Ïpïan dukai bii aatïmï gobai ix makïdï maiti ïr judidiu tudu ka mai ïïgiditai aatïmï go sïïrhikami. Kaxkïdï tudu tomarhi ïmo odami mai kïï bipiïyi Diuxi ïmadï ïïgiditai go sïïrhikami— antïtïdai go Piduru. Daidi potïtïdai aanï ïpï, —Xibi pokaitada antaada jaa sai soimaaxi gïr duiñturhi Suxi Kristo ka dagitokai aatïmï go sïïrhikami dai ka buaboidakai aatïmï Suxi. Dïï xadïrï ïr buaboikana sai soimaaxi gïr duiñturhi Suxi Kristo.

¹⁸ Dïï gia xi dagitoagi ïmoko go sïïrhikami maatïkatai sai gobai mai soikïi odami sai kïï biïna Diuxi ïmadï dai gokiïrï ix pokaitadagi aatïmï ïpamu sai gï agai xi ïïgiadagi go sïïrhikami, gobai gia gïïpi ïr soimaaxi— antïtïdai aanï go Piduru.

¹⁹ —Daiñi— antïtïdai aanï. —Ïkioma kabami gin aajagïiña aanï ïïgiada ïrhiditai go Moises sïïrhikamigadï. Poïrhiditadai aanï sai podukai kïï bimu aanï Diuxi ïmadï dïï maiti ixtui aanï ix kïïga ïïgiadagi gobai. Kaxkïdï bhaiyoma ka dagito aanï go sïïrhikami dai ka mai gaagai aanï ixdukatai ïïgiadagi gobai. Ka mukian dui aanï go sïïrhikami bïïtarï tudu. Go sïïrhikami mai bhaiga xi tïanïdagi ïmo mukiadï di. Ka mai oidaga aanï ïïgidaragai bïïtarï go sïïrhikami xibi tudu. Dai xibi bhaiyoma Diuxi bïïtarï oidaga aanï— antïtïdai aanï.

²⁰ —Aanï in bïïtarï pomaaxi gin oidakaragai xibi— antïtïdai. —Daiñi, ïkioma aanï ïr ïmo soimaaxi kïïrhikatadai. Dïï gia aidïxi muu Suxi Kristo gïr bïïtarï kuruxiana aidï muu go kïïrhi soimaaxkïdï ïgai ïmadï ïpï dai xibi ka utudui bii aanï. Dai kaxkïdï ka mai xu xi go kïïrhi ïkidadï oidaga gin tukugïrï dai bhaiyoma Suxi Kristo ïgai dai gin ïrana oidaga. Xibi oidaga aanï buaboitudaitai Suxi Kristo ix makïdï kïïgakïrï gïr oigïdai. Kïïga gïr oigïdai ïgai tudu dai kaxkïdï gï dagito sai gï muatudana dai kïïgakïrï gïr bubaitu— antïtïdai aanï go Piduru.

²¹ —Daiñi— antïtïdai. —Ïïmoko pokaiti sai bhaiga ix kïï bipiïdagi Diuxi ïmadï ïïgiditai go sïïrhikami. —¿Duna aatïmï xorai mukiagi gïr bïïtarï dai kïïgakïrï gïr bubiadagi?— ikaitiña ïgai. Ka gajiadïrï bipiadan buayi ïgai ixtumaxi idui Suxi Kristo gïr bïïtarï tudu. Dïï aanï gia mai gajiadïrï bia in ïrhidi ixtumaxi idui Suxi gïr bïïtarï. Gia kïï tuiga ïgai gïr bïïtarï tudu. Sïïrhikïdï gï agaitadai xi mukiagi ïgai gïr bïïtarï. Mai biakatadai aatïmï ïmai soiñi di— antïtïdai aanï go Piduru.