Galatas 1 - Northern Tepehuan Bible

Diuxkïdï biaturhi Pabora go buaboitudadami Galasiïrï óídakami

^1-2 Gin aaduñi Diuxi amadïrï ix makïdï Galasiïrï óídaga, aanï ïr Pabora dai gïn ojidi idi ojai dai aanï ïr otosadï Suxi Kristo. Gï agai xi maatïkagi aapimï sai tomarhi ïmo odami maiti gin maa gin sïïrhikamiga dai bhaiyoma Suxi Kristo ïmadï Diuxi gïr Oga ïgai dai gin maa. Ïgai tudu ix makïdï duakaturhi go Suxi Kristo ïgai dai gin maa gin sïïrhikamiga dai mai xu xi ïmai gin maa. Bia aanï ïmo sïïrhikami tudu. Dai idi ojai ix makïdï ibuayi aanï ïr bïïxi go buaboitudadami bïïtarï ix makïdï bïïxi aipakoga gïn ïmpaidiña amïka Galasiïrï. Aanï ïmadï bïïxi gin aaduñi Diuxi amadïrï ix makïdï tami gin ïmadï daraka bïïxi bhai aa sai gïn otosdiña aanï idi ojai.

³ Gin aaduñi, ipïrhidi aanï sai taatana aapimï xïï kïï tuiga Diuxi gïr Oga ïmadï Suxi Kristo dai sai gïn maakana ïgai ibhïxtaragai gïn ibhïdagïrï.

⁴ Suxi Kristo tudu ïgai dai ïïgi gï tïïgi sai gï muatudana ïmo daxdaragai dukai dai bhai duñagai gïr soimaaxkamiga sai ka kïï biïna aatïmï Diuxi ïmadï. Podukai idui ïgai dai kïïgakïrï gïr bubaitu bïïxi go soimaaxkamiañdïrï ix makïdï oidaga tami idi oidigi daama. Podukai ipïrhi Diuxi gïr Oga sai ïïgi gï tïïgidana Suxi gïr bïïtarï tudu xi kaxkïdï gï tïïgi ïgai dai gï muatu.

⁵ Dai kaxkïdï gï aagai xi bïïxkïrï bïïtarï mai dagitokai aagaiña aatïmï xïïxi ïr gïdukami Diuxi. Gobai gia ïr buaboi.

Go Pabora podukai aagai sai gï agai gïgïbituldagi odami ix makïdï ïma maaxi ñoki aagadagi dai pokaitadagi saidi ïr go bhai ïrhiaragai aatagi

⁶ Xibi bia aanï ïmo ñoki gïn bïïtarï gin aaduñi. Daiñi, Diuxi ïgai dai gïn abïnaki sai buaboitudaiña aapimï. Gïn tïtïgidi ïgai xïï kïï tuiga Suxi Kristo gïn bïïtarï tudu mukukai gïn bïïtarï. Podukai gïn abïnaki ïgai sai buaboitudaiña aapimï. Dai aidïxi máí aapimï xïï kïï tuiga ïgai gïn bïïtarï aidï buaboitu aapimï go bhai ïrhiaragai aatagi. Dïï gia kajioma aanï sai otoma dagito aapimï ïpamu gïn buaboidaraga. Xibi ka mai tïtïgai aanï ix tumaxi gin tïgitoagi mos ïï otoma dagitokai aapimï Diuxi. Ka buaboitu aapimï ïmai aatagi tudu ix makïdï bhai ïrhiaragai aatagi agaiña ixtumaxi dai maiti ïr ïgai.

⁷ Gin aaduñi, kajiomakana aanï sai gïn bupuirumadaiña jaa odami dai podukai soi gïn ïrhiatudai ïgai aapimï. Gïn tïtïgidiña ïgai ïmai aatagi ix makïdï mai buaboikïdï ïr go bhai ïrhiaragai aatagi. Mai sïïrhi aagai ïgai go bhai ïrhiaragai aatagi aagaitai Suxi Kristo tudu dai bhaiyoma saagida aagaiña ïgai yaatagi. Podukai gia ka maiti ïr bhai ïrhiaragai aatagi gobai di.

⁸ Gin aaduñi, kïïga gïn aagidi aatïmï go bhai ïrhiaragai aatagi dai maiti gï aagai xi jaa gïn aagidagi ïma maaxi. Aanï aagai sai ipïrhidi aanï xi Diuxi gïgïbituldagi tomax makïdï odami ix makïdï gatïtïïgiadagi ïma maaxi aatagi. Daiñi, ix dibiagi ïmoko dai gatïtïïgiadagi ïma maaxi aatagi ix makïdï maiti ïr go bhai ïrhiaragai aatagi kïïga gï agai xi taatagi ïgai gïgïbidaragai bïïxkïrï bïïtarï tomaxi aatïmïkamudai dai gïn aagidi ïma maaxi. Dai tomaxi ïr ïmo tïañikarudïkagi ïgai Diuxi ix mai sïïrhi aagadagi ïpï ïgai gï agai xi taatagi gïgïbidaragai bïïxkïrï bïïtarï ïkobai dakatai Diuxiañdïrï.

⁹ Gin aaduñi, ipïrhidi aanï xi kïïga maatïkagi aapimï xïï kabami gï agai xi tïgito kaïkagi aapimï ixtumaxi gïn aagidi aanï xibiki. Xi kaxkïdï gïn aagidamu aanï ïpïpï go galbaaxi ñoki. Daiñi, tomax makïdï odami ix makïdï gïn tïtïgiadagi ïma maaxi aatagi ix makïdï maiti ïr go aatagi ix makïdï gatïtïïgidiña aatïmï gï agai xi taatagi gïgïbidaragai ïkobai dakatai Diuxiañdïrï bïïxkïrï bïïtarï. Sïïrhikïdï maiti gï agai xi pobuadagi odami tudu.

¹⁰ Daiñi, aanï kïïga buamï in ïrhidi ix tïiyagi Diuxi nïiditai ïgai ix dukatai gatïtïïgidi aanï aatagi. Dïï gia mai buamï ïrhidi aanï ix tïiyagi odami. Mosïkaxi Diuxi buamï ïrhidi aanï ix tïiyagi tudu. Daiñi, oidaga odami ix makïdï pokaitiña sai aanï naana dukai aagaiña aatagi aagaitai ïïgi ixtumaxi kaïka ïrhiada odami. Pokaitiña ïgai sai aanï mos gaagaiña ix dukatai kïïgakïrï gin nïijadagi óídakami. Dïï maiti ïr buaboi gobai. Aanï ipïrhidi bhaiyoma sai kïïgakïrï gin nïijadagi Diuxi pioñigadïkatai aanï Suxi Kristo dai mai xu xi ipïrhidi aanï xi odami kïïgakïrï gin nïijadagi. Ka aagai aanï tudu sai xorai mai sïïrhi aagagi go bhai ïrhiaragai aatagi gï agai xi taatagi gïgïbidaragai bïïxkïrï bïïtarï. ¿Kaxkïdï dukatai naana dukai aagaiña aanï go aatagi? Mai bhaiga. Maatiga maaxi gobai di. Pioñigadï aanï Suxi Kristo tudu xi kaxkïdï bia aanï xi sïïrhi aagagi go aatagi dai mai xu xi mos aagagi aanï ixtumaxi odami kaïka ïrhiadagi.

Pokaiti Pabora sai Diuxi amadïrï biatu ïgai aatagidï dai mai xu xi odami amadïrï biatu ïgai

^11-12 Gin aaduñi, gï agai xi kïïga maatïkana aapimï xajadïrï dibia go bhai ïrhiaragai aatagi ix makïdï aipako aagidiña aanï. Diuxi tïgibudadïañdïrï dibia gobai dai mai xu xi go odami tïgibudadïañdïrï. Tomarhi ïmo oidigi daama oidakami gin maa go aatagi tudu dai tomarhi ïmadutai gin maatïturhi gobai dai bhaiyoma Suxi Kristo ïgai dai gin tïtïgidi gobai.

¹³ Gïn aagidamu aanï ix dukatai gin ayi go aatagi sai maatïkana aapimï sai Diuxiañdïrï dibia gobai. Daiñi, kïï maatï aapimï ixdukatai oidakana aanï ïkioma oiditai go judidiu buaboidaradï. Kïï maatï aapimï sai kïïdaiña aanï go buaboitudadamigadï Suxi Kristo. Kïïdaiña aanï Diuxi maamaradï tudu dai sïïrhikïdï omarhigakana buidïrï ïgai. Kabami gin aajagïiña aanï gaagaitai ixdukatai naato ugitotudagi ïgai tudu.

¹⁴ Aidïpïrï kabami oiditadai aanï go buaboidaragai ix makïdï gïr biturhi gïr ïïki aaduñi judidiu. Kïïgioma ïr judiukatadai aanï xi bhai tomax makïdï gin aaduñi kïïga ïïgiditai aanï gïr buaboidaraga tudu.

¹⁵ Pomaaxkatadai aanï ïkioma tudu, dïï bïïxkïrï Diuxi ïkobai gin busaitutadai mai kia busaikai aanï abhiadïrï ïmo sïïrhikami bïïtarï. Gia kïï tuiga Diuxi gin bïïtarï tudu. Dai gokiïrï ka aïkai ixtuigako Diuxi ipïrhi

¹⁶ maaxiturhi ïgai Suxi Kristo gin buitapi sai maatïkana aanï kïïga xorai ïgai. Podukai idui Diuxi ipïrhiditai sai aituldana aanï aatagi go ix makïdï maiti ïr judidiu aagaitai Suxi Kristo. Podukai gin maa ïgai go bhai ïrhiaragai aatagi tudu. Dai bhodïrï mai tïkakai aanï tomarhi ïmo odami ix dukatai iduñagi aanï dai bhaiyoma mos gin aaga aanï aagaitai go aatagi ix duu gin maatadai Diuxi gobai. Kaxkïdï gï maatï sai mai ïmo odamiañdïrï bhïiyi aanï go aatagi.

¹⁷ Dai gï agai xi maatïkagi aapimï ïpï sai mai xu xi go gaa ojotosadï Suxi Kristoañdïrï bhïiyi aanï go bhai ïrhiaragai aatagi. Dai bhaiyoma aidïxi bhïiyi aanï go aatagi aidï tomarhi mai jii aanï Jerusalenamu xako daraka go gaa ojotosadï Suxi. Mai dibiji aanï go ix makïdï kaxi ïr ojotosadïkana Suxi tudu. Kaxkïdï gï maatï sai mai xu xi ïgaiñdïrï bhïiyi aanï go aatagi tomaxi ïgai ïr Suxi ojotosadïkana ïpïgioma xi aanï. Bhaiyoma gï maaxitudakai Suxi Kristo gin buidïrï otoma jii aanï xako Arabia tïgidu oidigi dai gokiïrï abhiadïrï jii aanï Damaskamu. Mai otoma dibiji aanï go gaa ojotosadï Suxi Kristo tudu. Kaxkïdï gï maatï sai mai ïgaiñdïrï bhïiyi aanï go aatagi.

¹⁸ Dai asta baika umigi abhiadïrï xi bhïiyi aanï go aatagi jii aanï Jerusalenamu. Aidï utudami máí aanï go Piduru dai ami kiidïrï bii goka ïkarhi.

¹⁹ Aidï mosïkaxi go Piduru tïï aanï ïmadï go Santiago go sukurhidï Suxi. Mosïkaxi ïgai tïï aanï tudu dai maigobakoga mai tïï aanï go gaa ojotosadï Suxi.

²⁰ Gï agai xi maatïkana aapimï saidi ïr buaboi sai mai tïï aanï go gaa ojotosadï Suxi aidï. Mai yaatagïi aanï tudu. Kaxkïdï gï maatï sai mai ïgaiñdïrï bhïiyi aanï go aatagi ix makïdï aipako aagidiña aanï.

²¹ Dai imïkai aanï abhiadïrï Jerusalenañdïrï jii aanï xakoga Siriïrï tïgidu oidigi dai bhodïrï abhiadïrï Silisiamu.

²² Aidïpïrï mai kia gin maatïkana go odami Judeïrï óídakami ix makïdï bïïna daraka Suxi Kristo, ix makïdï gïn ïmpaidiña ami aipakoga Judeana tudu. Maiti gin tïïtadai ïgai kia kaxkïdï.

²³ Mos kajiomakana ïgai sai gin aagaiña odami aipakoga. Dai ikaitiña odami sai, —Go Pabora ïgai dai kabami soi buididiña go buaboitudadami ïkioma sai mai aagada ïgai go bhai ïrhiaragai aatagi. Dai xibi ka mai soi buayi gobai go buaboitudadami dai bhaiyoma xibi aipakoga aagai ïgai go galbaaxi aatagi ix makïdï go buaboitudadami aagai ïpï— ikaitiña odami gin aagaitai aanï.

²⁴ Daidi go odami aagaiña xïïxi ïr gïdukami Diuxi kajiomakai ïgai ix tuma dui Diuxi aanïkïdï.