Filipenses 3 - Northern Tepehuan Bible

Pabora pokaiti sai kïïga namïga ix maatïkagi ïmoko Suxi

¹ Xibi mosïkaxi biïga xi gïn aagidagi aanï ïpï chïki ixtumaxi kia. Gïn aagida in ïrhidi tudu sai gï agai xi bhai gïn ïrhiada aapimï bïïnaka darakatai aapimï Gïr Nukadakami. Kaxi gïn aagidiña aanï baasïkioma ixtumaxi gïn aagidimi aanï xibi idi ojaïrï dïï bïïxkïrï mai ojodakai gïn aagidamu aanï ïpamu. Gïn nukadabïrai tudu sai mai ïïgiada go odami ix makïdï gatïtïïgidi aatagi ix makïdï maiti ïr buaboi. Ipïrhidi aanï ix gïn soiñagi sai mai xia gï duñagi gïn buaboidaraga. Kaxkïdï dudatai gïn aagidi aanï sai gïn nukadakana dai ïïgiada mosïkaxi ixtumaxi ïr buaboi.

² Gïn nukadabïrai tudu go odamikïdï ix makïdï ojoidi xi ikitikïdagi tukugadï óídakami circuncidanduitai. Po kaitiña ïgai sai bia xi circuncidandoagi tukugadï saidi ïr Diuxi maamaradïkana. Dïï gobai gia maiti ïr buaboi. Ïmo gïdukami soimaaxi ibuayi ïgai ix makïdï pokaiti sai Diuxi maamaradï bipiïyi odami gïn ikitïkai tukugadï. Aanï googoxi omarhigakami dai tukurakami dukai nïidi ix makïdï po maaxi mamaakai aatagi. Soi buayi ïgai odami ibhïadï di.

³ Dïï gia aatïmï ix makïdï kïïgakïrï xadutudai Diuxi gubukarhigadïkïdï Diuxi Ibhïadï, aatïmï gia kïïgakïrï ïr maamaradï Diuxi. Aatïmï tudu ix makïdï gïïpi bia bhai ïrhiaragai bïïna darakatai aatïmï Suxi Kristo. Aatïmï ix makïdï mai buaboitudai ixtumaxi ibuadagi aatïmï ïïgi gïr gubukarhigakïdï tudu.

⁴ Gin aaduñi, mai bia aatïmï ix tuixi buaboitudada ixtumaxi ibuadagi aatïmï ïïgi gïr gubukarhigakïdï. Ix oidakamudai ix tuixi buaboitudagi aatïmï ixtumaxi ibuadagi aatïmï ïïgi aidï gia aanï bamioma biakamudai ix tuixi buaboitudagi gobai xi bhai toma xorai. Gïn aagidamu aanï ix tui. Daiñi, gin circunsidotu aanï aidïxi biakatadai mamaako tasai. Dai ïmo Israelita aanï pipiixaradïkatai aanï go Benjaminkaru. Kïïgakïrï ïr Hebreo aanï tudu.

⁵ Daidi ïr fariseo aanï ïpï oiditai aanï go fariseo buaboidaradï. Kïïga ïïgidiña aanï go Moises sïïrhikamigadï tudu.

⁶ Kabami gin aajagïiña aanï ipïrhiditai ix ibuadagi ixtumaxi bhai ïrhidi Diuxi. Dai asta soi buididiña aanï go buaboitudadami aipakoga ïmpaidadami po iñïrhiditai sai gobai bhai ïrhidi Diuxi ïpï. Kïïga ïïgidiña aanï bïïxi ixtumaxi gïr biturhi go Moiseskaru dai podukai mai tipukana ixtukïdï gïpiïrï gin bupadagi jaa. Kaxkïdï aanï bamioma biakatadai ixtukïdï buaboitudagi ixtumaxi ibuadana aanï xi bhai xi toma xorai. Dïï bïïxkïrï maiti gï agai xi buaboitudada aanï gobai.

⁷ Ïkioma buaboitudaiña aanï saidi ïr soiñikatadai bïïxi gobai gin bituldaraga dai gin aaduindaga. Dïï gia xibi ka maatï aanï sai maiti ïr soiñi gobai toma lïïchi. Xibi buaboitudai aanï Suxi Kristo bhaiyoma.

⁸ Daiñi, aanï in bïïtarï gïïpi bamioma namïga sai urabaka aanï Suxi Kristo gin Tïanïdamiga dai bïïxi gobai ix tumaxi ibuadana aanï ïkioma ka mai namïga in bïïtarï. Ïmo boixibharu dukai nïidi aanï bïïxi gobai ix makïdï ibuadana aanï tudu. Bïïxi gobai ka dagito aanï tudu sai podukai biakana aanï urabaragai Suxi Kristo ïmadï

⁹ bïïna dakatai aanï ïgai. Ka mai buaboitudai aanï tudu sai bia aanï xi ïïgiadagi go sïïrhikami sai kïïgakïrï gin nïijadagi Diuxi. Dai bhaiyoma Diuxi ïgai dai bhai dui ix dukatai kïïgakïrï gin nïijadagi ïgai buaboidaitai aanï Suxi Kristo. Gobai buaboitudai aanï xibi.

¹⁰ Gin aaduñi, kïïga biaka in ïrhidi bamioma urabaragai Suxi Kristo ïmadï. Taata in ïrhidi sai kïïga gubuakami dukai gaatabuadagi ïgai gin ïmadï ïpïan dukai ix dukatai gubuakami aatadui Diuxi go Suxi ïmadï aidïxi duakaturhi ïgai. Biaka in ïrhidi urabaragai Suxi ïmadï soimaaxi taatakai aanï ïpïan dukai xi taata ïgai. Ïpïan tuigaka in ïrhidi aanï Suxi Kristo asta xako ukami bhai gin dukagi ix mukiagi ïpïan dukai ïgai.

¹¹ Dai tomax dukai buaboitudai aanï sai gin duakatuda agai Diuxi ïpamu koidadï saagidañdïrï.

Gï agai xi apia oijada aatïmï gobai ix makïdï gïr tïtïgidi Diuxi

¹² Gin aaduñi, aanï aagai sai mai kia kïïgakïrï ïpïan tuiga aanï Suxi Kristo. Kia gin biïga tudu. Dïï gia kabami gin aajagïi aanï sai bïïx tasai bamioma ïpïan tuigakana aanï ïgai. Pomaaxi bïïtarï gin báí Suxi tudu, saidi ïpïan tuigakana aanï ïgai.

¹³ Gin aaduñi, kïïga maatï aanï sai mai kia kïïgakïrï ïpïan tuiga aanï Suxi Kristo dïï gia mai buamï ïrhidi aanï ixtumaxi idui aanï baasïkioma dai bhaiyoma kabami gin aajagïi aanï buamï in ïrhiditai ixtumaxi iduña iñagai xibi abhiadïrï bhaitiakoga.

¹⁴ Diuxi gin báí saidi bhïna aanï ïmo gïdukami maitïki. Dai kaxkïdï kabami gin aajagïi aanï bhïiya iñagaitai go maitïki ix makïdï ïr go tïbagiïrï oidakaragai ix makïdï bia aanï bïïnakami dakatai aanï Suxi Kristo.

¹⁵ Pomaaxi tïgibudagai gï agai xi bhïiyagi bïïxkatai aatïmï ix makïdï kïï kabami guka gïr buaboidaraga. Dai xi duñada biakagi aapimï ïmai tïgibudagai ix makïdï maiti ïr ïgai, Diuxi gïn soiñamu sai maatïkana aapimï.

¹⁶ Dïï gia gï agai xi apia maiti gïr dagitokai ibuadaiña aatïmï bïïxi ixtumaxi ix makïdï gïr tïtïgidi Diuxi.

¹⁷ Gin aaduñi, gin ïpïandukai abïr óídaka. Dai gïn tïgito abïr nïijada go gaa buaboitudadami ix makïdï gin ïpïan dukai óídaga dai gin ïmadï aatabuayi tudu dai podukai abïr óídaka aapimï ïpï.

¹⁸ Daiñi, dudatai gïn aagidiña aanï sai oidaga mui odami ix makïdï ïr buidïrï bïtïkami ixtumaxi idui Suxi Kristo kuruxiana. Dai xibi asta suakaiña aanï soi gin ïrhiarakïdï gïn aagiditai ïpamu.

¹⁹ Ïgai taata agai gïgïbidaragai bïïxkïrï bïïtarï tudu. Ïïgidiña ïgai mosïkaxi ixtumaxi tanïdagi tukugadï dai podukai ïïgi tukugadï ïmo diuxi dukai nïidiña. Ojoidi ïgai xi aagadagi go soimaaxkami ix makïdï ibuayi ïgai dai gï agaitadai bhaiyoma xi xia ïïradagi ïgai gokïdï. Dai buamï gïn ïrhidi ïgai mosïkaxi ixtumaxi tami oidigi daama oidaga.

²⁰ Dïï aatïmï gia bia gïr oidakaraga tïbagiana dai bhai ïrhiarakïdï nïnïraka aatïmï xi mïkadïrï dibiagi Suxi Kristo Gïr Nukadakami ix makïdï ïr gïr kïïgakïrï bubiadamiga.

²¹ Ïgai tudu bia gubukarhigai xi tïanïdagi bïïxi ixtumaxi dai bïïxi ixtumaxi bia xi ïïgiadagi. Dai go galbaaxi gubukarhigakïdï ïma maaxtuda agai Suxi gïr tukuga aidï dibiakai ïgai. Xibi mai xii gubuka gïr tukuga dai otoma ugiatïi. Dïï aidï gia gïr maakimu ïgai gïr tukuga utudui ix makïdï ïpïan maaxkamu ix makïdï bia ïgai. Dai ïgai tukugadï gia kïï gubuka dai kïï tiodi dai mai ugiti agai. Pomaaxika agai gïr tukuga utudui tudu.