Filipenses 2 - Northern Tepehuan Bible

Pabora aagidi go buaboitudadami sai bhïna ïgai go galbaaxi tïgibudagai ix makïdï biakana Suxi Kristo

¹ Daiñi gin aaduñi Diuxi amadïrï, kïïga ïr buaboi sai gïr abïnakidiña Suxi Kristo bïïna darakatai aatïmï ïgai. Dai ïr buaboi ïpï sai tomaxi soimaaxi taatakagi aatïmï bïïxkïrï biakana aatïmï bhai ïrhiaragai gïr oigïdaitai Suxi dai gïr oigïdaitai aatïmï aipakoga ïpï. Dai Diuxi Ibhïadï kïïga gïr soikïi sai biakana aatïmï ïmo kïïgadukami urabaragai ïpï. Dai kïïga gïr oigïdai aatïmï bïïna darakatai aatïmï Suxi Kristo ¿aba? ¿Dai soi gïr ïrhidiña aatïmï nïiditai ix makïdï soimaaxi taatakagi ïpï aba? Dai bïïxi gobai ïr Suxi Kristo aaduindadï kaxkïdï potadakana aatïmï bïïnakatai aatïmï ïgai.

² Ïmo tïgibudagai abïr bhïiyi bïïxkatai aapimï dai bïïxkatai aipakoga abïr gïn oigïdada ïmo xïgïmï dukai. Ïmo odami dukai abïr mosïkaxi ïmo ixtumaxikïdï buamï gïn ïrhiada dai mai xu xi ïjïkobai gïn tïtïgitoda aapimï. Mosïkaxi ïmo ixtumaxi abïr oijada bïïxkatai aapimï tudu. Ix pobuadagi aapimï aidï gia kïïgakïrï bhai gin ïrhiatudamu aapimï.

³ Maiti abïr ibuada tomarhi ïmo ixtumaxi ïïgi gïn bïïtarï mosïkaxi ïïgi gïn bïïtarï buamï gïn ïrhiditai aapimï. Dai maiti abïr ibuada tomarhi ïmo ixtumaxi ipïrhiditai ix namïakami bubuakiagi aapimï jaa bïïtarï. Abïr bhaiyoma mai namïakami dukai gïn nïijada ïïgi aapimï. Dai bamioma namïakami dukai abïr nïijada aapimï jaa.

⁴ Dai bamioma abïr gaagada ixtumaxi ïr soiñikagi jaa bïïtarï dai mai xu xi gaagada aapimï mosïkaxi ixtumaxi ïr soiñikagi ïïgi gïn bïïtarï.

⁵ Bhïibïrai tïgibudadï Suxi Kristo tudu ix dukatai idui ïgai.

^6-7 Daiñi, tomaxi ïr Diuxi ïgai bïïxkïrï gï dagito ïgai xi maigobai gï dasagi bïïxi ix tuma biakatadai ïgai Diuxikatai dai ïmo gapioñi dukai dibia. Podui ïgai ïmo kïïrhi busaikai.

⁸ Ïïgi gï dumaltu ïgai aidï dai asta muu ïïgiditai ïgai Diuxi. Dai mai xu xi mosïkaxi muu ïgai ïpïan dukai toma xorai. Ïgai muu kuruxiana ix makïdï kabami xaïraraga.

⁹ Ïïgi gï dumaltu Suxi Kristo tudu xi kaxkïdï Diuxi kïïga tïkabi dáí sai bïïxi adaama xadutudaiña bïïxkatai óídakami. Maa ïgai go adaama namïakïdï tïtiaragai tudu maakakai go sïïrhikami sai bïïxi adaama gatïanïda ïgai.

¹⁰ Podui Diuxi sai bïïxi óídakami xadutudaiña go Suxi. Mai xudu xi ïr oidigi daama óídakamikagi ïgai xi ïr tïbagiïrï óídakami ïpï xi dïbïrai uta darakagi ïpï. Bïïxkatai ïgai gïn totonakïdï gukadamu Suxi buitapi dai xadutuadamu

¹¹ dai biakamu xi aagadagi sai Suxi Kristo adaama ïr Tïanïdami. Podukai aagadamu ïgai bïïxi óídakami buitapi tudu dai podukai maaxitudamu ïgai xïïxi ïr gïdukami Diuxi gïr Oga.

¹² Daiñi, aapimï gin aaduñi ix makïdï oigïdai aanï, gï agai xi ïïgiadagi aapimï Diuxi. Kïïga ïïgidiña aapimï tudu aidïxi gïn ïmadï dakatadai aanï. Dai xibi bamioma gï agai xi ïïgiadagi aapimï mïkaxi dakatai aanï. Kïïga xadutudaitai abïr gïn aaga dai kïïgakïrï óídaka ixdukatai óídaga odami ix makïdï ka kïïgakïrï bubuaka. Kabami abïr gïn aaga tudu

¹³ dai kïïga bhaigakamu aapimï xi pobuadagi. Kaxkïdï tudu Diuxi ïgai dai gïn maakai tïgibudagai saidi ipïldana aapimï xi ibuadagi ixtumaxi ïgai ipïrhidi dai gïn maakai ïgai gubukarhigai saidi ibuada aapimï ïpï.

¹⁴ Gin aaduñi Diuxi amadïrï, maiti abïr soi kaitiada aapimï dai tomarhi maiti abïr naana kaitiada aipakoga tomax tuma aaduindagai ibuadagi aapimï.

^15-16 Podukai mai tïigimu jaa ixtukïdï gïpiïrï gïn bupadagi. Kïïga abïr buañixikami dukai óídaka tudu Diuxi maamaradïkatai aapimï. Abïr mai dagitokatai oijada go aatagi ixtukïdï kïïgakïrï óídakana odami sai podukai ïr kudagi dukaikana aapimï óídakatai aapimï saagida go soimaaxi ibuadami dai pupuirugami ix makïdï oidaga tami oidigi daama. Podukai abïr óídaka tudu sai biakana aanï ixtukïdï bhai gin ïrhiadagi xïxkadï dibiagi Suxi Kristo. Sai maatïkana aanï aidï sai mai mos ïïgikïdï aatadui aanï.

¹⁷ Daiñi, aanï aatabuayi gïn soiña iñïrhiditai sai kïïga buaboitudana aapimï. Dai xïduñada gin muatudagi aanï dai gï aaxtagi gin ïra gïn soikïitai aanï podukai gobai mos ïr ïmo daxdaragai dukaikamu Diuxi bïïtarï. Ïmo bhai ïrhiaragaikamudai gobai gin bïïtarï tudu. Dai ipïrhidi aanï xi bhai gïn ïrhiadagi aapimï gin ïmadï.

¹⁸ Bhaiga bïnïrhiada tudu Diuxi bïïtarï óídakatai aapimï. Gï agai sai ïmo daxdaragai dukaikagi gïn oidakaraga óídakatai aapimï ïgai bïïtarï tudu.

Pabora aagidi go buaboitudadami sai otosa agai Timoteo sai mïï dibidana

¹⁹ Gin aaduñi Diuxi amadïrï, kïïga buaboitudai aanï sai gin soiñamu Suxi Gïr Nukadakami. Gin soiñamu ïgai sai otoma otosana aanï go Timoteo gamoko sai gïn dibidana tudu. Dai buaboitudai aanï ïpï sai bhai gïn ïrhiadamu aapimï gïn dibidakai ïgai. Dai po in ïrhidi aanï sai aanï ïpï bhai gin ïrhiadamu gokiïrï dibiakai ïgai ïpamu dai gin aagidakai ïgai ix dukatai daraka aapimï amïka.

²⁰ Otosamu aanï go Timoteo tudu maatïkatai sai ïgai bamioma buamï ïrhidi gïn bïïtarï. Bamioma buamï ïrhidi ïgai xi bhai xi go gaa odami ix makïdï tami gin ïmadï daraka.

²¹ Go gaa mosïkaxi ïïgi bïïtarï buamï gïn ïrhidi dai mai buamï gïn ïrhidi ixtumaxi bhai ïrhidi Suxi Kristo.

²² Dïï gia kïïga maatï aapimï xïï kïïga gin soikïi go Timoteo aaduindagïrï. Kïï maatï aapimï tudu sai ix dukai ïmo arhi gïrhi oigïdai ogadï dai soikïi aaduindagïrï podukai gin soikïiña Timoteo ipïrhiditai sai aipakoga aiyagi go bhai ïrhiaragai aatagi.

²³ Kaxkïdï mosïkaxi maatïka in ïrhidi kia ix gin duñi agai go dudunukami tami maixakaruana dai xïxkadï maatïkagi aanï aidï gia otoma gamo otosa in ïrhidi go Timoteo.

²⁴ Dai buaboitudai aanï sai Diuxi gin maakimu oigaragai xi otoma mïïka gïn nïidagi aanï ïpï.

Pabora aagai sai otosa agai go Epafrodito gamo Filipoamu ïpï dai aagai sai kïï tuiga ïgai

²⁵ Gin aaduñi, po in ïrhidi aanï sai gï aagai xi gïn otosda aanï go Epafrodito ïpamu. Ïgai miadïrï ïr gin aduñi Diuxi amadïrï ix makïdï bhaigobai otoi aapimï sai gin soiñana. Kïïga gin ïmadï gaatabuadana ïgai tudu dai kïïga gï kabakadaiña ïgai xïïxkadï soimaaxi taatakagi aatïmï. Soimaaxi taatamaiña aatïmï ïpïan dukai sandadaru tudu. Kïï tuiga ïgai ix makïdï bhaigobai otoi aapimï tudu sai gin soiñana.

²⁶ Soi gï ïrhidiña go Epafrodito kabami gïn tïtïitoitai. Dai kaxkïdï otosa in ïrhidi aanï gamoko sai gïn ïmadï dakana ïpamu. Soi gï ïrhidiña ïgai maatïkatai sai aapimï kajioma sai koko ïgai.

²⁷ Kabami kokokatadai ïgai tudu. Karhioga muu ïgai aidï dai sïïrhikïdï soi gin ïrhidiña aanï. Dïï gia Diuxi kïï tuiga ïgai bïïtarï dai aanï in bïïtarï ïpï dai soi sai mai mukuna sai podukai mai daamioma taatana aanï ïpï ïmo soi ïrhiaragai.

²⁸ Kaxkïdï otoma otosda in ïrhidi gamoko ïpamu sai podukai bhai gïn ïrhiadagi aapimï tïïgakai ïpamu. Dai aidï gia mai soi gin ïrhiadamu aanï gïn tïgitokatai ïpï. Ka maatïkamu aanï sai bhai gïn ïrhidi aapimï tudu gïn ïmadï dakatai go Epafrodito.

²⁹ Kïïga abïr bhai ïrhiarakïdï miadïgida go Epafrodito tudu aïkai ïgai amïka. Gïn aduñi ïgai Diuxi amadïrï dai kaxkïdï abïr kïïga miadïgida. Kabami abïr oigïdada dai kïï xadutuada ïgai. Dai podukai ïpï abïr kabami oigïdada dai xadutuada xorai ïpïan tuigakagi ïgai dai xorai ïpïan dukai aatabuadagi. Daiñi, ïgai ibuadana Suxi Kristo aaduindadï tomaxi maatïkatadai sai kïïga muki antaada ibuadatai.

³⁰ Aapimï mai bhaigakatadai xi gin soikïdagi mïkaxi darakatai aapimï. Dïï ïgai gia kïïgakïrï gin soikïiña naana maaxiïrï. Dai bhaitoma muu ïgai gin soikïitai. Kaxkïdï abïr kïïga oigïdada dai xadutuada ïgai.