Filipenses 1 - Northern Tepehuan Bible

Go Pabora biaturhi go buaboitudadami Filipoïrï óídakami

¹ Bhaiga aapimï buaboitudadami Filipoïrï óídakami. Aanï ïr Pabora ïmadï Timoteo ix makïdï gïn otoxdi idi ojai pipioñigadïkatai aatïmï Diuxi. Idi ojai ïr bïïxkatai aapimï gïn bïïtarï ix makïdï ïr buaboitudadami dai bïïtarï go nunukadami buaboitudadami ami ïpï ïmadï soikïdadami buaboitudadami ïpï. Idi ojai ïr bïïxkatai aapimï gïn bïïtarï tudu ix makïdï bïïnaka Suxi Kristo dai ïr ïko bubaidadï Diuxi.

² Ipïrhidi aanï sai maatï taatana aapimï xïï kïï tutuiga Diuxi gïr Oga dai Suxi Kristo gïn bïïtarï dai sai gïn maakana ïgai ibhïxtaragai gïn ibhïdagïrï.

³ Gin aaduñi Diuxi amadïrï, sïïrhikïdï bhai gin ïrhidiña aanï Diuxikïdï gïn tïtïitoitai.

⁴ Dai bhai ïrhiarakïdï gïn daanturhiña aanï bïïxkïrï xïxkadï gaatagada aanï Diuxi ïmadï.

⁵ Dudatai gin tïgitokana aanï sai gin ïmadï gaatabuadana aapimï aidï abhiadïrï xi buaboitu aapimï. Gin soikïiña aapimï aipako aagaitai go bhai ïrhiaragai aatagi tudu. Kaxkïdï bhai gin ïrhidiña aanï gïn tïgitokatai.

⁶ Diuxi ïgai dai gï aaga idui ïmo aaduindagai aapimïrï tudu. Dai kïïga buaboitudai aanï sai apia oijadami ïgai go aaduindagai aapimïrï asta xïxkadï ukami dibia Suxi Kristo ïpamu. Aidï gia kïïga naatorhikami bimu gobai.

⁷ Kïïga gïn oigïdai aanï gin aaduñi. Xadïrï maiti gïn oigïdaiña aanï tudu. Aapimï gin soikïiña bïïxi gin aaduindagïrï di. Daiñi, Diuxi kïï tuiga gin bïïtarï dai gin maa oigaragai sai aipakoga aituldana aanï go bhai ïrhiaragai aatagi. Dai gin maa oigaragai saidi gïr buidïrï ñiñokadamiga buitapi maaxituldana aanï saidi ïr buaboi go bhai ïrhiaragai aatagi ïpï. Bïïxi gobai gin maa oigaragai Diuxi sai ibuada aanï. Dai aapimï kïïga gin soikïiña. Dïï gia mai xu xi mosïkaxi gobai bïïtarï gin maa Diuxi oigaragai, gin maa ïgai oigaragai sai maixapikana aanï ïpï. Dai aapimï kïïga gin soikïiña asta maixapikatai aanï tami ïpï. Podukai taatan duu aapimï go soimaaxkami gin ïmadï. Kaxkïdï kïïga gïn oigïdai aanï.

⁸ Gin aaduñi, Diuxi ïr nïijadami xïï kabami gïn tïgitokana aanï dai sai gïn oigïdai aanï ïpïan dukai xi gïn oigïdai Suxi Kristo.

⁹ Gïn daanturhiña aanï tudu sai apia bamioma gïn oigïdada aapimï aipakoga dai sai kïïgioma maatïkana aapimï ixtumaxi ïr buaboi dai sai bïïxi aïkatïrï kïïga gïn tïgito nïijadagi aapimï ixtumaxi ïr sïïrhi dai ixtumaxi maiti ïr sïïrhi.

¹⁰ Sai podukai bhaigakana aapimï xi oijadagi ixtumaxi bamioma ïr kïïgadukami. Dai podukai buañixikami dukai óídakamu aapimï mai tipukatai ixtukïdï gïpiïrï gïn bupadagi jaa tomarhi ïmo imidagai asta xïxkadï ukami dibia Suxi Kristo.

¹¹ Daiñi, Suxi Kristo ka kïïga buañixikami gïn bia. Dai aanï kabami daanïi Diuxi saidi gï ibuadagi naana maaxi ixtumaxi kïïgadukami aapimïkïdï ka buañixikatai aapimï. Aidï gia gïn tïgito nïijadamu jaa dai aagadamu xïïxi ïr gïdukami Diuxi dai xadutuadamu ïgai nïiditai ix makïdï ibuayi Diuxi aapimïkïdï.

Pokaiti Pabora sai bhai gï ïrhidi maatïkatai sai jaa aipakoga aagaiña Suxi aatagidï

¹² Gin aaduñi Diuxi amadïrï, naana maaxi daibuskïi gin ïmadï maixapikatai aanï tami. Dïï gia gï agai xi maatïkagi aapimï sai gobai maiti gin sobhikïi xi apia aagada aanï go bhai ïrhiaragai aatagi. Gin soikïi gobai bhaiyoma sai muiyoma óídakami buitapi aitulda aanï.

¹³ Asta go sandadaru ix makïdï nukadai go gïï dunukami kiidï kajioma gin maixatu aanï ibuadatai aanï Suxi Kristo aaduindadï. Dai bïïxi go gaa óídakami kajioma ïpï.

¹⁴ Dai go buaboitudadami gïn tïgito nïidiña ïpï ixdukatai aatabuayi Diuxi aanïkïdï maixapikatai aanï. Dai podukai nïiditai ix dukatai aatabuayi Diuxi aanïkïdï go bamioma muidukïdï kïïgioma buaboitudai Diuxi Gïr Nukadakami. Dai kïïgioma mai duadikoikatai aagai ïgai Diuxi ñokidï ïpï.

^15-17 Mui odami aipakoga aagaiña go Suxi tudu dai gokïdï bhai gin ïrhidi aanï. Ïïmoko aagaiña go Suxi gin oigïdaitai dai maatïkatai sai Diuxi gin maa sïïrhikamai sai maaxitudana aanï xïïxi ïr buaboi go bhai ïrhiaragai aatagi. Kïï bhai maaxkami bia ïgai tïgibudagai tudu dai aagaimi go Suxi. Dïï gia oidaga jaa ix makïdï ïjïgakoñi dai gin bui bïïtï. Gin maita ïrhidi ïgai tudu dai kaxkïdï aipakoga aagaiña ïgai go aatagi. Gïgïrdukïdï bubuakia ïrhidi ïgai dai kaxkïdï aipakoga aagaiña ïgai go Suxi tudu. Mai kïkïïgadu ïgai tïgibudadï. Ipïrhidi ïgai sai kabamioma soi taadakana aanï tami maixapikatai dai kajiomakatai aanï ix tuma ibuayi ïgai.

¹⁸ Dïï mai xudu gobai. Tomax dukai ix kïïgadukagi ïgai tïgibudadï ix mai kïïgadukagi ïpï dïï bïïxkïrï aipakoga aiturhimi ïgai ñoki odami buitapi aagaitai Suxi. Dai gokïdï kïïga bhai gin ïrhidi aanï. Dai aanï aagai sai apia bhai gin ïrhiadamu aanï kia.

¹⁹ Maatï saidi daanïiña aapimï Diuxi gin bïïtarï tudu. Bhai gin ïrhidi aanï maatïkatai ïpï sai Suxi Kristo Ibhïadï kïïga gin soikïiña sai kïïgakïrï oidakagi aanï tomaxi naana dukai soimaaxi taataimi aanï xibi.

²⁰ Kïïga buaboitudai aanï tudu sai maiti ibuada iñagai tomarhi ïmo ixtumaxi ix makïdï ïr ïmo xaïraragai gin bïïtarï. Buaboitudai aanï bhaiyoma sai mai duadikuitai maaxitudamu aanï xïïxi ïr gïdukami Suxi Kristo kia tami oidigi daama dakatai aanï. Buaboitudai aanï sai maaxitudamu aanï xïïxi ïr gïdukami Suxi tomaxi muu gin tukuga xiïpï xi kia tïbïpi kabakagi gobai. Gobai buaboitudai aanï tudu dai kïïga ibhïxtakan taadaga aanï buaboitudaitai podukai.

^21-22 Gïn aagidamu aanï ix dukatai nïidi aanï gin oidakaraga ïmadï Suxi Kristo. Daiñi, kïïga bïïnaka oidaga aanï ïmadï ïgai dai ïgai bïïtarï oidaga aanï. Kaxkïdï xi duñada apia bamioma oidakagi aanï tami oidigi daama gobai itïiya ïrhidi sai apia oijadamu aanï Suxi Kristo aaduindadï. Dai gobai gïïpi ibuayi soiñi. Dïï gia xi mukiagi aanï gobai bamioma kïïgadu in bïïtarï. Ix mukiagi aanï aidï gia Suxi Kristo ïmadï dakamu aanï di. Ka mai tïtïgai aanï ix makïdï bamioma gï agai.

²³ Goka tïgibudagai in aïjïi tudu dai bhaitoma mai tïtïgai ix dukatai gin tïgitoagi ix makïdï bamioma bhai dukai nïijadagi in bïïtarï. Ipïrhidi aanï xi imiagi tami oidigi daamaiñdïrï dai Suxi Kristo ïmadï dakagi tudu. Kaxkïdï tudu gobai bamioma ïr kïïgadukïdï aanï in bïïtarï.

²⁴ Dïï gia aapimï gïn bïïtarï gï agai xi oidakagi aanï tami oidigi daama kia.

²⁵ Aanï kïïga maatï sai aapimï gin tïgito kia tudu dai kaxkïdï po in ïrhidi aanï sai gïn urabamu aanï kia dai gïn soikïdamu sai bamioma gubuakagi gïn buaboidaraga sai podukai bamioma bhai gïn ïrhiadana aapimï.

²⁶ Podukai gïn dibidakai aanï dai gïn soiñakai aanï sai bamioma gubuakana gïn buaboidaraga aidï gia bamioma biakamu aapimï ixtukïdï bhai gïn ïrhiadagi dai ixtukïdï po tïdagi aapimï Suxi Kristo ix xïïxi ïr gïdukami ïgai.

^27-28 Dïï gia gïn aagidamu aanï ixtumaxi bamioma gï agai. Bamioma gï agai xi kïïga bhai dukai óídakagi aapimï ixdukatai aagai go bhai ïrhiaragai aatagi. Go aatagi aagaitai Suxi Kristo tudu. Ix apia ïïgiada aapimï go bhai ïrhiaragai aatagi aidï gia kïïgakïrï óídakamu aapimï. Dai aidï gia tomax dukai ix gïn dibidagi aanï xiïpï ix mos kajiomakagi aanï ix maaxi daraka aapimï mïkaxi dakatai aanï tomax dukai maatïkamu aanï sai mo ïxi kïïgakïrï óídaga aapimï mos ïmo tïgibudagai biakatai aapimï bïïxkatai. Dai maatïkamu aanï sai mai duadikoi aapimï ix makïdï gïn buidïrï bïïtï ïpï. Dai maatïkamu aanï ïpï sai maiti gïn daadagitoi aapimï xi gïn maitiagi go naana maaxi aatagi ix makïdï maiti ïr go bhai ïrhiaragai aatagi kïïgakïrï. Podukai mai duduadikuitai maaxituldamu aapimï ïgai ix makïdï gïn buidïrï bïïtï sai ïgai mai kïïgakïrï bubuaki agai dai aapimï gia. Diuxi tudu ïgai dai ibuayi bïïxi ixtumaxi gïn aagidimi aanï.

²⁹ Kïï tuiga Diuxi gïn bïïtarï dai gïn maa oigaragai xi maaxituldana aapimï jaa buitapi xïïxi ïr gïdukami Suxi Kristo. Dai gobai itïiya ïrhidi sai mai xu xi mosïkaxi gïn maa ïgai oigaragai ix buaboitudada aapimï. Ïma dukai gïn maa ïgai oigaragai ïpï sai soimaaxi taatana aapimï ïpï gamaaxiturhitai aapimï xïïxi ïr gïdukami ïgai.

³⁰ Biakana aapimï sai aa noraidagi ñoki go odami ix makïdï sobhida ïrhidi go bhai ïrhiaragai aatagi tudu. Dai ka nïidiña aapimï baasïkioma sai aanï ïpï biakana xi aa noraidagi ñoki ïgai ix makïdï sobhida ïrhidi ïpï. Dai xibi kajioma aapimï sai apia po buayi aanï. Ïmapi guka aatïmï, aanï ïmadï aapimï, gïr bui ñokaitai jaa. Ïmapi guka aatïmï ïmo kokodiïrï dukai tudu.