Exodo 32 - Northern Tepehuan Bible

¹ Kaxi pogïduitadai gokobhai tasai abhiadïrï xi jii go Moises tubidakiamu. Dai go Israelitas gïn ïmpagi ïmadï go Aaron daidi potïtïdai, —Ka mai dibian tïi go Moises— ikaiti ïgai. —Ka arhiï tïbïpi daja ïgai tubidakana— ikaiti. —Gïr bubaitu go Moises Ejiptuañdïrï dai xibi ka mai maatï aatïmï xi gï dui ïgai. Tïgito aatïmï xi aapi Aaron gïr duiñdagi ïmo ixtumaxi sai ïgai ïr diuxikagi aatïmï gïr bïïtarï. Aidï gia ix makïdï iduña agai aapi gïr tïïgidamu boi xako sïïrhi iimiagi aatïmï— itïtïdai go Israelitas.

² Daidi go Aaron potïtïdai aidï, —Ïmpaidabïrai go oro naanakagi ix makïdï bia gïn ooñiga ïmadï gïn maamara daidi gin buapida— itïtïdai Aaron go Israelitas.

³ Dai go Israelitas mïï tïïgi bïïxi go naanakagi go Aaron.

⁴ Dai go Aaron bhïiyi go oro dai taiyïrï aagitu. Bhodïrï ïgaikïdï idui ïgai ïmo baka maara maaxkami ubixi. Daidi ikaiti go Israelitas tïïgakai go baka maara, —Kaïkabïrai bïïxkatai aapimï Israelitas— itïtïdai ïgai. —Idi baka maara aba ïr diuxi ix makïdï buaboitudai aatïmï dai ix makïdï gïr bubaitu Ejiptuañdïrï— itïtïdai ïgai.

⁵ Dai bhodïrï go Aaron kïi ïmo daxdakarui xadutudikami buidïrï go baka maara tïïgakai ïgai xi diuxi aa odami. Daidi go Aaron gïïgïrï ño daidi potïtïdai ïgai go Israelitas, —Kaïkabïrai. Xoroko iduñimu aatïmï ïmo gïï bagimi dai xadutuadamu aatïmï Gïr Nukadakami— itïtïdai.

⁶ Dai xadiko ïki bapañi go odami dai koi buxtaki dadaxda bïïtarï go baka maara. Ïïmoko mïikami darai ïgai daidi jaa darai ïgai ïmo urabaragai dukai ïmadï go baka maara. Bhodïrï daraibakai gïn aagakai gauu dai gaii go odami dai xigarhi bujimi. Ka mos aipako gïn abhana bopoyimi ïgai.

⁷ Dai Gïr Nukadakami itïtïdai go Moises, —Mïïka nïida gï aaduñi mïï taana ix makïdï Ejiptuañdïrï bubaitu aapi. Kaxiata gïpiïrï gïn surhi ïgai ïïgi— itïtïdai.

⁸ —Otoma dagito ïgai gin ñoki ix dukatai tïjai aanï. Kaxi aagitu ïgai oro dai ïgaikïdï idui ïmo baka maara maaxkami ubixi dai xibi ka oigïda ñokai ïgai buidïrï. Dai ka daraxi daxdaragai bïïxi— itïtïdai. —Dai go Israelitas aagai sai gobai ïr Diuxi ix makïdï bubaitu Ejiptuañdïrï bïïxi— itïtïdai Gïr Nukadakami.

⁹ Dai Gïr Nukadakami apia aatagidimi go Moises daidi potïtïdai, —Gin tïgito nïidi aanï go Israelitas xi mai tïtïkaidaga ïgai.

¹⁰ Maiti gï agai xi gin sobhida ïrhiada aapi. Xibi an gia bhamuka aanï buidïrï go Israelitas— itïtïdai. —Bïï naato koda iñagai aanï bïïxkatai— itïtïdai. —Mosïkaxi aapi bimu dai bhodïrï gï piipixaraga gia muidutuldamu aanï dai gin aaduñi aagamu aanï ïgai— itïtïdai.

¹¹ Dïï gia go Moises apia dukai daañimi Diuxi Gïr Nukadakami go Israelitas bïïtarï daidi potïtïdai, —Cho gin Nukadakami— itïtïdai. —Ïïgi gï gubukadakïdï pïtai bubaitu aapi go Israelitas Ejiptuañdïrï dai xibi dukatai bhamuka ïrhidi aapi buidïrï— itïtïdai.

¹² —Xi kodagi aapi go Israelitas aidï gia go Ejipituana óídakami potïimu sai go maa bïïtarï bubaitu aapi go Israelitas, naato koda ïrhiditai tanai idi tubidakïrï. Gï daanïi aanï pïsai mai bhamukïda aapi Gin Nukadakami dai maiti koda gï maamara— itïtïdai Moises.

¹³ —Gï tïgitoñi gï ñoki ix makïdï ïki aagidi aapi gï soikïdami Abraam ïmadï Isaak dai go Israel. Aidïpïrï gï báí aapi sai ix xïïxi oidaga xixabugai po kakiduka as agai piipixaradï ïgai. Bïïxi gï gubukadakïdï namïatudai aapi gï ñoki ix makïdï aagidi aapi go Abraam ïmadï Isaak dai Israel. Aagidi aapi ïpï sai ix makïdï maa aapi oidagadï piipixaradï ïr tuidadï ka agai tomaxi tuigako. Dai idi Israelitas xibi ïr go piipixaradï ix makïdï agaitadai aapi ïïki. Kaxkïdï gï daanïi aanï pïxi oigïdagi dai mai kodagi ïgai— itïtïdai Moises Gïr Nukadakami.

¹⁴ Dai kaïkai gobai ka ïma dukai gï tïgito Gïr Nukadakami dai ka mai naato kodai go Israelitas xi dukai agaitadai ïgai.

¹⁵ Dai bhodïrï tïbai go Moises tubidakiañdïrï dai bhïkati go ojodai kaakaparakami bïï goka ix makïdï bïï gokapadïrï ojixtugai go sïïrhikami.

¹⁶ Diuxi ïgai dai bhai dui go ojodai ïgai dai ïïgi nobidikïdï oja go ojodai bïï gokapadïrï.

¹⁷ Dai go Josue ïmadï imïitadai go Moises dai kaï ïgai go odami xi mïï taana gïïgïrï iñakai xako gïn urhiñatadai. Daidi ikaiti Josue, —Ïmo kokodi ïrhiadan kaiti mïï taana— ikaiti.

¹⁸ —Cho— itïtïdai Moises. —Mai iñakigadï maa kaiti gobai ix makïdï bhai gïn ïrhiadagi kokodiïrï xudu gamaitiagi. Tomarhi maiti ïr suanïdami gobai ix makïdï kokodiïrï gamaitikïdan kaitadagi jaa. Ïma maaxi ïrhi aanï gobai— itïtïdai Moises.

¹⁹ Dai tïï Moises go baka maara ïmadï go bagimadami miadïrï aïkai xako gïn urhiñatadai go Israelitas. Dai bhamu ïgai dai surhi go ojodai kaakaparakïdï ami tubidaki uta dai taatapai.

²⁰ Dai taiyïrï daitu ïgai go baka maara dai gokiïrï busaitu ïpamï dai tuiyi dai sudaïrï gigiki ïgai tutadï dai iitu go Israelitas. Dai bhodïrï ïpamu bai Gïr Nukadakami go Moises sai tïsadïna ïpamu tubidakiamu.