Efesios 6 - Northern Tepehuan Bible

Pabora aagai ixdukatai gï agai xi óídakagi ix makïdï ïr ïmo kiiyïrï óídakami

¹ Aapimï aarhi ix makïdï ïr buaboitudadami, ïïgiadabïrai gïn dïïdï. Maamaradï aapimï Suxi Kristo Gïr Nukadakami, kaxkïdï ïr sïïrhi xi ïïgiada aapimï.

^2-3 Daiñi, Diuxi ñokidï ikaiti, Kïïga abïr xadutuada gïn dïïdï bai podukai kïïga gïn ïldagi gïn oidakaragai tanai oidigi daama mui umigi, ikaiti Diuxi ñokidï. Gobai ïr ïpïgadï ñoki ix makïdï gïr tïjai Diuxi ixtukïdï gïr aagidi ïgai sai gïr maaki agai ïmo bhai ïrhiaragai ix ïïgiadagi aatïmï.

⁴ Dai aapimï kïkïïrhi abïr mai bhakoitudada gïn maamara ïpï. Bhaiyoma abïr kïïga nunukada ïgai dai gïgïbitulda oigïdaitai aapimï. Dai abïr kïïga maakada ñoki bai podukai gïrhiagi ïgai ixdukatai ipïrhidi Suxi Kristo.

Pabora aagai ixdukatai óídakagi ix makïdï ïr pipioñi dai ix makïdï ïr ga amu ïpï

⁵ Aapimï pipioñi ix makïdï ïr sabïdixikami kïïga abïr ïïgiada gïn amu ix makïdï gasabïrhi. Bïïxi gïn ibhïdagakïdï abïr ïïgiada tudu ïpïan dukai ixdukai ïïgidi aapimï Suxi Kristo.

⁶ Kabami abïr gïn aaga gïn aaduindagïrï dai mai xu mos gïn nïiditai gïn amu. Aapimï ïr pipioñigadï Suxi Kristo tudu kaxkïdï abïr bïïxi gïn bhai ïrhiarakïdï ibuada ixdukatai ipïrhidi Diuxi.

⁷ Bhaiga abïr gïn ïrhiada tudu aatabuadatai, kïïgakïrï ïïgiditai aapimï Suxi Kristo Gïr Nukadakami dai mai xiu mos ïïgiditai ïmo kïïrhi gïn amu.

⁸ Kïïga maatï aatïmï saidi Suxi Kristo Gïr Nukadakami gïr aa namïidamu go kïïgadukami aaduindagai ix makïdï ibuadagi aatïmï. Ïgai gïr aa namïidamu bïïxkatai xi ïr sabïdixikami pipioñikagi aatïmï, xi maiti ïr sabïdixikami pipioñikagi aatïmï ïpï.

⁹ Dai aapimï ix makïdï ïr ga amu ïpï, kïï sïïrhi dukai abïr ibuada gïn pipioñi bïïtarï. Maiti abïr gubudakïdï aaduintulda gïn pipioñiga aagiditai sai gïgïbitulda antaada aapimï. Tïgitobïrai aapimï aidï saidi aapimï ïmadï gïn pipioñiga bia ïpï ïmai gïn Amu ix makïdï tïbagiana daja dai ïgai mos ïmadugan dukai nïidi bïïxi óídakami.

Diuxi gïr maakai aaduinkaru kokodi bïïtarï go diabora bui

¹⁰ Mosïkaxi ïpï ïmo aatagi gïn aagidamu aanï xibi idi ojiïrï. Gïn aagida in ïrhidi xi bhïna aapimï gubukarhigai bïïnakai Suxi Kristo. Ïgai gia sïïrhikïdï gubuka.

¹¹ Gïn aadabïrai tudu bïïxi go aaduinkaru ix makïdï gïr maakai Diuxi kokodi bïïtarï. Podukai bhaigakamu aapimï xi bui gukibagi go diabora xudu gaagadagi ïgai xi gïn buirumadagi.

¹² Daiñi, gïr buidïrï bïïtïkami maiti ïr odami. Aatïmï kokodai jaa ix makïdï ïr diabora tïtïañikarudï soimaaxi iibhïdagami dai ix makïdï mai nïidi aatïmï. Ïgai ïr gupudagai bipiakami dai tïtïanïdami tami oidigi daama dai maigobai tïbagiana ïpï. Gupuka ïgai dai tïanïi ïgai tanai oidigi daama óídakami. Kaxkïdï tukamugan dukai kaatï oidigi xibi gatïanïitai ïgai.

¹³ Kaxkïdï abïr gïn aada bïïxi go aaduinkaru ix makïdï gïr maa Diuxi kokodi bïïtarï xi ïgaikïdï bui gukibana aapimï gïr buidïrï kaatïkami xudu soimaaxi daibuñagi. Podukai xudu kugaidagi go kokodi aapimï mos apia kia gukakamu.

¹⁴ Gukabïrai tudu dai gïn abhana bhïka ixtumaxi ïr buaboi dai gïn aada gobai ïmo gïn gibura dukai. Tïgitobïrai ïpï sai kïï buañixi aapimï Diuxi buitapi. Xudu gïn tïgitoagi sai kïï buañixi aapimï gobai ïr ïmo taagiana nagiakarui dukai gïn bïïtarï ixtukïdï mai bapakïi ujuyi.

¹⁵ Dai go ibhïxtaragai ix makïdï gïr maakai go bhai ïrhiaragai aatagi ïr sususakai dukai gïn bïïtarï. Kïïga bhai gïn dukamu aapimï kokodi bïïtarï gïn aadakatai gobai.

¹⁶ Kïïga buaboitudaitai sobhidamu aapimï bïïxi go tai ujuyi ix makïdï surhigai go diabora tudu.

¹⁷ Tïgito abïr ajiopada ïpï sai ka kïïgakïrï bubuaka aapimï. Gobai ïr gïn kaskoga gï dukamika agai gïn moo bïïtarï. Daidi abïr bhïiyi Diuxi ñokidï ïpï ix makïdï ïr gïn maaxtaiga gï dukami.

¹⁸ Bïïxi aïkatai ix makïdï ibuadagi aapimï abïr aatagada Diuxi ïmadï, Diuxi Ibhïadï gubukarhigadïkïdï. Bïïxkïrï abïr bhai gïn duka dai daanïda Diuxi bïïxi buaboitudadami bïïtarï ix makïdï aipako óídaga.

¹⁹ Dai aanï gin bïïtarï abïr daanïda ïpï xi kïïga maatïtai aagada aanï Diuxi tïgibudadï ix makïdï ïxtokikana ïkioma. Bai mai duadimudakïdï aagada aanï sai Diuxi podukai gï tïgito xi go bhai ïrhiaragai aatagi ïr bïïtarïkana go ix makïdï maiti ïr judidiu ïpï.

²⁰ Gin aaduñi, kïïga burhidi aanï xibi kadenakïdï mos aagaitai Diuxi ñokidï. Kaxkïdï abïr daanïda gin bïïtarï sai mai duadimudagaikïdï aagada aanï Diuxi ñokidï. Gï agai sai mai duadimudagaikïdï ñokada aanï tudu.

Pabora otoxi ïmo biatuldaragai go buaboitudadami Efesoïrï óídakami

^21-22 Gïn otosdamu aanï ïmoko gïr sukurhi Diuxiïrï ix makïdï Tikiko tïgidu. Ïgai kïïga gin soikïiña Suxi Kristo aaduindadïrï. Ïgai gïn aagidamu ix maaxi daraja aatïmï dai podukai bhai gïn ïrhiatudamu ïgai mïï dibiakai.

²³ Xibi gin susukurhi Diuxiïrï, ipïrhidi aanï xi kïïga buaboitudada aapimï bai kïïga gïn urabakan taadakana aapimï aipakoga. Sai Diuxi Gïr Oga ïmadï Suxi Kristo Gïr Nukadakami gïn soiñana bai kïïgakïrï gïn oigïadagi aapimï aipakoga.

²⁴ Sai Diuxi gïn tïtïgidana xïï kïï tuiga ïgai aapimï gïn bïïtarï. Aapimï tudu ix makïdï kïïga oigïdai Suxi Kristo Gïr Nukadakami dai apia oigïada agai bïïxkïrï bïïtarï. Mosïkaxi.