Efesios 5 - Northern Tepehuan Bible

Buaboitudadami gï agai xi ïpïamaaxi tutiakagi Diuxi

¹ Aapimï ïr maamaradï Diuxi dai kïïgakïrï gïn oigïdai ïgai. Kaxkïdï abïr ïpïan dukai ibuada Diuxi.

² Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

³ Dai aapimï ïr Diuxi ïko bubaidadï. Kaxkïdï abïr mai abhana boopoda xorai maiti ïr gï kuna xi ïpï gï oñiga. Tomarhi maiti gï agai xi galnaxi buada aapimï toma lachi tomarhi xi koimudadï tutiakagi. Dai tomarhi maiti gï agai xi oidakagi ixtukïdï jaa pokaitadagi sai aapimï soimaaxi ibuayi. Aapimï ïr Diuxi ïko bubaidadï. ¡Gï agai xi kïï sïïrhi óídakagi aapimï tudu!

⁴ Kaxkïdï maiti gï agai xi galnaxi ñokada aapimï tomarhi xi aagadagi buirudagai maaxi. Tomarhi tïtïïbïitai maiti gï agai xi aagada aapimï ïmo galnaaxi ñoki. Bhaiyoma gï agai xi aagadagi aapimï xïï bhai gïn ïrhidi Diuxikïdï.

⁵ Ïïmo óídakami ïmadï boona jaa ix makïdï maiti ïr kunadï tomarhi oñigadï dai ïgamutïrïga ïgai ïpï. Ix makïdï pomaaxi ibuayi bamioma namïga ïrhidi ixtumaxi biaka ïrhiada ïgai dai Diuxi gia mai namïga ïrhidi ïgai. Ix makïdï pomaaxi ibuayi xadïrï gïn aïna xi gïn tïanïdagi Diuxi dai Suxi Kristo. ¡Mai ïmadï darakamu ïgai tomarhi ïmo imidagai di! Gobai kïïga maatiga maaxi.

⁶ Maiti abïr gïn dagito tudu xi gïn buirumadagi jaa potïkai ïgai sai maiti ïr soimaaxi gobai ix makïdï gïn aagidi aanï xibiki. Daiñi, Diuxi gïgïbitulda agai bïïxi ix makïdï pomaaxi buayi.

⁷ Kaxkïdï abïr mai urapïkïda ix makïdï soimaaxi buayi podukai.

⁸ Ïkioma aapimï mos ïr ïï tukamudagaikana dïï xibi gia ïr kudagi aapimï buaboidakai Gïr Nukadakami. Kaxkïdï abïr bhai maaxkami dukai óídaka dai kïïga maaxituda xi gia ïr kudagiïrï óídakami aapimï xibi.

⁹ Abhai kudagiañdïrï daibïi mosïkaxi ix makïdï ïr kïïgadukïdï dai ix makïdï ïr sïïrhi dai ix makïdï ïr buaboi.

¹⁰ Mamaatïrdabïrai aidï ix tumaxi bhai ïrhiatudai Diuxi.

¹¹ Maiti abïr urapïkïda ix makïdï soimaaxi ibuayi. Ïgai ibuayi ixtumaxi maiti ïr soiñi dai aapimï maiti gï agai xi pomaaxi ibuadagi. Bhaiyoma abïr maakada ïgai ñoki dai kïï maaxiko biada ix makïdï ïgai buayi.

¹² Xaïraraga tudu xi aagadagi gobai ixtumaxi odami ïxtokai ibuayi.

¹³ Dïï gia xako ajïi kudagi kïïga maaxi kaatï bïïxi aïkatai xi podukai kïïga gï maatï ix tumaxi ïgai.

¹⁴ Kaxkïdï odami ikaitiña, —Nïñiñi aapi kosokami Daidi bañigi koidadï saagidañdïrï ka duakakai Baidi Suxi Kristo gï kudaidana— ikaitiña odami.

Pabora aagai go oidakaragai Diuxi Ibhïadï gubukarhigadïkïdï

¹⁵ Kaxkïdï abïr kïïga gïn tïgito nïida mïx dukatai óídaga. Maiti abïr ïpïan dukai óídaka pupuirugami ix makïdï mai maatï tomarhi ïmo ixtumaxi tudu. Bhaiyoma abïr óídaka kïïga sïïrhiñikami biakatai gïn tïgibudaga.

¹⁶ Kabami abïr gïn aga ibuadatai ixtumaxi ïr kïïga. Arhiïxi ïr soimaaxi buadami xibi óídakami kaxkïdï.

¹⁷ Maiti abïr bupuiruaka aidï daidi abïr gïn aajagïda dai maatiagi ix tumaxi ipïrhidi Diuxi xi buadagi aapimï.

¹⁸ Maiti abïr nabaakorïda. Gobai mos xia buayi odami. Bhaiyoma abïr gïn dagito xi gïn tïanïdagi Diuxi Ibhïadï.

¹⁹ Dai xudu gïn aatagiadagi aapimï abïr aagada ix kaiti go Salmos nïidadï ïmadï jaa nïidadï Diuxi ïpï. Bïïxi gïn ibhïdagakïdï abïr ganïyi Diuxi bïïtarï oigïda ñokaitai ïgai bïïtarï.

²⁰ Bïïxkïrï dai bïïxi aïkatïrï abïr aagida Diuxi gïr Oga xïï bhai gïn ïrhidi aapimï ïgaikïdï. Daidi abïr aagada ïpï sai Suxi Kristo ïgai dai bhai dui gïn bïïtarï xi kaxkïdï aatagïi aapimï Diuxi ïmadï.

Go buaboitudadami gï agai xi gïn xadutuadagi aipakoga

²¹ Aapimï buaboitudadami kïïga abïr bhai aagada aapimï ix gïn ïïgiadagi aapimï aipakoga. Kïïga xadutuadamu aapimï Suxi Kristo pobuadatai.

²² Aapimï oki abïr ïïgiada gïn kukuna maatïkatai sai podukai ïïgidimi aapimï Gïr Nukadakami.

²³ Daiñi, gï kuna ïr gï moo dukai, ïpïan dukami xi Suxi Kristo ïr modï bïïxi go buaboitudadami. Suxi Kristo ïgai dai kïïgakïrï gïr bubaitu, aatïmï ix makïdï ïr tukugadï ïgai.

²⁴ Ix dukai buaboitudadami ïïgidi Suxi Kristo, podukai ïpï oki gï agai xi ïïgiadagi kukunadï bïïxi aïkatïrï.

²⁵ Dai aapimï kïkïïrhi abïr oigïada gïn oñiga ïpïan dukai xi Suxi Kristo gïr oigïdai aatïmï ix makïdï ïr buaboitudadami. Ïïgi gï dagito ïgai xi gï muatudagi gïr bïïtarï gïr oigïdaitai tudu.

²⁶ Podui Suxi Kristo kïïga gïr buana ïrhiditai. Gïr buanai ïgai sudagikïdï dai ñokidïkïdï ïpï.

²⁷ Suxi Kristo buanai go buaboitudadami xi podukai kïïga xigiamaaxkagi aatïmï xïxkadï buitapi gïr baan tutusagi ïgai. Bai kïïga xigiamaaxkagi aatïmï aidï mai biakatai toma lachi tukuragai xi podukai mai biakagi aatïmï toma lachi soimaaxi gïr abhana.

²⁸ Podukai aapimï kïkïïrhi abïr oigïada gïn oñiga ïpï. Oigïadabïrai gïn oñiga ïpïan ïxi xïïxi oigïdai aapimï ïïgi gïn tukuga. Daiñi, xïxkadï ïmo kïïrhi oigïadagi oñigadï mos ïïgi gï oigïdaiña pobuadatai.

²⁹ ¡Xadïrï kïïdaiña ïmoko ïïgi tukugadï di! ¡Cho! Daiñi, bhaiyoma bhibhidiña aatïmï gïr tukuga dai kïïga nunukadai. Podukai tudu Suxi Kristo nunukadai ix makïdï ïr buaboitudadami. Ïïgi tukugadï dukai nunukadai ïgai.

³⁰ Aatïmï tudu ïr tukugadï Suxi Kristo.

³¹ Kaxkïdï Diuxi ñokidïrï ikaiti sai, Kïkïirhi daadagitoi dïïdï dai ïmadï bipiïyi oki dai aidï abhiadïrï ïmo odami dukamikana ïgai, ikaiti Diuxi ñokidï.

³² Go ñoki gobai ïr ïmo maaxidaragai ix makïdï Diuxi ïxtokikami biakana ïïki abhiadïrï. Go ñoki gobai aagai Suxi Kristo ïmadï aatïmï buaboitudadami.

³³ Dïï go ñoki mai xu mosïkaxi aagadankaiti Suxi Kristo ïmadï aatïmï buaboitudadami. Aagadankaiti gobai aapimï kïkïïrhi ïpï dai gïr maatïturhi gobai sai gï agai xi oigïada aapimï gïn oñiga ïpïan dukai xi gïn oigïdai ïïgi aapimï. Dai podukai aapimï oki ïpï gï agai xi xadutuadagi gïn kukuna ïpï.