Efesios 4 - Northern Tepehuan Bible

Ïmo aadunumï Suxi Kristo buaboitudadamigadï

¹ Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

² Maiti abïr gïgïrdukïdï gïn ïrhiada ïïgi aapimï toma lachi dai kïïga abïr tutiaka jaa bïïtarï. Gupurtudabїrai gïn iibhïdaga daidi abïr mai ojodada go gaa buaboitudadami. Bhaiyoma abïr gïn oigïada aipakoga tomax dukai.

³ Bïïxi gïn gubukarhigakïdï abïr gaaga ixdukatai mos ïmo tïgibudagai biaka aapimï daidi ïmo aadunumï dukai abïr óídaka. Diuxi Ibhïadï ïgai dai gïn soikïi tudu xi kïï xioma óídakagi aapimï ïmo aadunumï dukai.

⁴ Ïmo aadunumï aatïmï tudu bïïxkatai ix makïdï bia Diuxi Ibhïadï dai ïgai mos arhi ïmaduga. Dai ïmaduga ïpï go gïï bhai ïrhiaragai ix makïdï nïnïrakatai ajiopai aatïmï bïïxkatai.

⁵ Ïmaduga Gïr Nukadakami dai ïmaduga gïr buaboidaraga dai ïmaduga gïr bakuanaraga ïpï.

⁶ Ïmaduga Diuxi gïr Oga ix makïdï ïr tïanïdamigadï bïïxi óídakami dai gïr ïrana daja dai aatïmïkïdï gï maaxitudai.

⁷ Dïï gia tomaxi ïr ïmo aadunumï aatïmï bïïxkïrï Suxi Kristo ïjïkobai gïr maa gubukarhigai xi ibuadagi aatïmï ïmo aaduindagai. Ïmo oidaragai dukai gïr maa ïgai gubukarhigai mos ïï kïï tuigakatai ïgai gïr bïïtarï.

⁸ Podukai tudu kaiti Diuxi ñokidïrï. Ami ikaiti, Maigo daana tïsai ïgai dai baidakai mui maamaixapikïdï. Dai bhodïrï takobi ïgai oidaragai aaduñdï, ikaiti go ojai.

⁹ Go ojai pokaiti sai tïsai ïgai maigo daana kaxkïdï gï maatï sai Suxi Kristo ka tïbaitadai xako ukami dumarhioma kaatï oidigi.

¹⁰ Dai gokiïrï xi tïbai Suxi Kristo xako ukami dumarhioma kaatï oidigi saidi gokiïrï tïsai ïgai mïï daana tïbagi daama ïpamu saidi podukai tïanïna ïgai bïïxi aïkatai.

¹¹ Suxi Kristo ïgai dai maa oidaragai aatïmï buaboitudadami bïïtarï tudu. Ïïmoko maa ïgai gubukarhigai saidi ïr Suxi ojotosadïkana. Dai jaa maa ïgai saidi ïr aagadamikana Diuxi ñokidï dai jaa saidi ïr aipako aituldiadamikana go bhai ïrhiaragai aatagi dai jaa saidi ïr nukadakamikana go gaa buaboitudadami dai maatïtuldiadami Diuxi ñokidï ïpï.

¹² Podukai Suxi Kristo darai ïïmoko saidi ïr soikïdamikana go gaa buaboitudadami. Ïgai bia aaduindagai xi bhai duiñturhiadagi go gaa buaboitudadami gïn aaduindagïrï bïïtarï ix makïdï gïn biturhi Suxi Kristo. Saidi aipakoga gïn abïnakidiña ïgai ïmo gïn aadunumï dukai.

¹³ Suxi Kristo darai odami podukai gïr saagida saidi gïr soiñana xi aatïmï gïr abïnakiadagi aipakoga. Dai apia gïr abïnakiadamu aatïmï aipakoga aidï asta xïïxkadï kïïga ïmo tïgibudagai bipiatu aatïmï. Biakamu aatïmï ïmo tïgibudagai aidï oiditai gïr buaboidaraga ix makïdï ïmaduga dai kïïga ïïmadatai aatïmï Diuxi Maradï ïpï. Podukai gïïrhimu aatïmï asta xïïxkadï kïïga odan tutiakagi aatïmï ïpïan dukai Suxi Kristo.

¹⁴ Podukai gïr soikïitai go mui soikïdadami ix makïdï Diuxi darai gïr bïïtarï ka mai aarhi dukaikamu aatïmï. Go aarhi gia otoma bhïiyiña ïmai tïgibudagai kaïkatai aatagidï jaa. Otoma buaboitudaiña ïgai yaatabogami tudu ix makïdï bupuirumadai odami. Dïï aatïmï gia mai pomaaxkamu aidï.

¹⁵ Aatïmï buaboitudadami oijadamu ixtumaxi ïr buaboi bhaiyoma, gïr oigïdaitai aipakoga. Podukai bïïx tasai bamioma gïïrhidamu aatïmï dai bïïxi aïkatai bamioma ïpïan tuigakamu aatïmï Suxi Kristo. Aatïmï buaboitudadami ïr tukugadï dukai Suxi Kristo dai ïgai ïr gïr moo.

¹⁶ Suxi Kristo gïr tïanïi gïr moo dukai dai aatïmï ïr tutuidadï tukugadï dukaikatai ïgai. Gïr ïgai maakai ixtumaxi tïgito aatïmï bai kïï gïrhiagi aatïmï ïmo tukugai dukai kïïga gïr arasakatai dai gïr soikïitai aipakoga. Bïïxkatai aatïmï ïr tutuidadï dukai Suxi Kristo tukugadï tudu. Dai ibuayi aatïmï gïr aaduindaga ix makïdï ïjïkobai gïr ajïga. Podukai kïïga gïrai aatïmï ïmo tukugai dukai gïr oigïdaitai aipakoga.

Aatïmï ix makïdï buaboitudai bia ïmo utudui oidakaragai xibi

¹⁷ Aanï Pabora ñokai xibi gubukadagaikïdï ix makïdï gin maa Gïr Nukadakami. Dai aanï aagai sai mai ïpïan dukai óídakagi aapimï go ix makïdï mai buaboitudai Diuxi.

¹⁸ Ïgai tïgibudadï maiti ïr soiñi, tukamuga maaxi bhaiyoma. Ïïgi kapatudai ïgai gïn momo dai gïn iibhïdaga Diuxi bui. Kaxkïdï mïkaxi ajiopai ïgai go oidakaragaiñdïrï ix makïdï Diuxi urhiñdimi odami.

¹⁹ Ka mai xaïrai ïgai soimaaxi buadatai dai bhaiyoma mos bamioma adaimïi bïïxi aïkatai buirudagai ix makïdï oidaga. Go ïï tukuragai maaxi ibuayi ïgai dai tïgito ajiopai ïïgi ixtuma duña ïrhidi dai ixtuma biaka ïrhidi ïgai.

²⁰ Dïï aapimï gia ïmamaaxi bui tïgibudagai aidïxi máí aapimï Suxi Kristo.

²¹ Kïïga kaïkana aapimï Suxi Kristo aatagidï tudu. Kïïga máí aapimï ix tumaxi ïr buaboi aidïxi máí aapimï Suxi.

²² Kaxkïdï abïr maigobai dasa go ïkidadï gïn tïgibudaga ïmadï ïkidadï gïn oidakaraga. Gobai mos ïr ïï soimaaxkamikana dai gïn bupuirumadaiña gobai gïn maakaitai tïgibudagai xi iduña ïrhiadagi aapimï ix makïdï maiti ïr soiñi.

²³ Kaxkïdï gï agai sai utudutuldagi aapimï gïn tïgibudaga xibi.

²⁴ Daiñi, Diuxi kaxi gïn utuduturhi. Odami utudui aapimï xibi. Kaxkïdï abïr dagito gïn ïkidadï ibhïdaga tïgibudadï dai gïn utudui ibhïdaga tïgibudadï abïr bhïiyi bhaiyoma. Utudui odami aapimï xibi tudu, ix makïdï Diuxi ïïgi ïpïamaaxkami idui. Gïn dui ïgai saidi ïr ïko darasadïkana aapimï ïgai, bai kïï sïïrhi óídakagi aapimï ïïgiditai ix makïdï ïr buaboi.

²⁵ Utudui aapimï xibi tudu. Kaxkïdï abïr mai gïn yaatagïda aipakoga. Abïr aagada ix tumaxi ïr buaboi bhaiyoma. ¡Ïmo aadunumï aatïmï di!

²⁶ Daidi abïr mai soimaaxi ibuada dagitokai xi gïn maitiagi bhaamudagai. Maiti abïr gïn dagito xi apia bhakoikagi aapimï ka dupikai tasai.

²⁷ Xïduñada maakiagi aapimï go diabora ixdukatai soi gïn buadagi.

²⁸ Ix makïdï gaïxidiña gï agai xi dagitoagi gobai tudu. Dai gï agai bhaiyoma xi gaataduñagi ïgai daidi iduñagi bhai maaxkami aaduindagai. Podukai biakamu ïgai ixtukïdï soikïdagi soititigami.

²⁹ Maiti abïr xigalnaxi ñoki aagada ïpï toma lachi. Gï agai xi aagada aapimï mosïkaxi ix makïdï ïr soiñi jaa bïïtarï xi kïïga abïnakiadan taadakagi ïgai kaïkatai.

³⁰ Maiti abïr soi ïrhiatuldada Diuxi Ibhïadï gïn oidakaragakïdï tudu. Diuxi Ibhïadï ïr Diuxi tïpakarudï dukai ix makïdï gïn daxi Diuxi bai gï maatïkana kïïga xi ayimu ixtuigako buiya ragai bïïxi ixtumaxi gïr aagidi Diuxi sai gïr maaki agai kïïgakïrï bubuakïkai aatïmï. Kaxkïdï abïr mai soi ïrhiatulda ïgai.

³¹ Gï agai sai ka mai bhakoitïrakagi aapimï tomarhi xi gakokodadagi. Abïr mai soimaaxi ñokada jaa bui daidi abïr mai yaatagïda ïpï dai mai kïïdada jaa ïpï.

³² Daiñi, Suxi Kristo bhai dui gïr bïïtarï kaxkïdï Diuxi soi gï ïrhidi gïr nïiditai dai gïr oigïrhi. Xibi aapimï abïr kïï tutiaka jaa bïïtarï ïpï daidi abïr soi gïn ïrhiada nïiditai. Daidi abïr oigïrhiada ïpï ïpïan dukai xi Diuxi gïr oigïrhi.